ਨਵੀਂ ਦਿੱਲੀ : 'ਜਾਗੋ' ਪਾਰਟੀ ਨੇ ਸਿੱਖ ਮਸਲਿਆਂ 'ਤੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਅਤੇ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਬੰਧ 'ਚ ਰੁਕਾਵਟਾਂ ਦਾ ਹਵਾਲਾ ਦਿੰਦੇ ਹੋਏ ਮੌਜੂਦਾ ਪ੍ਰਬੰਧਕੀ ਢਾਂਚੇ ਦੇ ਖਤਮ ਹੋਣ ਦਾ ਦਾਅਵਾ ਕੀਤਾ ਹੈ। ਪਾਰਟੀ ਦੇ ਅੰਤਰਰਾਸ਼ਟਰੀ ਪ੍ਰਧਾਨ ਮਨਜੀਤ ਸਿੰਘ ਜੀ. ਕੇ. ਨੇ ਅੱਜ ਪਾਰਟੀ ਦਫਤਰ 'ਚ ਮੀਡੀਆ ਨਾਲ ਗੱਲਬਾਤ ਕਰਦੇ ਹੋਏ ਮਈ 2016 'ਚ ਗੁਰਦੁਆਰਾ ਰਾਮਸਰ ਸਾਹਿਬ, ਅੰਮ੍ਰਿਤਸਰ 'ਚ ਸੁਖਾਸਨ ਸਥਾਨ 'ਤੇ ਲੱਗੀ ਅੱਗ ਦੇ ਕਾਰਣ ਨੁਕਸਾਨ ਹੋਏ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਪਾਵਨ ਸਰੂਪਾਂ ਦੀ ਗਿਣਤੀ 'ਤੇ ਸ਼੍ਰੋਮਣੀ ਕਮੇਟੀ ਦੀ ਦਿੱਕਤ ਦਾ ਖੁਲ੍ਹਾਸਾ ਕੀਤਾ, ਨਾਲ ਹੀ ਅੱਜ ਗੁਰਦੁਆਰਾ ਬੰਗਲਾ ਸਾਹਿਬ, ਦਿੱਲੀ 'ਚ ਦਸ਼ਮ ਗ੍ਰੰਥ ਦੀ ਕਥਾ 'ਤੇ ਹੋਏ ਵਿਵਾਦ ਵਿਚਾਲੇ ਸੰਗਤ 'ਚ ਹੋਏ ਆਪਸੀ ਟਕਰਾਅ ਨੂੰ ਦਿੱਲੀ ਕਮੇਟੀ ਦੇ ਪ੍ਰਬੰਧ ਨੂੰ ਲੱਚਰ ਹੋਣ ਦੇ ਤੌਰ 'ਤੇ ਪਰਿਭਾਸ਼ਿਤ ਕੀਤਾ।
ਜੀ. ਕੇ. ਨੇ ਦਾਅਵਾ ਕੀਤਾ ਕਿ ਮਈ 2016 'ਚ ਲੱਗੀ ਅੱਗ ਕਾਰਣ ਹੋਏ ਨੁਕਸਾਨ ਦਾ ਲੇਖਾ ਹੁਣ ਫਰਵਰੀ 2020 'ਚ ਕਮੇਟੀ ਦੇ ਖਾਤਿਆਂ 'ਚ ਪੁਰਾ ਕੀਤਾ ਜਾ ਰਿਹਾ ਹੈ। ਜੀ. ਕੇ. ਨੇ ਸ਼੍ਰੋਮਣੀ ਕਮੇਟੀ ਦਾ ਇਕ ਦਫਤਰੀ ਨੋਟ ਦਿਖਾਉਂਦੇ ਹੋਏ ਦੱਸਿਆ ਕਿ ਫਰਵਰੀ 2020 'ਚ ਬਣੇ ਇਸ ਨੋਟ 'ਚ ਮੁੱਖ ਸਕੱਤਰ ਡਾਕਟਰ ਰੂਪ ਸਿੰਘ ਦੇ ਦਸਤਖਤ ਹਨ ਅਤੇ 80 ਪਾਵਨ ਸਰੂਪ ਅੱਗ 'ਚ ਨੁਕਸਾਨ ਹੋਣ ਦੇ ਬਾਅਦ ਗੋਇੰਦਵਾਲ ਸਾਹਿਬ ਅੰਤਿਮ ਸੰਸਕਾਰ ਦੇ ਲਈ ਭੇਜੇ ਜਾਣ ਦਾ ਹਵਾਲਾ ਹੈ ਪਰ ਕਮੇਟੀ ਦੇ ਸੀਨੀਅਰ ਉਪ ਪ੍ਰਧਾਨ ਰਜਿੰਦਰ ਸਿੰਘ ਮਹਿਤਾ ਅਤੇ ਰੂਪ ਸਿੰਘ ਮਾਰਚ 2020 'ਚ ਕੀਤੀ ਗਈ ਪ੍ਰੈਸ ਕਾਨਫਰੰਸ 'ਚ ਨੁਕਸਾਨ ਹੋਏ ਸਰੂਪਾਂ ਦੀ ਗਿਣਤੀ 14 ਦੱਸਦੇ ਹਨ। ਜਦਕਿ ਸ੍ਰੀ ਅਕਾਲ ਤਖਤ ਸਾਹਿਬ ਦੀ ਜਾਂਚ ਕਮੇਟੀ ਨੂੰ ਇਸ ਦੀ ਗਿਣਤੀ 5 ਦੱਸੀ ਜਾਂਦੀ ਹੈ। ਜੀ. ਕੇ. ਨੇ ਕਿਹਾ ਕਿ ਜਦੋਂ 2016 'ਚ ਅੱਗ ਲਗਦੀ ਹੈ ਤਾਂ ਪੁਲਸ ਅਤੇ ਫਾਇਰ ਵਿਭਾਗ ਦੇ ਅਧਿਕਾਰੀਆਂ ਨੂੰ ਸ਼੍ਰੋਮਣੀ ਕਮੇਟੀ ਪ੍ਰਭਾਵਿਤ ਸਥਾਨ 'ਤੇ ਅੰਦਰ ਨਹੀਂ ਜਾਣ ਦਿੰਦੀ।
ਜੀ. ਕੇ. ਨੇ ਦੋਸ਼ ਲਗਾਇਆ ਕਿ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੇ ਦਬਾਵ 'ਚ ਸ਼੍ਰੋਮਣੀ ਕਮੇਟੀ ਦੇ ਰਿਕਾਰਡ 'ਚ 4 ਸਾਲ ਬਾਅਦ ਗੜਬੜੀ ਕਰਕੇ ਡੇਰੇ ਨੂੰ ਦਿੱਤੇ ਗਏ ਸਰੂਪਾਂ ਨੂੰ ਅੱਗ 'ਚ ਜਲਿਆ ਹੋਇਆ ਸਾਬਤ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਅਸੀਂ ਪਿਛਲੇ ਦਿਨੀਂ ਸੁਖਬੀਰ ਦੀ ਜ਼ਮੀਰ ਜਗਾਉਣ ਦੀ ਅਰਦਾਸ ਇਸ ਲਈ ਕੀਤੀ ਸੀ ਤਾਂ ਜੋ ਸੱਚ ਸਾਹਮਣੇ ਆਵੇ ਪਰ ਸਾਹਮਣੇ ਆਇਆ ਕਿ 4 ਸਾਲ ਪੁਰਾਣੇ ਰਿਕਾਰਡ ਦੇ ਨਾਲ ਛੇੜਛਾੜ ਕੀਤੀ ਜਾ ਰਹੀ ਹੈ। ਜੀ. ਕੇ. ਨੇ ਦਾਅਵਾ ਕੀਤਾ ਕਿ ਦਫਤਰ ਨੋਟ ਅਨੁਸਾਰ 80 ਸਰੂਪ ਗੋਇੰਦਵਾਲ ਸਾਹਿਬ ਗਏ ਹਨ ਪਰ ਗੋਇੰਦਵਾਲ 'ਚ ਇਸ ਸੰਬੰਧੀ ਕੋਈ ਰਿਕਾਰਡ ਨਹੀਂ ਹੈ।
ਕੱਲ ਅਫਗਾਨਿਸਤਾਨ ਤੋਂ ਆਏ 8 ਪਾਵਨ ਸਰੂਪਾਂ ਨੂੰ ਦਿੱਲੀ ਹਵਾਈ ਅੱਡੇ 'ਤੇ ਲੈਣ ਗਏ ਦਿੱਲੀ ਕਮੇਟੀ ਦੇ ਪ੍ਰਧਾਨ ਮਨਜਿੰਦਰ ਸਿੰਘ ਸਿਰਸਾ 'ਤੇ ਮਰਿਆਦਾ ਦਾ ਧਿਆਨ ਨਾ ਕਰਨ ਦਾ ਵੀ ਜੀ. ਕੇ. ਨੇ ਦੋਸ਼ ਲਗਾਇਆ ਹੈ। ਜੀ. ਕੇ. ਨੇ ਕਿਹਾ ਕਿ ਹਰ ਸਰੂਪ ਦੇ ਉਪਰ 1 ਚਵਰ ਸਾਹਿਬ ਝੁਲਾਉਣ ਦੇ ਲਈ ਮਰਿਆਦਾ ਅਨੁਸਾਰ ਹੋਣਾ ਚਾਹੀਦਾ ਪਰ 1 ਚਵਰ ਸਾਹਿਬ ਦੇ ਨਾਲ 8 ਸਰੂਪਾਂ ਨੂੰ ਲਿਆ ਕੇ ਸਿਰਸਾ ਨੇ ਆਪਣੀ ਧਾਰਮਿਕ ਅਗਿਆਨਤਾ ਦੀ ਇਕ ਵਾਰ ਫਿਰ ਪੋਲ ਖੋਲ੍ਹ ਦਿੱਤੀ ਹੈ। ਆਪਣੀ ਫੋਟੋ ਖਿਚਾਉਣ ਦੀ ਹੋੜ 'ਚ ਸਿਰਸਾ ਨੇ ਸਿਰ 'ਤੇ ਸਰੂਪ ਲੈ ਕੇ ਜਹਾਜ਼ ਤੋਂ ਬਾਹਰ ਆਏ ਸਿੱਖਾਂ ਨੂੰ ਕਾਫੀ ਸਮਾਂ ਰੋਕੀ ਰੱਖਿਆ। ਇਹ ਗੁਰੂ ਸਾਹਿਬ ਦੀ ਬੇਅਦਬੀ ਹੈ। ਗੁਰੂ ਗੋਬਿੰਦ ਸਿੰਘ ਜੀ ਦੇ ਸਮੇਂ ਪ੍ਰਸ਼ਾਦੀ ਹਾਥੀ ਦੇ ਦੁਆਰਾ ਗੁਰੂ ਸਾਹਿਬ 'ਤੇ ਚਵਰ ਕਰਨ ਦਾ ਇਤਿਹਾਸ 'ਚ ਹਵਾਲਾ ਹੈ ਪਰ ਸਿਰਸਾ ਨੂੰ ਕੁੱਝ ਨਹੀਂ ਪਤਾ। ਜੀ. ਕੇ. ਨੇ ਗੁਰਦੁਆਰਾ ਬੰਗਲਾ ਸਾਹਿਬ 'ਚ ਦਸ਼ਮ ਗ੍ਰੰਥ ਦੀ ਬਾਣੀ ਦੀ ਕਥਾ ਨੂੰ ਲੈ ਕੇ ਅੱਜ ਹੋਏ ਟਕਰਾਅ ਦਾ ਜ਼ਿੰਮੇਦਾਰ ਦਿੱਲੀ ਕਮੇਟੀ ਨੂੰ ਦੱਸਿਆ।
ਜੀ. ਕੇ. ਨੇ ਕਿਹਾ ਕਿ ਮੇਰੇ ਪ੍ਰਧਾਨ ਰਹਿੰਦੇ ਵੀ ਦਸ਼ਮ ਗ੍ਰੰਥ ਦੀ ਕਥਾ ਹੋਈ ਹੈ ਪਰ ਇਸ ਤਰ੍ਹਾਂ ਦੀ ਹੁੱਲੜਬਾਜ਼ੀ ਕਦੇ ਨਹੀਂ ਹੋਈ ਹੈ, ਜੇਕਰ ਕੁੱਝ ਲੋਕ ਕਥਾ ਦਾ ਵਿਰੋਧ ਕਰ ਰਹੇ ਹਨ ਤਾਂ ਉਨ੍ਹਾਂ ਨੂੰ ਸਮਝਾਉਣਾ ਕਮੇਟੀ ਦਾ ਕੰਮ ਸੀ। ਜੀ. ਕੇ. ਨੇ ਜੰਮੂ ਕਸ਼ਮੀਰ 'ਚ ਪੰਜਾਬੀ ਭਾਸ਼ਾ ਨੂੰ ਕੇਂਦਰ ਸਰਕਾਰ ਵਲੋਂ ਦੱਸੀ ਗਈ ਅਧਿਕਾਰਿਕ ਭਾਸ਼ਾਵਾਂ ਤੋਂ ਬਾਹਰ ਰੱਖਣ ਨੂੰ ਲੈ ਕੇ ਦਿੱਤੇ ਗਏ ਹੁਕਮ ਨੂੰ ਗਲਤ ਦੱਸਦੇ ਹੋਏ ਇਸ ਸੰਬੰਧੀ ਕੇਂਦਰੀ ਗ੍ਰਹਿ ਮੰਤਰੀ ਨੂੰ ਪੱਤਰ ਭੇਜਣ ਦਾ ਐਲਾਨ ਕੀਤਾ।
ਜਾਣੋ 5 ਮਿੰਟਾਂ 'ਚ ਪੰਜਾਬ ਦੇ ਤਾਜ਼ਾ ਹਾਲਾਤ
NEXT STORY 
