ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਜਨਮ ਦਿਨ ਦੇ ਸਮਾਗਮਾਂ ’ਚ ਵੱਡੀ ਗਿਣਤੀ ’ਚ ਭਾਜਪਾ ਤੇ ਰਾਜਗ ਦੇ ਸਹਿਯੋਗੀ ਸ਼ਾਮਲ ਹੋਏ। ਆਂਧਰਾ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਐੱਨ. ਚੰਦਰਬਾਬੂ ਨਾਇਡੂ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਦੇ ਨਾਲ ਮੋਦੀ ਦੇ ਲੋਕ ਸਭਾ ਹਲਕੇ ਵਾਰਾਣਸੀ ’ਚ ਉਨ੍ਹਾਂ ਨੂੰ ਜਨਮ ਦਿਨ ’ਤੇ ਸ਼ੁਭਕਾਮਨਾਵਾਂ ਦੇਣ ਲਈ ਗਏ।
ਚਿਰਾਗ ਪਾਸਵਾਨ, ਅਨੁਪ੍ਰਿਆ ਪਟੇਲ ਤੇ ਜਨਤਾ ਦਲ (ਯੂ) ਦੇ ਨੇਤਾ ਵੀ ਜਸ਼ਨਾਂ ’ਚ ਵਿਸ਼ੇਸ਼ ਤੌਰ 'ਤੇ ਸ਼ਾਮਲ ਹੋਏ। ਪਰ ਇਕ ਘਟਨਾ ਦਿੱਲੀ ’ਚ ਚਰਚਾ ਦਾ ਵਿਸ਼ਾ ਬਣ ਗਈ। ਮਹਾਰਾਸ਼ਟਰ ਦੇ ਉਪ ਮੁੱਖ ਮੰਤਰੀ ਏਕਨਾਥ ਸ਼ਿੰਦੇ ਗੁਜਰਾਤ ਦੇ ਵਡਨਗਰ ਜੋ ਪ੍ਰਧਾਨ ਮੰਤਰੀ ਦਾ ਜਨਮ ਅਸਥਾਨ ਹੈ, ਵਿਖੇ ਕਿਉਂ ਗਏ? ਉਹ ਪ੍ਰਧਾਨ ਮੰਤਰੀ ਦੀ ਸਿਹਤ ਲਈ ਪ੍ਰਾਰਥਨਾ ਕਰਨ ਲਈ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੇ ਨਾਲ ਕਿਉਂ ਆਏ?
ਉਨ੍ਹਾਂ ਦੋਵਾਂ ਨੇ ਪੂਰਾ ਮਹੀਨਾ ਚੱਲਣ ਵਾਲੇ ਸੇਵਾ ਸੰਕਲਪ ਅਭਿਆਨ ਦੀ ਸ਼ੁਰੂਆਤ ਕੀਤੀ ਤੇ ਇਕ ਬਾਈਕ ਰੈਲੀ ਨੂੰ ਹਰੀ ਝੰਡੀ ਦਿਖਾਈ। ਸ਼ਿੰਦੇ ਨੇ ਆਪਣੇ ਭਾਸ਼ਣ ਦੀ ਸ਼ੁਰੂਅਾਤ ਗੁਜਰਾਤੀ ’ਚ ਕੀਤੀ। ਹਾਲਾਂਕਿ, ਭਾਜਪਾ ਦੀ ਜਨਮ ਦਿਨ ਦੀ ਕੋਰੀਓਗ੍ਰਾਫੀ ਤੋਂ ਜਾਣੂ ਲੋਕਾਂ ਦਾ ਕਹਿਣਾ ਹੈ ਕਿ ਇਹ ਕੋਈ ਆਖਰੀ ਸਮੇਂ ਦੀ ਸਾਜ਼ਿਸ਼ ਨਹੀਂ ਸੀ। ਪੀ. ਐੱਮ. ਓ. ਅਤੇ ਭਾਜਪਾ ਲੀਡਰਸ਼ਿਪ ਨੇ ਇਨ੍ਹਾਂ ਜਸ਼ਨਾਂ ਦੀ ਯੋਜਨਾ ਪਹਿਲਾਂ ਤੋਂ ਹੀ ਤੇ ਬਹੁਤ ਧਿਆਨ ਨਾਲ ਬਣਾਈ ਸੀ, ਜਿਸ ’ਚ ਸੁਧਾਰ ਦੀ ਕੋਈ ਗੁੰਜਾਇਸ਼ ਨਹੀਂ ਸੀ।
ਪਰ ਦਿੱਲੀ ਦਾ ਸਿਆਸੀ ਕਾਨਾਫੂਸੀ ਵਾਲਾ ਨੈੱਟਵਰਕ ਸ਼ਾਇਦ ਹੀ ਅਧਿਕਾਰਤ ਸਕ੍ਰਿਪਟ ਨਾਲ ਸਹਿਮਤ ਹੋਵੇ। ਇਹ ਕਿਹਾ ਜਾਂਦਾ ਹੈ ਕਿ ਸ਼ਿੰਦੇ ਆਪਣੇ ਪੁੱਤਰ ਸ਼੍ਰੀਕਾਂਤ ਲਈ ਮੋਦੀ ਸਰਕਾਰ ’ਚ ਜਗ੍ਹਾ ਸੁਰੱਖਿਅਤ ਕਰਨ ਲਈ ਉਤਸੁਕ ਸਨ। ਸ਼ਿੰਦੇ ਦੀ ਪਾਰਟੀ ਰਾਜਗ ਦੀ ਇਕ ਮੁੱਖ ਸਹਿਯੋਗੀ ਹੈ। ਭਾਜਪਾ ਕੋਲ ਮਹਾਰਾਸ਼ਟਰ ਦੇ ਆਪਣੇ ਸਾਥੀ ਨੂੰ ਸਹਿਜ ਰੱਖਣ ਦਾ ਕਾਰਨ ਹੈ।
ਇਸ ਲਈ ਵਡਨਗਰ ਦੇ ਨਜ਼ਾਰੇ ਨੇ ਅਸਲੀਅਤ ਤੋਂ ਵੱਧ ਗਰਮੀ ਪੈਦਾ ਕੀਤੀ ਹੋਵੇਗੀ। ਦਿੱਲੀ ਦੀ ਭਾਸ਼ਾ ’ਚ ਇਹ ਸਿਰਫ਼ ਇਕ ਛੋਟੀ ਜਿਹੀ ਗੱਲ ਹੋ ਸਕਦੀ ਹੈ ਹਾਲਾਂਕਿ ਇਹ ਕਾਫੀ ਸੋਚ ਸਮਝ ਕੇ ਬਣਾਈ ਗਈ ਯੋਜਨਾ ਹੈ।
ਸੂਬੇ ਦੇ 75 ਫ਼ੀਸਦੀ ਇਲਾਕੇ 'ਚ ਪਿਆ ਸੋਕਾ ! CM ਫੜਨਵੀਸ ਨੇ ਕੀਤੇ ਵੱਡੇ ਐਲਾਨ
NEXT STORY 
