ਜਲੰਧਰ (ਚੋਪੜਾ)— ਇੰਪਰੂਵਮੈਂਟ ਟਰੱਸਟ ਦੇ ਟਰੱਸਟੀਆਂ ਦੇ ਕੋਰਮ ਨੂੰ ਪੂਰਾ ਕੀਤੇ ਬਿਨਾਂ ਹੀ ਚੇਅਰਮੈਨ ਦਲਜੀਤ ਸਿੰਘ ਆਹਲੂਵਾਲੀਆ ਨੇ ਬੀਤੇ ਦਿਨ ਮੀਟਿੰਗ ਕਰਕੇ ਟਰੱਸਟ ਦੀਆਂ ਵੱਖ-ਵੱਖ ਸਕੀਮਾਂ ਨਾਲ ਸਬੰਧਤ ਜ਼ਮੀਨਾਂ ਦੇ ਚੇਂਜ ਆਫ ਨੇਚਰ ਦੇ ਪ੍ਰਸਤਾਵ ਪਾਸ ਕਰ ਦਿੱਤੇ , ਜਦੋਂਕਿ ਟਰੱਸਟ ਦੇ 3 ਵਿਚੋਂ 2 ਟਰੱਸਟੀ ਗੈਰ-ਹਾਜ਼ਰ ਰਹੇ ਤੇ ਇਕ ਟਰੱਸਟੀ ਨੇ ਆਪਣੀ ਥਾਂ 'ਤੇ ਆਪਣੇ ਨੁਮਾਇੰਦੇ ਨੂੰ ਮੀਟਿੰਗ ਵਿਚ ਭੇਜ ਦਿੱਤਾ।ਚੇਅਰਮੈਨ ਆਹਲੂਵਾਲੀਆ ਦੀ ਪ੍ਰਧਾਨਗੀ ਹੇਠ ਹੋਈ ਮੀਟਿੰਗ ਵਿਚ ਟਰੱਸਟੀਆਂ ਦੀ ਗੈਰ-ਮੌਜੂਦਗੀ 'ਚ ਹੀ ਏਜੰਡੇ ਵਿਚ ਸ਼ਾਮਲ ਸਾਰੇ ਪ੍ਰਸਤਾਵਾਂ ਨੂੰ ਬਿਨਾਂ ਕਿਸੇ ਰੁਕਾਵਟ ਪਾਸ ਕਰ ਦਿੱਤਾ ਗਿਆ, ਜਿਨ੍ਹਾਂ ਨੂੰ ਹੁਣ 43-ਏ ਦੀ ਸੋਧ ਲਈ ਸਰਕਾਰ ਨੂੰ ਭੇਜਿਆ ਜਾਵੇਗਾ। ਜ਼ਿਕਰਯੋਗ ਹੈ ਕਿ ਕੈਪਟਨ ਸਰਕਾਰ ਨੇ ਆਪਣੇ ਢਾਈ ਸਾਲਾਂ ਦੇ ਕਾਰਜਕਾਲ ਦੌਰਾਨ ਟਰੱਸਟ ਦੇ ਪੋਲੀਟੀਕਲ ਚੇਅਰਮੈਨ ਦੀ ਨਿਯੁਕਤੀ ਨਹੀਂ ਕੀਤੀ ਸੀ, ਜਿਸ ਕਾਰਣ ਪਿਛਲੇ ਕੁਝ ਸਾਲਾਂ ਤੋਂ ਟਰੱਸਟ ਚੇਅਰਮੈਨ ਦਾ ਕੰਮ ਸੁਚਾਰੂ ਰੂਪ ਨਾਲ ਚਲਾਉਣ ਲਈ ਇਸ ਦਾ ਚਾਰਜ ਆਈ. ਏ. ਐੱਸ. ਅਧਿਕਾਰੀਆਂ ਦੇ ਸੁਪਰਦ ਕੀਤਾ ਜਾਂਦਾ ਰਿਹਾ ਹੈ।
ਪ੍ਰਸ਼ਾਸਨਿਕ ਚੇਅਰਮੈਨ ਦੇ ਤੌਰ 'ਤੇ ਅੰਤਿਮ ਵਾਰ ਨਿਗਮ ਕਮਿਸ਼ਨਰ ਦੀਪਰਵ ਲਾਕੜਾ ਨੇ ਜ਼ਿੰਮੇਵਾਰੀ ਸੰਭਾਲੀ ਸੀ। ਇਸ ਦੇ ਨਾਲ ਹੀ ਭ੍ਰਿਸ਼ਟਾਚਾਰ 'ਤੇ ਨਕੇਲ ਕੱਸਣ ਲਈ ਨਿਯਮ ਅਨੁਸਾਰ ਕੋਰਮ ਬਣਾਉਂਦਿਆਂ ਟਰੱਸਟ ਦੇ 3 ਪ੍ਰਸ਼ਾਸਨਿਕ ਟਰੱਸਟੀਆਂ ਦੀ ਨਿਯੁਕਤੀ ਕੀਤੀ ਸੀ ਤਾਂ ਜੋ ਟਰੱਸਟ ਦੇ ਕੰਮਾਂ ਵਿਚ ਪੂਰੀ ਪਾਰਦਰਸ਼ਿਤਾ ਵਰਤੀ ਜਾ ਸਕੇ। ਦਲਜੀਤ ਆਹਲੂਵਾਲੀਆ ਦੇ ਚੇਅਰਮੈਨ ਬਣਨ ਤੋਂ ਬਾਅਦ ਅਜੇ ਸਰਕਾਰ ਨੇ ਉਨ੍ਹਾਂ ਦੀ ਸਿਫਾਰਿਸ਼ 'ਤੇ ਟਰੱਸਟੀ ਨਹੀਂ ਲਾਏ ਹਨ, ਜਿਸ ਕਾਰਣ ਅਜੇ ਤਕ ਪ੍ਰਸ਼ਾਸਨਿਕ ਟਰੱਸਟੀ ਹੀ ਮੀਟਿੰਗ ਵਿਚ ਸ਼ਾਮਲ ਹੁੰਦੇ ਰਹੇ ਹਨ ਪਰ ਟਰੱਸਟ ਦੀ ਮੀਟਿੰਗ ਵਿਚ ਟਰੱਸਟੀ ਅਤੇ ਐੱਸ. ਡੀ. ਐੱਮ. ਮੌਜੂਦ ਨਹੀਂ ਰਹੇ ਤੇ ਨਾ ਹੀ ਦੂਜੇ ਟਰੱਸਟੀ ਅਤੇ ਐਕਸੀਅਨ ਬੀ. ਐਂਡ ਆਰ. ਸ਼ਾਮਲ ਹੋਏ, ਜਦੋਂਕਿ ਤੀਜੇ ਟਰੱਸਟੀ ਜ਼ਿਲਾ ਟਾਊਨ ਪਲਾਨਰ ਨੇ ਵੀ ਆਪਣੇ ਰੁਝੇਵਿਆਂ ਕਾਰਣ ਮੀਟਿੰਗ ਵਿਚ ਸ਼ਾਮਲ ਹੋਣ ਦੀ ਥਾਂ ਆਪਣੇ ਨੁਮਾਇੰਦੇ ਨੂੰ ਟਰੱਸਟ ਮੀਟਿੰਗ ਵਿਚ ਭੇਜ ਦਿੱਤਾ, ਜਦੋਂਕਿ ਉਕਤ ਨੁਮਾਇੰਦੇ ਤੋਂ ਇਲਾਵਾ ਟਰੱਸਟ ਦੀ ਸੈਕਟਰੀ ਅਤੇ ਈ. ਓ. ਸੁਰਿੰਦਰ ਕੁਮਾਰੀ ਤੋਂ ਇਲਾਵਾ ਐਕਸੀਅਨ ਸਤਿੰਦਰ ਸਿੰਘ, ਐਕਸੀਅਨ ਜਸਵੰਤ ਸਿੰਘ ਵੀ ਮੀਟਿੰਗ 'ਚ ਮੌਜੂਦ ਸਨ।
ਟਰੱਸਟੀਆਂ ਦਾ ਕੋਰਮ ਨਾ ਪੂਰਾ ਹੋਣ ਦੇ ਬਾਵਜੂਦ ਚੇਅਰਮੈਨ ਆਹਲੂਵਾਲੀਆ ਨੇ ਕਰੋੜਾਂ ਰੁਪਏ ਦੀਆਂ ਟਰੱਸਟ ਦੀਆਂ ਜਾਇਦਾਦਾਂ ਨਾਲ ਸਬੰਧਤ ਤਿਆਰ ਕੀਤੇ ਪ੍ਰਸਤਾਵਾਂ ਨੂੰ ਬਿਨਾਂ ਕਿਸੇ ਅੜਚਣ ਦੇ ਮਨਜ਼ੂਰ ਕਰਵਾ ਲਿਆ, ਜਿਨ੍ਹਾਂ ਵਿਚ ਟਰੱਸਟ ਦੀ 170 ਏਕੜ ਸੂਰਿਆ ਐਨਕਲੇਵ, 74.3 ਏਕੜ ਜੇ. ਪੀ. ਨਗਰ, 26.8 ਭਗਤ ਸਿੰਘ ਕਾਲੋਨੀ, 51.5 ਏਕੜ ਗੁਰੂ ਅਮਰਦਾਸ ਨਗਰ ਦੀਆਂ ਸਕੀਮਾਂ ਨਾਲ ਸਬੰਧਤ ਅਜਿਹੀਆਂ ਜਾਇਦਾਦਾਂ ਸ਼ਾਮਲ ਹਨ।
ਇਨ੍ਹਾਂ ਸਕੀਮਾਂ ਨੂੰ ਵਿਕਸਿਤ ਕਰਨ ਦੌਰਾਨ ਟਰੱਸਟ ਨੇ ਆਪਣੇ ਲੇਅ ਆਊਟ ਪਲਾਨ ਵਿਚ ਇਨ੍ਹਾਂ ਸਾਰੀਆਂ ਜ਼ਮੀਨਾਂ ਨੂੰ ਸਪੈਸ਼ਲ ਪਰਪਜ਼ ਲਈ ਰਿਜ਼ਰਵ ਰੱਖਿਆ ਸੀ ਪਰ ਹੁਣ ਇਨ੍ਹਾਂ ਰਿਜ਼ਰਵ ਜ਼ਮੀਨਾਂ ਦੇ ਚੇਂਜ ਆਫ ਨੇਚਰ ਦੇ ਪ੍ਰਸਤਾਵਾਂ ਨੂੰ ਬਿਨਾਂ ਕਿਸੇ ਅੜਿੱਕੇ ਪਾਸ ਕਰ ਦਿੱਤਾ ਕਿਉਂਕਿ ਮੀਟਿੰਗ ਵਿਚ ਕਿਸੇ ਵੀ ਪ੍ਰਸਤਾਵ 'ਤੇ ਆਪਣਾ ਇਤਰਾਜ਼ ਜਤਾਉਣ ਵਾਲੇ ਟਰੱਸਟੀ ਤਾਂ ਮੌਜੂਦ ਹੀ ਨਹੀਂ ਸਨ।
ਹੁਣ ਪ੍ਰਸ਼ਾਸਨਿਕ ਟਰੱਸਟੀਆਂ ਦੇ ਦਫਤਰ 'ਚ ਪ੍ਰਸਤਾਵਾਂ 'ਤੇ ਮਨਜ਼ੂਰੀ ਸਬੰਧੀ ਫਾਈਲ 'ਤੇ ਹੋਣਗੇ ਸਾਈਨ
ਇੰਪਰੂਵਮੈਂਟ ਟਰੱਸਟ ਦੇ ਪਾਲੀਟੀਕਲ ਚੇਅਰਮੈਨ ਦੀ ਨਿਯੁਕਤੀ ਹੋਣ ਤੋਂ ਬਾਅਦ ਪ੍ਰਸ਼ਾਸਨਿਕ ਟਰੱਸਟੀਆਂ ਨੇ ਵੀ ਟਰੱਸਟ ਦੇ ਕੰਮਾਂ 'ਚ ਰੁਚੀ ਦਿਖਾਉਣੀ ਬੰਦ ਕਰ ਦਿੱਤੀ ਹੈ। ਅੱਜ ਹੋਈ ਟਰੱਸਟ ਦੀ ਮੀਟਿੰਗ ਵਿਚ ਟਰੱਸਟੀਆਂ ਨੇ ਆਪਣੇ ਰੁਝੇਂਵਿਆਂ ਦਾ ਬਹਾਨਾ ਲਾ ਕੇ ਸ਼ਾਮਲ ਹੋਣ ਤੋਂ ਨਾਂਹ ਕਰ ਦਿੱਤੀ, ਭਾਵੇਂ ਜ਼ਿਲਾ ਟਾਊਨ ਪਲਾਨਰ ਨੇ ਆਪਣੇ ਇਕ ਅਧਿਕਾਰੀ ਨੂੰ ਨੁਮਾਇੰਦਾ ਬਣਾ ਕੇ ਮੀਟਿੰਗ 'ਚ ਭੇਜ ਦਿੱਤਾ, ਜਦੋਂਕਿ ਐੱਸ. ਡੀ. ਐੱਮ. ਅਤੇ ਐਕਸੀਅਨ ਬੀ. ਐਂਡ ਆਰ. ਤਾਂ ਮੀਟਿੰਗ ਵਿਚ ਆਏ ਹੀ ਨਹੀਂ।
ਟਰੱਸਟ ਸੂਤਰਾਂ ਅਨੁਸਾਰ ਅਧਿਕਾਰੀਆਂ ਨੇ ਜਦੋਂ ਦੋਵਾਂ ਪ੍ਰਸ਼ਾਸਨਿਕ ਟਰੱਸਟੀਆਂ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਦਾ ਕਹਿਣਾ ਸੀ ਕਿ ਮੀਟਿੰਗ ਦੇ ਏਜੰਡੇ 'ਚ ਸ਼ਾਮਲ ਪ੍ਰਸਤਾਵਾਂ ਨੂੰ ਪਾਸ ਕਰ ਕੇ ਫਾਈਲ ਸਾਡੇ ਕੋਲ ਭੇਜ ਦਿਓ, ਅਸੀਂ ਉਨ੍ਹਾਂ ਫਾਈਲਾਂ 'ਤੇ ਸਾਈਨ ਕਰ ਦੇਵਾਂਗੇ। ਹੁਣ ਦੋਵਾਂ ਅਧਿਕਾਰੀਆਂ ਕੋਲੋਂ ਬਾਅਦ ਵਿਚ ਉਨ੍ਹਾਂ ਦੇ ਦਫਤਰ ਜਾ ਕੇ ਸਾਈਨ ਕਰਵਾਏ ਜਾਣਗੇ ਜਾਂ ਕਹਿ ਲਈਏ ਕਿ ਸਾਈਨ ਕਰਵਾ ਲਏ ਗਏ ਹੋਣਗੇ ਪਰ ਬਿਨਾਂ ਕੋਰਮ ਪੂਰਾ ਕੀਤਿਆਂ ਕਰੋੜਾਂ ਰੁਪਏ ਦੀਆਂ ਜਾਇਦਾਦਾਂ ਸਬੰਧੀ ਪ੍ਰਸਤਾਵਾਂ 'ਤੇ ਸਹਿਮਤੀ ਦੀ ਮੋਹਰ ਲਾਏ ਜਾਣਾ ਟਰੱਸਟ ਦਫਤਰ ਵਿਚ ਚਰਚਾ ਦਾ ਵਿਸ਼ਾ ਬਣਿਆ ਰਿਹਾ।
ਟਰੱਸਟ ਮੀਟਿੰਗ 'ਚ ਇਨ੍ਹਾਂ ਸਪੈਸ਼ਲ ਪਰਪਜ਼ ਲਈ ਰਿਜ਼ਰਵ ਜ਼ਮੀਨਾਂ ਸਬੰਧੀ ਪ੍ਰਸਤਾਵ ਕੀਤੇ ਗਏ ਮਨਜ਼ੂਰ
ਟਰੱਸਟ ਮੀਟਿੰਗ ਏਜੰਡੇ ਵਿਚ ਸ਼ਾਮਲ ਜੇ. ਪੀ. ਨਗਰ ਸਕੀਮ ਵਿਚ ਪੁਲਸ ਥਾਣੇ ਕੋਲ 1 ਏਕੜ ਦੇ ਕਰੀਬ ਉਸ ਜ਼ਮੀਨ ਨੂੰ ਰੈਜ਼ੀਡੈਂਸ਼ੀਅਲ ਪਲਾਟ ਕੱਟਣ ਦਾ ਪ੍ਰਸਤਾਵ ਪਾਸ ਕੀਤਾ ਹੈ, ਜਿੱਥੇ ਟਰੱਸਟ ਨੇ ਜੇ. ਪੀ. ਨਗਰ ਸਕੀਮ ਕੱਟਣ ਦੌਰਾਨ ਉਥੇ 26 ਬੂਥ ਬਣਾਏ ਸਨ ਪਰ ਬੂਥਾਂ ਦੀ ਵਿਕਰੀ ਨਾ ਹੋ ਸਕਣ ਕਾਰਣ ਉਹ ਪੂਰੀ ਤਰ੍ਹਾਂ ਖਸਤਾਹਾਲ ਹੋ ਚੁੱਕੇ ਹਨ। ਹੁਣ ਇਸ ਜ਼ਮੀਨ ਨੂੰ ਖਾਲੀ ਕਰਵਾ ਕੇ ਉਥੇ 20 ਬਾਈ 80 ਵਰਗ ਫੁੱਟ ਦੇ 12 ਪਲਾਟ ਰਿਹਾਇਸ਼ੀ ਪਲਾਟਾਂ ਨੂੰ ਕੱਟ ਕੇ ਵੇਚੇ ਜਾਣਗੇ।
170 ਏਕੜ ਸੂਰਿਆ ਐਨਕਲੇਵ ਸਕੀਮ ਵਿਚ ਖਾਲੀ ਪਈ ਪ੍ਰਾਪਰਟੀ ਨੂੰ ਵੇਚਣ ਦਾ ਪ੍ਰਸਤਾਵ ਪਾਸ ਕੀਤਾ ਗਿਆ ਹੈ। ਇਸ ਜ਼ਮੀਨ ਨੂੰ ਮਿਕਸ ਪ੍ਰਾਪਰਟੀ ਦੇ ਤੌਰ 'ਤੇ ਵੇਚਣ ਦੇ ਪ੍ਰਸਤਾਵ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ, ਜਿਸ ਨੂੰ ਹੁਣ ਪੰਜਾਬ ਸਰਕਾਰ ਕੋਲ ਭੇਜਿਆ ਜਾਵੇਗਾ। ਇਸ ਜ਼ਮੀਨ ਨੂੰ ਖਰੀਦਣ ਵਾਲਾ ਅਲਾਟੀ ਇਸ ਨੂੰ ਰਿਹਾਇਸ਼ੀ ਤੇ ਕਮਰਸ਼ੀਅਲ ਦੋਵੇਂ ਤਰ੍ਹਾਂ ਵਰਤੋਂ 'ਚ ਲਿਆ ਸਕਦਾ ਹੈ।
26.8 ਏਕੜ ਭਗਤ ਸਿੰਘ ਕਾਲੋਨੀ ਸਕੀਮ ਵਿਚ ਨਾਲੇ ਕੋਲ ਖਾਲੀ ਪਈ 1 ਏਕੜ ਦੀ ਜ਼ਮੀਨ 'ਤੇ ਪੈਟਰੋਲ ਪੰਪ ਤੇ ਰੈਸਟੋਰੈਂਟ ਸਾਈਟ ਦੇ ਤੌਰ 'ਤੇ ਵੇਚਣ ਦੇ ਪ੍ਰਸਤਾਵ ਨੂੰ ਪ੍ਰਵਾਨਗੀ ਦਿੱਤੀ ਗਈ ਹੈ। ਇਸ ਤੋਂ ਇਲਾਵਾ ਇਸੇ ਕਾਲੋਨੀ ਵਿਚ ਇਕ ਪ੍ਰਾਇਮਰੀ ਸਕੂਲ ਲਈ ਰਿਜ਼ਰਵ ਰੱਖੀ ਗਈ 7773 ਵਰਗ ਗਜ਼ ਜ਼ਮੀਨ 'ਤੇ 100 ਵਰਗ ਗਜ਼ ਦੇ 18 ਅਤੇ 150 ਵਰਗ ਗਜ਼ ਦੇ 6 ਰਿਹਾਇਸ਼ੀ ਪਲਾਟ ਕੱਟ ਕੇ ਵੇਚੇ ਜਾਣਗੇ।
51.5 ਗੁਰੂ ਅਮਰਦਾਸ ਨਗਰ ਸਕੀਮ ਵਿਚ ਨੈਸ਼ਨਲ ਹਾਈਵੇ ਦੇ 100 ਮੀਟਰ ਨੂੰ ਨੋ ਕੰਸਟਰੱਕਸ਼ਨ ਜ਼ੋਨ ਦੇ ਨਿਯਮਾਂ ਵਿਚ ਬਦਲਾਅ ਤੋਂ ਬਾਅਦ 5.55 ਏਕੜ ਖਾਲੀ ਜ਼ਮੀਨ ਮਿਕਸ ਲੈਂਡ ਯੂਜ਼ ਦੇ ਤੌਰ 'ਤੇ ਵੇਚਣ ਦਾ ਪ੍ਰਸਤਾਵ ਵੀ ਪਾਸ ਕੀਤਾ ਗਿਆ ਹੈ।
ਐਕਸਟੈਂਸ਼ਨ ਖਤਮ ਹੋਣ ਉਪਰੰਤ ਠੇਕੇ 'ਤੇ ਰੱਖੇ ਜਾਣਗੇ ਟਰੱਸਟ ਦੇ ਸੀਨੀਅਰ ਅਸਿਸਟੈਂਟ ਤੇ ਡਰਾਈਵਰ
ਮੀਟਿੰਗ ਵਿਚ ਟਰੱਸਟ ਦੇ ਸੀਨੀਅਰ ਅਸਿਸਟੈਂਟ ਅਤੇ ਡਰਾਈਵਰ ਨੂੰ ਠੇਕੇ 'ਤੇ ਰੱਖੇ ਜਾਣ ਦੇ ਪ੍ਰਸਤਾਵਾਂ ਨੂੰ ਵੀ ਮਨਜ਼ੂਰੀ ਦਿੱਤੀ ਗਈ ਹੈ, ਜਿਨ੍ਹਾਂ ਦੀ 2 ਸਾਲਾਂ ਦੀ ਐਕਸਟੈਂਸ਼ਨ ਨਵੰਬਰ ਵਿਚ ਖਤਮ ਹੋ ਰਹੀ ਹੈ। ਟਰੱਸਟ ਦੇ ਸੀਨੀਅਰ ਅਸਿਸਟੈਂਟ ਮੁਖਤਿਆਰ ਸਿੰਘ ਤੇ ਡਰਾਈਵਰ ਜੱਟ ਰਾਮ ਜੋ ਕਿ ਸਾਲ 2017 ਵਿਚ ਰਿਟਾਇਰ ਹੋ ਗਏ ਸਨ ਪਰ ਉਨ੍ਹਾਂ ਦੀਆਂ ਸੇਵਾਵਾਂ ਨੂੰ ਦੇਖਦਿਆਂ ਹੋਇਆਂ ਟਰੱਸਟ ਨੇ ਸਰਕਾਰ ਕੋਲ ਉਨ੍ਹਾਂ ਦੀ 2 ਸਾਲ ਦੀ ਐਕਸਟੈਂਸ਼ਨ ਮਨਜ਼ੂਰ ਕਰਵਾਈ ਸੀ ਪਰ ਹੁਣ 2 ਸਾਲ ਵੀ ਪੂਰੇ ਹੋ ਜਾਣ 'ਤੇ ਟਰੱਸਟ ਦੋਵਾਂ ਨੂੰ ਲੜੀਵਾਰ 25000 ਤੇ 15000 ਮਹੀਨਾ ਤਨਖਾਹ 'ਤੇ ਠੇਕੇ 'ਤੇ ਰੱਖੇਗਾ। ਬਾਕੀ ਪ੍ਰਸਤਾਵਾਂ ਦੇ ਨਾਲ ਇਨ੍ਹਾਂ ਨੂੰ 2 ਸਾਲ ਲਈ ਠੇਕੇ 'ਤੇ ਰੱਖਣ ਦੇ ਪ੍ਰਸਤਾਵ ਨੂੰ ਵੀ ਅਪਰੂਵਲ ਲਈ ਸਰਕਾਰ ਕੋਲ ਭੇਜਿਆ ਜਾਵੇਗਾ।
ਜਲਦੀ ਹੀ ਜਲੰਧਰ ਦੀਆਂ ਸੜਕਾਂ 'ਤੇ ਉਤਰੇਗੀ ਨਿਗਮ ਦੀ ਆਪਣੀ ਸਵੀਪਿੰਗ ਮਸ਼ੀਨ
NEXT STORY 
