ਅੰਮ੍ਰਿਤਸਰ (ਛੀਨਾ) - ਭਾਰਤ ਸਰਕਾਰ ਵੱਲੋਂ ਪੰਜਾਬ ਸਰਕਾਰ ਦੇ ਸਹਿਯੋਗ ਨਾਲ ਮਿਡ-ਡੇ ਮੀਲ ਸਕੀਮ ਤਹਿਤ ਪਹਿਲੀ ਤੋਂ 8ਵੀਂ ਜਮਾਤ ਤੱਕ ਦੇ ਬੱਚਿਆਂ ਨੂੰ ਵਧੀਆ ਅਤੇ ਪੌਸ਼ਟਿਕ ਖਾਣਾ ਦਿੱਤਾ ਜਾ ਰਿਹਾ ਹੈ। ਪੰਜਾਬ 'ਚ ਅੰਮ੍ਰਿਤਸਰ, ਪਟਿਆਲਾ, ਬਠਿੰਡਾ, ਮੋਗਾ, ਸੰਗਰੂਰ, ਮੋਹਾਲੀ ਅਤੇ ਨਵਾਂਸ਼ਹਿਰ ਵਿਖੇ ਕੇਂਦਰੀ ਰਸੋਈ ਸਿਸਟਮ ਰਾਹੀਂ 2 ਵੱਖ-ਵੱਖ ਐੱਨ. ਜੀ. ਓਜ਼ ਵੱਲੋਂ ਖਾਣਾ ਦੇਣ ਦਾ ਕੰਮ ਕੀਤਾ ਜਾ ਰਿਹਾ ਹੈ। ਬੱਚਿਆਂ ਨੂੰ ਪੰਜਾਬ ਸਰਕਾਰ ਵੱਲੋਂ ਪੌਸ਼ਟਿਕ ਖਾਣਾ ਦੇਣ ਦੇ ਮੰਤਵ ਨੂੰ ਹੋਰ ਅੱਗੇ ਤੋਰਦਿਆਂ ਅੰਮ੍ਰਿਤਸਰ ਸ਼ਹਿਰ ਦੇ 210 ਸਕੂਲਾਂ ਦੇ 40 ਹਜ਼ਾਰ ਦੇ ਕਰੀਬ ਬੱਚਿਆਂ ਨੂੰ ਕੇਂਦਰੀ ਰਸੋਈ ਰਾਹੀਂ ਦਿੱਤੇ ਜਾ ਰਹੇ ਮਿਡ-ਡੇ ਮੀਲ 'ਚ ਅਗਲੇ ਹਫਤੇ ਤੋਂ ਮਟਰ-ਪਨੀਰ ਦੀ ਸਬਜ਼ੀ ਵੀ ਮਿਲੇਗੀ।
ਇਸ ਬਾਰੇ ਜਾਣਕਾਰੀ ਦਿੰਦਿਆਂ ਐੱਨ. ਜੀ. ਓ. ਬਗਦੰਗਾ ਕਲੱਬ ਦੇ ਜਨਰਲ ਮੈਨੇਜਰ ਹਰਦੀਪ ਕੁਮਾਰ ਹੈਪੀ ਨੇ ਦੱਸਿਆ ਕਿ ਕੇਂਦਰੀ ਰਸੋਈ ਰਾਹੀਂ ਮਿਡ-ਡੇ ਮੀਲ ਦੇਣ ਦੇ ਕਾਰਜ 'ਚ ਮੀਲ ਪੱਥਰ ਸਥਾਪਤ ਕਰਦਿਆਂ ਮਹੀਨੇ ਦੇ ਹਰ ਦੂਸਰੇ ਅਤੇ ਚੌਥੇ ਮੰਗਲਵਾਰ ਆਲੂ ਤੇ ਮਟਰ-ਪਨੀਰ ਦੀ ਸਬਜ਼ੀ ਪਾਇਲਟ ਪ੍ਰਾਜੈਕਟ ਤਹਿਤ ਦਿੱਤੀ ਜਾਵੇਗੀ। ਬਾਅਦ ਵਿਚ ਇਸ ਨੂੰ ਹਰ ਹਫਤੇ ਦੇਣ ਦੇ ਨਾਲ-ਨਾਲ ਸਾਰੇ ਪੰਜਾਬ 'ਚ ਚੱਲ ਰਹੀਆਂ ਸੈਂਟਰਲਾਈਜ਼ ਕਿਚਨਸ 'ਤੇ ਵੀ ਲਾਗੂ ਕੀਤਾ ਜਾਵੇਗਾ। ਇਸ ਬਾਰੇ ਸਿੱਖਿਆ ਵਿਭਾਗ ਦੇ ਉੱਚ ਅਧਿਕਾਰੀਆਂ ਨੂੰ ਵੀ ਸੂਚਿਤ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਵੱਲੋਂ ਪ੍ਰਾਇਮਰੀ ਦੇ ਬੱਚੇ ਲਈ 4 ਰੁਪਏ 13 ਪੈਸੇ ਅਤੇ ਅਪਰ-ਪ੍ਰਾਇਮਰੀ ਬੱਚੇ ਲਈ 6 ਰੁਪਏ 18 ਪੈਸੇ ਦਿੱਤੇ ਜਾਂਦੇ ਹਨ। ਇਸ ਵਿਚ ਕੇਂਦਰੀ ਰਸੋਈ ਅਤੇ ਗੋਦਾਮ ਦਾ ਕਿਰਾਇਆ, ਸਟੀਮ ਕੁਕਿੰਗ ਸਿਸਟਮ ਆਦਿ ਮਸ਼ੀਨਰੀ ਦਾ ਖਰਚ, ਕੁਕਿੰਗ ਟੀਮਾਂ, ਟਰਾਂਸਪੋਰਟ ਅਤੇ 100 ਦੇ ਕਰੀਬ ਸਟਾਫ ਦੀਆਂ ਤਨਖਾਹਾਂ ਦਾ ਖਰਚ ਐੱਨ. ਜੀ. ਓ. ਨੂੰ ਆਪਣੇ ਵਸੀਲਿਆਂ ਤੋਂ ਕਰਨਾ ਪੈਂਦਾ ਹੈ। ਇਸ ਤਰ੍ਹਾਂ ਇਕ ਖਾਣੇ ਦੀ ਪਲੇਟ ਜੋ 10 ਰੁਪਏ ਦੀ ਪੈਂਦੀ ਸੀ, ਪਨੀਰ ਦੇਣ ਉਪਰੰਤ 12 ਰੁਪਏ ਦੀ ਪਵੇਗੀ। ਉਨ੍ਹਾਂ ਦੱਸਿਆ ਕਿ ਪੂਰੇ ਭਾਰਤ 'ਚ ਕੇਂਦਰੀ ਰਸੋਈ ਤੋਂ ਮਟਰ-ਪਨੀਰ ਦੇਣ ਵਾਲੀ ਬਗਦੰਗਾ ਕਲੱਬ ਪਹਿਲੀ ਐੱਨ. ਜੀ. ਓ. ਹੋਵੇਗੀ।
ਹਰਦੀਪ ਕੁਮਾਰ ਨੇ ਜਾਣਕਾਰੀ ਦਿੱਤੀ ਕਿ ਸਰਦੀ ਜ਼ਿਆਦਾ ਹੋਣ ਕਾਰਨ ਸਕੂਲਾਂ ਵਿਚ ਖਾਣਾ ਠੰਡਾ ਹੋਣ ਦੀ ਸਮੱਸਿਆ ਦੇ ਹੱਲ ਲਈ ਜਲਦ ਹੀ ਪੰਜਾਬ ਸਰਕਾਰ ਅਤੇ ਪ੍ਰਸ਼ਾਸਨ ਦੇ ਸਹਿਯੋਗ ਨਾਲ ਕਾਰਪੋਰੇਟ ਕੰਪਨੀਆਂ ਤੋਂ ਸੀ. ਐੱਸ. ਆਰ. ਫੰਡ ਰਾਹੀਂ ਐੱਨ. ਜੀ. ਓ. ਵੱਲੋਂ ਹਰ ਮਹੀਨੇ ਹਰ ਸਕੂਲ ਨੂੰ ਇਕ ਗੈਸ ਸਿਲੰਡਰ ਦੇਣ ਦਾ ਪ੍ਰੋਗਰਾਮ ਵੀ ਉਲੀਕਿਆ ਜਾ ਰਿਹਾ ਹੈ। ਇਸ ਕਾਰਜ ਲਈ ਟਾਟਾ ਸਟੀਲ, ਨਾਲਕੋ, ਨੈਸਲੇ, ਓ. ਸੀ. ਐੱਮ. ਅਤੇ ਆਨੰਦ ਗਰੁੱਪ ਕਾਰਪੋਰੇਟ ਫਰਮਾ ਨਾਲ ਗੱਲਬਾਤ ਚੱਲ ਰਹੀ ਹੈ।
ਜਲਿਆਂਵਾਲਾ ਬਾਗ ਕਤਲੇਆਮ ਲਈ ਮੁਆਫ਼ੀ ਮੰਗੇ ਬਰਤਾਨੀਆ ਸਰਕਾਰ
NEXT STORY 
