ਜਲੰਧਰ, (ਸੁਧੀਰ)- ਸਥਾਨਕ ਸ਼ੇਖਾਂ ਬਾਜ਼ਾਰ ਨੇੜੇ ਪੈਂਦੇ ਫੁੱਲਾਂ ਵਾਲੇ ਚੌਕ ਕੋਲ ਸਥਿਤ ਵਿਨੇ ਜਿਊਲਰ ਦੀ ਦੁਕਾਨ ਵਿਚ ਉਸ ਸਮੇਂ ਹੰਗਾਮਾ ਹੋ ਗਿਆ ਜਦੋਂ ਸੋਨੇ ਦੀ ਚੇਨ ਚੋਰੀ ਕਰਕੇ ਭੱਜ ਰਹੀ ਇਕ ਔਰਤ ਨੂੰ ਜਿਊਲਰ ਤੇ ਉਸਦੇ ਕੁੱਝ ਸਾਥੀਆਂ ਨੇ ਕਾਬੂ ਕਰ ਲਿਆ। ਬਾਅਦ ਵਿਚ ਔਰਤ ਰੌਲਾ ਪਾਉਂਦੀ ਹੋਈ ਬਾਜ਼ਾਰ ਵਿਚ ਆਪਣੀ ਐਕਟਿਵਾ ਛੱਡ ਕੇ ਭੱਜ ਗਈ। ਜਿਸ ਤੋਂ ਬਾਅਦ ਘਟਨਾ ਸਬੰਧੀ ਪੁਲਸ ਨੂੰ ਸੂਚਨਾ ਦਿੱਤੀ ਗਈ। ਸੂਚਨਾ ਮਿਲਦਿਆਂ ਹੀ ਥਾਣਾ ਨੰਬਰ ਦੋ ਦੀ ਪੁਲਸ ਮੌਕੇ 'ਤੇ ਪਹੁੰਚੀ। ਪੁਲਸ ਨੇ ਆਲੇ-ਦੁਆਲੇ ਲੱਗੇ ਸੀ. ਸੀ. ਟੀ. ਵੀ. ਕੈਮਰਿਆਂ ਦੀ ਜਾਂਚ ਕੀਤੀ ਤੇ ਔਰਤ ਦੀ ਐਕਟਿਵਾ ਵੀ ਕਬਜ਼ੇ ਵਿਚ ਲੈ ਲਈ। ਜਿਊਲਰ ਨੇ ਪੁਲਸ ਨੂੰ ਦੱਸਿਆ ਕਿ ਐਕਟਿਵਾ ਦੇ ਨਾ ਤਾਂ ਅੱਗੇ ਕੋਈ ਨੰਬਰ ਲਿਖਿਆ ਹੈ ਤੇ ਨਾ ਹੀ ਪਿੱਛੇ। ਜਿਸ ਤੋਂ ਬਾਅਦ ਪੁਲਸ ਉਸਨੂੰ ਜਾਂਚ ਲਈ ਥਾਣੇ ਲੈ ਗਈ।
ਥਾਣਾ ਨੰਬਰ 2 ਦੇ ਏ. ਐੱਸ. ਆਈ. ਸੁਖਦੇਵ ਸਿੰਘ ਨੇ ਦੱਸਿਆ ਕਿ ਵਿਨੇ ਜਿਊਲਰ ਦੇ ਮਾਲਕ ਸੁਸ਼ੋਭਿਤ ਚੱਢਾ ਨੇ ਪੁਲਸ ਨੂੰ ਦਿੱਤੀ ਸ਼ਿਕਾਇਤ ਵਿਚ ਦੋਸ਼ ਲਾਇਆ ਕਿ ਅੱਜ ਸ਼ਾਮ ਇਕ ਔਰਤ ਉਸਦੀ ਦੁਕਾਨ 'ਤੇ ਆਈ ਤੇ ਗਹਿਣੇ ਦਿਖਾਉਣ ਲਈ ਕਹਿਣ ਲੱਗੀ। ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਔਰਤ ਨੂੰ ਗਹਿਣੇ ਦਿਖਾਏ। ਔਰਤ ਨੇ ਜਿਊਲਰ ਕੋਲੋਂ ਉਸਦਾ ਵਿਜ਼ਿਟਿੰਗ ਕਾਰਡ ਮੰਗਿਆ। ਜਿਵੇਂ ਹੀ ਉਹ ਆਪਣਾ ਵਿਜ਼ਿਟਿੰਗ ਕਾਰਡ ਲੈਣ ਗਿਆ ਤਾਂ ਇੰਨੇ ਵਿਚ ਔਰਤ ਨੇ ਇਕ ਚੇਨ ਚੋਰੀ ਕਰਕੇ ਲੁਕੋ ਲਈ ਤੇ ਬਾਹਰ ਜਾਣ ਲੱਗੀ। ਜਿਊਲਰ ਨੂੰ ਸ਼ੱਕ ਹੋਇਆ ਤਾਂ ਉਨ੍ਹਾਂ ਨੇ ਔਰਤ ਨੂੰ ਕਾਬੂ ਕਰ ਉਸਦੇ ਹੱਥੋਂ ਚੇਨ ਬਰਾਮਦ ਕਰ ਲਈ। ਜਿਊਲਰ ਨੇ ਦੋਸ਼ ਲਾਇਆ ਕਿ ਉਸਤੋਂ ਬਾਅਦ ਉਕਤ ਔਰਤ ਉਸ ਨਾਲ ਝਗੜਦੀ ਹੋਈ ਹੰਗਾਮਾ ਕਰਕੇ ਆਪਣੀ ਐਕਟਿਵਾ ਛੱਡ ਚਲੀ ਗਈ। ਏ. ਐੱਸ. ਆਈ. ਸੁਖਦੇਵ ਸਿੰਘ ਨੇ ਦੱਸਿਆ ਕਿ ਫਿਲਹਾਲ ਪੁਲਸ ਨੇ ਔਰਤ ਦੀ ਐਕਟਿਵਾ ਕਬਜ਼ੇ ਵਿਚ ਲੈ ਲਈ ਹੈ ਤੇ ਪੁਲਸ ਆਲੇ-ਦੁਆਲੇ ਲੱਗੇ ਸੀ. ਸੀ. ਟੀ. ਵੀ. ਕੈਮਰਿਆਂ ਦੀ ਜਾਂਚ ਕਰ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਜਾਂਚ ਵਿਚ ਜੇਕਰ ਕੋਈ ਦੋਸ਼ੀ ਪਾਇਆ ਗਿਆ ਤਾਂ ਉਸ ਖਿਲਾਫ ਬਣਦੀ ਕਾਰਵਾਈ ਕੀਤੀ ਜਾਵੇਗੀ।
ਨਗਰ ਕੌਂਸਲ ਪੱਟੀ ਨੇ ਸ਼ਹਿਰ 'ਚੋਂ ਨਾਜਾਇਜ਼ ਕਬਜ਼ੇ ਹਟਾਏ
NEXT STORY 
