ਅਜੇ ਤੱਕ ਤਾਂ ਮੰਨਿਆ ਜਾਂਦਾ ਸੀ ਕਿ ਜਾਪਾਨ ਦੇ ਲੋਕ ਸਭ ਤੋਂ ਵੱਧ ਲੰਬੀ ਉਮਰ ਤੱਕ ਜਿਊਂਦੇ ਹਨ ਪਰ ਇਟਲੀ ’ਚ ‘ਸਾਰਡੀਨੀਆ’ ਨਾਂ ਦੀ ਅਜਿਹੀ ਜਗ੍ਹਾ ਹੈ ਜਿਸ ਦੇ ‘ਬੋਲੋਟਾਨ’ ਨਾਂ ਦੇ ਪਹਾੜੀ ਪਿੰਡ ’ਚ ਔਰਤਾਂ ਦੁਨੀਆ ’ਚ ਸਭ ਤੋਂ ਲੰਬੀ ਉਮਰ ਜਿਊਂਦੀਆਂ ਹਨ। ਜੋ 70 ਸਾਲ ਤੋਂ ਵੱਧ ਹੈ, ਇਹ ਇਸ ਗੱਲ ਦੀ ਗਾਰੰਟੀ ਹੈ ਕਿ ਉੱਥੇ ਬਹੁਗਿਣਤੀ ਔਰਤਾਂ 100 ਸਾਲ ਦੀ ਉਮਰ ਤੱਕ ਪਹੁੰਚਣਗੀਆਂ।
‘ਸਾਰਡੀਨੀਆ’ ਦੀਪ ਲੰਬੀ ਉਮਰ ਲਈ, ਖਾਸ ਕਰ ਕੇ ਵੱਡੀ ਉਮਰ ਤੱਕ ਜਿਊਣ ਵਾਲੇ ਮਰਦਾਂ ਲਈ, 1999 ’ਚ ਮਸ਼ਹੂਰ ਹੋਇਆ ਸੀ। ਇਸ ਖੇਤਰ ਦੇ ਪਿੰਡਾਂ ਨੂੰ ਦੁਨੀਆ ਦੇ 5 ‘ਬਲਿਊ ਜ਼ੋਨ’ ’ਚ ਸ਼ਾਮਲ ਕੀਤਾ ਗਿਆ ਸੀ। ‘ਬਲਿਊ ਜ਼ੋਨ’ ਅਜਿਹੇ ਭੂਗੋਲਿਕ ਇਲਾਕਿਆਂ ਨੂੰ ਕਿਹਾ ਜਾਂਦਾ ਹੈ ਜਿੱਥੇ 100 ਸਾਲ ਤੋਂ ਵੱਧ ਜਿਊਣ ਵਾਲੇ ਲੋਕਾਂ ਦੀ ਗਿਣਤੀ ਬਹੁਤ ਜ਼ਿਆਦਾ ਹੁੰਦੀ ਹੈ।
ਹੁਣ ਖੋਜਕਾਰਾਂ ਨੇ ਦੱਸਿਆ ਹੈ ਕਿ ਮੱਧ ਸਾਰਡੀਨੀਆ ’ਚ ‘ਬੋਲੋਟਾਨ’ ਦੇ ਮੂਲ ਬਲਿਊ ਜ਼ੋਨ ਤੋਂ ਲਗਭਗ 110 ਕਿਲੋਮੀਟਰ ਦੂਰ ‘ਮਾਰਜਿਨ’ ਨਾਂ ਦੇ ਪਿੰਡ ’ਚ ਔਰਤਾਂ 100 ਸਾਲ ਤੋਂ ਵੀ ਵੱਧ ਲੰਬੀ ਉਮਰ ਭੋਗਦੀਆਂ ਹਨ।
ਇਨ੍ਹਾਂ ਫੁਰਤੀਲੀਆਂ ਔਰਤਾਂ ਦੀ ਲੰਬੀ ਉਮਰ ਦਾ ਰਾਜ਼ ਹੈ, ਜ਼ਿੰਦਗੀ ਭਰ ਬਣੇ ਰਹਿਣ ਵਾਲੇ ਬਹੁਤ ਗੂੜ੍ਹੇ ਅਤੇ ਬਹੁਤ ਸੱਚੇ ਸਮਾਜਿਕ ਰਿਸ਼ਤੇ। ਇਕੱਠੇ ਰਹਿਣਾ, ਇਕੱਠੇ ਖਾਣਾ ਪਕਾਉਣਾ, ਸਾਫ਼-ਸੁਥਰਾ ਤਾਜ਼ਾ ਭੋਜਨ ਖਾਣਾ, ਕੋਈ ਪੈਕੇਟ ਵਾਲੀ ਚੀਜ਼ ਨਾ ਖਾਣਾ, ਇਕ-ਦੂਜੇ ਨਾਲ ਬਰਾਬਰ ਗੱਲਬਾਤ ਕਰਨਾ, ਪਿੰਡ ਦੇ ਆਲੇ-ਦੁਆਲੇ ਦਾ ਸ਼ੁੱਧ, ਪ੍ਰਦੂਸ਼ਣ ਰਹਿਤ ਕੁਦਰਤੀ ਵਾਤਾਵਰਣ ਅਤੇ ਕੋਈ ਜਿਮ ਨਾ ਹੋਣ ਦੇ ਬਾਵਜੂਦ ਕਸਰਤ ਕਾਰਨ ਕਿਸੇ ਕਿਸਮ ਦੀ ਸਰੀਰਕ ਸਮਰੱਥਾ ’ਚ ਕੋਈ ਕਮੀ ਨਾ ਆਉਣਾ। ਉਮਰ ਵਧ ਜਾਣ ਦੇ ਬਾਵਜੂਦ ਉੱਥੇ ਦੇ ਬਜ਼ੁਰਗ ਰੋਜ਼ਾਨਾ 20 ਕਿਲੋਮੀਟਰ ਤੱਕ ਦੀ ਸੈਰ ਕਰਦੇ ਹਨ ਜਿਨ੍ਹਾਂ ’ਚ ਬਹੁਗਿਣਤੀ ਔਰਤਾਂ ਦੀ ਹੁੰਦੀ ਹੈ।
ਦੂਜੇ ਪਾਸੇ ਅਸੀਂ ਹਾਂ ਕਿ 70 ਸਾਲ ਦੀ ਉਮਰ ਤੱਕ ਪਹੁੰਚ ਜਾਣ ਤੋਂ ਬਾਅਦ ਜੀਵਨ ਨੂੰ ਸਮਾਪਤ ਮੰਨ ਕੇ ਗੈਰ-ਸਰਗਰਮ ਹੋ ਜਾਂਦੇ ਹਾਂ। ਭਾਰਤ ’ਚ ਲੋਕਾਂ ਦੀ ਇਹ ਧਾਰਨਾ ਬਣ ਗਈ ਹੈ ਕਿ ‘ਬਜ਼ੁਰਗ’ ਹੋ ਗਏ ਹਾਂ, ਹੁਣ ਇਹ ਸਭ ਕਿਉਂ ਕਰਨਾ! ਪਰ ਜੇਕਰ ਅਸੀਂ ਵੀ ਇਟਲੀ ਦੇ ਉਕਤ ਪਿੰਡਾਂ ਦੇ ਲੋਕਾਂ ਵਰਗੀ ਜੀਵਨਸ਼ੈਲੀ ਅਪਣਾਈਏ ਤਾਂ ਇਸ ਨਾਲ ਜਿੱਥੇ ਲੋਕਾਂ ਦੀ ਸਿਹਤ ’ਚ ਸੁਧਾਰ ਹੋਵੇਗਾ, ਉੱਥੇ ਹੀ ਇਸ ਨਾਲ ਲੋਕਾਂ ਦਾ ਜੀਵਨ ਆਸਾਨ ਬਣੇਗਾ ਅਤੇ ਜੀਵਨ ਦੀ ਸ਼ਾਮ ਮਜ਼ੇ ਨਾਲ ਗੁਜ਼ਰੇਗੀ।
ਇਸ ਸਮੇਂ ਤਾਂ ਹਾਲਤ ਇਹ ਹੈ ਕਿ ਸਾਡੇ ਇੱਥੇ 60 ਸਾਲ ਦੀ ਉਮਰ ’ਚ ਹੀ ਲੋਕ ਗੋਡਿਆਂ ਦੀ ਸ਼ਿਕਾਇਤ ਕਰਨ ਲੱਗਦੇ ਹਨ। 65 ਸਾਲ ’ਚ ਪਹੁੰਚਦਿਆਂ-ਪਹੁੰਚਦਿਆਂ ਉਨ੍ਹਾਂ ਲਈ ਪੌੜੀਆਂ ਚੜ੍ਹਨਾ ਮੁਸ਼ਕਲ ਹੋ ਜਾਂਦਾ ਹੈ ਅਤੇ 70 ਸਾਲ ਦੇ ਹੋਣ ਤੱਕ ਤਾਂ ਬਹੁਤ ਸਾਰੇ ਲੋਕ ਬਿਨਾਂ ਸਹਾਰੇ ਦੇ ਜ਼ਮੀਨ ਤੋਂ ਉੱਠ ਵੀ ਨਹੀਂ ਪਾਉਂਦੇ।
ਜਾਪਾਨ ’ਚ ਲੋਕਾਂ ਦੀ ਔਸਤ ਉਮਰ 84 ਸਾਲ ਅਤੇ ਯੂਰਪ ਦੇ ਬਹੁਤ ਸਾਰੇ ਦੇਸ਼ਾਂ ’ਚ 81 ਤੋਂ 83 ਸਾਲ, ਸਿੰਗਾਪੁਰ ਅਤੇ ਦੱਖਣੀ ਕੋਰੀਆ ’ਚ ਲਗਭਗ 83 ਸਾਲ ਅਤੇ ਭਾਰਤ ’ਚ ਲਗਭਗ 70 ਸਾਲ ਹੈ। ਪਰ ਅਸਲੀ ਸਵਾਲ ਇਹ ਨਹੀਂ ਹੈ ਕਿ ਤੁਸੀਂ ਕਿੰਨਾ ਲੰਬਾ ਜਿਓਗੇ। ਅਸਲੀ ਸਵਾਲ ਇਹ ਹੈ ਕਿ ਤੁਸੀਂ ਕਿੰਨਾ ਠੀਕ ਤਰ੍ਹਾਂ ਜਿਓਗੇ। ਭਾਵ ਉਹ ਸਾਲ ਜਦੋਂ ਤੁਸੀਂ ਖੁਦ ਤੁਰ ਸਕੋ, ਖੁਦ ਉੱਠ-ਬੈਠ ਸਕੋ ਅਤੇ ਕਿਸੇ ਦੂਜੇ ’ਤੇ ਨਿਰਭਰ ਨਾ ਹੋਵੋ।
ਸਿੰਗਾਪੁਰ ’ਚ ਇਹ ਉਮਰ 73.6 ਸਾਲ, ਜਾਪਾਨ ’ਚ 73.4 ਅਤੇ ਦੱਖਣੀ ਕੋਰੀਆ ’ਚ 72.5 ਸਾਲ ਹੈ, ਜਿੱਥੇ ਲੋਕ ਬਿਨਾਂ ਕਿਸੇ ਸਪੋਰਟ ਦੇ ਆਪਣਾ ਜੀਵਨ ਜੀਅ ਲੈਂਦੇ ਹਨ। ਦੁਨੀਆ ਦਾ ਔਸਤ ਸਿਹਤਮੰਦ ਜੀਵਨ 63.7 ਸਾਲ ਅਤੇ ਭਾਰਤ ਦਾ ਲਗਭਗ 60 ਸਾਲ ਦੇ ਆਸ-ਪਾਸ ਹੈ।
ਪਰ ਚੰਗੀ ਗੱਲ ਇਹ ਹੈ ਕਿ ਲੰਬੀ ਉਮਰ ਪਾਉਣ ਦੀ ਦੌੜ ਜੀਨਸ ਨੇ ਨਹੀਂ ਹਾਰੀ ਹੈ। ਇਹ ਦੌੜ ਆਦਤਾਂ ਨਾਲ ਜਿੱਤੀ ਜਾ ਸਕਦੀ ਹੈ। ਆਪਣੀਆਂ ਆਦਤਾਂ ਨੂੰ ਸੁਧਾਰ ਕੇ ਖੁਦ ਨੂੰ ਸੁਧਾਰਿਆ ਜਾ ਸਕਦਾ ਹੈ। ਇਸੇ ਲਈ ਆਪਣਾ ਅਤੇ ਆਪਣੇ ਪੇਰੈਂਟਸ ਦਾ ਲਾਈਫਸਟਾਈਲ ਬਦਲ ਕੇ ਇਹ ਬਦਲਾਅ ਲਿਆਂਦਾ ਜਾ ਸਕਦਾ ਹੈ।
ਕੁਛ ਤੋ ਬਾਤ ਹੈ ਹਮਮੇਂ, ਜੋ ਹਸਤੀ ਮਿਟਤੀ ਨਹੀਂ ਹਮਾਰੀ
NEXT STORY