ਨਵੀਂ ਦਿੱਲੀ— ਫਰਿੱਜ, ਏਅਰ ਕੰਡੀਸ਼ਨਰ, ਮਾਈਕ੍ਰੋਵੇਵ ਓਵਨ ਜਾਂ ਵਾਸ਼ਿੰਗ ਮਸ਼ੀਨ ਖਰੀਦਣਾ ਜਲਦ ਹੀ ਮਹਿੰਗਾ ਹੋਣ ਜਾ ਰਿਹਾ ਹੈ। ਇਨ੍ਹਾਂ ਦੀ ਕੀਮਤ 'ਚ 4 ਹਜ਼ਾਰ ਰੁਪਏ ਤੱਕ ਦਾ ਭਾਰੀ-ਭਰਕਮ ਵਾਧਾ ਹੋ ਸਕਦਾ ਹੈ। ਕੋਰੋਨਾ ਵਾਇਰਸ ਦੀ ਵਜ੍ਹਾ ਨਾਲ ਸਪਲਾਈ ਪ੍ਰਭਾਵਿਤ ਹੋਣ ਨਾਲ ਕੰਪੋਨੈਂਟਸ ਮਹਿੰਗੇ ਹੋ ਗਏ ਹਨ, ਜਿਸ ਕਾਰਨ ਇਲੈਕਟ੍ਰਾਨਿਕਸ ਕੰਪਨੀਆਂ ਕੀਮਤਾਂ ਵਧਾਉਣ ਦੀ ਯੋਜਨਾ ਬਣਾ ਰਹੀਆਂ ਹਨ। ਮਾਰਚ ਤੋਂ ਫਰਿੱਜ, AC, ਮਾਈਕ੍ਰੋਵੇਵ ਓਵਨ ਤੇ ਵਾਸ਼ਿੰਗ ਮਸ਼ੀਨ ਕੀਮਤਾਂ 'ਚ ਵਾਧਾ ਹੋ ਸਕਦਾ ਹੈ।
LG, ਵੋਲਟਸ, ਸੈਮਸੰਗ, ਹਾਇਰ ਤੇ ਪੈਨਾਸੋਨਿਕ ਸਮੇਤ ਸਾਰੇ ਵੱਡੇ ਨਿਰਮਾਤਾਵਾਂ ਨੇ ਕੀਮਤਾਂ 'ਚ 3 ਤੋਂ 5 ਫੀਸਦੀ ਦਾ ਵਾਧਾ ਕਰਨ ਦਾ ਫੈਸਲਾ ਕੀਤਾ ਹੈ। ਇਸ ਦਾ ਅਰਥ ਹੈ ਪ੍ਰੀਮੀਅਮ ਤੇ ਵੱਡੀ ਸਮਰੱਥਾ ਵਾਲੇ ਮਾਡਲਾਂ ਦੀ ਕੀਮਤ 'ਚ 3,000-4,000 ਰੁਪਏ ਦਾ ਵਾਧਾ ਹੋਵੇਗਾ।
ਕੰਪਨੀਆਂ ਦਾ ਕਹਿਣਾ ਹੈ ਕਿ ਚੀਨ 'ਚ ਉਤਪਾਦਨ ਘੱਟ ਹੋਣ ਕਾਰਨ ਕੰਪੋਨੈਂਟ ਦੀਆਂ ਕੀਮਤਾਂ ਵੱਧ ਗਈਆਂ ਹਨ ਅਤੇ ਸ਼ਿਪਮੈਂਟ ਦੀ ਲਾਗਤ ਵੀ ਵੱਧ ਗਈ ਹੈ। ਇਸ ਤੋਂ ਇਲਾਵਾ ਬਜਟ 'ਚ ਵੀ ਕੁਝ ਕੰਪੋਨੈਂਟਸ 'ਤੇ ਇੰਪੋਰਟ ਡਿਊਟੀ 2.5 ਫੀਸਦੀ ਵਧਾਈ ਗਈ ਹੈ, ਜਿਸ ਕਾਰਨ ਕੀਮਤਾਂ 'ਚ ਵਾਧਾ ਕਰਨਾ ਪੈ ਰਿਹਾ ਹੈ। ਬਜਟ-2020 'ਚ ਫਰਿੱਜਾਂ ਅਤੇ AC ਕੰਪਰੈਸਰਾਂ ਦੀ ਇੰਪੋਰਟ ਡਿਊਟੀ 10 ਤੋਂ ਵਧਾ ਕੇ 12.5 ਫੀਸਦੀ ਕੀਤੀ ਗਈ ਹੈ। ਉੱਥੇ ਹੀ, ਵਾਸ਼ਿੰਗ ਮਸ਼ੀਨ ਅਤੇ ਕੁਝ ਹੋਰ ਪ੍ਰਾਡਕਟਸ 'ਚ ਇਸਤੇਮਾਲ ਹੋਣ ਵਾਲੀਆਂ ਮੋਟਰਾਂ 'ਤੇ ਡਿਊਟੀ 7.5 ਫੀਸਦੀ ਤੋਂ ਵੱਧ ਕੇ 10 ਫੀਸਦੀ ਹੋ ਗਈ ਹੈ।
ਸੂਤਰਾਂ ਮੁਤਾਬਕ, LG ਤੇ ਸੈਮਸੰਗ ਵੱਲੋਂ ਮਾਰਚ 'ਚ ਮਾਈਕ੍ਰੋਵੇਵ ਓਵਨ ਅਤੇ ਵਾਸ਼ਿਗ ਮਸ਼ੀਨਾਂ ਦੀ ਕੀਮਤ 'ਚ 3-4 ਫੀਸਦੀ ਦਾ ਵਾਧਾ ਕਰ ਦਿੱਤਾ ਜਾਵੇਗਾ, ਜਦੋਂ ਕਿ AC ਤੇ ਫਰਿੱਜ ਕੀਮਤਾਂ 'ਚ ਵਾਧਾ ਇਸ ਪਿੱਛੋਂ ਹੋਵੇਗਾ। ਉੱਥੇ ਹੀ, ਵੋਲਟਸ AC ਮਾਰਚ 'ਚ 3 ਫੀਸਦੀ ਤੱਕ ਮਹਿੰਗੇ ਹੋ ਜਾਣਗੇ। ਪੈਨਾਸੋਨਿਕ ਵੀ AC ਕੀਮਤਾਂ 'ਚ ਇੰਨਾ ਹੀ ਵੱਧ ਕਰ ਸਕਦੀ ਹੈ। ਹਾਇਰ ਵੱਲੋਂ ਫਰਿੱਜਾਂ ਤੇ AC ਕੀਮਤਾਂ 'ਚ 2.5 ਤੋਂ 5 ਫੀਸਦੀ ਤੱਕ ਦਾ ਵਾਧਾ ਕੀਤਾ ਜਾ ਸਕਦਾ ਹੈ। ਇਨ੍ਹਾਂ ਕੰਪਨੀਆਂ ਨੇ ਪਿਛਲੇ ਹਫਤੇ ਮਾਰਚ ਤੋਂ ਟੈਲੀਵਿਜ਼ਨ ਦੀਆਂ ਕੀਮਤਾਂ 7-10 ਫੀਸਦੀ ਵਧਾਉਣ ਦਾ ਫੈਸਲਾ ਕੀਤਾ ਸੀ।
ਸ਼ੇਅਰ ਬਜ਼ਾਰ 'ਚ ਗਿਰਾਵਟ, ਸੈਂਸੈਕਸ 158 ਅੰਕ ਟੁੱਟਿਆ ਤੇ ਨਿਫਟੀ 11,639 ਦੇ ਪੱਧਰ 'ਤੇ ਖੁੱਲ੍ਹਿਆ
NEXT STORY 
