ਖਰੜ (ਰਣਬੀਰ) : ਇੱਥੋਂ ਦੇ ਪਿੰਡ ਜੰਡਪੂਰ ਵਿਖੇ ਇੱਕ ਪਰਵਾਸੀ ਵਿਅਕਤੀ ਦੀ ਸੜਕ ਹਾਦਸੇ 'ਚ ਮੌਤ ਹੋ ਜਾਣ ਦੀ ਸੂਚਨਾ ਮਿਲੀ ਹੈ। ਪੁਲਸ ਵਲੋਂ ਇਸ ਸਬੰਧ 'ਚ ਧਾਰਾ-194 ਤਹਿਤ ਬਣਦੀ ਕਾਰਵਾਈ ਕਰਦਿਆਂ ਮ੍ਰਿਤਕ ਦੀ ਲਾਸ਼ ਦਾ ਪੋਸਟਮਾਰਟਮ ਕਰਵਾਉਣ ਮਗਰੋਂ ਲਾਸ਼ ਨੂੰ ਵਾਰਸਾਂ ਦੇ ਹਵਾਲੇ ਕਰ ਦਿੱਤਾ ਗਿਆ ਹੈ। ਸਦਰ ਥਾਣਾ ਤੋਂ ਤਫ਼ਤੀਸ਼ੀ ਅਧਿਕਾਰੀ ਏ. ਐੱਸ. ਆਈ ਕੁਲਵਿੰਦਰ ਸਿੰਘ ਨੇ ਦੱਸਿਆ ਕਿ (30) ਸਾਲਾ ਮਿਥੁਨ ਨਾਂ ਦਾ ਪਰਵਾਸੀ ਬਿਹਾਰ ਨਾਲ ਸੰਬੰਧਤ ਸੀ।
ਉਹ ਫਿਲਹਾਲ ਆਪਣੀ ਘਰਵਾਲੀ ਸਣੇ 2 ਛੋਟੇ ਮੁੰਡਿਆਂ ਨਾਲ ਜੰਡਪੂਰ ਵਿਖੇ ਹੀ ਇਕ ਕਿਰਾਏ ਦੇ ਮਕਾਨ 'ਤੇ ਪਿਛਲੇ ਕਰੀਬ 3 ਸਾਲ ਤੋਂ ਰਹਿ ਰਿਹਾ ਸੀ। ਉਕਤ ਵਿਅਕਤੀ ਲੇਬਰ ਦਾ ਕੰਮ ਕਰਦਾ ਸੀ। ਬੀਤੇ ਕੱਲ੍ਹ ਉਹ ਆਪਣੇ ਮੋਟਰਸਾਈਕਲ 'ਤੇ ਸਵਾਰ ਹੋ ਕੇ ਜਿਵੇਂ ਹੀ ਜੰਡਪੂਰ-ਦੇਸੂਮਾਜਰਾ-ਦਾਊਂ ਜਾਣ ਵਾਲੀ ਸੜਕ 'ਤੇ ਸਥਿਤ ਬੈਂਕ ਨੇੜੇ ਪੁੱਜਾ ਤਾਂ ਉੱਥੇ ਅਚਾਨਕ ਉਸਦਾ ਮੋਟਰਸਾਈਕਲ ਬੇਕਾਬੂ ਹੋ ਕੇ ਕੰਧ ਦੇ ਨਾਲ ਜਾ ਵੱਜਿਆ।
ਇਸ ਦੇ ਨਤੀਜੇ ਵਜੋਂ ਉਸ ਦੇ ਸਿਰ 'ਚ ਗੰਭੀਰ ਸੱਟ ਲੱਗਣ ਕਾਰਨ ਉਸ ਨੂੰ ਫੌਰੀ ਹਸਪਤਾਲ ਲਿਜਾਇਆ ਗਿਆ ਪਰ ਉੱਥੇ ਪੁੱਜਦਿਆਂ ਸਾਰ ਡਾਕਟਰਾਂ ਵਲੋਂ ਮਿਥੁਨ ਨੂੰ ਮ੍ਰਿਤਕ ਕਰਾਰ ਦਿੱਤਾ ਗਿਆ। ਸੂਚਨਾ ਮਿਲਣ 'ਤੇ ਪੁਲਸ ਵਲੋਂ ਮੌਕੇ 'ਤੇ ਪੁੱਜ ਮ੍ਰਿਤਕ ਦੇ ਪਿਤਾ ਸ਼ਿਆਮ ਬਲੀ ਸ਼ਾਹ ਦੇ ਬਿਆਨਾਂ 'ਤੇ ਉਪਰੋਕਤ ਕਾਰਵਾਈ ਨੂੰ ਅਮਲ ਵਿੱਚ ਲਿਆਂਦਾ ਗਿਆ ਹੈ।
ਅਚਾਨਕ ਪੰਜਾਬ ਦੇ ਇਸ ਡੇਰੇ 'ਚ ਪਹੁੰਚੇ ਬਾਬਾ ਗੁਰਿੰਦਰ ਸਿੰਘ ਢਿੱਲੋਂ, ਸੰਗਤ ਦੀ ਲੱਗ ਗਈ ਭੀੜ
NEXT STORY 
