ਅੰਮ੍ਰਿਤਸਰ (ਨੀਰਜ) : ਸੀ. ਬੀ. ਆਈ. ਵਲੋਂ ਹਾਲ ਹੀ 'ਚ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਚੰਡੀਗੜ੍ਹ 'ਚ 20 ਹਜ਼ਾਰ ਰੁਪਏ ਦੀ ਰਿਸ਼ਵਤ ਨਾਲ ਰੰਗੇ ਹੱਥੀਂ ਗ੍ਰਿਫਤਾਰ ਕੀਤਾ ਗਿਆ ਆਰ. ਟੀ. ਏ. ਦਫਤਰ ਚੰਡੀਗੜ੍ਹ ਅਤੇ ਕਥਿਤ ਏ. ਟੀ. ਓ. (ਅਸਿਸਟੈਂਟ ਟਰਾਂਸਪੋਰਟ ਅਫਸਰ) ਭੁਪਿੰਦਰ ਸਿੰਘ ਅਸਲ 'ਚ ਕੋਈ ਏ. ਟੀ. ਓ. ਨਹੀਂ ਸਗੋਂ ਆਰ. ਟੀ. ਏ. ਦਫਤਰ 'ਚ ਡਰਾਈਵਰ ਹੈ। ਜਾਣਕਾਰੀ ਅਨੁਸਾਰ ਭੁਪਿੰਦਰ ਸਿੰਘ ਅੰਮ੍ਰਿਤਸਰ ਦੇ ਮੌਜੂਦਾ ਆਰ. ਟੀ. ਏ. ਦਫਤਰ ਅਤੇ ਸਾਬਕਾ ਅਕਾਲੀ-ਭਾਜਪਾ ਗਠਜੋੜ ਸਰਕਾਰ ਦੇ ਸਮੇਂ ਡੀ. ਟੀ. ਓ. ਦਫਤਰ ਅੰਮ੍ਰਿਤਸਰ 'ਚ 4 ਸਾਲ ਤੋਂ ਵੱਧ ਦੇ ਕਾਰਜਕਾਲ ਵਿਚ ਡੀ. ਟੀ. ਓ. ਡਰਾਈਵਰ ਰਹਿ ਚੁੱਕਾ ਹੈ। ਡੀ. ਟੀ. ਓ. ਡਰਾਈਵਰ ਦੇ ਕਾਰਜਕਾਲ ਦੌਰਾਨ ਵੀ ਮਹਾਨਗਰ ਦੇ ਕਈ ਬੱਸ ਅਤੇ ਟਰੱਕ ਆਪ੍ਰੇਟਰਾਂ ਨੇ ਭੁਪਿੰਦਰ ਸਿੰਘ ਖਿਲਾਫ ਭ੍ਰਿਸ਼ਟਾਚਾਰ ਦੇ ਦੋਸ਼ ਲਾਏ ਸਨ ਅਤੇ ਕਈ ਵਾਰ ਡੀ. ਟੀ. ਓ. ਦਫਤਰ ਧਰਨਾ ਵੀ ਦਿੱਤਾ ਸੀ ਪਰ ਰਾਜਨੀਤਕ ਛਤਰ-ਛਾਇਆ ਕਾਰਨ ਉਸ ਦਾ ਤਬਾਦਲਾ ਹੋਣ ਤੋਂ ਬਾਅਦ ਵੀ ਫਿਰ ਡੀ. ਟੀ. ਓ. ਦਫਤਰ 'ਚ ਬਤੌਰ ਡਰਾਈਵਰ ਆਪਣਾ ਤਬਾਦਲਾ ਕਰਵਾ ਲੈਂਦਾ ਸੀ।
ਚੰਡੀਗੜ੍ਹ 'ਚ ਸੀ. ਬੀ. ਆਈ. ਵੱਲੋਂ ਗ੍ਰਿਫਤਾਰ ਕੀਤੇ ਗਏ ਆਰ. ਟੀ. ਏ. ਦਫਤਰ ਦੇ ਕÎਥਿਤ ਏ. ਟੀ. ਓ. ਅਤੇ ਡਰਾਈਵਰ ਭੁਪਿੰਦਰ ਸਿੰਘ ਦੀ ਗ੍ਰਿਫਤਾਰੀ ਤੋਂ ਬਾਅਦ ਕੈਪਟਨ ਸਰਕਾਰ ਵੱਲੋਂ ਹਾਲ ਹੀ 'ਚ ਟਰਾਂਸਪੋਰਟ ਮੰਤਰੀ ਤਾਇਨਾਤ ਕੀਤੀ ਗਈ ਰਜ਼ੀਆ ਸੁਲਤਾਨਾ ਨੇ ਗੰਭੀਰ ਨੋਟਿਸ ਲੈਂਦਿਆਂ ਪੂਰੇ ਪੰਜਾਬ ਦੇ ਆਰ. ਟੀ. ਏ. ਡਰਾਈਵਰਾਂ ਦਾ ਤਬਾਦਲਾ ਕਰ ਦਿੱਤਾ ਹੈ। ਇਨ੍ਹਾਂ ਤਬਾਦਲਿਆਂ 'ਚ ਅੰਮ੍ਰਿਤਸਰ ਆਰ. ਟੀ. ਏ. ਦਫਤਰ ਵਿਚ ਤਾਇਨਾਤ ਡਰਾਈਵਰ ਰਮਨ ਕੁਮਾਰ ਦਾ ਨਾਂ ਵੀ ਸ਼ਾਮਿਲ ਹੈ। ਟਰਾਂਸਪੋਰਟ ਮੰਤਰੀ ਵੱਲੋਂ ਪੰਜਾਬ ਦੇ ਸਾਰੇ ਪ੍ਰਮੁੱਖ ਜ਼ਿਲਿਆਂ ਦੇ ਆਰ. ਟੀ. ਏ. ਦਫਤਰਾਂ ਦੇ ਡਰਾਈਵਰਾਂ ਨੂੰ ਟਰਾਂਸਫਰ ਕੀਤਾ ਗਿਆ ਹੈ ਅਤੇ ਟਰਾਂਸਪੋਰਟ ਵਿਭਾਗ ਨੂੰ ਵੀ ਨਿਰਦੇਸ਼ ਦਿੱਤੇ ਗਏ ਹਨ ਕਿ ਉਹ ਆਰ. ਟੀ. ਏ. ਦਫਤਰਾਂ 'ਚ ਤਇਨਾਤ ਡਰਾਈਵਰਾਂ ਬਾਰੇ ਸਰਕਾਰ ਵੱਲੋਂ ਜੋ ਪਾਲਿਸੀ ਬਣਾਈ ਗਈ ਹੈ, ਦੀ ਪਾਲਣਾ ਕਰਨ।
'ਚੌਧਰੀ' ਬਣ ਕੇ ਬੈਠੇ ਸਨ ਆਰ. ਟੀ. ਏ. ਦਫਤਰਾਂ ਦੇ ਕੁਝ ਡਰਾਈਵਰ
ਸਾਬਕਾ ਗਠਜੋੜ ਸਰਕਾਰ ਦੇ ਸਮੇਂ ਦੌਰਾਨ ਕੁਝ ਜ਼ਿਲਿਆਂ ਦੇ ਡੀ. ਟੀ. ਓ. ਦਫਤਰਾਂ 'ਚ ਕੁਝ ਡਰਾਈਵਰ ਆਪਣੀ ਰਾਜਨੀਤਕ ਪਹੁੰਚ ਕਾਰਨ 'ਚੌਧਰੀ' ਬਣ ਕੇ ਬੈਠੇ ਹੋਏ ਸਨ ਅਤੇ ਇਕ ਹੀ ਜ਼ਿਲੇ 'ਚ ਸਾਲਾਂ ਤੋਂ ਤਾਇਨਾਤ ਸਨ। ਕੈਪਟਨ ਸਰਕਾਰ ਸੱਤਾ 'ਚ ਆਉਣ ਤੋਂ ਬਾਅਦ ਤਾਇਨਾਤ ਕੀਤੀ ਗਈ ਸਾਬਕਾ ਟਰਾਂਸਪੋਰਟ ਮੰਤਰੀ ਅਰੁਣਾ ਚੌਧਰੀ ਨੇ ਆਰ. ਟੀ. ਏ. ਦਫਤਰਾਂ ਵਿਚ ਫੈਲੇ ਭ੍ਰਿਸ਼ਟਾਚਾਰ ਨੂੰ ਖਤਮ ਕਰਨ ਲਈ ਇਕ ਵੱਡਾ ਕਦਮ ਚੁੱਕਿਆ ਅਤੇ ਡੀ. ਜੀ. ਪੀ. ਪੰਜਾਬ ਪੁਲਸ ਅਤੇ ਏ. ਡੀ. ਜੀ. ਪੀ. (ਸਕਿਓਰਿਟੀ) ਨੂੰ ਲਿਖਤੀ ਪੱਤਰ ਜ਼ਰੀਏ ਸਿਫਾਰਸ਼ ਕੀਤੀ ਸੀ ਕਿ ਪੰਜਾਬ ਦੇ ਸਾਰੇ ਆਰ. ਟੀ. ਏ. ਦਫਤਰਾਂ ਵਿਚ ਸੈਕਟਰੀ ਆਰ. ਟੀ. ਏ. ਨਾਲ ਤਾਇਨਾਤ ਡਰਾਈਵਰਾਂ ਅਤੇ ਗੰਨਮੈਨਾਂ ਨੂੰ ਸਥਾਈ ਨਹੀਂ ਰੱਖਿਆ ਜਾਵੇ ਅਤੇ ਜੋ ਡਰਾਈਵਰ ਅਤੇ ਗੰਨਮੈਨ ਸਾਲਾਂ ਤੋਂ ਆਰ. ਟੀ. ਏ. ਸੈਕਟਰੀ ਦੇ ਨਾਲ ਤਾਇਨਾਤ ਹਨ, ਉਨ੍ਹਾਂ ਨੂੰ ਤੁਰੰਤ ਬਦਲ ਦਿੱਤਾ ਜਾਵੇ। ਇਸ ਮਾਮਲੇ 'ਚ ਟਰਾਂਸਪੋਰਟ ਮੰਤਰੀ ਨੂੰ ਵਿਜੀਲੈਂਸ ਬਿਊਰੋ ਦੇ ਜ਼ਰੀਏ ਸੂਚਨਾ ਮਿਲੀ ਸੀ ਕਿ ਪੰਜਾਬ ਦੇ ਕਈ ਜ਼ਿਲਿਆਂ 'ਚ ਕਈ ਅਜਿਹੇ ਡਰਾਈਵਰ ਅਤੇ ਗੰਨਮੈਨ ਹਨ, ਜੋ ਪਹਿਲਾਂ ਡੀ. ਟੀ. ਓ. ਅਤੇ ਮੌਜੂਦਾ ਸਮੇਂ ਵਿਚ ਆਰ. ਟੀ. ਏ. ਸੈਕਟਰੀਆਂ ਦੇ ਨਾਲ ਸਾਲਾਂ ਤੋਂ ਤਾਇਨਾਤ ਹਨ। ਬਿਊਰੋ ਰਿਪੋਰਟ ਵਿਚ ਲਿਖਿਆ ਗਿਆ ਸੀ ਕਿ ਇਹ ਡਰਾਈਵਰ ਅਤੇ ਗੰਨਮੈਨ ਹੀ ਭ੍ਰਿਸ਼ਟਾਚਾਰ ਫੈਲਾਉਣ ਵਿਚ ਪ੍ਰਮੁੱਖ ਭੂਮਿਕਾ ਨਿਭਾਉਂਦੇ ਹਨ, ਇਸ ਲਈ ਕਿਸੇ ਵੀ ਡਰਾਈਵਰ ਜਾਂ ਗੰਨਮੈਨ ਨੂੰ ਸਥਾਈ ਤੌਰ 'ਤੇ ਸੈਕਟਰੀਜ਼ ਆਰ. ਟੀ. ਏ. ਨਾਲ ਤਾਇਨਾਤ ਨਾ ਕੀਤਾ ਜਾਵੇ, ਇਨ੍ਹਾਂ ਨੂੰ ਬਦਲ-ਬਦਲ ਕੇ ਰੱਖਿਆ ਜਾਵੇ।
ਹੁਸ਼ਿਆਰਪੁਰ 'ਚ ਆਰ. ਟੀ. ਏ. ਦੇ ਡਰਾਈਵਰ ਦੀ ਗ੍ਰਿਫਤਾਰੀ ਤੋਂ ਬਾਅਦ ਹੋਇਆ ਸੀ ਅਹਿਮ ਖੁਲਾਸਾ
ਵਿਜੀਲੈਂਸ ਬਿਊਰੋ ਨੂੰ ਡੀ. ਟੀ. ਓ. ਅਤੇ ਸੈਕਟਰੀ ਆਰ. ਟੀ. ਏ. ਦੇ ਨਾਲ ਤਾਇਨਾਤ ਡਰਾਈਵਰਾਂ ਅਤੇ ਗੰਨਮੈਨਾਂ ਵੱਲੋਂ ਫੈਲਾਏ ਜਾ ਰਹੇ ਭ੍ਰਿਸ਼ਟਾਚਾਰ ਦਾ ਉਸ ਸਮੇਂ ਪਤਾ ਲੱਗਾ ਸੀ, ਜਦੋਂ ਵਿਜੀਲੈਂਸ ਵਿਭਾਗ ਨੇ ਹੁਸ਼ਿਆਰਪੁਰ ਜ਼ਿਲੇ ਦੇ ਆਰ. ਟੀ. ਏ. ਦੇ ਡਰਾਈਵਰ ਨੂੰ ਰਿਸ਼ਵਤ ਲੈਂਦੇ ਹੋਏ ਰੰਗੇ ਹੱਥੀਂ ਗ੍ਰਿਫਤਾਰ ਕੀਤਾ ਸੀ। ਇਸ ਜਾਂਚ ਵਿਚ ਖੁਲਾਸਾ ਹੋਇਆ ਸੀ ਕਿ ਡੀ. ਟੀ. ਓ. ਅਤੇ ਆਰ. ਟੀ. ਏ. ਨਾਲ ਤਾਇਨਾਤ ਡਰਾਈਵਰ ਅਤੇ ਗੰਨਮੈਨ ਹੀ ਆਪਣੇ ਅਧਿਕਾਰੀਆਂ ਨੂੰ ਰਿਸ਼ਵਤ ਇਕੱਠੀ ਕਰ ਕੇ ਦਿੰਦੇ ਹਨ ਅਤੇ ਇਹ ਵੀ ਖੁਲਾਸਾ ਹੋਇਆ ਸੀ ਕਿ ਕਈ ਵੱਡੇ ਜ਼ਿਲਿਆਂ 'ਚ ਇਸ ਤਰ੍ਹਾਂ ਦੇ ਹਾਲਾਤ ਕਾਇਮ ਹਨ। ਡਰਾਈਵਰ ਅਤੇ ਗੰਨਮੈਨ ਵੱਡੇ ਟਰਾਂਸਪੋਰਟਰਾਂ, ਬੱਸ ਮਾਲਕਾਂ, ਟੈਕਸੀ ਚਾਲਕਾਂ ਅਤੇ ਟਰਾਂਸਪੋਰਟੇਸ਼ਨ ਨਾਲ ਜੁੜੇ ਹੋਰ ਕਾਰੋਬਾਰੀਆਂ ਤੋਂ ਰਿਸ਼ਵਤ ਦੀ ਰਕਮ ਇਕੱਠੀ ਕਰ ਕੇ ਅੱਗੇ ਦਿੰਦੇ ਸਨ।
ਟਰਾਂਸਪੋਰਟ ਮੰਤਰੀ ਦੇ ਆਦੇਸ਼ਾਂ ਖਿਲਾਫ ਹਾਈ ਕੋਰਟ ਚਲੇ ਗਏ ਸਨ ਡਰਾਈਵਰ
ਸਾਬਕਾ ਟਰਾਂਸਪੋਰਟ ਮੰਤਰੀ ਅਰੁਣਾ ਚੌਧਰੀ ਅਤੇ ਵਿਜੀਲੈਂਸ ਬਿਊਰੋ ਪੰਜਾਬ ਦੀ ਰਿਪੋਰਟ ਤੋਂ ਬਾਅਦ ਜਦੋਂ ਪੰਜਾਬ ਪੁਲਸ ਹਰਕਤ ਵਿਚ ਆਈ ਅਤੇ ਇਸ ਦੀ ਸ਼ੁਰੂਆਤ ਅੰਮ੍ਰਿਤਸਰ ਆਰ. ਟੀ. ਏ. ਦਫਤਰ ਤੋਂ ਕਰਦੇ ਇਥੇ ਪਿਛਲੇ 8-9 ਸਾਲਾਂ ਤੋਂ ਤਾਇਨਾਤ ਇਕ ਡਰਾਈਵਰ ਦਾ ਤਬਾਦਲਾ ਕੀਤਾ ਗਿਆ ਤਾਂ ਸਬੰਧਤ ਡਰਾਈਵਰ ਨੇ ਹਾਈ ਕੋਰਟ 'ਚ ਜਾ ਕੇ ਸਟੇਅ ਲੈ ਲਿਆ ਪਰ ਪੰਜਾਬ ਸਰਕਾਰ ਦੇ ਅਟਾਰਨੀ ਜਨਰਲ ਨੇ ਕੋਸ਼ਿਸ਼ ਕਰਦਿਆਂ ਅਦਾਲਤ ਨੂੰ ਦੱਸਿਆ ਕਿ ਜੇਕਰ ਡਰਾਈਵਰ ਨੇ ਅੰਮ੍ਰਿਤਸਰ ਵਿਚ ਹੀ ਰਹਿਣਾ ਹੈ ਤਾਂ ਉਸ ਨੂੰ ਆਰ. ਟੀ. ਏ. ਦਫਤਰ ਦੀ ਬਜਾਏ ਕਿਸੇ ਹੋਰ ਅਧਿਕਾਰੀ ਜਾਂ ਨੇਤਾ ਨਾਲ ਤਾਇਨਾਤ ਕਰ ਦਿੱਤਾ ਜਾਵੇ, ਵਾਰ-ਵਾਰ ਆਰ. ਟੀ. ਏ. ਦਫਤਰ ਵਿਚ ਹੀ ਤਾਇਨਾਤ ਰਹਿਣ ਦੀ ਅਜਿਹੀ ਕੀ ਮਜਬੂਰੀ ਹੈ, ਜਿਸ ਤੋਂ ਬਾਅਦ ਅਦਾਲਤ ਨੇ ਡਰਾਈਵਰ ਨੂੰ ਆਰ. ਟੀ. ਏ. ਦਫਤਰ ਦੀ ਬਜਾਏ ਅੰਮ੍ਰਿਤਸਰ ਵਿਚ ਕਿਸੇ ਹੋਰ ਅਧਿਕਾਰੀ ਨਾਲ ਤਾਇਨਾਤ ਕਰ ਦਿੱਤਾ ਸੀ।
ਕਾਂਗਰਸ ਨੂੰ ਕਿਸ ਮੋੜ 'ਤੇ ਲੈ ਆਈ ਸਿੱਧੂ ਤੇ ਸੋਨੀ ਦੀ ਨਾਰਾਜ਼ਗੀ
NEXT STORY 
