ਜਲੰਧਰ,(ਕਮਲੇਸ਼)– ਸਰਬ ਮਲਟੀਪਲੈਕਸ ਤੋਂ ਕੁਝ ਦੂਰੀ 'ਤੇ ਸਥਿਤ ਇਕ ਖਾਲੀ ਪਲਾਟ ਵਿਚ ਬੋਰੀ ਵਿਚ ਬੰਨ੍ਹ ਕੇ ਰੱਖਿਆ ਗਿਆ ਸਿਰ ਕੱਟਿਆ ਧੜ ਬਰਾਮਦ ਹੋਇਆ ਹੈ ਤੇ ਲਾਸ਼ ਨੂੰ ਬੋਰੇ ਵਿਚ ਪੈਕ ਕੀਤਾ ਗਿਆ ਸੀ। ਲਾਸ਼ ਨੂੰ ਪਹਿਲਾਂ ਇਕ ਬੈੱਡ ਸ਼ੀਟ ਅਤੇ ਬਾਅਦ ਵਿਚ 2 ਵੱਖ-ਵੱਖ ਬੋਰਿਆਂ ਵਿਚ ਪਾਇਆ ਗਿਆ ਸੀ। ਪਲਾਟ ਵਿਚ ਜਦੋਂ ਇਕ ਵਿਅਕਤੀ ਨੇ ਬੋਰੇ ਵਿਚ ਪਈ ਲਾਸ਼ ਨੂੰ ਵੇਖਿਆ ਤਾਂ ਉਸ ਨੇ ਤੁਰੰਤ ਪੁਲਸ ਨੂੰ ਸੂਚਨਾ ਦਿੱਤੀ, ਜਿਸ ਤੋਂ ਬਾਅਦ ਥਾਣਾ ਨੰਬਰ 8 ਦੇ ਐੱਸ. ਐੱਚ. ਓ., ਏ. ਸੀ. ਪੀ. ਨਾਰਥ ਅਤੇ ਸੀ. ਆਈ. ਏ. ਸਟਾਫ ਦੀ ਪੁਲਸ ਮੌਕੇ 'ਤੇ ਪਹੁੰਚ ਗਈ। ਪੁਲਸ ਦੀ ਜਾਂਚ ਵਿਚ ਸਾਫ ਹੋ ਗਿਆ ਹੈ ਕਿ ਮਾਮਲਾ ਕਤਲ ਦਾ ਹੈ।
ਪੁਲਸ ਦੀ ਮੰਨੀਏ ਤਾਂ ਮ੍ਰਿਤਕ ਦੇ ਹੱਥ-ਪੈਰ ਬੰਨ੍ਹਣ ਤੋਂ ਬਾਅਦ ਉਸਦਾ ਸਿਰ ਕੱਟਿਆ ਗਿਆ ਅਤੇ ਲਾਸ਼ ਨੂੰ ਬੋਰੇ ਵਿਚ ਪਾ ਕੇ ਇਸ ਖਾਲੀ ਪਲਾਟ ਵਿਚ ਸੁੱਟ ਦਿੱਤਾ ਗਿਆ। ਫਿਲਹਾਲ ਥਾਣਾ ਨੰਬਰ 8 ਵਿਚ ਅਣਪਛਾਤੇ ਹਥਿਆਰਾਂ ਦੇ ਖਿਲਾਫ ਕੇਸ ਦਰਜ ਕਰ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ। ਮਾਮਲੇ ਦੀ ਜਾਣਕਾਰੀ ਦਿੰਦੇ ਹੋਏ ਏ. ਸੀ. ਪੀ. ਨਾਰਥ ਜਸਬਿੰਦਰ ਸਿੰਘ ਨੇ ਦੱਸਿਆ ਕਿ ਸ਼ੁੱਕਰਵਾਰ ਰਾਤ 9 ਵਜੇ ਦੇ ਕਰੀਬ ਉਨ੍ਹਾਂ ਨੂੰ ਸੂਚਨਾ ਮਿਲੀ ਸੀ ਕਿ ਸਰਬ ਮਲਟੀਪਲੈਕਸ ਤੋਂ ਕੁਝ ਦੂਰੀ 'ਤੇ ਸਥਿਤ ਇਕ ਖਾਲੀ ਪਲਾਟ ਵਿਚ ਬੋਰੀ ਵਿਚ ਬੰਨ੍ਹੀ ਹੋਈ ਲਾਸ਼ ਮਿਲੀ ਹੈ। ਦਰਅਸਲ ਇਸ ਖਾਲੀ ਪਲਾਟ ਵਿਚ ਲੱਕੜੀ ਦਾ ਸਾਮਾਨ ਰੱਖਣ ਆਏ ਇਕ ਵਿਅਕਤੀ ਨੇ ਇਸ ਬੋਰੀ ਨੂੰ ਵੇਖ ਕੇ ਪੁਲਸ ਨੂੰ ਸੂਚਨਾ ਦਿੱਤੀ ਸੀ। ਮੌਕੇ 'ਤੇ ਪਹੁੰਚੀ ਪੁਲਸ ਨੇ ਬੋਰੀ ਦੇ ਅੰਦਰ ਦੇਖਿਆ ਤਾਂ ਉਸ ਵਿਚ ਇਕ ਲਾਸ਼ ਸੀ, ਜਿਸ ਦੇ ਹੱਥ-ਪੈਰ ਬੰਨ੍ਹੇ ਹੋਏ ਸਨ ਪਰ ਗਰਦਨ ਗਾਇਬ ਸੀ। ਲਾਸ਼ 'ਤੇ ਅੰਡਰਵੀਅਰ ਅਤੇ ਬਨਿਆਨ ਤੋਂ ਇਲਾਵਾ ਕੋਈ ਕੱਪੜਾ ਨਹੀਂ ਸੀ। ਏ. ਸੀ. ਪੀ. ਦਾ ਕਹਿਣਾ ਹੈ ਕਿ ਵਿਅਕਤੀ ਦਾ ਕਤਲ ਕਿਤੇ ਹੋਰ ਹੋਣ ਦਾ ਸ਼ੱਕ ਹੈ ਅਤੇ ਹੱਤਿਆ ਤੋਂ ਬਾਅਦ ਲਾਸ਼ ਪਲਾਟ ਵਿਚ ਸੁੱਟੀ ਗਈ ਹੈ। ਪੁਲਸ ਨੂੰ ਮੌਕੇ 'ਤੇ ਇਕ ਸਾਈਕਲ ਵੀ ਮਿਲੀ ਹੈ। ਏ. ਸੀ. ਪੀ. ਨੇ ਕਿਹਾ ਕਿ ਮ੍ਰਿਤਕ ਵਿਅਕਤੀ ਦੀ ਪਛਾਣ ਨਾ ਹੋਣ ਦੇ ਚਲਦੇ ਬਰਾਮਦ ਧੜ ਨੂੰ ਸਿਵਲ ਹਸਪਤਾਲ ਵਿਚ ਰਖਵਾਇਆ ਗਿਆ ਹੈ ਅਤੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।
ਪੁਲਸ ਹੱਥ ਲੱਗੀ ਵੱਡੀ ਕਾਮਯਾਬੀ, 55 ਕਰੋੜ ਦੀ ਫੜ੍ਹੀ ਹੈਰੋਇਨ
NEXT STORY 
