ਨਵੀਂ ਦਿੱਲੀ : ਭਾਰਤੀ ਇਲੈਕਟ੍ਰਿਕ ਟੂ-ਵੀਲਰ ਬਾਜ਼ਾਰ ਵਿੱਚ ਭਾਵੇਂ ਇਲੈਕਟ੍ਰਿਕ ਸਕੂਟਰਾਂ ਦਾ ਦਬਦਬਾ ਹੈ, ਪਰ ਇਲੈਕਟ੍ਰਿਕ ਬਾਈਕ ਸ਼੍ਰੇਣੀ ਵਿੱਚ ਬੈਂਗਲੁਰੂ ਸਥਿਤ ਸਟਾਰਟਅੱਪ ਕੰਪਨੀ ਓਬੇਨ ਇਲੈਕਟ੍ਰਿਕ ਦੇਸ਼ ਦੀ ਸਭ ਤੋਂ ਵੱਧ ਵਿਕਣ ਵਾਲੀ ਬ੍ਰਾਂਡ ਬਣ ਕੇ ਉੱਭਰੀ ਹੈ। ਸਤੰਬਰ 2026 ਦੇ ਮਹੀਨੇ ਦੌਰਾਨ ਕੰਪਨੀ ਨੇ 1,417 ਇਲੈਕਟ੍ਰਿਕ ਬਾਈਕਾਂ ਦੀ ਵਿਕਰੀ ਕੀਤੀ ਹੈ, ਜੋ ਕਿ ਕੰਪਨੀ ਦੀ ਹੁਣ ਤੱਕ ਦੀ ਸਭ ਤੋਂ ਵੱਧ ਮਾਸਿਕ ਵਿਕਰੀ ਹੈ।
ਸਤੰਬਰ ਮਹੀਨੇ ਦੌਰਾਨ ਦੇਸ਼ ਦੀਆਂ ਪ੍ਰਮੁੱਖ 5 ਇਲੈਕਟ੍ਰਿਕ ਬਾਈਕ ਕੰਪਨੀਆਂ ਨੇ ਕੁੱਲ 3,066 ਵਾਹਨ ਵੇਚੇ। ਇਸ ਕੁੱਲ ਵਿਕਰੀ ਵਿੱਚੋਂ ਇਕੱਲੀ ਓਬੇਨ ਇਲੈਕਟ੍ਰਿਕ ਦੀ ਹਿੱਸੇਦਾਰੀ 46.2 ਫ਼ੀਸਦੀ ਰਹੀ। ਦੂਜੇ ਨੰਬਰ 'ਤੇ ਰਿਵੋਲਟ ਇੰਟੈਲੀਕਾਰਪ ਰਹੀ, ਜਿਸ ਨੇ 1,027 ਯੂਨਿਟ (38 ਫ਼ੀਸਦੀ ਹਿੱਸੇਦਾਰੀ) ਵੇਚੇ। ਤੀਜੇ ਸਥਾਨ 'ਤੇ ਅਲਟਰਾਵਾਇਲਟ ਆਟੋਮੋਟਿਵ (536 ਯੂਨਿਟ), ਚੌਥੇ 'ਤੇ ਮੈਟਰ ਮੋਟਰ ਵਰਕਸ (69 ਯੂਨਿਟ) ਅਤੇ ਪੰਜਵੇਂ 'ਤੇ ਰੈਪਟੀ ਐਨਰਜੀ (17 ਯੂਨਿਟ) ਰਹੀ। ਹਾਲਾਂਕਿ, ਸਮੁੱਚੀ ਇਲੈਕਟ੍ਰਿਕ ਟੂ-ਵੀਲਰ ਸ਼੍ਰੇਣੀ ਵਿੱਚ ਟੀ.ਵੀ.ਐੱਸ. ਮੋਟਰ (TVS Motor) 53,990 ਸਕੂਟਰ ਵੇਚ ਕੇ ਪਹਿਲੇ ਸਥਾਨ 'ਤੇ ਹੈ ਅਤੇ ਓਬੇਨ 11ਵੇਂ ਸਥਾਨ 'ਤੇ ਆਉਂਦੀ ਹੈ।
ਕੰਪਨੀ ਨੇ ਵਿਕਰੀ ਵਿੱਚ ਆਏ ਇਸ ਉਛਾਲ ਦਾ ਸਿਹਰਾ ਆਪਣੇ ਨਵੇਂ ਮਾਡਲ ਓਬੇਨ ਰੋਰ ਇਵੋ (Rorr Evo) ਨੂੰ ਦਿੱਤਾ ਹੈ। ਕੰਪਨੀ ਨੇ ਹਾਲ ਹੀ ਵਿੱਚ ਆਪਣੇ ਪਲਾਂਟ ਤੋਂ 10,000 ਯੂਨਿਟ ਉਤਪਾਦਨ ਦਾ ਅੰਕੜਾ ਵੀ ਪਾਰ ਕਰ ਲਿਆ ਹੈ।
ਰੋਰ ਇਵੋ ਦੇ ਫੀਚਰਸ ਅਤੇ ਚਾਰਜਿੰਗ ਖ਼ਰਚਾ:
ਬੈਟਰੀ ਅਤੇ ਰੇਂਜ: ਇਸ ਬਾਈਕ ਵਿੱਚ 3.4kWh ਦੀ ਬੈਟਰੀ ਦਿੱਤੀ ਗਈ ਹੈ, ਜੋ ਇੱਕ ਵਾਰ ਚਾਰਜ ਕਰਨ 'ਤੇ 180 ਕਿਲੋਮੀਟਰ ਦੀ ਦਾਅਵੇਦਾਰ ਰੇਂਜ (Claimed Range) ਦਿੰਦੀ ਹੈ।
ਰਫ਼ਤਾਰ: ਇਹ ਬਾਈਕ 110 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਟੌਪ ਸਪੀਡ ਨਾਲ ਚੱਲਦੀ ਹੈ ਅਤੇ ਮਾਤਰ 3 ਸੈਕਿੰਡ ਵਿੱਚ 0 ਤੋਂ 40 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਫੜ ਲੈਂਦੀ ਹੈ।
ਚਾਰਜਿੰਗ ਅਤੇ ਖ਼ਰਚਾ: ਬੈਟਰੀ ਨੂੰ 0 ਤੋਂ 80 ਫ਼ੀਸਦੀ ਤੱਕ ਚਾਰਜ ਹੋਣ ਵਿੱਚ 90 ਮਿੰਟ ਦਾ ਸਮਾਂ ਲੱਗਦਾ ਹੈ। 8 ਰੁਪਏ ਪ੍ਰਤੀ ਯੂਨਿਟ ਦੀ ਦਰ ਨਾਲ ਇਸ ਦੀ ਬੈਟਰੀ ਚਾਰਜ ਕਰਨ ਦਾ ਖ਼ਰਚਾ ਲਗਭਗ 35 ਰੁਪਏ ਆਉਂਦਾ ਹੈ (ਜੋ ਲਗਭਗ 1 ਰੁਪਏ ਵਿੱਚ 5 ਕਿਲੋਮੀਟਰ ਚੱਲਣ ਦੇ ਬਰਾਬਰ ਪੈਂਦਾ ਹੈ)।
ਨੌਕਰੀ ਬਾਜ਼ਾਰ 'ਚ AI ਦੀ ਵਧੀ ਮੰਗ, ਤਜਰਬੇਕਾਰ ਲੋਕਾਂ ਨੂੰ ਮਿਲ ਰਹੇ ਜ਼ਿਆਦਾ ਮੌਕੇ
NEXT STORY 
