ਨਵੀਂ ਦਿੱਲੀ — ਈਰਾਨ ਤੋੋਂ ਭੁਗਤਾਨ ਦੀ ਸਮੱਸਿਆ ਕਾਰਣ ਭਾਰਤ ਦੀ ਬਾਸਮਤੀ ਚੌਲ ਬਰਾਮਦ (ਐਕਸਪੋਰਟ) ’ਤੇ ਇਸ ਸਾਲ ਅਸਰ ਪਿਆ ਹੈ। ਭਾਰਤ ਦੀ ਬਾਸਮਤੀ ਚੌਲ ਬਰਾਮਦ ਚਾਲੂ ਵਿੱਤੀ ਸਾਲ ਦੇ ਸ਼ੁਰੂਆਤੀ 9 ਮਹੀਨਿਆਂ ’ਚ ਪਿਛਲੇ ਸਾਲ ਦੇ ਮੁਕਾਬਲੇ ਤਕਰੀਬਨ 3 ਫ਼ੀਸਦੀ ਘੱਟ ਗਈ ਹੈ। ਉਥੇ ਹੀ ਗੈਰ-ਬਾਸਮਤੀ ਚੌਲਾਂ ਦੀ ਬਰਾਮਦ ’ਚ 36.5 ਫ਼ੀਸਦੀ ਦੀ ਗਿਰਾਵਟ ਆਈ ਹੈ। ਗੈਰ-ਬਾਸਮਤੀ ਚੌਲਾਂ ਦੀ ਬਰਾਮਦ ਘਟਣ ਦੀ ਵਜ੍ਹਾ ਦੇ ਸਬੰਧ ’ਚ ਕਾਰੋਬਾਰੀ ਦੱਸਦੇ ਹਨ ਕਿ ਕੌਮਾਂਤਰੀ ਬਾਜ਼ਾਰ ’ਚ ਭਾਰਤ ਦਾ ਗੈਰ-ਬਾਸਮਤੀ ਚੌਲ ਹੋਰ ਦੇਸ਼ਾਂ ਦੇ ਚੌਲ ਦੇ ਮੁਕਾਬਲੇ ਮਹਿੰਗਾ ਹੈ, ਜਿਸ ਕਾਰਣ ਇਸ ਦੀ ਮੰਗ ਘੱਟ ਹੈ। ਹਾਲਾਂਕਿ ਇਹ ਗੱਲ ਬਾਸਮਤੀ ਚੌਲ ’ਤੇ ਲਾਗੂ ਨਹੀਂ ਹੁੰਦੀ ਹੈ ਕਿਉਂਕਿ ਬਾਸਮਤੀ ਚੌਲ ਦਾ ਭਾਰਤ ਦਾ ਆਪਣਾ ਇਕ ਬਾਜ਼ਾਰ ਹੈ, ਜਿੱਥੇ ਇਸ ਦਾ ਮੁਕਾਬਲਾ ਕਿਸੇ ਹੋਰ ਦੇਸ਼ ਨਾਲ ਨਹੀਂ ਹੈ।
ਅਪ੍ਰੈਲ ਤੋਂ ਦਸੰਬਰ ਤੱਕ ਲਗਭਗ 297.75 ਕਰੋਡ਼ ਡਾਲਰ ਮੁੱਲ ਦਾ ਬਾਸਮਤੀ ਚੌਲ ਬਰਾਮਦ
ਕੇਂਦਰੀ ਵਣਜ ਮੰਤਰਾਲਾ ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ ਚਾਲੂ ਵਿੱਤੀ ਸਾਲ 2019-20 ਦੇ ਸ਼ੁਰੂਆਤੀ 9 ਮਹੀਨੇ ਯਾਨੀ ਅਪ੍ਰੈਲ ਤੋਂ ਲੈ ਕੇ ਦਸੰਬਰ ਤੱਕ ਭਾਰਤ ਨੇ ਲਗਭਗ 297.75 ਕਰੋਡ਼ ਡਾਲਰ ਮੁੱਲ ਦਾ ਬਾਸਮਤੀ ਚੌਲ ਬਰਾਮਦ ਕੀਤਾ, ਜੋ ਪਿਛਲੇ ਵਿੱਤੀ ਸਾਲ ਦੀ ਇਸ ਮਿਆਦ ਦੇ ਲਗਭਗ 306.51 ਕਰੋਡ਼ ਡਾਲਰ ਦੇ ਮੁਕਾਬਲੇ 2.86 ਫ਼ੀਸਦੀ ਘੱਟ ਹੈ। ਉਥੇ ਹੀ ਗੈਰ-ਬਾਸਮਤੀ ਚੌਲ ਦੀ ਬਰਾਮਦ ਚਾਲੂ ਵਿੱਤੀ ਸਾਲ ’ਚ ਅਪ੍ਰੈਲ-ਦਸੰਬਰ ਦੌਰਾਨ 145.28 ਕਰੋਡ਼ ਡਾਲਰ ਮੁੱਲ ਦੀ ਹੋਈ ਹੈ, ਜੋ ਪਿਛਲੇ ਸਾਲ ਦੀ ਇਸ ਮਿਆਦ ਦੀ ਬਰਾਮਦ 228.96 ਕਰੋਡ਼ ਡਾਲਰ ਤੋਂ 36.55 ਫ਼ੀਸਦੀ ਘੱਟ ਹੈ।
ਈਰਾਨ ਤੋਂ ਭੁਗਤਾਨ ਨੂੰ ਲੈ ਕੇ ਆ ਰਹੀ ਸਮੱਸਿਆ ਨਾਲ ਐਕਸਪੋਰਟ ’ਚ ਆਈ ਕਮੀ
ਖੇਤੀਬਾੜੀ ਅਤੇ ਪ੍ਰੋਸੈੱਸਸਡ ਖੁਰਾਕੀ ਉਤਪਾਦ ਬਰਾਮਦ ਵਿਕਾਸ ਅਥਾਰਟੀ ਅਨੁਸਾਰ ਆਉਣ ਵਾਲੇ ਬਾਸਮਤੀ ਐਕਸਪੋਰਟ ਡਿਵੈੱਲਪਮੈਂਟ ਫਾਊਂਡੇਸ਼ਨ ਦੇ ਨਿਰਦੇਸ਼ਕ ਏ. ਕੇ. ਗੁਪਤਾ ਨੇ ਦੱਸਿਆ ਕਿ ਈਰਾਨ ਤੋਂ ਭੁਗਤਾਨ ਨੂੰ ਲੈ ਕੇ ਆ ਰਹੀ ਸਮੱਸਿਆ ਕਾਰਣ ਬਾਸਮਤੀ ਚੌਲ ਦੀ ਬਰਾਮਦ ਸੁਸਤ ਚੱਲ ਰਹੀ ਹੈ। ਈਰਾਨ ਬਾਸਮਤੀ ਚੌਲ ਦਾ ਮੁੱਖ ਖਰੀਦਦਾਰ ਹੈ ਅਤੇ ਅਮਰੀਕਾ ਵਲੋਂ ਈਰਾਨ ’ਤੇ ਪਾਬੰਦੀ ਲਾਏ ਜਾਣ ਕਾਰਣ ਉਥੋਂ ਦਾ ਵਪਾਰ ਪ੍ਰਭਾਵਿਤ ਹੋਇਆ ਹੈ। ਕਾਰੋਬਾਰੀਆਂ ਨੇ ਵੀ ਦੱਸਿਆ ਕਿ ਈਰਾਨ ਨੂੰ ਪਿਛਲੇ ਦਿਨੀਂ ਬਾਸਮਤੀ ਚੌਲ ਦੀ ਜੋ ਬਰਾਮਦ ਹੋਈ ਹੈ, ਉਸ ਦਾ ਭੁਗਤਾਨ ਨਹੀਂ ਹੋ ਰਿਹਾ ਹੈ, ਜਿਸ ਕਾਰਣ ਇਸ ਸਾਲ ਬਰਾਮਦ ’ਤੇ ਅਸਰ ਪਿਆ ਹੈ। ਬਾਸਮਤੀ ਚੌਲ ਕਾਰੋਬਾਰੀਆਂ ਦਾ ਅੰਦਾਜ਼ਾ ਹੈ ਕਿ ਇਸ ਸਾਲ ਦੇਸ਼ ’ਚ ਬਾਸਮਤੀ ਚੌਲ ਦਾ ਉਤਪਾਦਨ ਤਕਰੀਬਨ 80-82 ਲੱਖ ਟਨ ਹੋਵੇਗਾ।
ਥੋਕ ਮੁਦਰਾਸਫੀਤੀ ਜਨਵਰੀ 'ਚ ਵਧ ਕੇ 3.1 ਫੀਸਦੀ 'ਤੇ ਪਹੁੰਚੀ, ਦਸੰਬਰ 'ਚ ਸੀ 2.59 ਫੀਸਦੀ
NEXT STORY 
