ਮੁੰਬਈ (ਬਿਊਰੋ)– ਮਸ਼ਹੂਰ ਨਿਰਦੇਸ਼ਕ, ਨਿਰਮਾਤਾ ਤੇ ਸਕ੍ਰਿਪਟ ਰਾਈਟਰ ਮਹੇਸ਼ ਭੱਟ ਨੇ ਬਾਲੀਵੁੱਡ ਨੂੰ ਹੁਣ ਤੱਕ ਬਹੁਤ ਸਾਰੀਆਂ ਸ਼ਾਨਦਾਰ ਤੇ ਹਿੱਟ ਫ਼ਿਲਮਾਂ ਦਿੱਤੀਆਂ ਹਨ। ਉਹ ਉਨ੍ਹਾਂ ਫ਼ਿਲਮ ਨਿਰਮਾਤਾਵਾਂ ’ਚੋਂ ਇਕ ਹਨ, ਜੋ ਬਾਕਸ ਤੋਂ ਬਾਹਰ ਦੀਆਂ ਫ਼ਿਲਮਾਂ ਬਣਾਉਂਦੇ ਹਨ। ਮਹੇਸ਼ ਭੱਟ ਦਾ ਜਨਮ 20 ਸਤੰਬਰ, 1948 ਨੂੰ ਮੁੰਬਈ ’ਚ ਹੋਇਆ ਸੀ। ਉਨ੍ਹਾਂ ਦੇ ਪਿਤਾ ਦਾ ਨਾਂ ਨਾਨਾਭਾਈ ਭੱਟ ਤੇ ਮਾਤਾ ਦਾ ਨਾਂ ਸ਼ਰੀਨ ਮੁਹੰਮਦ ਅਲੀ ਹੈ। ਮਹੇਸ਼ ਭੱਟ ਨੇ ਆਪਣੀ ਸਕੂਲੀ ਪੜ੍ਹਾਈ ਡੌਨ ਬੋਸਕੋ ਹਾਈ ਸਕੂਲ, ਮਾਟੁੰਗਾ ਤੋਂ ਕੀਤੀ।
ਆਪਣੇ ਸਕੂਲ ਦੇ ਦਿਨਾਂ ਦੌਰਾਨ ਉਨ੍ਹਾਂ ਨੇ ਪੈਸਾ ਕਮਾਉਣ ਲਈ ਗਰਮੀਆਂ ਦੀਆਂ ਛੁੱਟੀਆਂ ਦੌਰਾਨ ਨੌਕਰੀ ਸ਼ੁਰੂ ਕੀਤੀ। ਮਹੇਸ਼ ਭੱਟ ਨੇ 20 ਸਾਲ ਦੀ ਉਮਰ ’ਚ ਇਸ਼ਤਿਹਾਰਾਂ ਲਈ ਲਿਖਣਾ ਸ਼ੁਰੂ ਕੀਤਾ ਸੀ। ਮਹੇਸ਼ ਉਸ ਸਮੇਂ ਦੌਰਾਨ ਸਮਿਤਾ ਪਾਟਿਲ ਤੇ ਵਿਨੋਦ ਖੰਨਾ ਦੇ ਸਕੱਤਰ ਵਜੋਂ ਕੰਮ ਕਰਦੇ ਸਨ, ਜਦੋਂ ਉਹ ਸੰਘਰਸ਼ ਕਰ ਰਹੇ ਸਨ। ਉਨ੍ਹਾਂ ਨੇ ਫ਼ਿਲਮ ‘ਕੈਪਚਰ’ ਨਾਲ ਨਿਰਮਾਤਾ ਦੇ ਰੂਪ ’ਚ ਕੰਮ ਕਰਨਾ ਸ਼ੁਰੂ ਕੀਤਾ।
26 ਸਾਲ ਦੀ ਉਮਰ ’ਚ ਮਹੇਸ਼ ਭੱਟ ਨੇ ਬਾਲੀਵੁੱਡ ’ਚ ਫ਼ਿਲਮ ‘ਮੰਜ਼ੀਲੇਂ ਔਰ ਭੀ ਹੈਂ’ ਨਾਲ ਬਤੌਰ ਨਿਰਦੇਸ਼ਕ ਸ਼ੁਰੂਆਤ ਕੀਤੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਕਈ ਹਿੱਟ ਫ਼ਿਲਮਾਂ ਦਾ ਨਿਰਦੇਸ਼ਨ ਕੀਤਾ, ਜਿਨ੍ਹਾਂ ’ਚ ‘ਲਹੂ ਕੇ ਦੋ ਰੰਗ’, ‘ਅਰਥ’, ‘ਸਾਰਾਂਸ਼’, ‘ਨਾਮ’, ‘ਡੈਡੀ’, ‘ਆਸ਼ਿਕੀ’, ‘ਦਿਲ ਹੈ ਕੇ ਮਾਨਤਾ ਨਹੀਂ’ ਤੇ ‘ਹਮ ਹੈਂ ਰਾਹੀਂ ਪਿਆਰ ਕੇ’ ਸ਼ਾਮਲ ਹਨ। ਇੰਨਾ ਹੀ ਨਹੀਂ, ਮਹੇਸ਼ ਭੱਟ ਨੇ ਕਈ ਪ੍ਰਸਿੱਧ ਟੀ. ਵੀ. ਸੀਰੀਅਲਜ਼ ਜਿਵੇਂ ‘ਸਵਾਭਿਮਾਨ’, ‘ਕਭੀ-ਕਭੀ’ ਤੇ ‘ਨਾਮਕਰਨ’ ਦਾ ਨਿਰਦੇਸ਼ਨ ਵੀ ਕੀਤਾ ਹੈ।
ਇਹ ਖ਼ਬਰ ਵੀ ਪੜ੍ਹੋ : ਅਸ਼ਲੀਲ ਫ਼ਿਲਮਾਂ ਦੇ ਮਾਮਲੇ ’ਚ ਰਾਜ ਕੁੰਦਰਾ ਨੂੰ ਮਿਲੀ ਜ਼ਮਾਨਤ
ਫ਼ਿਲਮਾਂ ਤੋਂ ਇਲਾਵਾ ਮਹੇਸ਼ ਭੱਟ ਆਪਣੀ ਨਿੱਜੀ ਜ਼ਿੰਦਗੀ ਨੂੰ ਲੈ ਕੇ ਵੀ ਸੁਰਖ਼ੀਆਂ ’ਚ ਬਣੇ ਰਹਿੰਦੇ ਹਨ। ਆਪਣੇ ਕਾਲਜ ਦੇ ਦਿਨਾਂ ਦੌਰਾਨ ਉਨ੍ਹਾਂ ਨੂੰ ਲੋਰੀਅਨ ਬ੍ਰਾਈਟ ਨਾਮ ਦੀ ਇਕ ਕੁੜੀ ਨਾਲ ਪਿਆਰ ਹੋ ਗਿਆ। ਲੋਰੀਅਨ ਬ੍ਰਾਈਟ ਨੇ ਬਾਅਦ ’ਚ ਆਪਣਾ ਨਾਂ ਬਦਲ ਕੇ ਕਿਰਨ ਭੱਟ ਰੱਖ ਦਿੱਤਾ। ਕਿਰਨ, ਪੂਜਾ ਭੱਟ ਤੇ ਰਾਹੁਲ ਭੱਟ ਦੀ ਮਾਂ ਹੈ। ਹਾਲਾਂਕਿ ਇਹ ਰਿਸ਼ਤਾ ਉਦੋਂ ਟੁੱਟਣਾ ਸ਼ੁਰੂ ਹੋਇਆ, ਜਦੋਂ ਮਹੇਸ਼ ਭੱਟ ਤੇ ਮਸ਼ਹੂਰ ਅਦਾਕਾਰਾ ਪਰਵੀਨ ਬਾਬੀ ਦੇ ਅਫੇਅਰ ਦੀਆਂ ਖ਼ਬਰਾਂ ਸਾਹਮਣੇ ਆਉਣ ਲੱਗੀਆਂ।
ਜਦੋਂ ਪਰਵੀਨ ਬਾਬੀ ਨਾਲ ਉਨ੍ਹਾਂ ਦੇ ਰਿਸ਼ਤੇ ਵਿਗੜ ਗਏ, ਸੋਨੀ ਰਜ਼ਦਾਨ ਨੇ ਉਨ੍ਹਾਂ ਦੀ ਜ਼ਿੰਦਗੀ ’ਚ ਐਂਟਰੀ ਕੀਤੀ। ਸੋਨੀ ਨਾਲ ਅਫੇਅਰ ਦੇ ਸਮੇਂ ਮਹੇਸ਼ ਤੇ ਕਿਰਨ ਇਕੱਠੇ ਰਹਿੰਦੇ ਸਨ। ਮਹੇਸ਼ ਤੇ ਕਿਰਨ ਦਾ ਕਾਨੂੰਨੀ ਤੌਰ ’ਤੇ ਤਲਾਕ ਨਹੀਂ ਹੋਇਆ ਸੀ ਪਰ ਮਹੇਸ਼ ਨੇ ਸੋਨੀ ਰਾਜ਼ਦਾਨ ਨਾਲ ਵਿਆਹ ਕਰਵਾ ਲਿਆ। ਮਹੇਸ਼ ਨੇ ਇਸ ਵਿਆਹ ਲਈ ਮੁਸਲਿਮ ਧਰਮ ਅਪਣਾਇਆ ਸੀ। ਇਸ ਵਿਆਹ ਤੋਂ ਮਹੇਸ਼ ਦੇ ਦੋ ਬੱਚੇ ਹਨ, ਸ਼ਾਹੀਨ ਭੱਤਰੀ ਤੇ ਆਲੀਆ ਭੱਟ। ਆਲੀਆ ਭੱਟ ਅੱਜ ਬਾਲੀਵੁੱਡ ਦੀਆਂ ਸੁਪਰਹਿੱਟ ਅਦਾਕਾਰਾਂ ’ਚੋਂ ਇਕ ਹੈ।
ਨੋਟ– ਇਸ ਖ਼ਬਰ ’ਤੇ ਆਪਣੀ ਪ੍ਰਤੀਕਿਰਿਆ ਕੁਮੈਂਟ ਕਰਕੇ ਸਾਂਝੀ ਕਰੋ।
ਗਿੱਪੀ ਗਰੇਵਾਲ ਨੇ ਅਫਸਾਨਾ ਖ਼ਾਨ ਤੇ ਸਾਜ਼ ਦੀ ਜੋੜੀ ਨੂੰ ਦਿੱਤੀ ਵਧਾਈ, ਵਿਆਹ ਨੂੰ ਲੈ ਕੀਤਾ ਖ਼ਾਸ ਵਾਅਦਾ
NEXT STORY 
