ਮੁੰਬਈ (ਬਿਊਰੋ)– ਹਿੰਦੀ ਸਿਨੇਮਾ ਦੇ ਮਸ਼ਹੂਰ ਅਦਾਕਾਰ, ਨਿਰਮਾਤਾ-ਨਿਰਦੇਸ਼ਕ ਰਾਕੇਸ਼ ਰੌਸ਼ਨ ਦਾ ਜਨਮ 6 ਸਤੰਬਰ, 1949 ਨੂੰ ਮੁੰਬਈ ’ਚ ਹੋਇਆ ਸੀ। ਉਨ੍ਹਾਂ ਨੇ ਬਾਲੀਵੁੱਡ ਨੂੰ ਕਈ ਹਿੱਟ ਫ਼ਿਲਮਾਂ ਦਿੱਤੀਆਂ ਹਨ। ਕਦੇ ਕਹਾਣੀ ਲਿਖਣੀ, ਕਦੇ ਅਦਾਕਾਰੀ ਤੇ ਕਦੇ ਨਿਰਦੇਸ਼ਨ, ਰਾਕੇਸ਼ ਰੌਸ਼ਨ ਨੇ ਵੱਡੇ ਪਰਦੇ ’ਤੇ ਖ਼ਾਸ ਛਾਪ ਛੱਡੀ ਹੈ। ਉਹ ਬਾਲੀਵੁੱਡ ਸੰਗੀਤ ਨਿਰਦੇਸ਼ਕ ਰੌਸ਼ਨ ਦੇ ਪੁੱਤਰ ਹਨ।
ਰਾਕੇਸ਼ ਰੌਸ਼ਨ ਨੇ 70 ਤੋਂ 80 ਦੇ ਦਹਾਕੇ ਤੱਕ ਕਈ ਫ਼ਿਲਮਾਂ ’ਚ ਅਭਿਨੈ ਕੀਤਾ। ਉਨ੍ਹਾਂ ਨੇ ਲਗਭਗ 84 ਫ਼ਿਲਮਾਂ ’ਚ ਅਭਿਨੈ ਕੀਤਾ ਹੈ। ਰਾਕੇਸ਼ ਰੌਸ਼ਨ ਨੇ ਬਾਲੀਵੁੱਡ ’ਚ ਆਪਣੇ ਫ਼ਿਲਮੀ ਕਰੀਅਰ ਦੀ ਸ਼ੁਰੂਆਤ 1970 ’ਚ ਆਈ ਫ਼ਿਲਮ ‘ਕਹਾਨੀ ਘਰ ਘਰ ਕੀ’ ਨਾਲ ਕੀਤੀ ਸੀ। ਇਸ ਫ਼ਿਲਮ ’ਚ ਉਨ੍ਹਾਂ ਦੀ ਅਦਾਕਾਰੀ ਨੂੰ ਦਰਸ਼ਕਾਂ ਵਲੋਂ ਭਰਵਾਂ ਹੁੰਗਾਰਾ ਮਿਲਿਆ ਸੀ। ਇਸ ਤੋਂ ਬਾਅਦ ਰਾਕੇਸ਼ ਰੌਸ਼ਨ ‘ਪਰਾਇਆ ਧਨ’, ‘ਜ਼ਖਮੀ’, ‘ਖਾਨਦਾਨ’, ‘ਹਮਾਰੀ ਬਹੁ ਅਲਕਾ’, ‘ਮਹਾਗੁਰੂ’ ਵਰਗੀਆਂ ਫ਼ਿਲਮਾਂ ’ਚ ਨਜ਼ਰ ਆਏ।
ਰਾਕੇਸ਼ ਰੌਸ਼ਨ ਨੇ ਫ਼ਿਲਮਾਂ ’ਚ ਸਾਕਾਰਾਤਮਕ ਤੇ ਨਾਕਾਰਾਤਮਕ ਦੋਵੇਂ ਤਰ੍ਹਾਂ ਦੇ ਕਿਰਦਾਰ ਨਿਭਾਏ ਤੇ ਦਰਸ਼ਕਾਂ ਦਾ ਦਿਲ ਜਿੱਤਿਆ। ਰਾਕੇਸ਼ ਰੌਸ਼ਨ ਨੇ ਸਾਲ 1980 ’ਚ ਆਪਣਾ ਪ੍ਰੋਡਕਸ਼ਨ ਹਾਊਸ ਖੋਲ੍ਹਿਆ। ਇਸ ਪ੍ਰੋਡਕਸ਼ਨ ਹਾਊਸ ਦੇ ਅਧੀਨ, ਉਨ੍ਹਾਂ ਨੇ ‘ਫਿਲਮਕ੍ਰਾਫਟ’ ਤੇ ਫ਼ਿਲਮ ‘ਆਪ ਕੀ ਦੀਵਾਨੀ’ ਬਣਾਈ। ਇਸ ਦੇ ਨਾਲ ਹੀ ਰਾਕੇਸ਼ ਰੌਸ਼ਨ ਨੇ ਫ਼ਿਲਮ ‘ਖੁਦਾਗਰਜ਼’ ਨਾਲ ਨਿਰਦੇਸ਼ਕ ਦੀ ਸ਼ੁਰੂਆਤ ਕੀਤੀ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ‘ਕਿਸ਼ਨ ਕਨ੍ਹਈਆ’ ਤੇ ‘ਕਰਨ-ਅਰਜੁਨ’ ਵਰਗੀਆਂ ਫ਼ਿਲਮਾਂ ਵੀ ਕੀਤੀਆਂ।
ਜਦੋਂ ਸਾਲ 2000 ਆਇਆ ਤਾਂ ਰਾਕੇਸ਼ ਰੌਸ਼ਨ ਨੇ ਆਪਣੇ ਬੇਟੇ ਰਿਤਿਕ ਰੌਸ਼ਨ ਨੂੰ ਲਾਂਚ ਕਰਨ ਦਾ ਫ਼ੈਸਲਾ ਕੀਤਾ। ਉਨ੍ਹਾਂ ਨੇ ਫ਼ਿਲਮ ‘ਕਹੋ ਨਾ ਪਿਆਰ ਹੈ’ ਨਾਲ ਰਿਤਿਕ ਰੌਸ਼ਨ ਦਾ ਬਾਲੀਵੁੱਡ ’ਚ ਸਫ਼ਰ ਸ਼ੁਰੂ ਕੀਤਾ ਸੀ। ਫ਼ਿਲਮ ‘ਕਹੋ ਨਾ ਪਿਆਰ ਹੈ’ ਬਹੁਤ ਵੱਡੀ ਹਿੱਟ ਸਾਬਿਤ ਹੋਈ ਤੇ ਬਾਪ-ਬੇਟੇ ਦੀ ਜੋੜੀ ਨੇ ਬਾਕਸ ਆਫਿਸ ’ਤੇ ਕਾਫੀ ਸੁਰਖ਼ੀਆਂ ਬਟੋਰੀਆਂ। ਇਸ ਤੋਂ ਬਾਅਦ ਰਾਕੇਸ਼ ਰੌਸ਼ਨ ਨੇ ਬੇਟੇ ਰਿਤਿਕ ਰੌਸ਼ਨ ਨਾਲ ‘ਕੋਈ ਮਿਲ ਗਿਆ’ ਤੇ ‘ਕ੍ਰਿਸ਼’ ਵਰਗੀਆਂ ਫ਼ਿਲਮਾਂ ਬਣਾਈਆਂ, ਜੋ ਬਲਾਕਬਸਟਰ ਸਾਬਿਤ ਹੋਈਆਂ।
ਰਾਕੇਸ਼ ਤੇ ਰਿਤਿਕ ਰੌਸ਼ਨ ਦੀਆਂ ਇਨ੍ਹਾਂ ਫ਼ਿਲਮਾਂ ਨੇ ਨਾ ਸਿਰਫ਼ ਬਾਕਸ ਆਫਿਸ ’ਤੇ ਵੱਡੀ ਕਮਾਈ ਕੀਤੀ, ਸਗੋਂ ਕਈ ਪੁਰਸਕਾਰ ਵੀ ਜਿੱਤੇ ਹਨ। ਮੰਨਿਆ ਜਾਂਦਾ ਹੈ ਕਿ ਰਾਕੇਸ਼ ਰੌਸ਼ਨ ਆਪਣੀਆਂ ਸਾਰੀਆਂ ਫ਼ਿਲਮਾਂ ਦੇ ਨਾਂ ‘ਕੇ’ ਤੋਂ ਰੱਖਦੇ ਹਨ, ਜਿਸ ਨੂੰ ਉਹ ਫ਼ਿਲਮ ਲਈ ਸ਼ੁਭ ਮੰਨਦੇ ਹਨ। ਉਹ ਅੰਕ ਵਿਗਿਆਨ ਦੇ ਕਾਰਨ ਅਜਿਹਾ ਕਰਦੇ ਹਨ। ਭਵਿੱਖ ’ਚ ਰਾਕੇਸ਼ ਰੌਸ਼ਨ ਆਪਣੇ ਪੁੱਤਰ ਦੀਆਂ ਫ਼ਿਲਮਾਂ ’ਚ ਅੱਖਰ ‘ਕੇ’ ਨੂੰ ਜਗ੍ਹਾ ਦਿੰਦੇ ਹੋਏ ਦਿਖਾਈ ਦੇਣਗੇ। ਸਾਲ 2019 ’ਚ ਰਾਕੇਸ਼ ਰੌਸ਼ਨ ਇਕ ਤਰ੍ਹਾਂ ਦੇ ਗਲੇ ਦੇ ਕੈਂਸਰ ਤੋਂ ਪੀੜਤ ਸਨ।
ਰਿਤਿਕ ਰੌਸ਼ਨ ਨੇ ਆਪਣੇ ਪਿਤਾ ਰਾਕੇਸ਼ ਰੌਸ਼ਨ ਨਾਲ ਇਕ ਤਸਵੀਰ ਸੋਸ਼ਲ ਮੀਡੀਆ ’ਤੇ ਸਾਂਝੀ ਕੀਤੀ ਤੇ ਲਿਖਿਆ, ‘ਮੈਂ ਡੈਡ ਨੂੰ ਇਕ ਤਸਵੀਰ ਲੈਣ ਲਈ ਕਿਹਾ। ਸਰਜਰੀ ਦੇ ਦਿਨ ਵੀ, ਉਹ ਜਿਮ ’ਚ ਆਪਣੀ ਕਸਰਤ ਕਰਨਾ ਨਹੀਂ ਭੁੱਲੇ। ਮੈਨੂੰ ਪਤਾ ਹੈ ਕਿ ਉਹ ਇਕ ਮਜ਼ਬੂਤ ਆਦਮੀ ਹਨ। ਕੁਝ ਹਫ਼ਤੇ ਪਹਿਲਾਂ ਉਨ੍ਹਾਂ ਨੂੰ ਗਲੇ ਦੇ ਸਕਵੇਮਸ ਸੈੱਲ ਕਾਰਸਿਨੋਮਾ (ਗਲੇ ਦੇ ਕੈਂਸਰ ਦੀ ਇਕ ਕਿਸਮ) ਦਾ ਪਤਾ ਲੱਗਾ ਸੀ।’
ਨੋਟ– ਇਸ ਖ਼ਬਰ ’ਤੇ ਆਪਣੀ ਪ੍ਰਤੀਕਿਰਿਆ ਕੁਮੈਂਟ ਕਰਕੇ ਸਾਂਝੀ ਕਰੋ।
ਨਵਜੋਤ ਸਿੱਧੂ ਦੀ ਥਾਂ ਲੈਣ 'ਤੇ ਕਪਿਲ ਨੇ ਅਰਚਨਾ ਪੂਰਨ ਨੂੰ ਲਿਆ ਲੰਮੇ ਹੱਥੀਂ, ਸ਼ਰੇਆਮ ਆਖ ਦਿੱਤੀ ਇਹ ਗੱਲ
NEXT STORY 
