ਸੁਲਤਾਨਪੁਰ ਲੋਧੀ, (ਧੀਰ)- ਪਵਿੱਤਰ ਨਗਰੀ ਸ਼ਹਿਰ 'ਚ ਟ੍ਰੈਫਿਕ ਦੀ ਸਮੱਸਿਆ ਜੀਅ ਦਾ ਜੰਜਾਲ ਬਣ ਚੁੱਕੀ ਹੈ। ਪ੍ਰਸ਼ਾਸਨ ਵਲੋਂ ਕੋਸ਼ਿਸ਼ਾਂ ਕਰਨ ਦੇ ਬਾਵਜੂਦ ਪੰਚਾਂ ਦਾ ਕਿਹਾ ਸਿਰ ਮੱਥੇ ਪਰਨਾਲਾ ਉਥੇ ਦਾ ਉਥੇ ਬਿਲਕੁਲ ਸਟੀਕ ਬੈਠਦਾ ਹੈ। ਸ਼ਹਿਰ ਦੇ ਅੰਦਰੂਨੀ ਹਿੱਸਿਆਂ 'ਚ ਦੁਕਾਨਾਂ ਦੇ ਅੱਗੇ ਵਧੇ ਹੋਏ ਥੜੇ ਤੁੜਵਾਉਣ ਦੇ ਬਾਵਜੂਦ ਟ੍ਰੈਫਿਕ ਦੀ ਸਮੱਸਿਆ ਸ਼ਹਿਰ 'ਚ ਦਿਨ-ਬ-ਦਿਨ ਵਧਦੀ ਜਾ ਰਹੀ ਹੈ, ਜਿਸ ਦਾ ਮੁੱਖ ਕਾਰਨ ਸ਼ਹਿਰ ਦੇ ਅੰਦਰੂਨੀ ਹਿੱਸਿਆਂ 'ਚ ਸਥਿਤ ਬੈਂਕ, ਮੁੱਖ ਚੌਕਾਂ 'ਚ ਖੜ੍ਹੀਆਂ ਬੇਤਰਤੀਬ ਰੇਹੜੀਆਂ, ਚੌਕਾਂ 'ਚ ਟ੍ਰੈਫਿਕ ਕਰਮਚਾਰੀਆਂ ਦਾ ਨਾ ਹੋਣਾ, ਸ਼ਹਿਰ ਦੇ ਅੰਦਰੂਨੀ ਹਿੱਸੇ 'ਚ ਕੋਈ ਵੀ ਪਾਰਕਿੰਗ ਵਿਵਸਥਾ ਨਾ ਹੋਣਾ ਹੈ।
ਟ੍ਰੈਫਿਕ ਦੀ ਸਮੱਸਿਆ ਨਾਲ ਨਿਪਟਣ ਲਈ ਨਹੀਂ ਹੈ ਲੋੜੀਂਦੀ ਟ੍ਰੈਫਿਕ ਪੁਲਸ : ਪਵਿੱਤਰ ਨਗਰੀ 'ਚ ਟ੍ਰੈਫਿਕ ਦੀ ਸਮੱਸਿਆ ਦਾ ਮੁੱਖ ਕਾਰਨ ਲੋੜ ਅਨੁਸਾਰ ਟ੍ਰੈਫਿਕ ਪੁਲਸ ਕਰਮਚਾਰੀਆਂ ਦਾ ਨਾ ਹੋਣਾ ਹੈ। 15 ਤੋਂ 20 ਹਜ਼ਾਰ ਆਬਾਦੀ ਵਾਲੇ ਇਸ ਸ਼ਹਿਰ 'ਚ ਰੋਜ਼ਾਨਾ ਪਿੰਡਾਂ ਤੋਂ ਆਉਣ ਜਾਣ ਵਾਲੇ ਲੋਕਾਂ ਦੀ ਗਿਣਤੀ ਵਧਦੀ ਦਾ ਰਹੀ ਹੈ ਪ੍ਰੰਤੂ ਆਬਾਦੀ ਦੇ ਲਿਹਾਜ ਨਾਲ ਸਿਰਫ 3 ਟ੍ਰੈਫਿਕ ਪੁਲਸ ਕਰਮਚਾਰੀ ਹੀ ਤਾਇਨਾਤ ਹਨ, ਜੋ ਤਲਵੰਡੀ ਪੁਲ ਚੌਕ 'ਤੇ ਹੀ ਸਵੇਰੇ ਤੋਂ ਲੈ ਕੇ ਸ਼ਾਮ ਤਕ ਹੁੰਦੇ ਹਨ, ਸ਼ਾਮ ਨੂੰ ਡਿਊਟੀ ਉਪਰੰਤ ਨਾ ਤਾਂ ਤਲਵੰਡੀ ਚੌਕ ਤੇ ਨਾ ਹੀ ਸ਼ਹਿਰ ਦੇ ਹੋਰ ਕਿਸੇ ਪ੍ਰਮੁੱਖ ਚੌਕ 'ਚ ਟ੍ਰੈਫਿਕ ਪੁਲਸ ਕਰਮਚਾਰੀ ਵਿਖਾਈ ਦਿੰਦਾ ਹੈ।
ਬੈਂਕ ਕੋਲ ਟ੍ਰੈਫਿਕ ਲਈ ਆਪਣੀ ਜਗ੍ਹਾ ਨਾ ਹੋਣਾ ਵੀ ਟ੍ਰੈਫਿਕ ਸਮੱਸਿਆ ਦਾ ਇਕ ਕਾਰਨ : ਸ਼ਹਿਰ 'ਚ ਫੈਲੀ ਟ੍ਰੈਫਿਕ ਦੀ ਅਵਿਵਸਥਾ ਲਈ ਅੰਦਰੂਨੀ ਖੇਤਰ 'ਚ ਸਥਿਤ ਪ੍ਰਮੁੱਖ ਬੈਂਕਾਂ ਦਾ ਵੀ ਹੋਣਾ ਹੈ। ਪੰਜਾਬ ਨੈਸ਼ਨਲ ਬੈਂਕ, ਕੋਆਪਰੇਟਿਵ ਬੈਂਕ, ਸਟੇਟ ਬੈਂਕ ਆਫ ਇੰਡੀਆ, ਕੇਨਰਾ ਬੈਂਕ, ਪੰਜਾਬ ਗ੍ਰਾਮੀਣ ਬੈਂਕ ਆਦਿ ਕਿਸੇ ਵੀ ਬੈਂਕ ਦੇ ਕੋਲ ਆਪਣੀ ਪਾਰਕਿੰਗ ਦੀ ਜਗ੍ਹਾ ਨਾ ਹੋਣਾ ਹੈ। ਖਪਤਕਾਰ ਮਜਬੂਰੀਵਸ ਆਪਣਾ ਵਾਹਨ ਇਨ੍ਹਾਂ ਦੇ ਬਾਹਰ ਖੜ੍ਹਾ ਕਰ ਦਿੰਦੇ ਹਨ, ਜਿਸ ਨਾਲ ਆਵਾਜਾਈ 'ਚ ਵਿਘਨ ਪੈਣ ਨਾਲ ਟ੍ਰੈਫਿਕ ਦੀ ਸਮੱਸਿਆ ਪੈਦਾ ਹੁੰਦੀ ਹੈ। ਬੈਂਕਾਂ ਦੇ ਬਾਹਰ ਪੈਦਾ ਹੋਈ ਟ੍ਰੈਫਿਕ ਸਮੱਸਿਆ ਨੂੰ ਕੰਟਰੋਲ ਕਰਨ ਤੇ ਵਹੀਕਲਾਂ ਨੂੰ ਸਹੀ ਢੰਗ ਨਾਲ ਖੜ੍ਹਾ ਕਰਵਾਉਣ ਲਈ ਕਿਸੇ ਵੀ ਬੈਂਕ ਕੋਲ ਸਕਿਊਰਿਟੀ ਗਾਰਡ ਨਹੀਂ ਹੈ।
ਬੇਤਰਤੀਬ ਢੰਗ ਨਾਲ ਖੜ੍ਹੀਆਂ ਰੇਹੜੀਆਂ ਵੀ ਟ੍ਰੈਫਿਕ ਲਈ ਜ਼ਿੰਮੇਵਾਰ
ਸ਼ਹਿਰ 'ਚ ਬਦ ਤੋਂ ਬਦਤਰ ਹੋਈ ਟ੍ਰੈਫਿਕ ਦੀ ਮੁੱਖ ਸਮੱਸਿਆ ਸ਼ਹਿਰ ਦੇ ਪ੍ਰਮੁੱਖ ਚੌਕਾਂ 'ਚ ਬੇਤਰਤੀਬ ਢੰਗ ਨਾਲ ਰੇਹੜੀਆਂ ਦਾ ਖੜ੍ਹਾ ਹੋਣਾ ਵੀ ਹੈ। ਸ਼ਹਿਰ 'ਚ ਸ਼ਾਮ ਵੇਲੇ ਤਾਂ ਪ੍ਰਮੁੱਖ ਆਰੀਆ ਸਮਾਜ ਚੌਕ 'ਚ ਵੱਡੀ ਗਿਣਤੀ 'ਚ ਲੱਗੀਆਂ ਸਬਜ਼ੀ ਦੀਆਂ ਰੇਹੜੀਆਂ ਟ੍ਰੈਫਿਕ ਨੂੰ ਜਾਮ ਕਰ ਦਿੰਦੀਆਂ ਹਨ ਤੇ ਹਾਲਤ ਅਜਿਹੀ ਹੋ ਜਾਂਦੀ ਹੈ ਕਿ ਵਾਹਨ ਸਵਾਰ ਦੇ ਕੋਲ ਵਾਹਨ ਦੇ ਨਾਲ ਨਿਕਲਣਾ ਤਾਂ ਦੂਰ ਪੈਦਲ ਜਾਣਾ ਵੀ ਮੁਸ਼ਕਿਲ ਹੋ ਜਾਂਦਾ ਹੈ।
ਸਕੂਲ ਲੱਗਣ ਅਤੇ ਛੁੱਟੀ ਸਮੇਂ ਵਧਦੀ ਹੈ ਟ੍ਰੈਫਿਕ : ਸ਼ਹਿਰ 'ਚ ਸਥਿਤ ਪ੍ਰਮੁੱਖ ਸਕੂਲਾਂ ਦੇ ਸ਼ੁਰੂ ਤੇ ਬੰਦ ਹੋਣ ਸਮੇਂ ਵਿਦਿਆਰਥੀਆਂ ਵਲੋਂ ਆਪਣੇ ਵਹੀਕਲਾਂ, ਸਕੂਲ ਵੈਨ ਜਾਂ ਬੱਸਾਂ 'ਚ ਆਉਣ ਜਾਣ ਸਮੇਂ ਕੋਈ ਵੀ ਟ੍ਰੈਫਿਕ ਦਾ ਰੂਲ ਨਾ ਹੋਣ ਕਾਰਨ ਤੰਗ ਬਾਜ਼ਾਰ 'ਚ ਵਾਹਨ ਇਕ ਦੂਸਰੇ ਨਾਲ ਭਿੜ ਜਾਂਦੇ ਹਨ ਤੇ ਕਈ ਵਾਰ ਦੁਰਘਟਨਾ ਦਾ ਵੀ ਕਾਰਨ ਬਣਦੇ ਹਨ।
ਨਹੀਂ ਹੈ ਸ਼ਹਿਰ 'ਚ ਕੋਈ ਜਨਤਕ ਪਾਰਕਿੰਗ ਵਿਵਸਥਾ : ਟ੍ਰੈਫਿਕ ਦੀ ਸਮੱਸਿਆ ਨੂੰ ਕੰਟਰੋਲ ਕਰਨ ਲਈ ਸ਼ਹਿਰ 'ਚ ਕੋਈ ਵੀ ਜਨਤਕ ਪਾਰਕਿੰਗ ਦੀ ਵਿਵਸਥਾ ਨਹੀਂ ਹੈ। ਬੈਂਕਾਂ ਜਾਂ ਸ਼ਹਿਰ 'ਚ ਖੁੱਲ੍ਹੇ ਵੱਡੇ- ਵੱਡੇ ਸ਼ੋਅ ਰੂਮਾਂ 'ਚ ਗਾਹਕ ਵਲੋਂ ਆਪਣੇ ਨਾਲ ਲਿਆਂਦੀ ਕਾਰ ਜਾਂ ਹੋਰ ਵਾਹਨ ਖੜ੍ਹੇ ਕਰਨ ਕਾਰਨ ਟ੍ਰੈਫਿਕ ਗੜਬੜਾ ਜਾਂਦੀ ਹੈ ਜਿਸਨੂੰ ਕੰਟਰੋਲ ਕਰਨ ਜਾਂ ਸਹੀ ਢੰਗ ਨਾਲ ਵਾਹਨ ਲਗਾਉਣ ਦੀ ਕੋਈ ਵੀ ਵਿਵਸਥਾ ਨਹੀਂ ਹੈ।
ਸ਼ਹਿਰ ਤੇ ਬਾਹਰੀ ਖੇਤਰ 'ਚ ਹੋਏ ਮੁੜ ਕਬਜ਼ੇ : ਸ਼ਹਿਰ ਦੇ ਅੰਦਰੂਨੀ ਤੇ ਬਾਹਰ ਪ੍ਰਮੁੱਖ ਚੌਕਾਂ 'ਚ ਲੋਕਾਂ ਵਲੋਂ ਕੀਤੇ ਨਾਜਾਇਜ਼ ਕਬਜ਼ਿਆਂ ਨੂੰ ਬੀਤੇ ਮਹੀਨੇ ਮਾਣਯੋਗ ਲੋਕਾਂ ਅਦਾਲਤ ਦੀ ਪ੍ਰਮੁੱਖ ਜੱਜ ਮੈਡਮ ਮੰਜੂ ਰਾਣਾ ਵਲੋਂ ਕੀਤੀ ਸਖਤੀ ਤੇ ਪ੍ਰਸ਼ਾਸਨ ਤੇ ਨਗਰ ਕੌਂਸਲ ਨੇ ਕਾਰਵਾਈ ਕਰਕੇ ਨਾਜਾਇਜ਼ ਕਬਜ਼ੇ ਇਕ ਸਮੇਂ ਤਾਂ ਖਤਮ ਕਰ ਦਿੱਤੇ ਸਨ ਪ੍ਰੰਤੂ ਕੁਝ ਸਮੇਂ ਬਾਅਦ ਪ੍ਰਸ਼ਾਸਨ ਵਲੋਂ ਢਿੱਲ ਵਰਤਣ 'ਤੇ ਸ਼ਹਿਰ ਦੇ ਪ੍ਰਮੁੱਖ ਚੌਕਾਂ 'ਤੇ ਬਾਹਰੀ ਖੇਤਾਂ 'ਚ ਮੁੜ ਕਬਜ਼ੇ ਹੋ ਗਏ ਹਨ। ਜਿਨ੍ਹਾਂ ਵੱਲ ਪ੍ਰਸ਼ਾਸਨ ਅਵੇਸਲਾ ਹੋਇਆ ਬੈਠਾ ਹੈ।
ਟ੍ਰੈਫਿਕ ਪੁਲਸ ਦੀ ਹੈ ਘਾਟ : ਐੱਸ. ਐੱਚ. ਓ. ਸਰਬਜੀਤ ਸਿੰਘ
ਇਸ ਸਬੰਧੀ ਗੱਲਬਾਤ ਕਰਨ 'ਤੇ ਐੱਸ. ਐੱਚ. ਓ. ਸਰਬਜੀਤ ਸਿੰਘ ਦਾ ਕਹਿਣਾ ਹੈ ਕਿ ਸ਼ਹਿਰ 'ਚ ਟ੍ਰੈਫਿਕ ਵਿਵਸਥਾ ਨੂੰ ਕੰਟਰੋਲ ਨਾ ਕਰਨ ਦਾ ਮੁੱਖ ਕਾਰਨ ਟ੍ਰੈਫਿਕ ਪੁਲਸ ਦੀ ਘਾਟ ਵੀ ਹੈ। ਉਨ੍ਹਾਂ ਕਿਹਾ ਕਿ ਸਾਡੇ ਕੋਲ ਸਿਰਫ ਤਿੰਨ ਟ੍ਰੈਫਿਕ ਪੁਲਸ ਕਰਮਚਾਰੀ ਹਨ ਜਦਕਿ ਪ੍ਰਮੁੱਖ ਤਲਵੰਡੀ ਚੌਕ ਤੋਂ ਇਲਾਵਾ ਬੇਰ ਸਾਹਿਬ ਰੋਡ, ਆਰੀਆ ਸਮਾਜ ਚੌਕ, ਚੌਕ ਚੇਲਿਆਂ ਤੇ ਹੋਰ ਵੀ ਕਈ ਪ੍ਰਮੁੱਖ ਸਥਾਨਾਂ 'ਤੇ ਟ੍ਰੈਫਿਕ ਪੁਲਸ ਦੀ ਬੇਹੱਦ ਲੋੜ ਹੈ, ਜਿਸ ਸਬੰਧੀ ਲਿੱਖ ਕੇ ਦਿੱਤਾ ਹੋਇਆ ਹੈ।
ਬਿਆਸ ਦਰਿਆ ਮਾਮਲੇ 'ਚ ਵਣ ਜੀਵ ਵਿਭਾਗ ਪੁੱਜਾ ਅਦਾਲਤ
NEXT STORY