ਮੁੱਲਾਂਪੁਰ ਦਾਖਾ, (ਕਾਲੀਆ)- ਬੀਤੀ ਰਾਤ 3 ਨਕਾਬਪੋਸ਼ ਮਾਰੂ ਹਥਿਆਰਾਂ ਨਾਲ ਲੈਸ ਲੁਟੇਰਿਆਂ ਨੇ ਪਿੰਡ ਪੰਡੋਰੀ ਮੱਛੀ ਫਾਰਮ ’ਤੇ ਬਣੇ ਕਮਰਿਆਂ ’ਚ ਰਹਿ ਰਹੇ ਪ੍ਰਵਾਸੀ ਮਜ਼ਦੂਰਾਂ ’ਤੇ ਹਮਲਾ ਕਰ ਦਿੱਤਾ, ਜਿਸ ਵਿਚ ਇਕ ਅੌਰਤ ਦੀ ਮੌਤ ਹੋ ਗਈ।
ਜਾਣਕਾਰੀ ਅਨੁਸਾਰ ਪਿੰਡ ਦੀ ਪੰਚਾਇਤ ਵੱਲੋਂ ਮੱਛੀ ਫਾਰਮ ਸ਼ਿਵ ਬਚਨ ਨੂੰ ਠੇਕੇ ’ਤੇ ਦਿੱਤਾ ਹੋਇਆ ਹੈ ਤੇ ਸ਼ਿਵ ਬਚਨ ਨੇ ਮੱਛੀ ਫਾਰਮ ਦੀ ਸਾਂਭ-ਸੰਭਾਲ ਲਈ ਦੋ ਮਜ਼ਦੂਰ ਵਿਨੋਦ ਕੁਮਾਰ ਤੇ ਸੁਧੀਰ ਕੁਮਾਰ ਦੇਖ-ਭਾਲ ਲਈ ਰੱਖੇ ਹੋਏ ਹਨ, ਜਿਨ੍ਹਾਂ ਨੂੰ ਪਿੰਡ ਦੇ ਬਾਹਰ ਮੱਛੀ ਫਾਰਮ ’ਤੇ ਰਹਿਣ ਲਈ ਕਮਰੇ ਬਣਾ ਕੇ ਦਿੱਤੇ ਹੋਏ ਹਨ। ਸੁਧੀਰ ਕੁਮਾਰ ਬੀਤੇ ਕੁਝ ਦਿਨਾਂ ਤੋਂ ਆਪਣੇ ਘਰ ਦੀ ਵੰਡ ਕਰਵਾਉਣ ਲਈ ਆਪਣੇ ਪਿੰਡ ਹਾਜੀਪੁਰ ਬਿਹਾਰ ਗਿਆ ਹੋਇਆ ਹੈ। ਵਿਨੋਦ ਕੁਮਾਰ ਤੇ ਸੁਧੀਰ ਦੀ ਮਾਂ ਰਾਮ ਕਲੀ ਤੇ ਉਸ ਦੀ ਪਤਨੀ ਸੰਗੀਤਾ ਆਪਣੀਆਂ ਦੋ ਬੇਟੀਆਂ ਨਾਲ ਇਨ੍ਹਾਂ ਕਮਰਿਆਂ ’ਚ ਰਹਿ ਰਹੀਆਂ ਹਨ। ਰਾਤ ਵਿਨੋਦ ਕੁਮਾਰ ਬਾਹਰ ਸੁੱਤਾ ਪਿਆ ਸੀ ਤੇ ਸੱਸ ਤੇ ਨੂੰਹ ਬੱਚਿਆਂ ਸਮੇਤ ਕਮਰੇ ’ਚ ਸੁੱਤੀਆਂ ਪਈਆਂ ਸਨ। ਬੀਤੀ ਅੱਧੀ ਰਾਤ ਨੂੰ 3 ਨਕਾਬਪੋਸ਼ ਲੁਟੇਰੇ ਮਾਰੂ ਹਥਿਆਰਾਂ ਨਾਲ ਲੈਸ ਹੋ ਕੇ ਆ ਗਏ ਤੇ ਆਉਂਦਿਆਂ ਵਿਨੋਦ ਕੁਮਾਰ ਦੀ ਕੁੱਟ-ਮਾਰ ਸ਼ੁਰੂ ਕਰ ਦਿੱਤੀ। ਰੌਲਾ ਸੁਣ ਕੇ ਨੂੰਹ ਤੇ ਸੱਸ ਵੀ ਜਾਗ ਪਈਆਂ। ਨੂੰਹ ਸੰਗੀਤਾ ਨੇ ਰੌਲਾ ਪਾਉਣਾ ਸ਼ੁਰੂ ਕਰ ਦਿੱਤਾ। ਲੁਟੇਰਿਆਂ ਨੇ ਸੰਗੀਤਾ ਨੂੰ ਇੰਨੀ ਬੁਰੀ ਤਰ੍ਹਾਂ ਕੁੱਟਿਆ ਕਿ ਉਹ ਜ਼ਖਮਾਂ ਦੀ ਤਾਬ ਨਾ ਸਹਿੰਦੀ ਹੋਈ ਮੌਕੇ ’ਤੇ ਹੀ ਦਮ ਤੋਡ਼ ਗਈ। ਲੁਟੇਰਿਆਂ ਨੇ ਰਾਮ ਕਲੀ ਤੇ ਵਿਨੋਦ ਕੁਮਾਰ ਦੀ ਕੁੱਟ-ਮਾਰ ਕਰ ਕੇ ਘਰ ਦੀ ਫਰੋਲਾ-ਫਰਾਲੀ ਕੀਤੀ ਤੇ ਘਰ ’ਚੋਂ ਚਾਂਦੀ ਦੀਆਂ ਝਾਂਜਰਾਂ ਤੇ ਦੋ ਮੋਬਾਇਲ ਜਿਸ ’ਚੋਂ ਇਕ ਚਲਦਾ ਸੀ ਲੈ ਕੇ ਫਰਾਰ ਹੋ ਗਏ। ਇਸ ਘਟਨਾ ਸਬੰਧੀ ਥਾਣਾ ਦਾਖਾ ਨੂੰ ਸੂਚਿਤ ਕੀਤਾ ਤਾਂ ਥਾਣਾ ਦਾਖਾ ਦੇ ਮੁਖੀ ਬਿਕਰਮਜੀਤ ਸਿੰਘ ਸਮੇਤ ਪੁਲਸ ਪਾਰਟੀ ਮੌਕੇ ’ਤੇ ਪੁੱਜੇ ਤੇ ਜ਼ਖਮੀਆਂ ਨੂੰ ਲੁਧਿਆਣਾ ਦੇ ਹਸਪਤਾਲ ’ਚ ਦਾਖਲ ਕਰਵਾਇਆ। ਮੌਕਾ ਵਾਰਦਾਤ ’ਤੇ ਐੱਸ. ਐੱਸ. ਪੀ. ਸੁਰਜੀਤ ਸਿੰਘ, ਐੱਸ.ਪੀ. (ਡੀ) ਰੁਪਿੰਦਰ ਭਾਰਦਵਾਜ, ਐੱਸ.ਪੀ. (ਐੱਚ) ਸਰਬਜੀਤ ਸਿੰਘ, ਇੰਸਪੈਕਟਰ ਲਖਬੀਰ ਸਿੰਘ ਸੀ.ਆਈ.ਏ., ਡੀ.ਐੱਸ.ਪੀ. ਜਸਵਿੰਦਰ ਸਿੰਘ ਬਰਾਡ਼ ਤੇ ਅਮਨਦੀਪ ਸਿੰਘ ਬਰਾਡ਼, ਹਰਜਿੰਦਰ ਸਿੰਘ ਥਾਣਾ ਮੁਖੀ ਸੁਧਾਰ ਪੁੱਜੇ ਤੇ ਸਥਿਤੀ ਦਾ ਜਾਇਜ਼ਾ ਲਿਆ। ਐੱਮ.ਐੱਫ. ਐੱਸ.ਐੱਲ. ਟੀਮ ਦੇ ਇੰਚਾਰਜ ਜਗਦੀਪ ਸਿੰਘ ਤੇ ਵਰਿੰਦਰ ਸਿੰਘ ਨੇ ਫਿੰਗਰ ਪ੍ਰਿੰਟ ਹਾਸਲ ਕੀਤੇ।
ਸੰਗੀਤਾ ਨੇ ਮਾਰਨ ਤੋਂ ਪਹਿਲਾਂ ਪਤੀ ਤੇ ਸਰਪੰਚ ਨੂੰ ਦਿੱਤੀ ਸੂਚਨਾ
ਲੁਟੇਰਿਆਂ ਵੱਲੋਂ ਵਾਰਦਾਤ ਕਰ ਦੇਣ ਦੀ ਸੂਚਨਾ ਆਪਣੇ ਪਤੀ ਸੁਧੀਰ ਕੁਮਾਰ ਨੂੰ ਮ੍ਰਿਤਕਾ ਸੰਗੀਤਾ ਦੱਸ ਰਹੀ ਸੀ ਤਾਂ ਲੁਟੇਰਿਆਂ ਨੇ ਉਸ ਦੀ ਕੁੱਟ-ਮਾਰ ਜਾਰੀ ਰੱਖੀ। ਕੁੱਟ ਖਾਂਦਿਆਂ-ਖਾਂਦਿਆਂ ਮੋਬਾਇਲ ’ਤੇ ਸਰਪੰਚ ਸਤਪਾਲ ਸਿੰਘ ਨੂੰ ਸੂਚਿਤ ਕਰ ਗਈ।
ਜਿਸ ’ਤੇ ਸਰਪੰਚ ਬੰਦੇ ਲੈ ਕੇ ਰਾਤ ਮੌਕਾ ਵਾਰਦਾਤ ’ਤੇ ਪੁੱਜਾ ਤਾਂ ਲੁਟੇਰੇ ਭੱਜ ਚੁੱਕੇ ਸਨ ਤੇ ਸੰਗੀਤਾ ਦਮ ਤੋਡ਼ ਚੁੱਕੀ ਸੀ। ਸਰਪੰਚ ਨੇ ਸੰਬੰਧਤ ਥਾਣੇ ਨੂੰ ਸੂਚਿਤ ਕੀਤਾ।
ਜਲਦੀ ਕਾਬੂ ਕਰ ਲਏ ਜਾਣਗੇ ਲੁਟੇਰੇ : ਐੱਸ.ਐੱਸ.ਪੀ.
ਐੱਸ. ਐੱਸ.ਪੀ. ਸੁਰਜੀਤ ਸਿੰਘ ਨੇ ਦੱਸਿਆ ਕਿ ਇਸ ਵਾਰਦਾਤ ’ਤੇ ਪੁਲਸ ਕਈ ਥਿਊਰੀਆਂ ’ਤੇ ਕੰਮ ਕਰ ਰਹੀ ਹੈ ਤੇ ਉਨ੍ਹਾਂ ਨੂੰ ਕੁਝ ਸੁਰਾਗ ਵੀ ਮਿਲੇ ਹਨ। ਜਲਦੀ ਹੀ ਇਨ੍ਹਾਂ ਲੁਟੇਰਿਆਂ ਨੂੰ ਕਾਬੂ ਕਰ ਲਿਆ ਜਾਵੇਗਾ।
ਥਾਣਾ ਦਾਖਾ ਦੇ ਮੁਖੀ ਬਿਕਰਮਜੀਤ ਸਿੰਘ ਨੇ ਦੱਸਿਆ ਕਿ ਰਾਮ ਕਲੀ ਪਤਨੀ ਰਾਜਿੰਦਰ ਰਜਕ ਦੇ ਬਿਆਨਾਂ ’ਤੇ ਲੁਟੇਰਿਆਂ ਵਿਰੁੱਧ ਕੇਸ ਦਰਜ ਕਰ ਕੇ ਮਾਮਲੇ ਦੀ ਜਾਂਚ ਆਰੰਭ ਦਿੱਤੀ ਹੈ।
ਕਿਸਾਨਾਂ ਨੇ ਕੀਤਾ ਸਰਕਾਰ ਦਾ ਅਰਥੀ ਫੂਕ ਪ੍ਰਦਰਸ਼ਨ
NEXT STORY 
