ਪਟਿਆਲਾ, ਰੱਖੜਾ (ਰਾਣਾ) - ਸੂਬੇ ਅੰਦਰ ਪਿਛਲੇ ਕਾਫੀ ਮਹੀਨਿਆਂ ਤੋਂ ਫੈਲੇ ਹਵਾ ਪ੍ਰਦੂਸ਼ਣ ਦੀ ਰੋਕਥਾਮ ਲਈ ਪੰਜਾਬ ਪ੍ਰਦੂਸ਼ਣ ਰੋਕਥਾਮ ਬੋਰਡ ਵਲੋਂ ਲਗਾਤਾਰ ਉਪਰਾਲੇ ਕੀਤੇ ਜਾ ਰਹੇ ਹਨ ਭਾਵੇਂ ਕਿ ਉਹ ਪਰਾਲੀ ਨੂੰ ਅੱਗ ਲਾਉਣਾ, ਰਹਿੰਦ-ਖੂੰਹਦ ਨੂੰ ਅੱਗ ਲਾਉਣਾ, ਦਫ਼ਤਰਾਂ ਵਿਚ ਕੂੜਾ-ਕਰਕਟ ਫੂਕਣਾ, ਗੱਡੀਆਂ, ਫੈਕਟਰੀਆਂ, ਭੱਠਿਆਂ ਆਦਿ ਦੇ ਧੂੰਏਂ ਨੂੰ ਰੋਕਣ ਲਈ ਸਮੇਂ-ਸਮੇਂ ਸਿਰ ਵੱਖ-ਵੱਖ ਟੀਮਾਂ ਬਣਾ ਕੇ ਨਿਰੀਖਣ ਕੀਤਾ ਜਾ ਰਿਹਾ ਹੈ ਤਾਂ ਜੋ ਫੈਲ ਰਹੇ ਪ੍ਰਦੂਸ਼ਣ ਨੂੰ ਰੋਕਿਆ ਜਾ ਸਕੇ ਅਤੇ ਆਮ ਲੋਕਾਂ ਨੂੰ ਸਾਫ਼-ਸੁਥਰਾ ਵਾਤਾਵਰਣ ਮਿਲ ਸਕੇ, ਉਥੇ ਹੀ ਪੰਜਾਬ ਪ੍ਰਦੂਸ਼ਣ ਰੋਕਥਾਮ ਬੋਰਡ ਦੇ ਚੇਅਰਮੈਨ ਕਾਹਨ ਸਿੰਘ ਪਨੂੰ ਦੇ ਯੋਗ ਯਤਨਾਂ ਸਦਕਾ ਫਸਲਾਂ ਦੀ ਸਾਫ਼-ਸਫਾਈ ਲਈ ਮੰਡੀਆਂ ਵਿਚ ਵਰਤੀਆਂ ਜਾਣ ਵਾਲੀਆਂ ਮਸ਼ੀਨਾਂ ਤੋਂ ਉੜਦੀ ਧੂੜ ਨੂੰ ਰੋਕਣ ਲਈ ਇਕ ਨਵੀਂ ਮਸ਼ੀਨ ਮਾਰਕੀਟ ਵਿਚ ਲਿਆਂਦੀ ਗਈ ਹੈ, ਜਿਸ ਨੂੰ ਸੂਬੇ ਦੇ ਸਮੁੱਚੇ ਆੜ੍ਹਤੀਆਂ ਤੱਕ ਪਹੁੰਚਾਉਣ ਦਾ ਉਪਰਾਲਾ ਕੀਤਾ ਜਾ ਰਿਹਾ ਹੈ। ਜ਼ਿਕਰਯੋਗ ਹੈ ਕਿ ਆਏ ਸਾਲ ਝੋਨੇ ਅਤੇ ਕਣਕ ਦੀ ਧੜਾ-ਧੜ ਆਮਦ ਦੌਰਾਨ ਫ਼ਸਲ ਨੂੰ ਪੱਖਾ ਲਾਉਣ ਕਾਰਨ ਉÎੱਡ ਰਹੀ ਧੂੜ ਕਾਰਨ ਦਾਣਾ ਮੰਡੀਆਂ ਨੇੜਲੀ ਹਵਾ ਦੂਸ਼ਤ ਰਹਿੰਦੀ ਹੈ, ਜਿਸ ਦਾ ਅਸਰ ਮੰਡੀਆਂ 'ਚ ਕੰਮ ਕਰਦੇ ਮਜ਼ਦੂਰਾਂ, ਕਿਸਾਨਾਂ, ਆੜ੍ਹਤੀਆਂ ਦੁਕਾਨਦਾਰਾਂ ਅਤੇ ਦਾਣਾ ਮੰਡੀਆਂ ਨੇੜਲੇ ਵਸਨੀਕਾਂ ਦੀ ਸਿਹਤ 'ਤੇ ਪੈਂਦਾ ਹੈ ਅਤੇ ਪੈਦਾ ਹੋ ਰਹੇ ਇਸ ਹਵਾ ਪ੍ਰਦੂਸ਼ਣ ਕਾਰਨ ਅੱਖਾਂ, ਸਾਹ ਦੀਆਂ ਬੀਮਾਰੀਆਂ, ਫੇਫੜਿਆਂ 'ਤੇ ਸਿੱਧਾ ਅਸਰ ਅਤੇ ਫ਼ੇਫੜਿਆਂ ਦੀ ਆਕਸੀਜਨ ਲੈਣ ਦੀ ਸਮਰੱਥਾ ਘਟਾਉਣਾ ਇਕ ਆਮ ਵਰਤਾਰਾ ਬਣਦਾ ਜਾ ਰਿਹਾ ਹੈ।
ਇਸ ਸਾਲ ਅਕਤੂਬਰ ਮਹੀਨੇ ਬੋਰਡ ਵੱਲੋਂ ਪੰਜਾਬ ਦੀਆਂ 10 ਦਾਣਾ ਮੰਡੀਆਂ ਦੀ ਹਵਾ ਦਾ ਨਿਰੀਖਣ ਕਰਵਾਇਆ ਗਿਆ ਜਿਸ ਦੇ ਨਤੀਜੇ ਹੈਰਾਨੀਜਨਕ ਸਨ ਅਤੇ ਹਵਾ ਵਿਚ ਧੂੜ ਦੇ ਕਣਾਂ ਦੀ ਮਾਤਰਾ ਨਿਰਧਾਰਤ 100 ਮਾਈਕ੍ਰੋਗ੍ਰਾਮ ਪ੍ਰਤੀ ਘਣ ਮੀਟਰ ਤੋਂ ਕਿਤੇ ਜ਼ਿਆਦਾ 5 ਤੋਂ 8 ਗੁਣ ਤੱਕ ਰਿਕਾਰਡ ਕੀਤੀ ਗਈ ਅਤੇ ਇਸ ਹਵਾ ਪ੍ਰਦੂਸ਼ਣ ਨੂੰ ਰੋਕਣ ਲਈ ਲੋੜੀਂਦੇ ਕਦਮ ਚੁੱਕਣ ਲਈ ਸਕੱਤਰ, ਪੰਜਾਬ ਮੰਡੀਕਰਨ ਬੋਰਡ ਨੂੰ ਕਿਹਾ ਗਿਆ।
ਮੰਡੀਆਂ ਵਿਚ ਪੈਦਾ ਹੁੰਦੀ ਇਸ ਧੂੜ ਨੂੰ ਇਕ ਵੱਡੀ ਸਮੱਸਿਆ ਮੰਨਦਿਆਂ ਪ੍ਰਦੂਸ਼ਣ ਰੋਕਥਾਮ ਬੋਰਡ ਵਲੋਂ ਇਸ ਨੂੰ ਕਾਬੂ ਪਾਉਣ ਲਈ ਯਤਨ ਆਰੰਭੇ ਗਏ ਹਨ ਅਤੇ ਮੰਡੀਆਂ ਵਿਚ ਕੰਮ ਕਰਦੇ ਮਜ਼ਦੂਰਾਂ, ਆੜ੍ਹਤੀਆਂ ਅਤੇ ਕਿਸਾਨਾਂ ਨਾਲ ਗੱਲ ਕਰਨ ਤੋਂ ਬਾਅਦ ਇਕ ਅਜਿਹੀ ਮਸ਼ੀਨ ਬਣਾਈ ਗਈ, ਜਿਸ ਨੂੰ ਫਸਲ ਦੀ ਸਫਾਈ ਕਰਨ ਵਾਲੇ ਪੱਖੇ 'ਤੇ ਲਾਉਣ ਤੋਂ ਬਾਅਦ 80 ਤੋਂ 90 ਫੀਸਦੀ ਤੱਕ ਹਵਾ 'ਚ ਉÎੱਡ ਰਹੀ ਇਸ ਧੂੜ ਨੂੰ ਕਾਬੂ ਕਰਨ ਵਿਚ ਸਫ਼ਲਤਾ ਹਾਸਲ ਕੀਤੀ ਗਈ।
ਬੋਰਡ ਦੇ ਚੇਅਰਮੈਨ ਕਾਹਨ ਸਿੰਘ ਪਨੂੰ ਨੇ ਦੱਸਿਆ ਕਿ ਪੰਜਾਬ ਦੀਆਂ ਮੰਡੀਆਂ ਵਿਚ ਇਸ ਸਮੇਂ 50 ਹਜ਼ਾਰ ਦੇ ਕਰੀਬ ਪੱਖੇ-ਝਰਨੇ ਲੱਗੇ ਹੋਏ ਹਨ ਅਤੇ ਹਰੇਕ ਝਾਰਨੇ 'ਤੇ 6 ਮਜ਼ਦੂਰ ਕੰਮ ਕਰਦੇ ਹਨ। ਸਮੁੱਚੇ ਪੰਜਾਬ ਦੀਆਂ ਅਨਾਜ ਮੰਡੀਆਂ ਵਿਚ 3 ਲੱਖ ਦੇ ਕਰੀਬ ਮਜ਼ਦੂਰਾਂ ਤੋਂ ਇਲਾਵਾ ਕਿਸਾਨ, ਆੜ੍ਹਤੀਏ, ਦੁਕਾਨਦਾਰ, ਟਰਾਂਸਪੋਰਟਰ ਅਤੇ ਮੰਡੀਆਂ ਦੇ ਨੇੜੇ ਰਹਿਣ ਵਾਲੇ ਲੋਕ ਇਸ ਪ੍ਰਦੂਸ਼ਣ ਦੀ ਮਾਰ ਸਹਿ ਰਹੇ ਹਨ। ਇਸ ਡਸਟ ਕੁਲੈਕਟਰ ਨਾਮੀ ਮਸ਼ੀਨ ਨਾਲ ਪੱਖਾ-ਝਰਨਾ ਇਸ ਤਰ੍ਹਾਂ ਢੱਕਿਆ ਗਿਆ ਹੈ ਕਿ ਪੈਦਾ ਹੋਈ ਧੂੜ ਨੂੰ ਹਵਾ ਵਿਚ ਜਾਣ ਤੋਂ ਰੋਕਿਆ ਜਾ ਸਕੇ ਅਤੇ ਇਕੱਠਾ ਕਰ ਕੇ ਇਸ ਨੂੰ ਬੋਰੀਆਂ ਵਿਚ ਭਰਿਆ ਜਾ ਸਕੇ। ਇਸ ਮਸ਼ੀਨ ਦੇ ਲੱਗਣ ਨਾਲ ਹਵਾ ਪ੍ਰਦੂਸ਼ਣ 'ਤੇ ਵੱਡੀ ਪੱਧਰ 'ਤੇ ਕਾਬੂ ਪਾਇਆ ਜਾਵੇਗਾ। ਉਨ੍ਹਾਂ ਅੱਗੇ ਦੱਸਿਆ ਕਿ ਆਉਣ ਵਾਲੇ ਕਣਕ ਦੇ ਸੀਜ਼ਨ ਦੌਰਾਨ ਹਰੇਕ ਪੱਖੇ-ਝਰਨੇ 'ਤੇ ਇਹ ਮਸ਼ੀਨ ਲਾਉਣਾ ਯਕੀਨੀ ਬਣਾਉਣ ਦੀ ਕਾਰਵਾਈ ਅਮਲ ਵਿਚ ਲਿਆਂਦੀ ਜਾਵੇਗੀ ।
ਨਸ਼ਾ ਮੁਕਤ ਸਮਾਜ ਸਿਰਜਣ ਦਾ ਹੋਕਾ ਦੇ ਗਿਆ ਜੇ. ਪੀ. ਐੱਸ. ਦਾ ਖੇਡ ਮੇਲਾ
NEXT STORY 
