ਮੁੰਬਈ (ਬਿਊਰੋ) : ਅਦਾਕਾਰਾ ਸ਼ਮਿਤਾ ਸ਼ੈੱਟੀ 2 ਫਰਵਰੀ ਯਾਨੀਕਿ ਅੱਜ ਆਪਣਾ 43ਵਾਂ ਜਨਮਦਿਨ ਮਨਾ ਰਹੀ ਹੈ। ਸ਼ਮਿਤਾ ਸ਼ੈੱਟੀ ਬਾਲੀਵੁੱਡ ਦੀ ਮਸ਼ਹੂਰ ਅਤੇ ਦਿੱਗਜ ਅਦਾਕਾਰਾ ਸ਼ਿਲਪਾ ਸ਼ੈਟੀ ਦੀ ਛੋਟੀ ਭੈਣ ਹੈ। ਸ਼ਮਿਤਾ ਦਾ ਜਨਮ 2 ਫਰਵਰੀ ਸਾਲ 1979 'ਚ ਮੰਗਲੌਰ 'ਚ ਹੋਇਆ ਸੀ। ਉਸ ਨੇ ਆਪਣੀ ਸਕੂਲੀ ਸਿੱਖਿਆ ਮੰਗਲੌਰ ਤੋਂ ਅਤੇ ਕਾਲਜ ਦੀ ਪੜ੍ਹਾਈ ਮੁੰਬਈ ਤੋਂ ਕੀਤੀ ਹੈ।
ਬਚਪਨ ਤੋਂ ਹੀ ਸੀ ਇਹ ਸ਼ੌਕ
ਬਚਪਨ ਤੋਂ ਹੀ ਫੈਸ਼ਨ ਦੀ ਸ਼ੌਕੀਨ ਸ਼ਮਿਤਾ ਸ਼ੈੱਟੀ ਨੇ ਮੁੰਬਈ ਦੇ SNDT ਕਾਲਜ ਤੋਂ ਫੈਸ਼ਨ ਡਿਜ਼ਾਈਨਿੰਗ ਦੀ ਪੜ੍ਹਾਈ ਕੀਤੀ ਹੈ। ਇਸ ਤੋਂ ਬਾਅਦ ਉਸ ਨੇ ਮਸ਼ਹੂਰ ਫੈਸ਼ਨ ਡਿਜ਼ਾਈਨਰ ਮਨੀਸ਼ ਮਲਹੋਤਰਾ ਨਾਲ ਕੰਮ ਕੀਤਾ, ਜਿਸ ਤੋਂ ਬਾਅਦ ਉਸ ਨੇ ਸਾਲ 2000 'ਚ ਆਦਿਤਿਆ ਚੋਪੜਾ ਦੀ ਫ਼ਿਲਮ 'ਮੁਹੱਬਤੇਂ' ਨਾਲ ਬਾਲੀਵੁੱਡ 'ਚ ਆਪਣਾ ਸਫ਼ਰ ਸ਼ੁਰੂ ਕੀਤਾ। ਸ਼ਮਿਤਾ ਸ਼ੈੱਟੀ ਨੂੰ ਇਸ ਮਲਟੀ-ਸਟਾਰਰ ਫ਼ਿਲਮ ਲਈ ਡੈਬਿਊ 'ਆਫ ਦਿ ਈਅਰ ਐਵਾਰਡ' ਮਿਲਿਆ।
ਲੋਕਾਂ ਦਾ ਦਿਲ ਜਿੱਤਣ 'ਚ ਰਹੀ ਅਸਫ਼ਲ
ਫ਼ਿਲਮ 'ਮੁਹੱਬਤੇਂ' ਤੋਂ ਬਾਅਦ ਸ਼ਮਿਤਾ ਸ਼ੈੱਟੀ ਨੇ 'ਅਗਨੀਪੰਖ', 'ਫਰੇਬ', 'ਜ਼ਹਿਰ', 'ਬੇਵਫਾ', 'ਕੈਸ਼' ਅਤੇ 'ਹਰੀ ਪੁੱਤਰ' ਵਰਗੀਆਂ ਫ਼ਿਲਮਾਂ 'ਚ ਕੰਮ ਕੀਤਾ ਪਰ ਉਹ ਆਪਣੀ ਵੱਡੀ ਭੈਣ ਵਾਂਗ ਦਰਸ਼ਕਾਂ ਦਾ ਦਿਲ ਨਹੀਂ ਜਿੱਤ ਸਕੀ। ਹੌਲੀ-ਹੌਲੀ ਸ਼ਮਿਤਾ ਸ਼ੈੱਟੀ ਪਰਦੇ ਤੋਂ ਗਾਇਬ ਹੋ ਗਈ। ਉਹ ਆਖਰੀ ਵਾਰ Zee5 ਦੀ ਵੈੱਬ ਸੀਰੀਜ਼ 'ਬਲੈਕ ਵਿਡੋ' 'ਚ ਨਜ਼ਰ ਆਈ ਸੀ। ਉਨ੍ਹਾਂ ਦੀ ਵੈੱਬ ਸੀਰੀਜ਼ ਨੂੰ ਵੀ ਦਰਸ਼ਕਾਂ ਦਾ ਜ਼ਿਆਦਾ ਪਿਆਰ ਨਹੀਂ ਮਿਲਿਆ।
ਰਾਜ ਕੁੰਦਰਾ ਨੇ ਸ਼ਮਿਤਾ ਨੂੰ ਦਿੱਤੇ ਸਨ 5000 ਰੁਪਏ
ਸ਼ਮਿਤਾ ਸ਼ੈੱਟੀ ਭੈਣ ਸ਼ਿਲਪਾ, ਮਾਂ ਸੁੰਦਾ ਅਤੇ ਜੀਜਾ ਰਾਜ ਕੁੰਦਰਾ ਨੂੰ ਆਪਣੇ ਪਰਿਵਾਰ 'ਚ ਸਭ ਤੋਂ ਨਜ਼ਦੀਕੀ ਮੰਨਦੀ ਹੈ। ਸ਼ਿਲਪਾ ਸ਼ੈੱਟੀ ਦੇ ਪਤੀ ਰਾਜ ਕੁੰਦਰਾ ਇੱਕ ਵੱਡੇ ਕਾਰੋਬਾਰੀ ਹਨ। ਅਜਿਹੇ 'ਚ ਜਦੋਂ ਉਨ੍ਹਾਂ ਦਾ ਵਿਆਹ ਹੋਇਆ ਤਾਂ ਸ਼ਮਿਤਾ ਸ਼ੈੱਟੀ ਨੇ ਰਾਜ ਕੁੰਦਰਾ ਦੇ ਜੁੱਤੇ ਚੋਰੀ ਕਰ ਲਏ। ਸ਼ਮਿਤਾ ਸ਼ੈੱਟੀ ਨੇ ਜੁੱਤੀ ਚੋਰੀ ਕਰਨ ਲਈ ਜੀਜੇ ਤੋਂ 1 ਲੱਖ ਰੁਪਏ ਦੀ ਮੰਗ ਕੀਤੀ ਸੀ ਪਰ ਰਾਜ ਕੁੰਦਰਾ ਨੇ ਕੁੱਲ 5000 ਰੁਪਏ ਦੇ ਦਿੱਤੇ। ਇਸ ਗੱਲ ਦਾ ਖੁਲਾਸਾ ਖੁਦ ਸ਼ਿਲਪਾ ਸ਼ੈੱਟੀ, ਰਾਜ ਕੁੰਦਰਾ ਅਤੇ ਸ਼ਮਿਤਾ ਸ਼ੈੱਟੀ ਨੇ 'ਦਿ ਕਪਿਲ ਸ਼ਰਮਾ ਸ਼ੋਅ' 'ਚ ਕੀਤਾ ਸੀ।
ਕਈ ਰਿਐਲਿਟੀ ਸ਼ੋਅਜ਼ 'ਚ ਆ ਚੁੱਕੀ ਹੈ ਨਜ਼ਰ
ਫ਼ਿਲਮਾਂ ਤੋਂ ਇਲਾਵਾ ਸ਼ਮਿਤਾ ਸ਼ੈੱਟੀ ਟੀ. ਵੀ. ਸ਼ੋਅਜ਼ 'ਚ ਵੀ ਨਜ਼ਰ ਆ ਚੁੱਕੀ ਹੈ। ਉਸ ਨੇ 'ਬਿੱਗ ਬੌਸ' ਦੇ ਸੀਜ਼ਨ 8 'ਚ ਮੁਕਾਬਲੇਬਾਜ਼ ਵਜੋਂ ਹਿੱਸਾ ਲਿਆ ਸੀ। ਹਾਲਾਂਕਿ, ਉਨ੍ਹਾਂ ਨੂੰ ਕੁਝ ਦਿਨਾਂ ਬਾਅਦ ਹੀ ਕਿਸੇ ਕਾਰਨ ਕਰਕੇ ਸ਼ੋਅ ਛੱਡਣਾ ਪਿਆ ਸੀ। ਜਿਸ ਤੋਂ ਬਾਅਦ ਸ਼ਮਿਤਾ ਸ਼ੈੱਟੀ ਵੀ ਡਾਂਸਿੰਗ ਸ਼ੋਅ 'ਝਲਕ ਦਿਖਲਾ ਜਾ' 'ਚ ਨਜ਼ਰ ਆਈ। ਉਹ ਪਿਛਲੇ ਸਾਲ 'ਬਿੱਗ ਬੌਸ' ਓਟੀਟੀ ਦਾ ਹਿੱਸਾ ਬਣੀ ਸੀ। ਸ਼ਮਿਤਾ ਸ਼ੈੱਟੀ ਭਲੇ ਹੀ ਸ਼ੋਅ ਨਾ ਜਿੱਤ ਸਕੀ ਹੋਵੇ ਪਰ ਉਸ ਨੇ ਰਾਕੇਸ਼ ਬਾਪਟ ਨੂੰ ਪਾਰਟਨਰ ਦੇ ਤੌਰ 'ਤੇ ਮੰਨਿਆ ਹੈ। ਪਿਛਲੇ ਦਿਨੀਂ ਉਸ ਨੇ 'ਬਿੱਗ ਬੌਸ 15' 'ਚ ਵੀ ਹਿੱਸਾ ਲਿਆ ਸੀ ਪਰ ਉਹ ਸ਼ੋਅ ਨਹੀਂ ਜਿੱਤ ਸਕੀ ਸੀ।
ਨੋਟ - ਇਸ ਖ਼ਬਰ ਸਬੰਧੀ ਤੁਹਾਡੀ ਕੀ ਹੈ ਰਾਏ, ਕੁਮੈਂਟ ਕਰਕੇ ਜ਼ਰੂਰ ਦੱਸੋ।
ਨਿਮਰਤ ਖਹਿਰਾ ਦੀ ਐਲਬਮ ‘ਨਿੰਮੋ’ ਸਾਰੇ ਸਟ੍ਰੀਮਿੰਗ ਪਲੇਟਫਾਰਮਜ਼ ’ਤੇ ਹੋਈ ਰਿਲੀਜ਼
NEXT STORY 
