ਨਵੀਂ ਦਿੱਲੀ : ਏਸ਼ੀਅਨ ਗੇਮਜ਼ 2026 ਦੇ 13ਵੇਂ ਦਿਨ ਭਾਰਤੀ ਐਥਲੀਟਾਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਦੇਸ਼ ਲਈ ਮੈਡਲਾਂ ਦੀ ਬਾਰਿਸ਼ ਕਰ ਦਿੱਤੀ। 13ਵੇਂ ਦਿਨ ਭਾਰਤ ਦੇ ਖਾਤੇ ਵਿੱਚ ਕੁੱਲ 6 ਗੋਲਡ (ਸੋਨ), 2 ਸਿਲਵਰ (ਚਾਂਦੀ) ਅਤੇ 2 ਬ੍ਰੌਂਜ਼ (ਕਾਂਸੀ) ਮੈਡਲ ਆਏ। ਇਸ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਭਾਰਤ ਕੁੱਲ 16 ਸੋਨ ਤਗਮਿਆਂ ਸਮੇਤ 76 ਮੈਡਲ ਜਿੱਤ ਕੇ ਮੈਡਲ ਸੂਚੀ ਵਿੱਚ 5ਵੇਂ ਸਥਾਨ 'ਤੇ ਪਹੁੰਚ ਗਿਆ ਹੈ। ਹੁਣ ਤੱਕ ਭਾਰਤ ਨੇ 16 ਗੋਲਡ, 25 ਸਿਲਵਰ ਅਤੇ 35 ਬ੍ਰੌਂਜ਼ ਮੈਡਲ ਆਪਣੇ ਨਾਮ ਕੀਤੇ ਹਨ।
ਮਹਿਲਾ ਹਾਕੀ ਟੀਮ ਦਾ ਇਤਿਹਾਸਕ ਕਾਰਨਾਮਾ
ਦਿਨ ਦੀ ਸਭ ਤੋਂ ਵੱਡੀ ਇਤਿਹਾਸਕ ਸਫ਼ਲਤਾ ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਦਿਵਾਈ। ਫਾਈਨਲ ਮੁਕਾਬਲੇ ਵਿੱਚ ਭਾਰਤ ਨੇ ਚੀਨ ਨੂੰ 1-0 ਨਾਲ ਹਰਾ ਕੇ ਸੋਨ ਤਗਮਾ ਜਿੱਤਿਆ। ਇਹ ਜਿੱਤ ਇਸ ਲਈ ਵੀ ਖ਼ਾਸ ਹੈ ਕਿਉਂਕਿ ਮਹਿਲਾ ਹਾਕੀ ਟੀਮ ਨੇ 44 ਸਾਲਾਂ ਦੇ ਲੰਬੇ ਇੰਤਜ਼ਾਰ ਤੋਂ ਬਾਅਦ ਏਸ਼ੀਅਨ ਗੇਮਜ਼ ਵਿੱਚ ਗੋਲਡ ਮੈਡਲ ਹਾਸਲ ਕੀਤਾ ਹੈ। ਇਸ ਜਿੱਤ ਨਾਲ ਭਾਰਤੀ ਟੀਮ ਨੇ 2028 ਵਿੱਚ ਲਾਸ ਏਂਜਲਸ (ਅਮਰੀਕਾ) ਵਿਖੇ ਹੋਣ ਵਾਲੀਆਂ ਓਲੰਪਿਕ ਖੇਡਾਂ ਲਈ ਵੀ ਸਿੱਧਾ ਕੁਆਲੀਫਾਈ ਕਰ ਲਿਆ ਹੈ।
ਕੁਸ਼ਤੀ 'ਚ ਸੁਜੀਤ ਕਲਕਲ ਦਾ ਧਮਾਕੇਦਾਰ ਉਲਟਫੇਰ
ਕੁਸ਼ਤੀ ਦੇ 65 ਕਿੱਲੋਗ੍ਰਾਮ ਫ੍ਰੀਸਟਾਈਲ ਵਰਗ ਵਿੱਚ ਭਾਰਤ ਦੇ ਸਟਾਰ ਪਹਿਲਵਾਨ ਸੁਜੀਤ ਕਲਕਲ ਨੇ ਸ਼ਾਨਦਾਰ ਵਾਪਸੀ ਕੀਤੀ। ਫਾਈਨਲ ਮੈਚ ਵਿੱਚ ਉਹ ਤਾਜਿਕਸਤਾਨ ਦੇ ਪਹਿਲਵਾਨ ਤੋਂ 2-9 ਨਾਲ ਪਿੱਛੇ ਚੱਲ ਰਹੇ ਸਨ, ਪਰ ਆਖ਼ਰੀ ਪਲਾਂ ਵਿੱਚ ਲਗਾਤਾਰ ਤਿੰਨ ਟੇਕਡਾਊਨ ਕਰਕੇ ਉਨ੍ਹਾਂ ਨੇ ਮੁਕਾਬਲਾ 10-9 ਨਾਲ ਜਿੱਤ ਕੇ ਸੋਨ ਤਗਮਾ ਆਪਣੇ ਨਾਮ ਕਰ ਲਿਆ।
ਬਾਕਸਿੰਗ 'ਚ ਲਵਲੀਨਾ, ਪਰਵੀਨ ਅਤੇ ਅੰਕੁਸ਼ ਦਾ ਦਬਦਬਾ
ਬਾਕਸਿੰਗ ਰਿੰਗ ਵਿੱਚ ਵੀ ਭਾਰਤੀ ਮੁੱਕੇਬਾਜ਼ਾਂ ਨੇ ਦਮ ਦਿਖਾਇਆ। ਮਹਿਲਾ ਬਾਕਸਿੰਗ ਵਿੱਚ ਲਵਲੀਨਾ ਬੋਰਗੋਹੇਨ (75 ਕਿੱਲੋ) ਅਤੇ ਪਰਵੀਨ ਹੁੱਡਾ (65 ਕਿੱਲੋ) ਨੇ ਗੋਲਡ ਮੈਡਲ ਜਿੱਤੇ। ਇਸੇ ਤਰ੍ਹਾਂ ਪੁਰਸ਼ਾਂ ਦੇ 80 ਕਿੱਲੋ ਵਰਗ ਵਿੱਚ ਅੰਕੁਸ਼ ਪੰਗਾਲ ਨੇ ਸੋਨ ਤਗਮਾ ਜਿੱਤਿਆ।
ਤੀਰਅੰਦਾਜ਼ੀ 'ਚ ਵੀ ਮਿਲਿਆ ਇਤਿਹਾਸਕ ਗੋਲਡ
ਰੀਕਰਵ ਮਹਿਲਾ ਟੀਮ ਸਪਰਧਾ ਦੇ ਫਾਈਨਲ ਵਿੱਚ ਅੰਕਿਤਾ ਭਗਤ, ਕੀਰਤੀ ਅਤੇ ਕੁਮਕੁਮ ਮੋਹੋਦ ਦੀ ਟੀਮ ਨੇ ਦੱਖਣੀ ਕੋਰੀਆ ਨੂੰ ਹਰਾ ਕੇ ਇਤਿਹਾਸਕ ਸੋਨ ਤਗਮਾ ਜਿੱਤਿਆ। ਇਸ ਤੋਂ ਇਲਾਵਾ ਤੀਰਅੰਦਾਜ਼ੀ ਦੇ ਪੁਰਸ਼ ਰੀਕਰਵ ਟੀਮ ਅਤੇ ਮਿਕਸਡ ਰੀਕਰਵ ਟੀਮ ਈਵੈਂਟਸ ਵਿੱਚ ਭਾਰਤ ਨੂੰ ਦੋ ਸਿਲਵਰ ਮੈਡਲ ਵੀ ਪ੍ਰਾਪਤ ਹੋਏ।
ASIAN GAMES 2026 : ਭਾਰਤ ਦੀਆਂ ਧੀਆਂ ਨੇ ਹਾਕੀ 'ਚ ਜਿੱਤਿਆ GOLD
NEXT STORY 
