ਮੁੰਬਈ (ਬਿਊਰੋ)– ਬਾਲੀਵੁੱਡ ਦੇ ਦਿੱਗਜ ਅਦਾਕਾਰ ਬੌਬੀ ਦਿਓਲ ਇਕ ਵਾਰ ਮੁੜ ਤੋਂ ਆਪਣੇ ਕਰੀਅਰ ਦੇ ਚੰਗੇ ਮੁਕਾਮ ’ਤੇ ਹਨ। ਉਨ੍ਹਾਂ ਨੂੰ ਹਾਲ ਹੀ ’ਚ ਬਹੁ-ਚਰਚਿਤ ਵੈੱਬ ਸੀਰੀਜ਼ ‘ਆਸ਼ਰਮ’ ਲਈ ‘ਦਾਦਾ ਸਾਹਿਬ ਫਾਲਕੇ’ ਐਵਾਰਡ ਨਾਲ ਸਨਮਾਨਿਤ ਕੀਤਾ ਗਿਆ ਹੈ। ਇਕ ਸਮਾਂ ਅਜਿਹਾ ਸੀ ਜਦੋਂ ਬੌਬੀ ਦਿਓਲ ਨੂੰ ਆਪਣੇ ਕਰੀਅਰ ’ਚ ਕਈ ਅਸਫਲਤਾਵਾਂ ਦਾ ਸਾਹਮਣਾ ਕਰਨਾ ਪਿਆ ਸੀ। ਉਸ ਸਮੇਂ ਬੌਬੀ ਕੋਲ ਬਾਲੀਵੁੱਡ ’ਚ ਕੰਮ ਵੀ ਘੱਟ ਸੀ। ਉਸ ਦਾ ਉਹ ਖਰਾਬ ਦੌਰ ਸੀ।
ਹੁਣ ਬੌਬੀ ਦਿਓਲ ਨੇ ਆਪਣੇ ਕਰੀਅਰ ਦੇ ਖਰਾਬ ਦੌਰ ਨੂੰ ਲੈ ਕੇ ਢੇਰ ਸਾਰੀਆਂ ਗੱਲਾਂ ਕੀਤੀਆਂ ਹਨ। ਬੌਬੀ ਨੇ ਦੱਸਿਆ ਕਿ ਜਦੋਂ ਉਹ ਹਰ ਸਮੇਂ ਘਰ ’ਚ ਰਹਿੰਦੇ ਸਨ ਤਾਂ ਉਨ੍ਹਾਂ ਦੇ ਬੱਚੇ ਇਹ ਸੋਚਣ ਲੱਗੇ ਸਨ ਕਿ ਉਨ੍ਹਾਂ ਦੇ ਪਿਤਾ ਕੁਝ ਨਹੀਂ ਕਰਦੇ ਹਨ। ਇਹ ਗੱਲ ਬੌਬੀ ਦਿਓਲ ਨੇ ਅੰਗਰੇਜ਼ੀ ਵੈੱਬਸਾਈਟ ਬਾਲੀਵੁੱਡ ਲਾਈਫ ਨੂੰ ਦਿੱਤੇ ਆਪਣੇ ਇਕ ਵੀਡੀਓ ਇੰਟਰਵਿਊ ’ਚ ਆਖੀ ਹੈ। ਉਨ੍ਹਾਂ ਨੇ ਆਪਣੀ ਜ਼ਿੰਦਗੀ ਦੇ ਅਹਿਮ ਮੋੜ ਨੂੰ ਲੈ ਕੇ ਵੀ ਗੱਲਬਾਤ ਕੀਤੀ ਤੇ ਦੱਸਿਆ ਕਿਹੜਾ ਸਮਾਂ ਉਨ੍ਹਾਂ ਦੀ ਜ਼ਿੰਦਗੀ ’ਚ ਅਹਿਮ ਸੀ।
ਬੌਬੀ ਦਿਓਲ ਨੇ ਕਿਹਾ, ‘ਮੇਰੀ ਜ਼ਿੰਦਗੀ ਦਾ ਟਰਨਿੰਗ ਪੁਆਇੰਟ ਉਹ ਸੀ, ਜਦੋਂ ਮੈਂ ਘਰ ’ਤੇ ਖਾਲੀ ਬੈਠਾ ਹੁੰਦਾ ਸੀ ਤੇ ਮੇਰੇ ਬੱਚੇ ਵੀ ਹੈਰਾਨ ਸਨ ਕਿ ਪਿਤਾ ਹਮੇਸ਼ਾ ਘਰ ’ਤੇ ਹੀ ਕਿਉਂ ਰਹਿੰਦੇ ਹਨ। ਇਹ ਉਹ ਪਲ ਸੀ, ਜਦੋਂ ਮੈਨੂੰ ਮਹਿਸੂਸ ਹੋਇਆ ਕਿ ਮੈਂ ਅਸਲ ’ਚ ਸਖਤ ਮਿਹਨਤ ਕਰਨੀ ਹੈ। ਇਸ ਇੰਡਸਟਰੀ ’ਚ ਆਉਣ ਵਾਲੇ ਸਾਰੇ ਨੌਜਵਾਨ ਲੜਕਿਆਂ ਤੇ ਲੜਕੀਆਂ ਨੂੰ ਕਹਿਣਾ ਚਾਹੁੰਦਾ ਹਾਂ ਕਿ ਇਸ ਇੰਡਸਟਰੀ ’ਚ ਟਿਕੇ ਰਹਿਣਾ ਬਹੁਤ ਸੌਖਾ ਨਹੀਂ ਹੈ। ਕਦੇ ਵੀ ਹਾਰ ਨਹੀਂ ਮੰਨਣੀ ਚਾਹੀਦੀ, ਖੁਦ ’ਤੇ ਭਰੋਸਾ ਰੱਖਣਾ ਚਾਹੀਦਾ ਹੈ। ਜੇਕਰ ਤੁਹਾਡੇ ਅੰਦਰ ਉਹ ਗੱਲ ਹੈ ਤਾਂ ਯਕੀਨ ਮੰਨੋ ਸਫਲਤਾ ਜ਼ਰੂਰ ਮਿਲੇਗੀ।’ ਬੌਬੀ ਕਹਿੰਦੇ ਹਨ ਕਿ ਇਹੀ ਸਭ ਉਨ੍ਹਾਂ ਨੇ ਸਿੱਖਿਆ ਹੈ।
‘ਦਾਦਾ ਸਾਹਿਬ ਫਾਲਕੇ’ ਐਵਾਰਡ ਹਾਸਲ ਕਰਨ ’ਤੇ ਬੌਬੀ ਦਿਓਲ ਨੇ ਆਪਣੀ ਖੁਸ਼ੀ ਜ਼ਾਹਿਰ ਕੀਤੀ। ਉਨ੍ਹਾਂ ਅੱਗੇ ਕਿਹਾ, ‘ਇਹ ਸਭ ਮੇਰੇ ਪ੍ਰਸ਼ੰਸਕਾਂ ਦੀ ਵਜ੍ਹਾ ਕਾਰਨ ਹੈ, ਜਿਨ੍ਹਾਂ ਨੇ ਮੈਨੂੰ ਇੰਨਾ ਪਿਆਰ ਦਿੱਤਾ ਤੇ ਉਨ੍ਹਾਂ ਦੀ ਵਜ੍ਹਾ ਕਾਰਨ ਇਹ ਸੰਭਵ ਹੋ ਸਕਿਆ। ਉਨ੍ਹਾਂ ਨੇ ਮੇਰੀ ਮਿਹਨਤ ਦੇਖੀ ‘ਆਸ਼ਰਮ’ ’ਚ ਮੇਰਾ ਕੰਮ ਦੇਖਿਆ। ਮੈਂ ਸੋਚਦਾ ਹਾਂ ਕਿ ਇਕ ਕਲਾਕਾਰ ਦੇ ਤੌਰ ’ਤੇ ਮੇਰੇ ਕੰਮ ’ਚ ਵੈਰੀਏਸ਼ਨ ਹੈ। ‘ਆਸ਼ਰਮ’ ਨੂੰ ਕਾਫੀ ਪਿਆਰ ਮਿਲਿਆ ਹੈ। ਮੈਨੂੰ ਐਵਾਰਡ ਨਾਲ ਸਨਮਾਨਿਤ ਕੀਤਾ ਗਿਆ ਹੈ, ਉਸ ਦਾ ਮੈਂ ਬਹੁਤ ਧੰਨਵਾਦੀ ਹਾਂ। ਮੈਂ ਜਦੋਂ ‘ਆਸ਼ਰਮ’ ਕਰ ਰਿਹਾ ਸੀ ਤਾਂ ਮੈਂ ਕਦੇ ਨਹੀਂ ਸੋਚਿਆ ਸੀ ਕਿ ਮੈਨੂੰ ਐਵਾਰਡ ਮਿਲੇਗਾ ਜਾਂ ਐਵਾਰਡ ਲਈ ਕੰਮ ਕਰ ਰਿਹਾ ਹਾਂ।’
ਨੋਟ– ਬੌਬੀ ਦਿਓਲ ਦੀ ‘ਆਸ਼ਰਮ’ ਵੈੱਬ ਸੀਰੀਜ਼ ’ਚ ਅਦਾਕਾਰੀ ਤੁਹਾਨੂੰ ਕਿਵੇਂ ਦੀ ਲੱਗੀ? ਕੁਮੈਂਟ ਕਰਕੇ ਜ਼ਰੂਰ ਦੱਸੋ।
ਸੋਨੂੰ ਸੂਦ ਦਾ ਮਨੁੱਖਤਾ ਲਈ ਇੱਕ ਹੋਰ ਪਰਉਪਕਾਰ, ਬਣਾਉਣਗੇ ਦੇਸ਼ ਦਾ ਸੱਭ ਤੋਂ ਵੱਡਾ ਬਲੱਡ ਬੈਂਕ
NEXT STORY 
