ਜਲੰਧਰ (ਗੁਲਸ਼ਨ)— ਬੀਤੇ ਦਿਨ ਸਿਟੀ ਰੇਲਵੇ ਸਟੇਸ਼ਨ 'ਤੇ ਇਕ ਮਾਲ ਗੱਡੀ ਦੇ ਪਹੀਏ ਪਟੜੀ ਤੋਂ ਉਤਰ ਗਏ। ਸੂਚਨਾ ਮਿਲਦੇ ਹੀ ਰੇਲਵੇ ਨਾਲ ਸਬੰਧਤ ਵਿਭਾਗਾਂ ਦੇ ਇੰਚਾਰਜ ਮੌਕੇ 'ਤੇ ਪਹੁੰਚੇ ਅਤੇ ਰਾਹਤ ਕਾਰਜ ਸ਼ੁਰੂ ਕਰਵਾਇਆ। ਐਕਸੀਡੈਂਟ ਰਿਲੀਫ ਟਰੇਨ ਨੂੰ ਵੀ ਮੌਕੇ 'ਤੇ ਬੁਲਾਉਣਾ ਪਿਆ। 3 ਘੰਟਿਆਂ ਦੀ ਮਿਹਨਤ ਤੋਂ ਬਾਅਦ ਮਾਲ ਗੱਡੀ ਦੇ ਵੈਗਨ ਨੂੰ ਦੋਬਾਰਾ ਪਟੜੀ 'ਤੇ ਲਿਆਂਦਾ ਗਿਆ, ਜਿਸ ਕਾਰਨ ਵੱਡਾ ਹਾਦਸਾ ਟਲ ਸਕਿਆ।
ਜਾਣਕਾਰੀ ਮੁਤਾਬਕ ਹੀਰਾ ਨਗਰ ਤੋਂ ਚੱਲ ਕੇ ਸਿਟੀ ਸਟੇਸ਼ਨ ਪਹੁੰਚ ਰਹੀ 48 ਵੈਗਨ ਦੀ ਇਕ ਮਾਲ ਗੱਡੀ, ਜਿਸ 'ਚ ਰੇਲ ਲਾਈਨਾਂ ਨਾਲ ਪੱਥਰ ਵੀ ਭਰੇ ਹੋਏ ਸਨ। ਲੱਕੜ ਵਾਲੇ ਪੁਲ ਤੋਂ ਥੋੜ੍ਹਾ ਅੱਗੇ ਯਾਰਡ ਵੱਲ ਜਾ ਰਹੀ ਸੀ ਤਾਂ ਮਾਲ ਗੱਡੀ ਦੇ ਅੱਠਵੇਂ ਵੈਗਨ ਦੇ ਪਹੀਏ ਪਟੜੀ ਤੋਂ ਉਤਰ ਗਏ। ਡਰਾਈਵਰ ਕਾਫੀ ਦੂਰ ਤਕ ਗੱਡੀ ਨੂੰ ਘੜੀਸਦਾ ਹੋਇਆ ਲੈ ਗਿਆ।
ਇਸ ਕਾਰਨ ਰੇਲ ਲਾਈਨਾਂ ਨਾਲ ਲੱਗੇ ਕਈ ਲਾਕ ਵੀ ਟੁੱਟ ਗਏ। ਰੇਲਵੇ ਕਰਮਚਾਰੀਆਂ ਨੇ ਇਸ ਦੀ ਸੂਚਨਾ ਸਟੇਸ਼ਨ ਪ੍ਰਧਾਨ ਆਰ. ਕੇ. ਬਹਿਲ ਨੂੰ ਦਿੱਤੀ, ਜਿਸ ਤੋਂ ਬਾਅਦ ਸੀਨੀਅਰ ਸੈਕਸ਼ਨ ਇੰਜੀਨੀਅਰ ਸਲਵਿੰਦਰ ਸਿੰਘ, ਸੀਨੀਅਰ ਸੈਕਸ਼ਨ ਇੰਜੀਨੀਅਰ (ਸਿਗਨਲ) ਵਿਨੀਤ, ਸੀ. ਡੀ. ਓ. ਉਪਕਾਰ ਸਮੇਤ ਕਈ ਹੋਰ ਅਧਿਕਾਰੀ ਵੀ ਮੌਕੇ 'ਤੇ ਪਹੁੰਚੇ। ਸਵੇਰੇ 6.15 ਵਜੇ ਹੋਏ ਹਾਦਸੇ ਤੋਂ ਬਾਅਦ ਕਰੀਬ 9 ਵਜੇ ਵੈਗਨ ਦੇ ਪਹੀਆਂ ਨੂੰ ਦੁਬਾਰਾ ਪਟੜੀ 'ਤੇ ਲਿਆਂਦਾ ਗਿਆ। ਇਸ ਤੋਂ ਬਾਅਦ ਅਧਿਕਾਰੀਆਂ ਵੱਲੋਂ ਘਟਨਾ ਦੀ ਸਮੀਖਿਆ ਕੀਤੀ ਗਈ।
ਸੂਤਰਾਂ ਮੁਤਾਬਕ ਵੈਗਨ ਵਿਚ ਭਰੇ ਪੱਥਰ ਬਰਾਬਰ ਨਹੀਂ ਸਨ। ਉਸ ਤੋਂ ਬਾਅਦ ਅਧਿਕਾਰੀਆਂ ਵਲੋਂ ਇਕ ਜੁਆਇੰਟ ਨੋਟ ਬਣਾਇਆ ਗਿਆ, ਜਿਸ ਵਿਚ ਸੀਨੀਅਰ ਸੈਕਸ਼ਨ ਇੰਜੀਨੀਅਰ ਪੀ. ਡਬਲਯੂ. ਆਈ. ਜਿਸ ਦੀ ਵਿਸ਼ੇਸ਼ ਤੌਰ 'ਤੇ ਡਿਊਟੀ ਮਾਲ ਗੱਡੀਆਂ ਦੇ ਸੰਚਾਲਨ 'ਤੇ ਹੁੰਦੀ ਹੈ, ਉਸ ਨੂੰ ਦੋਸ਼ੀ ਠਹਿਰਾਇਆ ਗਿਆ। ਅਧਿਕਾਰੀਆਂ ਵਲੋਂ ਇਸ ਸਬੰਧੀ ਰਿਪੋਰਟ ਬਣਾ ਕੇ ਮੰਡਲ ਅਧਿਕਾਰੀਆਂ ਨੂੰ ਭੇਜ ਦਿੱਤੀ ਗਈ ਹੈ।
ਯੂਥ ਕਾਂਗਰਸ ਪ੍ਰਧਾਨਗੀ ਲਈ ਆਨਲਾਈਨ ਨਾਮਜ਼ਦਗੀ ਰਾਤ 12 ਵਜੇ ਤਕ ਹੋਈ
NEXT STORY 
