ਨਵੀਂ ਦਿੱਲੀ : ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਦੀ ਦੁਨੀਆ ਵਿੱਚ ਕ੍ਰਾਂਤੀ ਲਿਆਉਣ ਵਾਲੀ ਅਤੇ ChatGPT ਬਣਾਉਣ ਵਾਲੀ ਦਿੱਗਜ ਕੰਪਨੀ ਓਪਨਏਆਈ (OpenAI) ਹੁਣ ਸਮਾਰਟਫੋਨ ਬਾਜ਼ਾਰ ਵਿੱਚ ਵੀ ਧਮਾਕੇਦਾਰ ਐਂਟਰੀ ਕਰਨ ਦੀ ਤਿਆਰੀ ਕਰ ਰਹੀ ਹੈ। ਤਾਜ਼ਾ ਸਪਲਾਈ-ਚੇਨ ਰਿਪੋਰਟਾਂ ਮੁਤਾਬਕ, ਕੰਪਨੀ ਨੇ ਆਪਣੇ ਪਹਿਲੇ ਸਮਾਰਟਫੋਨ ਦੇ ਨਿਰਮਾਣ ਅਤੇ ਅਸੈਂਬਲਿੰਗ ਲਈ ਐਪਲ (Apple) ਦੇ ਪ੍ਰਮੁੱਖ ਸਪਲਾਇਰ ਫੌਕਸਕੌਨ ਦੀ ਸਹਿਯੋਗੀ ਕੰਪਨੀ FIH Mobile ਨਾਲ ਹੱਥ ਮਿਲਾਇਆ ਹੈ।
ਚੀਨ ਦੀ ਪ੍ਰਮੁੱਖ ਵਿੱਤੀ ਅਖ਼ਬਾਰ 'ਸਿਕਿਓਰਿਟੀਜ਼ ਟਾਈਮਜ਼' ਅਤੇ 'ਕੈਲੀਅਨ ਪ੍ਰੈੱਸ' ਦੀਆਂ ਰਿਪੋਰਟਾਂ ਅਨੁਸਾਰ, FIH Mobile ਨੂੰ OpenAI ਦੇ ਇਸ ਸਮਾਰਟਫੋਨ ਪ੍ਰੋਜੈਕਟ ਦੇ ਆਰਡਰ ਮਿਲ ਚੁੱਕੇ ਹਨ। ਇਸ ਪ੍ਰੋਜੈਕਟ ਵਿੱਚ ਲਕਸਸ਼ੇਅਰ ਪ੍ਰਿਸੀਜ਼ਨ, ਲਿੰਗਯੀ ਆਈਟੈੱਕ ਅਤੇ AAC ਟੈਕਨਾਲੋਜੀਜ਼ ਵਰਗੀਆਂ ਵੱਡੀਆਂ ਕੰਪਨੀਆਂ ਦੇ ਸ਼ਾਮਲ ਹੋਣ ਦੀ ਵੀ ਚਰਚਾ ਹੈ। ਰਿਪੋਰਟਾਂ ਮੁਤਾਬਕ ਇਹ ਫੋਨ 2027 ਦੇ ਅਖੀਰ ਜਾਂ 2028 ਤੱਕ ਬਾਜ਼ਾਰ ਵਿੱਚ ਲਾਂਚ ਹੋ ਸਕਦਾ ਹੈ, ਹਾਲਾਂਕਿ OpenAI ਵੱਲੋਂ ਅਜੇ ਇਸ ਬਾਰੇ ਕੋਈ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਗਈ ਹੈ।
ਪ੍ਰਸਿੱਧ ਤਕਨੀਕੀ ਵਿਸ਼ਲੇਸ਼ਕ ਮਿੰਗ-ਚੀ ਕੁਓ ਅਤੇ ਲੀਕ ਹੋਈਆਂ ਜਾਣਕਾਰੀਆਂ ਮੁਤਾਬਕ, OpenAI ਦੇ ਇਸ ਫੋਨ ਵਿੱਚ ਬੇਹੱਦ ਸ਼ਕਤੀਸ਼ਾਲੀ ਹਾਰਡਵੇਅਰ ਦੇਖਣ ਨੂੰ ਮਿਲੇਗਾ। ਇਸ ਵਿੱਚ 2nm ਤਕਨੀਕ 'ਤੇ ਆਧਾਰਿਤ ਕਸਟਮ 'ਮੀਡੀਆਟੈੱਕ ਡਾਇਮੈਂਸਿਟੀ 9600' ਚਿੱਪਸੈੱਟ, ਨਵੀਂ ਪੀੜ੍ਹੀ ਦੀ LPDDR6 ਰੈਮ ਅਤੇ ਤੇਜ਼ ਰਫ਼ਤਾਰ UFS 5.0 ਸਟੋਰੇਜ ਮਿਲ ਸਕਦੀ ਹੈ। ਫੋਨ ਵਿੱਚ AI ਦੇ ਕੰਮਾਂ ਨੂੰ ਸੰਭਾਲਣ ਲਈ ਦੋ NPU (AI ਪ੍ਰੋਸੈਸਿੰਗ ਇੰਜਣ) ਹੋਣਗੇ। ਇਸ ਦਾ ਕੈਮਰਾ ਸਿਰਫ਼ ਤਸਵੀਰਾਂ ਖਿੱਚਣ ਤੱਕ ਸੀਮਤ ਨਹੀਂ ਰਹੇਗਾ, ਸਗੋਂ ਅਸਲ ਸਮੇਂ ਵਿੱਚ ਆਲੇ-ਦੁਆਲੇ ਦੀਆਂ ਚੀਜ਼ਾਂ ਨੂੰ ਪਛਾਣ ਕੇ ਉਨ੍ਹਾਂ ਦਾ ਵਿਸ਼ਲੇਸ਼ਣ ਵੀ ਕਰ ਸਕੇਗਾ।
ਮੌਜੂਦਾ ਸਮਾਰਟਫੋਨਾਂ ਵਿੱਚ AI ਸਿਰਫ਼ ਇੱਕ ਫੀਚਰ ਵਜੋਂ ਮੌਜੂਦ ਹੈ, ਪਰ OpenAI ਇੱਕ 'ਏਜੈਂਟਿਕ ਫੋਨ' ਤਿਆਰ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਇਸ ਵਿੱਚ 'AI ਏਜੰਟ' ਮੁੱਖ ਭੂਮਿਕਾ ਨਿਭਾਏਗਾ, ਜੋ ਯੂਜ਼ਰ ਦੀ ਗੱਲ ਸਮਝ ਕੇ ਵੱਖ-ਵੱਖ ਐਪਸ 'ਤੇ ਖ਼ੁਦ ਹੀ ਟਿਕਟ ਬੁੱਕ ਕਰਨ, ਸੁਨੇਹੇ ਭੇਜਣ ਜਾਂ ਹੋਰ ਜ਼ਰੂਰੀ ਕੰਮ ਪੂਰੇ ਕਰਨ ਦੇ ਸਮਰੱਥ ਹੋਵੇਗਾ।
GTA 6 ਨੇ ਤੋੜੇ ਸਾਰੇ ਰਿਕਾਰਡ, 24 ਘੰਟਿਆਂ 'ਚ ਹੀ 3.79 ਬਿਲੀਅਨ ਡਾਲਰ ਦੀ ਕੀਤੀ ਕਮਾਈ
NEXT STORY