ਅੰਮ੍ਰਿਤਸਰ (ਮਮਤਾ)-‘ਡਾ. ਪਾਲ ਕੌਰ ਦੀਆਂ ਕਵਿਤਾਵਾਂ ਦੀ ਪੈਡ਼ ਬਹੁਤ ਡੁੰਘੀ ਹੈ ਤੇ ਇਹ ਪਿੱਤਰੀ ਸੱਤਾ ਵਿਰੁੱਧ ਆਵਾਜ਼ ਬੁਲੰਦ ਕਰਦੀ ਹੈ। ਇਹ ਰਿਸ਼ਤਿਆਂ ਦੀ ਟੁੱਟ-ਭੱਜ, ਆਰਥਿਕਤਾ ਤੇ ਸਾਡੇ ਸੁਭਾਅ ਨੂੰ ਦਰਸਾਉਂਦੀ ਸ਼ਬਦਾਵਲੀ ਜੋ ਸਾਡੇ ਸਮਿਆਂ ਦਾ ਰੂ-ਬ-ਰੂ ਪ੍ਰਤੀਬਿੰਦ ਹੈ ਤੇ ਇਸ ਦੀ ਭਾਵਨਾ ਨੂੰ ਲੋਕਾਂ ’ਚ ਪ੍ਰਚਾਰਨ ਤੇ ਪ੍ਰਸਾਰਨ ਦੀ ਲੋੜ ਹੈ।’ ਇਹ ਵਿਚਾਰ ਅੱਜ ਇਥੇ ਪੰਜਾਬੀ ਸਾਹਿਤ ਅਕਾਦਮੀ ਲੁਧਿਆਣਾ ਵੱਲੋਂ ਪ੍ਰਗਤੀਸ਼ੀਲ ਲੇਖਕ ਸੰਘ ਅੰਮ੍ਰਿਤਸਰ ਤੇ ਵਿਰਸਾ ਵਿਹਾਰ ਸੋਸਾਇਟੀ ਦੇ ਸਹਿਯੋਗ ਨਾਲ ਆਯੋਜਿਤ ਇਕ ਸਾਹਿਤਕ ਸਮਾਗਮ ’ਚ ਵਿਦਵਾਨ ਲੇਖਕ ਦੇਸ ਰਾਜ ਕਾਲੀ ਨੇ ਪ੍ਰਗਟ ਕੀਤੇ, ਜੋ ਡਾ. ਪਾਲ ਕੌਰ ਦੀ ਪੁਸਤਕ ‘ਹੁਣ ਤਕ’ ਨੂੰ ਲੋਕ ਅਰਪਿਤ ਕਰਨ ਦੇ ਰੂ-ਬ-ਰੂ ਸਮਾਗਮ ’ਚ ਵਿਸ਼ੇਸ਼ ਤੌਰ ’ਤੇ ਹਾਜ਼ਰ ਹੋਏ। ਵਿਰਸਾ ਵਿਹਾਰ ਦੇ ਨਾਨਕ ਸਿੰਘ ਨਾਵਲਿਸਟ ਸੈਮੀਨਾਰ ਹਾਲ ’ਚ ਹੋਏ ਇਸ ਗਹਿਰ-ਗੰਭੀਰ ਸਮਾਗਮ ’ਚ ਦੇਸ ਰਾਜ ਕਾਲੀ ਨੇ ਬਹੁਤ ਸਾਰੀਆਂ ਮਿੱਥਾਂ ਤੇ ਇਤਿਹਾਸ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਕਵਿਤਾ ਦੀ ਗੰਭੀਰਤਾ ਨੂੰ ਸਮਝਣਾ ਵਿਦਵਾਨਾਂ ਤੇ ਸਾਹਿਤ ਪ੍ਰੇਮੀਆਂ ਲਈ ਲਾਹੇਵੰਦ ਹੈ। ਇਸ ਮੌਕੇ ਡਾ. ਪਾਲ ਕੌਰ ਨੇ ਆਪਣੀ ਜ਼ਿੰਦਗੀ ਤੇ ਸਾਹਿਤਕ ਖੇਤਰ ਦੇ ਵਿਚਲੇ ਸਾਹਿਤਕ ਪਲਾਂ ਦਾ ਬਾਖੂਬੀ ਜ਼ਿਕਰ ਕੀਤਾ ਤੇ ਪੁਸਤਕ ਵਿਚਲੀਆਂ ਕਵਿਤਾਵਾਂ ਨੂੰ ਆਪਣੀ ਜ਼ਿੰਦਗੀ ਦਾ ਅਹਿਮ ਹਾਸਲ ਦੱਸਿਆ। ਇਸ ਪੁਸਤਕ ’ਚ ਡਾ. ਨਰੇਸ਼ ਕੁਮਾਰ ਬਟਾਲਾ, ਡਾ. ਹੀਰਾ ਸਿੰਘ ਰੰਧਾਵਾ ਖਾਲਸਾ ਕਾਲਜ, ਡਾ. ਇਕਬਾਲ ਕੌਰ ਸੌਂਦ, ਡਾ. ਸੁਨੀਤਾ ਸ਼ਰਮਾ, ਐੱਮ. ਫਿਲ. ਦੇ ਵਿਦਿਆਰਥੀ ਵਜ਼ੀਰ ਸਿੰਘ ਤੇ ਸ਼ਾਇਰ ਵਿਸ਼ਾਲ ਨੇ ਵੀ ਆਪਣੇ ਢੰਗ ਤੇ ਅਕੀਦੇ ਨਾਲ ਸਾਹਿਤਕ ਵਰਣਨ ਕੀਤਾ ਤੇ ਕਵਿਤਾਵਾਂ ਦੀ ਸਹਾਰਨਾ ਕੀਤੀ। ਸਮਾਗਮ ਦੇ ਆਰੰਭ ’ਚ ਸਭ ਨੂੰ ਜੀ ਆਇਆਂ ਸਾਹਿਤ ਅਕਾਦਮੀ ਦੇ ਮੀਤ ਪ੍ਰਧਾਨ ਭੁਪਿੰਦਰ ਸਿੰਘ ਸੰਧੂ ਨੇ ਕਿਹਾ ਤੇ ਇਸ ਪ੍ਰੋਗਰਾਮ ਦੀ ਸਾਰਥਿਕਤਾ ਬਾਰੇ ਜਾਣਕਾਰੀ ਦਿੱਤੀ। ਮੰਚ ਸੰਚਾਲਨ ਗੁਰਬਾਜ ਸਿੰਘ ਛੀਨਾ ਨੇ ਨਿਭਾਇਆ।ਇਸ ਮੌਕੇ ਰਾਜਵੰਤ ਬਾਜਵਾ, ਡਾ. ਇਕਬਾਲ ਕੌਰ, ਡਾ. ਰਾਣੀ, ਡਾ. ਸੰਦੀਪ ਕੌਰ, ਡਾ. ਰਵਿੰਦਰ ਕੌਰ, ਡਾ. ਬਿਕਰਮ ਸਿੰਘ, ਹਰਮੀਤ ਆਰਟਿਸਟ, ਡਾ. ਪ੍ਰਭਜੋਤ ਕੌਰ, ਧਰਵਿੰਦਰ ਔਲਖ, ਪ੍ਰੋ. ਮਧੂ ਸ਼ਰਮਾ, ਸਿਮਰਨਜੀਤ ਕੌਰ ਸਿਮਰ, ਪ੍ਰੋ. ਸਿਮਰਜੀਤ ਸਿੰਘ, ਸਤਿੰਦਰ ਓਠੀ, ਰਾਜਪਾਲ ਰਮਦਾਸ, ਹਰਜੀਤ ਰਾਜਾਸਾਂਸੀ, ਬਲਬੀਰ ਮੂਧਲ, ਰਾਜਨ, ਕਮਲ ਗਿੱਲ, ਮਨਿੰਦਰ ਕੌਰ, ਹਰੀਸ਼ ਕੈਲਾ, ਡਾ. ਸਤਿੰਦਰ ਸਿੰਘ ਬੇਦੀ, ਹਰਜੀਤ ਕੌਰ ਬਮਰਾ, ਮਾ. ਭੁਪਿੰਦਰ ਸਿੰਘ ਗਿੱਲ, ਸੁਰਿੰਦਰ ਕੰਵਲ, ਕੁਲਦੀਪ ਦਰਾਜਕੇ, ਸੁਖਬੀਰ ਅੰਮ੍ਰਿਤਸਰੀ, ਯਸ਼ਪਾਲ ਝਬਾਲ, ਸਿਮਰਤ ਗਗਨ, ਟੀ. ਐੱਸ. ਰਾਜਾ ਤੋਂ ਇਲਾਵਾ ਬਹੁਤ ਸਾਰੇ ਸਾਹਿਤ ਪ੍ਰੇਮੀਆਂ ਨੇ ਹਾਜ਼ਰੀ ਭਰੀ। ਸਮਾਗਮ ਦੇ ਮੁੱਖ ਮਹਿਮਾਨ ਸ਼੍ਰੋਮਣੀ ਸ਼ਾਇਰ ਐਡਵੋਕੇਟ ਅਜਾਇਬ ਸਿੰਘ ਹੁੰਦਲ ਨੇ ਸਮੁੱਚੇ ਸਮਾਗਮ ਦਾ ਮੁਤਾਲਿਆ ਕੀਤਾ ਤੇ ਕਵਿਤਾਵਾਂ ਤੇ ਉਨ੍ਹਾਂ ਦੇ ਵਿਸ਼ਿਆਂ ਦੀ ਚੰਗੀ ਚੋਣ ਦੀ ਭਰਪੂਰ ਸਹਾਰਨਾ ਕੀਤੀ। ਸਭ ਦਾ ਧੰਨਵਾਦ ਵਿਰਸਾ ਵਿਹਾਰ ਦੇ ਸਕੱਤਰ ਰਮੇਸ਼ ਯਾਦਵ ਨੇ ਕੀਤਾ।
ਔਜਲਾ ਦੀ ਜਿਤ ਲਈ ਐੱਨ. ਆਰ. ਆਈ. ਅੰਮ੍ਰਿਤਸਰ ਆਉਣਗੇ : ਬੌਬੀ ਬਾਠ
NEXT STORY 
