ਮਹਿਬੂਬਾ ਮੁਫਤੀ ਨੇ 1999 ’ਚ ਆਪਣੇ ਪਿਤਾ ਮੁਫਤੀ ਮੁਹੰਮਦ ਸਈਦ ਨਾਲ ਮਿਲ ਕੇ ਪੀਪਲਜ਼ ਡੈਮੋਕ੍ਰੇਟਿਕ ਪਾਰਟੀ (ਪੀ. ਡੀ. ਪੀ.) ਬਣਾਈ, ਜਿਸ ਦੀ ਉਹ ਹੁਣ ਪ੍ਰਧਾਨ ਹੈ। ਮੁਫਤੀ ਮੁਹੰਮਦ ਸਈਦ ਨੇ ਆਪਣੀ ਜ਼ਿੰਦਗੀ ’ਚ ਪਾਰਟੀ ’ਤੇ ਮਜ਼ਬੂਤੀ ਨਾਲ ਕੰਟਰੋਲ ਬਣਾਈ ਰੱਖਿਆ ਪਰ ਉਨ੍ਹਾਂ ਦੇ ਦਿਹਾਂਤ ਤੋਂ ਬਾਅਦ ਉਹ ਹਾਲਾਤ ਨਾ ਰਹੇ ਅਤੇ ਪਾਰਟੀ ਤੇ ਸਰਕਾਰ ’ਤੇ ਮਹਿਬੂਬਾ ਦਾ ਕੰਟਰੋਲ ਢਿੱਲਾ ਹੁੰਦਾ ਚਲਾ ਗਿਆ।
19 ਜੂਨ 2018 ਨੂੰ ਜੰਮੂ-ਕਸ਼ਮੀਰ ਦੇ ਮੁੱਖ ਮੰਤਰੀ ਦੇ ਅਹੁਦੇ ਤੋਂ ਮਹਿਬੂਬਾ ਦੇ ਅਸਤੀਫਾ ਦਿੰਦਿਆਂ ਹੀ ਉਨ੍ਹਾਂ ਦੀ ਕਾਰਜਸ਼ੈਲੀ ਨੂੰ ਲੈ ਕੇ ਪਾਰਟੀ ’ਚ ਅਸਹਿਮਤੀ ਦੀਆਂ ਆਵਾਜ਼ਾਂ ਉੱਠਣ ਲੱਗੀਆਂ ਅਤੇ ਪਾਰਟੀ ਦੀ ਬਦਹਾਲੀ ਲਈ ਮਹਿਬੂਬਾ ਦੀਆਂ ਨੀਤੀਆਂ ਅਤੇ ਪਰਿਵਾਰ ਦੇ ਪੋਸ਼ਣ ਨੂੰ ਜ਼ਿੰਮੇਵਾਰ ਠਹਿਰਾਉਂਦੇ ਹੋਏ ਕੁਝ ਹੀ ਸਮੇਂ ਦੇ ਵਕਫੇ ਮਗਰੋਂ ਪਾਰਟੀ ਦੇ ਕਈ ਸੀਨੀਅਰ ਆਗੂਆਂ ਨੇ ਬਗਾਵਤ ਕਰ ਕੇ ਪਾਰਟੀ ਨੂੰ ਅਲਵਿਦਾ ਕਹਿ ਦਿੱਤਾ।
ਮਹਿਬੂਬਾ ਦੀ ਸਰਕਾਰ ਡਿੱਗਣ ਤੋਂ ਬਾਅਦ ਹੁਣ ਤੱਕ ਕਈ ਸਾਬਕਾ ਮੰਤਰੀ, ਵਿਧਾਇਕ ਅਤੇ ਸੀਨੀਅਰ ਨੇਤਾ ਪਾਰਟੀ ਛੱਡ ਚੁੱਕੇ ਹਨ, ਜਿਨ੍ਹਾਂ ’ਚ ਪਾਰਟੀ ਦਾ ‘ਥਿੰਕ ਟੈਂਕ’ ਮੰਨੇ ਜਾਣ ਵਾਲੇ ਸਾਬਕਾ ਵਿੱਤ ਮੰਤਰੀ ਹਸੀਬ ਦਰਾਬੂ, ਅਲਤਾਫ ਬੁਖਾਰੀ, ਇਮਰਾਨ ਅੰਸਾਰੀ ਅਤੇ ਆਬਿਦ ਅੰਸਾਰੀ ਤੋਂ ਬਾਅਦ ਇਸ ਦੇ ਸੰਸਥਾਪਕ ਮੈਂਬਰ 3 ਵਾਰੀ ਵਿਧਾਇਕ ਅਤੇ 2 ਵਾਰੀ ਕੈਬਨਿਟ ਮੰਤਰੀ ਰਹੇ ਮੁਹੰਮਦ ਖਲੀਲ ਬੰਧ ਦਾ ਨਾਂ ਵੀ ਜੁੜ ਗਿਆ ਹੈ।
ਪੀ. ਡੀ. ਪੀ. ਨੂੰ ਅਲਵਿਦਾ ਕਹਿਣ ਵਾਲੇ ਸ਼੍ਰੀ ਖਲੀਲ ਪੰਜਵੇਂ ਮੰਤਰੀ ਹਨ। ਪੁਲਵਾਮਾ ਖੇਤਰ ’ਚ ਪਾਰਟੀ ਨੂੰ ਮਜ਼ਬੂਤ ਕਰਨ ’ਚ ਵੱਡੀ ਭੂਮਿਕਾ ਨਿਭਾਉਣ ਵਾਲੇ ਸ਼੍ਰੀ ਖਲੀਲ ਨੇ ਮਹਿਬੂਬਾ ਨੂੰ ਆਪਣੇ ਪੱਤਰ ’ਚ ਲਿਖਿਆ :
‘‘ਜਦੋਂ ਪਾਰਟੀ ਦੇ ਮੂਲ ਅਤੇ ਸੰਸਥਾਪਕ ਸਿਧਾਂਤਾਂ ਨਾਲ ਸਮਝੌਤਾ ਕੀਤਾ ਜਾ ਰਿਹਾ ਹੋਵੇ ਤਾਂ ਅਜਿਹੀ ਸਥਿਤੀ ’ਚ ਪਾਰਟੀ ’ਚ ਬਣੇ ਰਹਿਣਾ ਸਹੀ ਨਹੀਂ ਹੋਵੇਗਾ। ਸਾਬਕਾ ਮੁੱਖ ਮੰਤਰੀ ਮੁਫਤੀ ਮੁਹੰਮਦ ਸਈਦ ਦੇ ਦਿਹਾਂਤ ਤੋਂ ਬਾਅਦ ਤੋਂ ਹੀ ਪਾਰਟੀ ਖਤਮ ਹੋਣ ਵੱਲ ਵਧ ਗਈ ਹੈ। ਪੁਰਾਣੇ, ਚੁਣੇ ਹੋਏ ਅਤੇ ਤਜਰਬੇਕਾਰ ਲੋਕਾਂ ਨੂੰ ਨਜ਼ਰਅੰਦਾਜ਼ ਕੀਤਾ ਗਿਆ।’’
ਸ਼੍ਰੀ ਖਲੀਲ ਨੇ ਦੋਸ਼ ਲਗਾਇਆ ਹੈ ਕਿ ਵਿਧਾਇਕ ਅਤੇ ਮੰਤਰੀ ਦੇ ਰੂਪ ’ਚ ਉਨ੍ਹਾਂ ਦੇ ਕਾਰਜਕਾਲ ਦੌਰਾਨ ਉਨ੍ਹਾਂ ਨੂੰ ਕਈ ਵਾਰ ਅਪਮਾਨਿਤ ਕੀਤਾ ਗਿਆ ਅਤੇ ਪਾਰਟੀ ਛੱਡਣ ਦਾ ਫੈਸਲਾ ਉਨ੍ਹਾਂ ਲਈ ਆਸਾਨ ਨਹੀਂ ਸੀ।
ਉਨ੍ਹਾਂ ਨੇ ਪੱਤਰ ’ਚ ਅੱਗੇ ਲਿਖਿਆ, ‘‘ਸੁਆਰਥੀ ਅਨਸਰਾਂ ਦੇ ਕਹਿਣ ’ਤੇ ਕਈ ਤਬਾਹਕੁੰਨ ਫੈਸਲੇ ਲਏ ਗਏ। ਆਪਣੇ ਵਰਕਰਾਂ ਦੇ ਹਿੱਤ, ਉਨ੍ਹਾਂ ਦੇ ਭਵਿੱਖ ਅਤੇ ਉਨ੍ਹਾਂ ਦੇ ਸੁਪਨਿਆਂ ਦੀ ਖਾਤਿਰ ਉਨ੍ਹਾਂ ਨਾਲ ਸਲਾਹ-ਮਸ਼ਵਰਾ ਕਰ ਕੇ ਮੈਂ ਇਹ ਫੈਸਲਾ ਕੀਤਾ ਹੈ ਕਿ ਪੀ. ਡੀ. ਪੀ. ਨੂੰ ਅਲਵਿਦਾ ਕਹਿਣਾ ਹੀ ਨੈਤਿਕ ਤੌਰ ’ਤੇ ਉਚਿਤ ਹੈ।’’
28 ਜੁਲਾਈ ਨੂੰ 20ਵੇਂ ਸਥਾਪਨਾ ਦਿਵਸ ਦੇ ਕੁਝ ਦਿਨ ਪਹਿਲਾਂ ਖਲੀਲ ਦਾ ਪਾਰਟੀ ਛੱਡਣਾ ਪੀ. ਡੀ. ਪੀ. ਲਈ ਬਹੁਤ ਵੱਡਾ ਝਟਕਾ ਹੈ ਅਤੇ ਉਨ੍ਹਾਂ ਦੇ ਅਸਤੀਫੇ ਤੋਂ ਇਕ ਵਾਰ ਫਿਰ ਇਹ ਸਪੱਸ਼ਟ ਹੋ ਗਿਆ ਹੈ ਕਿ ਮਹਿਬੂਬਾ ਦੀਆਂ ਪਰਿਵਾਰ ਪੋਸ਼ਣ ਦੀਆਂ ਨੀਤੀਆਂ ਅਤੇ ਹੋਰ ਕਾਰਣਾਂ ਕਰਕੇ ਪਾਰਟੀ ਫੁੱਟ ਵੱਲ ਵਧ ਰਹੀ ਹੈ ਅਤੇ ਇਸ ਨੂੰ ਬਚਾਉਣਾ ਹੁਣ ਮਹਿਬੂਬਾ ਲਈ ਸੌਖਾ ਨਹੀਂ ਹੋਵੇਗਾ।
–ਵਿਜੇ ਕੁਮਾਰ
ਪਾਕਿਸਤਾਨ ਦੇ ਨਜ਼ਰੀਏ ’ਚ ਤਬਦੀਲੀ ਇਹ ਮਜਬੂਰੀ ਹੈ ਜਾਂ ਸਦਭਾਵਨਾ
NEXT STORY 
