ਨਵਾਂਸ਼ਹਿਰ— ਇਕ ਪਾਸੇ ਜਿੱਥੇ ਪੰਜਾਬ 'ਚ ਸ਼ਹੀਦ ਭਗਤ ਸਿੰਘ ਦੇ ਜੱਦੀ ਪਿੰਡ ਖਟਕੜ ਕਲਾਂ 'ਚ ਮਿਊਜ਼ੀਅਮ ਨਿਰਮਾਣ ਦੇ ਕੰਮ ਨੂੰ ਲਗਾਤਾਰ ਦੇਰੀ ਹੋ ਰਹੀ ਹੈ, ਉਥੇ ਹੀ ਪਾਕਿਸਤਾਨ 'ਚ ਇਸੇ ਤਰ੍ਹਾਂ ਦੀ ਯਾਦਗਾਰ ਨੂੰ 2 ਸਾਲ 'ਚ ਬਣਾ ਕੇ ਤਿਆਰ ਕੀਤਾ ਗਿਆ ਹੈ। ਫਰਵਰੀ 2009 'ਚ ਉਸ ਸਮੇਂ ਦੇ ਕੇਂਦਰੀ ਮੰਤਰੀ ਪੀ. ਚਿਦੰਬਰਮ ਅਤੇ ਸੀ. ਐੱਮ. ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਪਿੰਡ ਖਟਕੜ ਕਲਾਂ 'ਚ ਸ਼ਹੀਦ ਭਗਤ ਸਿੰਘ ਦੀ ਯਾਦ 'ਚ ਬਣਨ ਵਾਲੇ ਮਿਊਜ਼ੀਅਮ ਦਾ ਨੀਂਹ ਪੱਥਰ ਰੱਖਿਆ ਸੀ ਅਤੇ ਦਾਅਵਾ ਕੀਤਾ ਸੀ ਕਿ ਮਿਊਜ਼ੀਅਮ 22 ਮਹੀਨੇ 'ਚ ਤਿਆਰ ਕੀਤਾ ਜਾਵੇਗਾ। ਜੇਕਰ ਗੱਲ ਕੀਤੀ ਜਾਵੇ ਤਾਜ਼ਾ ਹਾਲਾਤਾਂ ਦੀ ਤਾਂ ਤਾਜ਼ਾ ਹਾਲਾਤ ਅਜਿਹੇ ਹਨ ਕਿ 8 ਸਾਲ ਬਤੀਤ ਹੋ ਜਾਣ ਤੋਂ ਬਾਅਦ ਵੀ ਕੰਮ ਅਜੇ ਅਧੂਰਾ ਹੀ ਹੈ। ਇਸ ਦੇ ਉਲਟ ਪਾਕਿਸਤਾਨ ਸਰਕਾਰ ਨੇ ਸ਼ਹੀਦ ਭਗਤ ਸਿੰਘ ਦਾ ਜਨਮ ਸਥਾਨ ਚੱਕ ਨੰਬਰ 105 ਜੀ. ਬੀ. (ਹੁਣ ਬੰਗਾ ਪਿੰਡ) ਲਾਇਲਪੁਰ ਦੀ ਫਰਵਰੀ 2014 'ਚ ਸੰਭਾਲ ਕਰਨ ਦਾ ਐਲਾਨ ਕੀਤਾ ਸੀ। ਪਾਕਿ ਸਰਕਾਰ ਵੱਲੋਂ ਦੋ ਸਾਲ 'ਚ ਹੀ ਇਸ ਨੂੰ ਹੈਰੀਟੇਜ ਸਾਈਟ ਐਲਾਨ ਕਰਕੇ 23 ਮਾਰਚ ਨੂੰ ਲੋਕਾਂ ਲਈ ਖੋਲ੍ਹ ਵੀ ਦਿੱਤਾ ਗਿਆ। ਦੇਸ਼ ਦੋ ਹਨ ਪਰ ਸ਼ਹੀਦ ਇਕ ਹੀ ਹੈ। ਫਰਕ ਸਾਫ ਨਜ਼ਰ ਆਉਂਦਾ ਹੈ ਕਿ ਸ਼ਹੀਦਾਂ ਦੀ ਯਾਦ ਨੂੰ ਲੈ ਕੇ ਸਰਕਾਰਾਂ ਕਿੰਨੀ ਕੂ ਸੰਜੀਦਗੀ ਨਾਲ ਕੰਮ ਕਰ ਰਹੀਆਂ ਹਨ।
ਤੁਹਾਨੂੰ ਦੱਸ ਦੱਈਏ ਨੀਂਹ ਪੱਥਰ ਰੱਖਦੇ ਸਮੇਂ ਇਸ ਦੀ ਅਨੁਮਾਨ ਲਾਗਤ ਕਰੀਬ 8 ਕਰੋੜ ਸੀ। 8 ਸਾਲ ਬਾਅਦ ਇਹ ਕੀਮਤ 18 ਕਰੋੜ ਹੋ ਗਈ ਹੈ। ਮਿਊਜ਼ੀਅਮ ਦੇ ਲਈ ਜ਼ਮੀਨ ਕਬਜ਼ੇ ਨੂੰ ਹੀ 2 ਸਾਲ ਦਾ ਸਮਾਂ ਲੱਗ ਗਿਆ ਅਤੇ ਸਾਲ 2011 'ਚ ਸਰਕਾਰ ਦੇ ਪੁਰਾਤੱਤਵ ਵਿਭਾਗ ਦੇ ਮੱਧ ਨਾਲ ਮਿਊਜ਼ੀਅਮ ਦਾ ਨਿਰਮਾਣ ਮਾਰਕਫੇਡ ਦੀ ਅਗਵਾਈ 'ਚ ਸ਼ੁਰੂ ਕਰਵਾਇਆ। ਇਸ ਦੇ ਬਾਅਦ ਹਰ 23 ਮਾਰਚ ਨੂੰ ਹੋਣ ਵਾਲੇ ਸ਼ਹੀਦੀ ਸਮਾਗਮਾਂ 'ਚ ਮਿਊਜ਼ੀਅਮ ਦਾ ਨਿਰਮਾਣ ਜਲਦ ਪੂਰਾ ਕਰਕੇ ਲੋਕਾਂ ਲਈ ਖੋਲਣ ਦਾ ਦਾਅਵਾ ਕਰਦੇ ਰਹੇ ਹਨ। ਜਾਣਕਾਰ ਦੱਸਦੇ ਹਨ ਕਿ ਜਿਸ ਗਤੀ ਦੇ ਨਾਲ ਕੰਮ ਕੀਤਾ ਜਾ ਰਿਹਾ ਹੈ, ਉਸ ਨੂੰ ਦੇਖ ਕੇ ਲੱਗਦਾ ਹੈ ਕਿ ਅਜੇ ਇਸ ਨੂੰ ਪੂਰਾ ਹੋਣ 'ਚ ਘੱਟੋ-ਘੱਟ 2 ਸਾਲ ਦਾ ਸਮਾਂ ਹੋਰ ਲੱਗੇਗਾ। ਫਿਲਹਾਲ ਨਿਰਮਾਣ ਅਧੀਨ ਮਿਊਜ਼ੀਅਮ 'ਚ ਇੰਟੀਰੀਅਰ ਡੈਕੋਰੇਸ਼ਨ, ਲਾਈਟਾਂ ਅਤੇ ਸਾਊਂਡ ਦਾ ਕੰਮ ਚੱਲ ਰਿਹਾ ਹੈ। ਜਨਵਰੀ 2016 'ਚ ਵੀ ਵਿਭਾਗ ਦੀ ਪਿੰਸੀਪਲ ਸੈਕਟਰੀ ਅੰਜਲੀ ਭਾਂਬਰਾ ਨੇ ਦੌਰਾ ਕਰਕੇ ਜੂਨ 2016 ਤੱਕ ਇੰਟੀਰੀਅਰ ਡੈਕੋਰੇਸ਼ਨ ਦਾ ਕੰਮ ਖਤਮ ਹੋਣ ਦਾ ਦਾਅਵਾ ਕੀਤਾ ਸੀ ਪਰ ਹੁਣ ਹਕੀਕਤ ਇਹ ਹੈ ਕਿ ਨਿਰਮਾਣ ਕੰਮ ਪਿਛਲੇ 6 ਮਹੀਨਿਆਂ ਤੋਂ ਫੰਡ ਦੀ ਕਮੀ 'ਚ ਠੱਪ ਹੈ।
ਸੂਤਰਾਂ ਮੁਤਾਬਕ ਇੰਟੀਰੀਅਰ ਡੈਕੋਰੇਸ਼ਨ ਦੀ ਅਦਾਇਗੀ ਨਾ ਹੋਣ ਕਾਰਨ ਉਸ ਨੇ ਕੰਮ ਰੋਕ ਦਿੱਤਾ ਹੈ। ਮਿਊਜ਼ੀਅਮ ਦਾ ਕੰਮ ਕਦੋਂ ਤੱਕ ਮੁਕੰਮਲ ਹੋਵੇਗਾ ਅਧਿਕਾਰੀ ਕੁਝ ਵੀ ਬੋਲਣ ਨੂੰ ਤਿਆਰ ਨਹੀਂ ਹਨ। ਉਥੇ ਹੀ ਨਵੇਂ ਮਿਊਜ਼ੀਅਮ ਦੇ ਲਈ ਭਰਤੀ ਕੀਤੇ ਜਾਣ ਵਾਲੇ ਸਟਾਫ ਸੰਬੰਧੀ ਅਜੇ ਕੋਈ ਵੀ ਯੋਜਨਾ ਤਿਆਰ ਨਹੀਂ ਹੋਈ ਕਿ ਕਿੰਨਾ ਸਟਾਫ ਰੱਖਿਆ ਜਾਵੇਗਾ ਅਤੇ ਇਸ ਨੂੰ ਠੇਕੇ 'ਤੇ ਭਰਤੀ ਕੀਤਾ ਜਾਵੇਗਾ ਜਾਂ ਫਿਰ ਰੈਗੂਲਰ ਭਰਤੀ ਕੀਤਾ ਜਾਵੇਗਾ। ਡੀ. ਸੀ. ਸੋਨਾਲੀ ਗਿਰੀ ਨੇ ਦੱਸਿਆ ਕਿ ਉਨ੍ਹਾਂ ਨੇ ਪਿਛਲੇ ਮੰਗਲਵਾਰ ਨੂੰ ਇਸ ਦਾ ਜਾਇਜ਼ਾ ਲਿਆ ਸੀ ਅਤੇ ਫਿਰ ਨਿਰਮਾਣ ਕਰਵਾ ਰਹੀ ਏਜੰਸੀ ਦੇ ਅਧਿਕਾਰੀਆਂ ਨੂੰ ਬੁਲਾਇਆ ਸੀ ਪਰ ਉਹ ਅਜੇ ਤੱਕ ਨਹੀਂ ਆਏ। ਵੀਰਵਾਰ ਨੂੰ ਸੂਬਾ ਪੱਧਰੀ ਸਮਾਰੋਹ 'ਚ ਆ ਰਹੇ ਮੁੱਖ ਮਹਿਮਾਨ ਨਾਲ ਮਿਊਜ਼ੀਅਮ ਦਾ ਕੰਮ ਜਲਦੀ ਪੂਰਾ ਕਰਨ ਦੀ ਗੱਲ ਕੀਤੀ ਜਾਵੇਗੀ, ਜਿਸ ਨਾਲ ਸਰਕਾਰ ਵੱਲੋਂ ਨਿਰਮਾਣ ਏਜੰਸੀ ਨੂੰ ਜਲਦੀ ਕੰਮ ਮੁਕੰਮਲ ਕਰਨ ਦੇ ਨਿਰਦੇਸ਼ ਜਾਰੀ ਕੀਤੇ ਜਾ ਸਕਣ ਅਤੇ ਲੋਕਾਂ ਨੂੰ ਲੰਬਾ ਇੰਤਜ਼ਾਰ ਨਾ ਕਰਨਾ ਪਵੇ।
ਜ਼ਿਲਾ ਸਿੱਖਿਆ ਅਫਸਰ ਵੱਲੋਂ ਮਾਰਕਿੰਗ ਸੈਂਟਰ ਦਾ ਦੌਰਾ
NEXT STORY 
