ਜਲੰਧਰ(ਰਵਿੰਦਰ ਸ਼ਰਮਾ)- ਇਕ ਸਮਾਂ ਸੀ, ਜਦੋਂ ਕੈਪਟਨ ਅਮਰਿੰਦਰ ਸਿੰਘ ਦੀ ਪੂਰੀ ਸ਼ਖਸੀਅਤ ਸੂਬੇ ਦੀ ਜਨਤਾ ਨੂੰ ਬੇਹੱਦ ਪਸੰਦ ਸੀ। ਕੈਪਟਨ ਦੇ ਦਰਸ਼ਨ ਕਰਕੇ ਹੀ ਜਨਤਾ ਨੂੰ ਸਾਰੀਆਂ ਖੁਸ਼ੀਆਂ ਮਿਲ ਜਾਂਦੀਆਂ ਸਨ। ਲੋਕ ਕੈਪਟਨ ਨੂੰ ਮਿਲ ਕੇ ਹੱਥ ਲਾਉਣ ਦੀਆਂ ਕੋਸ਼ਿਸ਼ਾਂ ਕਰਦੇ। ਕੈਪਟਨ ਦੇ ਜਲਸਿਆਂ ਵਿਚ ਤਾਂ ਭੀੜ ਉਮੜਦੀ ਹੀ ਸੀ, ਕੈਪਟਨ ਦੇ ਰੋਡ ਸ਼ੋਅ ਦਾ ਨਜ਼ਾਰਾ ਵੀ ਵੇਖਣ ਵਾਲਾ ਹੁੰਦਾ ਸੀ ਪਰ ਕੈਪਟਨ ਦੇ ਭਰੇ ਜਲਸੇ ਅੱਜ ਖਾਲੀ ਕੁਰਸੀਆਂ ਵਿਚ ਬਦਲ ਚੁੱਕੇ ਹਨ। ਇਹ ਸਭ ਕੁਝ ਰਾਜਨੀਤੀ ਦੇ ਬਦਲੇ ਸਰੂਪ ਤੇ ਜਨਤਾ ਨਾਲ ਕੀਤੀ ਵਾਅਦਾਖਿਲਾਫੀ ਕਾਰਨ ਹੋਇਆ ਹੈ। 2017 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਕੈਪਟਨ ਅਮਰਿੰਦਰ ਸਿੰਘ ਦੇ ਜਲਸਿਆਂ ਵਿਚ ਭਾਰੀ ਭੀੜ ਉਮੜਦੀ ਸੀ। ਜਨਤਾ ਦੇ ਨਾਲ-ਨਾਲ ਪਾਰਟੀ ਦੇ ਛੋਟੇ ਵਰਕਰ ਤੇ ਵੱਡੇ ਨੇਤਾ ਤੱਕ ਕੈਪਟਨ ਨੂੰ ਵੇਖਣ ਤੇ ਉਨ੍ਹਾਂ ਨੂੰ ਸੁਣਨ ਲਈ ਆਉਂਦੇ ਸਨ ਤੇ ਕੈਪਟਨ ਦੇ ਜਲਵੇ ਪੂਰੇ ਮੁਕਾਮ 'ਤੇ ਸਨ। ਕੈਪਟਨ ਜਦੋਂ ਆਪਣੇ ਭਾਸ਼ਣਾਂ ਵਿਚ ਸਾਬਕਾ ਉਪ ਮੁੱਖ ਮੰਤਰੀ ਸੁਖਬੀਰ ਬਾਦਲ ਨੂੰ ਬਲੂੰਗੜਾ ਕਹਿ ਕੇ ਬਲਾਉਂਦੇ ਸਨ ਤਾਂ ਜਨਤਾ ਖੂਬ ਤਾੜੀਆਂ ਮਾਰਦੀ ਸੀ। ਕਾਰਨ ਸੀ ਕਿ ਪਿਛਲੇ 10 ਸਾਲਾਂ ਤੱਕ ਸੂਬੇ ਵਿਚ ਰਹੀ ਅਕਾਲੀ-ਭਾਜਪਾ ਸਰਕਾਰ ਕੋਲੋਂ ਸੂਬੇ ਦੀ ਜਨਤਾ ਮੂੰਹ ਮੋੜ ਚੁੱਕੀ ਸੀ ਤੇ ਅਕਾਲੀ ਦਲ ਦੇ ਖਿਲਾਫ ਜਾਂ ਉਨ੍ਹਾਂ ਦੇ ਆਗੂਆਂ ਦੇ ਖਿਲਾਫ ਕੈਪਟਨ ਦੇ ਮੂੰਹ ਵਿਚੋਂ ਨਿਕਲੇ ਬੋਲ ਜਨਤਾ ਨੂੰ ਖੁਸ਼ ਕਰ ਦਿੰਦੇ। ਆਪਣੇ ਭਾਸ਼ਣਾਂ ਵਿਚ ਕੈਪਟਨ ਨੇ ਚੋਣਾਂ ਤੋਂ ਪਹਿਲਾਂ ਇਥੋਂ ਤੱਕ ਐਲਾਨ ਕਰ ਦਿੱਤਾ ਸੀ ਕਿ ਕਾਂਗਰਸ ਦੀ ਸਰਕਾਰ ਬਨਣ ਤੋਂ ਤੁਰੰਤ ਬਾਅਦ ਹੀ ਵੱਡੇ ਬਾਦਲ, ਸੁਖਬੀਰ ਬਾਦਲ ਤੇ ਬਿਕਰਮ ਮਜੀਠੀਆ ਨੂੰ ਜੇਲ ਵਿਚ ਡੱਕਿਆ ਜਾਵੇਗਾ। ਸਰਕਾਰ ਬਣਦਿਆਂ ਹੀ ਬਿਜਲੀ ਸਸਤੀ ਕਰ ਦਿੱਤੀ ਜਾਵੇਗੀ। ਸ਼ਹਿਰੀ ਜਨਤਾ 'ਤੇ ਲੱਗੇ ਪ੍ਰਾਪਰਟੀ ਟੈਕਸ ਨੂੰ ਖਤਮ ਕਰ ਦਿੱਤਾ ਜਾਵੇਗਾ। ਵਪਾਰੀਆਂ ਤੇ ਉਦਯੋਗਪਤੀਆਂ ਦੀਆਂ ਸਾਰੀਆਂ ਸਮੱਸਿਆਵਾਂ ਦਾ ਹੱਲ ਕੀਤਾ ਜਾਵੇਗਾ। ਸਰਕਾਰ ਬਣਦਿਆਂ ਹੀ ਨੌਜਵਾਨਾਂ ਨੂੰ ਰੋਜ਼ਗਾਰ ਦਿੱਤਾ ਜਾਵੇਗਾ। ਵਾਅਦਾ ਤਾਂ ਹਰ ਘਰ ਇਕ ਨੌਕਰੀ ਦੇਣ ਤੱਕ ਦਾ ਕੀਤਾ ਗਿਆ। ਸਰਕਾਰ ਬਣਦਿਆਂ ਹੀ ਪੈਨਸ਼ਨ 500 ਤੋਂ ਵਧਾ ਕੇ 2500 ਕਰ ਦਿੱਤੀ ਜਾਵੇਗੀ। ਸੂਬੇ ਦੀ ਜਨਤਾ ਨੂੰ ਕੈਪਟਨ ਤੇ ਕਾਂਗਰਸ ਦੇ ਇਹ ਵਾਅਦੇ ਬਹੁਤ ਪਸੰਦ ਆਏ ਤੇ ਸੂਬੇ ਦੀ ਜਨਤਾ ਨੇ ਅਕਾਲੀ ਤੇ ਭਾਜਪਾ ਨੂੰ ਤੀਜੇ ਨੰਬਰ 'ਤੇ ਧੱਕਦਿਆਂ ਭਾਰੀ ਬਹੁਮਤ ਨਾਲ ਕਾਂਗਰਸ ਨੂੰ ਸਰਕਾਰ ਬਣਾਉਣ ਦਾ ਫਤਵਾ ਦੇ ਦਿੱਤਾ ਪਰ ਅੱਜ ਕੈਪਟਨ ਸਰਕਾਰ ਨੂੰ ਸੱਤਾ ਵਿਚ ਆਇਆਂ 11 ਮਹੀਨਿਆਂ ਦਾ ਸਮਾਂ ਹੋ ਚੁੱਕਾ ਹੈ। ਇਨ੍ਹਾਂ 11 ਮਹੀਨਿਆਂ ਵਿਚ ਕੈਪਟਨ ਤੇ ਉਨ੍ਹਾਂ ਦੀ ਸਰਕਾਰ ਸਿਰਫ ਸੱਤਾ ਲੋਭ ਵਿਚ ਹੀ ਡੁੱਬੀ ਨਜ਼ਰ ਆਈ। ਦਾਅਵੇ ਤਾਂ ਰੋਜ਼ਾਨਾ ਕੋਈ ਨਾ ਕੋਈ ਕੀਤੇ ਜਾ ਰਹੇ ਹਨ ਪਰ ਹੈਰਾਨੀ ਵਾਲੀ ਗੱਲ ਇਹ ਹੈ ਕਿ ਇਨ੍ਹਾਂ 11 ਮਹੀਨਿਆਂ ਵਿਚ ਜਨਤਾ ਨਾਲ ਕੀਤਾ ਇਕ ਵੀ ਵਾਅਦਾ ਕੈਪਟਨ ਸਰਕਾਰ ਪੂਰਾ ਨਹੀਂ ਕਰ ਸਕੀ। ਜਨਤਾ ਦੀ ਗੱਲ ਤਾਂ ਛੱਡੋ ਕੈਪਟਨ ਸਰਕਾਰ ਤੋਂ ਪਾਰਟੀ ਦੇ ਹੀ ਆਗੂ ਤੇ ਵਿਧਾਇਕ ਤੱਕ ਖੁਸ਼ ਨਹੀਂ ਹਨ। ਜਿਸ ਕੈਪਟਨ ਦੇ ਜਸਲਿਆਂ ਵਿਚ ਇਕ ਆਵਾਜ਼ 'ਤੇ ੇਜਨਤਾ ਦੀ ਭੀੜ ਇਕੱਠੀ ਹੋ ਜਾਂਦੀ ਸੀ, ਉਸ ਕੈਪਟਨ ਦੇ ਜਲਸਿਆਂ ਵਿਚ ਹੁਣ ਕੁਰਸੀਆਂ ਖਾਲੀ ਰਹਿਣ ਲੱਗ ਪਈਆਂ ਹਨ। ਮਹਾਨ ਸਿੱਖ ਜਰਨੈਲ ਸਰਦਾਰ ਸ਼ਾਮ ਸਿੰਘ ਅਟਾਰੀਵਾਲਾ ਦੇ ਸ਼ਹੀਦੀ ਦਿਹਾੜੇ 'ਤੇ ਕਰਵਾਏ ਸੂਬਾ ਪੱਧਰੀ ਪ੍ਰੋਗਰਾਮ ਵਿਚ ਖਾਲੀ ਕੁਰਸੀਆਂ ਕੈਪਟਨ ਦੇ ਬਦਲਦੇ ਅਕਸ ਦੀ ਜਿਊਂਦੀ ਜਾਗਦੀ ਮਿਸਾਲ ਹੈ। ਆਉਣ ਵਾਲੇ ਕੁਝ ਮਹੀਨਿਆਂ ਵਿਚ ਇੰਝ ਹੀ ਚਲਦਾ ਰਿਹਾ ਤਾਂ ਇਹ ਕਾਂਗਰਸ ਲਈ ਖਤਰੇ ਦੀ ਘੰਟੀ ਹੋਵੇਗੀ।
ਕੌਮੀ ਲੋਕ ਅਦਾਲਤ 'ਚ 669 ਕੇਸਾਂ ਦਾ ਨਿਪਟਾਰਾ
NEXT STORY