ਮਾਛੀਵਾੜਾ ਸਾਹਿਬ (ਟੱਕਰ) : ਮਾਛੀਵਾੜਾ ਅਨਾਜ ਮੰਡੀ ’ਚ 27 ਸਤੰਬਰ ਤੋਂ ਝੋਨੇ ਦੀ ਸਰਕਾਰੀ ਖਰੀਦ ਸ਼ੁਰੂ ਹੋ ਗਈ ਹੈ ਅਤੇ ਉਸ ਦਿਨ ਤੋਂ ਹੁਣ ਤੱਕ ਕਰੋੜਾਂ ਰੁਪਏ ਦਾ ਯੂ. ਪੀ. ਤੋਂ ਸਸਤਾ ਝੋਨਾ ਲਿਆ ਕੇ ਇਸ ਮੰਡੀ ’ਚ ਵੇਚ ਕੇ ਕੁਝ ਆੜ੍ਹਤੀ ਤੇ ਸ਼ੈਲਰ ਮਾਲਕ ਮਾਲੋ-ਮਾਲ ਹੋ ਰਹੇ ਸਨ ਕਿ ਅਚਾਨਕ ਪੁਲਸ ਪ੍ਰਸ਼ਾਸਨ ਦੀ ਅੱਖ ਖੁੱਲ੍ਹੀ, ਜਿਸ ਤਹਿਤ ਪੰਜ ਆੜ੍ਹਤੀਆਂ, ਇੱਕ ਸ਼ੈਲਰ ਮਾਲਕ ਅਤੇ ਡਰਾਈਵਰ ’ਤੇ ਪਰਚਾ ਦਰਜ ਕਰ ਇਸ ਘਪਲੇ ਦੀਆਂ ਪਰਤਾਂ ਖੋਲ੍ਹਣ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਾਣਗੀਆਂ। ਮਾਛੀਵਾੜਾ ਪੁਲਸ ਤੇ ਖੁਰਾਕ ਸਪਲਾਈ ਮਹਿਕਮੇ ਵਲੋਂ ਅਨਾਜ ਮੰਡੀ ਦੇ ਆੜ੍ਹਤੀ ਦਾ ਯੂ. ਪੀ. ਤੋਂ ਆਇਆ ਟਰੱਕ ਕਾਬੂ ਕਰ ਲਿਆ ਗਿਆ, ਜਦਕਿ ਮੁਖ਼ਬਰ ਦੀ ਸੂਚਨਾ ’ਤੇ 4 ਹੋਰ ਆੜ੍ਹਤੀਆਂ ਤੇ ਬੇਟ ਖੇਤਰ ਸ਼ੇਰਪੁਰ ਨੇੜ੍ਹੇ ਇੱਕ ਸ਼ੈਲਰ ਮਾਲਕ ’ਤੇ ਇਸ ਗੋਰਖਧੰਦੇ ’ਚ ਸ਼ਮੂਲੀਅਤ ਹੋਣ ’ਤੇ ਮਾਮਲਾ ਦਰਜ ਕਰਨ ਤੋਂ ਬਾਅਦ ਮੰਡੀ ’ਚ ਹੜਕੰਪ ਮਚ ਗਿਆ ਕਿ ਇਹ ਕਿਸਾਨ ਹਿਤੈਸ਼ੀ ਕਹਾਉਣ ਵਾਲੇ ਕੁਝ ਆੜ੍ਹਤੀ ਆਪਣੀਆਂ ਜੇਬਾਂ ਭਰਨ ਲਈ ਬਾਹਰਲੇ ਸੂਬਿਆਂ ਤੋਂ ਸਸਤਾ ਝੋਨਾ ਲਿਆ ਉਨ੍ਹਾਂ ਦੇ ਹੱਕਾਂ ’ਤੇ ਡਾਕਾ ਮਾਰ ਰਹੇ ਹਨ।
ਪੁਲਸ ਵਲੋਂ ਮਾਮਲਾ ਦਰਜ ਕਰਨ ਤੋਂ ਬਾਅਦ ਹੁਣ ਆੜ੍ਹਤੀਆ ਦੇ ਰਿਕਾਰਡ ਦੀ ਜਾਂਚ ਕੀਤੀ ਜਾਵੇਗੀ ਕਿ ਯੂ.ਪੀ. ਤੋਂ ਆਇਆ ਝੋਨਾ ਮਾਛੀਵਾੜਾ ਅਨਾਜ ਮੰਡੀ ’ਚ ਕਿਨ੍ਹਾਂ ਫ਼ਰਜ਼ੀ ਕਿਸਾਨਾਂ ਦੇ ਨਾਮ ’ਤੇ ਜੇ ਫਾਰਮ ਤਿਆਰ ਮਾਛੀਵਾੜਾ ਮੰਡੀ ’ਚ ਮਹਿੰਗੇ ਭਾਅ ਸਰਕਾਰੀ ਰੇਟ ’ਤੇ ਵੇਚ ਕੇ ਸਰਕਾਰ ਨਾਲ ਧੋਖਾਧੜੀ ਕੀਤੀ ਗਈ। ਜਾਣਕਾਰੀ ਅਨੁਸਾਰ ਮਾਛੀਵਾੜਾ ਮੰਡੀ ’ਚ ਕਰੀਬ 70 ਤੋਂ 100 ਦੇ ਕਰੀਬ ਝੋਨੇ ਦੇ ਟਰੱਕ ਯੂ. ਪੀ. ਤੋਂ ਲਿਆ ਕੇ ਇੱਥੇ ਕਿਸਾਨਾਂ ਦੇ ਨਾਮ ’ਤੇ ਵੇਚ ਦਿੱਤੇ ਗਏ, ਜਿਨ੍ਹਾਂ ਦੀ ਕੀਮਤ ਕਰੋੜਾਂ ਰੁਪਏ ਬਣਦੀ ਹੈ ਅਤੇ ਇਸ ਧੰਦੇ ਨਾਲ ਜੁੜਿਆ ਆੜ੍ਹਤੀ ਕੁੱਝ ਹੀ ਦਿਨਾਂ ’ਚ ਲੱਖਾਂ ਰੁਪਏ ਦੀ ਕਾਲੀ ਕਮਾਈ ਕਰ ਸਰਕਾਰ ਨੂੰ ਚੂਨਾ ਲਗਾ ਗਿਆ। ਇਸ ਤੋਂ ਇਲਾਵਾ ਮਾਛੀਵਾੜਾ ਇਲਾਕੇ ਦੇ 2 ਕੁ ਸ਼ੈਲਰ ਵਾਲਿਆਂ ਨੇ ਵੀ ਸਿੱਧੇ ਤੌਰ ’ਤੇ ਯੂ. ਪੀ. ਤੋਂ ਸਸਤਾ ਝੋਨਾ ਮੰਗਵਾ ਆਪਣੀਆਂ ਮਿੱਲਾਂ 'ਚ ਉਤਾਰ ਲਿਆ ਅਤੇ ਕੁਝ ਆੜ੍ਹਤੀਆਂ ਨਾਲ ਗੰਢ-ਤੁੱਪ ਕਰ ਇਲਾਕੇ ਨਾਲ ਸਬੰਧਿਤ ਕਿਸਾਨਾਂ ਦੇ ਨਾਮ ’ਤੇ ਫ਼ਰਜ਼ੀ ਜੇ ਫਾਰਮ ਤਿਆਰ ਕਰ ਸਰਕਾਰ ਦੇ ਖਾਤਿਆਂ ’ਚ ਇਹ ਝੋਨਾ ਸਰਕਾਰੀ ਦਿਖਾਇਆ ਅਤੇ ਲੱਖਾਂ ਰੁਪਏ ਰਾਤੋ-ਰਾਤ ਕਮਾ ਲਏ। ਪੁਲਸ ਤੇ ਪ੍ਰਸ਼ਾਸਨ ਬਾਹਰਲੇ ਸੂਬੇ ਤੋਂ ਆਉਂਦੇ ਸਸਤੇ ਝੋਨੇ ਦੇ ਗੋਰਖਧੰਦੇ ਦੀ ਜੇਕਰ ਹੁਣ ਬਰੀਕੀ ਨਾਲ ਜਾਂਚ ਕਰ ਆੜ੍ਹਤੀਆਂ ਤੇ ਸ਼ੈਲਰਾਂ ਦੇ ਰਿਕਾਰਡ ਨੂੰ ਖੰਗਾਲੇ ਤਾਂ ਇਸ ਕਰੋੜਾਂ ਰੁਪਏ ਦੇ ਘਪਲੇ ਤੋਂ ਪਰਦਾ ਬੇਨਕਾਬ ਹੋ ਸਕਦਾ ਹੈ।
ਮਾਰਕੀਟ ਕਮੇਟੀ ਨੇ 5 ਆੜ੍ਹਤੀਆਂ ਨੂੰ ਕੱਢੇ ਨੋਟਿਸ
ਮਾਛੀਵਾੜਾ ਮਾਰਕੀਟ ਕਮੇਟੀ ਦੇ ਸਕੱਤਰ ਹਰਪ੍ਰੀਤ ਕੌਰ ਵਲੋਂ ਬਾਹਰਲੇ ਸੂਬਿਆਂ ਤੋਂ ਝੋਨਾ ਲਿਆਉਣ ਦੇ ਕਥਿਤ ਦੋਸ਼ ਹੇਠ ਪੁਲਸ ਵਲੋਂ ਨਾਮਜ਼ਦ ਕੀਤੇ ਗਏ 5 ਆੜ੍ਹਤੀਆਂ ਨੂੰ ਨੋਟਿਸ ਜਾਰੀ ਕਰ ਦਿੱਤੇ ਹਨ ਅਤੇ ਇਸ ਮਾਮਲੇ ਸਬੰਧੀ ਸਪੱਸ਼ਟੀਕਰਨ ਮੰਗਿਆ ਹੈ। ਨੋਟਿਸ ’ਚ ਇਨ੍ਹਾਂ ਆੜ੍ਹਤੀਆਂ ਨੂੰ ਸਪੱਸ਼ਟ ਕਿਹਾ ਗਿਆ ਹੈ ਕਿ ਜੇਕਰ ਉਨ੍ਹਾਂ ਇਸ ਸਬੰਧੀ ਆਪਣਾ ਰਿਕਾਰਡ ਜਾਂ ਪੱਖ ਪੇਸ਼ ਨਾ ਕੀਤਾ ਤਾਂ ਉਨ੍ਹਾਂ ਦੀ ਆੜ੍ਹਤ ਦੇ ਲਾਈਸੈਂਸ ਮੁਅੱਤਲ ਕਰ ਦਿੱਤੇ ਜਾਣਗੇ।
ਐੱਸ.ਡੀ.ਐੱਮ ਨੇ ਮਾਛੀਵਾੜਾ ਮੰਡੀ ਦੀ ਕੀਤੀ ਜਾਂਚ
ਬਾਹਰਲੇ ਸੂਬਿਆਂ ਤੋਂ ਝੋਨਾ ਮਾਛੀਵਾੜਾ ਮੰਡੀ ’ਚ ਵਿਕਣ ਲਈ ਆਉਣ ਤੋਂ ਬਾਅਦ ਸੁਰਖ਼ੀਆਂ ’ਚ ਆਈ ਮੰਡੀ ’ਚ ਵਿਸ਼ੇਸ਼ ਤੌਰ ’ਤੇ ਪ੍ਰਸ਼ਾਸਨ ਵਲੋਂ ਐੱਸ.ਡੀ.ਐੱਮ ਗੀਤਿਕਾ ਸਿੰਘ ਪੁੱਜੇ, ਜਿਨ੍ਹਾਂ ਮਾਰਕਿਟ ਕਮੇਟੀ ਅਧਿਕਾਰੀਆਂ ਤੇ ਪੁਲਸ ਨਾਲ ਮੀਟਿੰਗ ਕਰ ਇਸ ਸਬੰਧੀ ਸਾਰੀ ਜਾਣਕਾਰੀ ਹਾਸਲ ਕੀਤੀ। ਐੱਸ. ਡੀ.ਐੱਮ ਵਲੋਂ ਮਾਛੀਵਾੜਾ ਅਨਾਜ ਮੰਡੀ ’ਚ ਜਾ ਕੇ ਝੋਨੇ ਨਾਲ ਭਰੀਆਂ ਬੋਰੀਆਂ ਦਾ ਤੋਲ ਵੀ ਚੈੱਕ ਕੀਤਾ, ਜਿੱਥੇ ਕੋਈ ਕੁਤਾਹੀ ਸਾਹਮਣੇ ਨਾ ਆਈ ਪਰ ਮਾਰਕਿਟ ਕਮੇਟੀ ਦੇ ਨਮੀ ਮਾਤਰਾ ਜਾਂਚਣ ਵਾਲੇ ਮੀਟਰ ਖ਼ਰਾਬ ਪਾਏ ਗਏ, ਜਿਸ ਕਾਰਣ ਉਨ੍ਹਾਂ ਇਸ ’ਤੇ ਨਾਰਾਜ਼ਗੀ ਪ੍ਰਗਟਾਉਂਦਿਆਂ ਤੁਰੰਤ ਠੀਕ ਕਰਵਾਉਣ ਦੇ ਨਿਰਦੇਸ਼ ਦਿੱਤੇ। ਐੱਸ. ਡੀ. ਐੱਮ. ਗੀਤਿਕਾ ਸਿੰਘ ਨੇ ਦੱਸਿਆ ਕਿ ਝੋਨੇ ਦੀ ਖਰੀਦ ਦੌਰਾਨ ਪ੍ਰਸ਼ਾਸਨ ਵਲੋਂ ਹੁਣ ਅਚਨਚੇਤ ਜਾਂਚ ਕੀਤੀ ਜਾਵੇਗੀ ਅਤੇ ਜੇਕਰ ਕਿਤੇ ਵੀ ਕੋਈ ਕੁਤਾਹੀ ਪਾਈ ਗਈ ਤਾਂ ਉਸ ਉਪਰ ਕਾਨੂੰਨੀ ਕਾਰਵਾਈ ਕਰਨ ਤੋਂ ਗੁਰੇਜ਼ ਨਹੀਂ ਕੀਤਾ ਜਾਵੇਗਾ।
ਰਾਤ ਤੋਂ ਗਾਇਬ ਨੌਜਵਾਨ ਦੀ ਸਵੇਰੇ ਪਾਰਕ 'ਚ ਮਿਲੀ ਲਾਸ਼
NEXT STORY 
