ਹੈਲਥ ਡੈਸਕ - ਫਰਵਰੀ ਦਾ ਮਹੀਨਾ ਆਪਣੇ ਨਾਲ ਮੌਸਮ 'ਚ ਵੱਡੀ ਤਬਦੀਲੀ ਲੈ ਕੇ ਆਇਆ ਹੈ। ਦਿਨ ਵੇਲੇ ਨਿੱਘੀ ਧੁੱਪ ਅਤੇ ਸਵੇਰੇ-ਸ਼ਾਮ ਦੀ ਗੁਲਾਬੀ ਠੰਢ ਕਾਰਨ ਲੋਕ ਤੇਜ਼ੀ ਨਾਲ ਸਰਦੀ, ਖਾਂਸੀ ਅਤੇ ਜ਼ੁਕਾਮ ਦੀ ਲਪੇਟ 'ਚ ਆ ਰਹੇ ਹਨ। ਅਜਿਹੇ ਸਮੇਂ 'ਚ ਵਾਰ-ਵਾਰ ਦਵਾਈਆਂ ਖਾਣ ਦੀ ਬਜਾਏ, ਸਾਡੀ ਰਸੋਈ 'ਚ ਕੁਝ ਅਜਿਹੀਆਂ ਚੀਜ਼ਾਂ ਮੌਜੂਦ ਹਨ ਜੋ ਸਦੀਆਂ ਤੋਂ 'ਰਾਮਬਾਣ' ਇਲਾਜ ਵਜੋਂ ਵਰਤੀਆਂ ਜਾ ਰਹੀਆਂ ਹਨ। ਆਓ ਜਾਣਦੇ ਹਾਂ ਉਨ੍ਹਾਂ 5 ਦੇਸੀ ਨੁਸਖਿਆਂ ਬਾਰੇ ਜੋ ਤੁਹਾਨੂੰ ਬਿਨਾਂ ਕਿਸੇ ਸਾਈਡ ਇਫੈਕਟ ਦੇ ਤੁਰੰਤ ਆਰਾਮ ਦੇ ਸਕਦੇ ਹਨ:
ਬੇਸਣ ਦਾ ਸ਼ੀਰਾ
- ਸਰਦੀ-ਜ਼ੁਕਾਮ ਲਈ ਪੰਜਾਬ ਦਾ ਸਭ ਤੋਂ ਪਸੰਦੀਦਾ ਨੁਸਖਾ 'ਬੇਸਣ ਦਾ ਸ਼ੀਰਾ' ਹੈ। ਇਸ ਨੂੰ ਬਣਾਉਣ ਲਈ ਤੁਸੀਂ ਪਹਿਲਾਂ ਦੇਸੀ ਘਿਓ 'ਚ ਦੋ ਚਮਚ ਬੇਸਣ ਭੁੰਨੋ। ਜਦੋਂ ਖੁਸ਼ਬੂ ਆਉਣ ਲੱਗੇ ਤਾਂ ਉਸ ਵਿਚ ਗਰਮ ਦੁੱਧ (ਜਾਂ ਪਾਣੀ) ਅਤੇ ਗੁੜ ਮਿਲਾਓ। ਇਸ ਵਿਚ ਥੋੜ੍ਹੀ ਕਾਲੀ ਮਿਰਚ ਅਤੇ ਅਦਰਕ ਦਾ ਪਾਊਡਰ (ਸੁੰਢ) ਵੀ ਪਾਇਆ ਜਾ ਸਕਦਾ ਹੈ। ਇਹ ਛਾਤੀ ਦੀ ਜਕੜਨ ਨੂੰ ਖੋਲ੍ਹਦਾ ਹੈ ਅਤੇ ਵਗਦੇ ਨੱਕ ਨੂੰ ਤੁਰੰਤ ਰੋਕਣ ਵਿਚ ਮਦਦਗਾਰ ਹੈ।
ਅਦਰਕ ਅਤੇ ਸ਼ਹਿਦ ਦਾ ਮਿਸ਼ਰਣ
- ਅਦਰਕ ਵਿਚ ਐਂਟੀ-ਇਨਫਲੇਮੇਟਰੀ ਗੁਣ ਹੁੰਦੇ ਹਨ ਜੋ ਗਲੇ ਦੀ ਸੋਜ ਨੂੰ ਘਟਾਉਂਦੇ ਹਨ। ਇਸ ਲਈ ਅਦਰਕ ਦੇ ਰਸ ਵਿਚ ਇਕ ਚਮਚ ਸ਼ਹਿਦ ਮਿਲਾ ਕੇ ਹਲਕਾ ਕੋਸਾ ਕਰਕੇ ਚੱਟੋ। ਇਹ ਖਾਂਸੀ ਅਤੇ ਗਲੇ ਦੀ ਖਰਾਸ਼ ਲਈ ਬਹੁਤ ਪ੍ਰਭਾਵਸ਼ਾਲੀ ਹੈ।
ਹਲਦੀ ਵਾਲਾ ਦੁੱਧ
- ਹਲਦੀ ਇਕ ਕੁਦਰਤੀ ਐਂਟੀਬਾਇਓਟਿਕ ਹੈ। ਰਾਤ ਨੂੰ ਸੌਣ ਤੋਂ ਪਹਿਲਾਂ ਇਕ ਗਲਾਸ ਕੋਸੇ ਦੁੱਧ ਵਿਚ ਅੱਧਾ ਚਮਚ ਹਲਦੀ ਅਤੇ ਇਕ ਚੁਟਕੀ ਕਾਲੀ ਮਿਰਚ ਪਾ ਕੇ ਪੀਓ। ਇਹ ਸਰੀਰ ਦੀ ਰੋਗਾਂ ਨਾਲ ਲੜਨ ਦੀ ਸ਼ਕਤੀ ਵਧਾਉਂਦਾ ਹੈ ਅਤੇ ਸਰੀਰ ਦੇ ਦਰਦ ਨੂੰ ਦੂਰ ਕਰਦਾ ਹੈ।
ਤੁਲਸੀ ਅਤੇ ਕਾਲੀ ਮਿਰਚ ਦਾ ਕਾੜ੍ਹਾ
- ਤੁਲਸੀ ਦੇ ਪੱਤੇ ਇਨਫੈਕਸ਼ਨ ਨਾਲ ਲੜਨ 'ਚ ਮਦਦ ਕਰਦੇ ਹਨ। ਪਾਣੀ ਵਿਚ 5-7 ਤੁਲਸੀ ਦੇ ਪੱਤੇ, 2 ਲੌਂਗ ਅਤੇ 3-4 ਕਾਲੀਆਂ ਮਿਰਚਾਂ ਉਬਾਲੋ। ਜਦੋਂ ਪਾਣੀ ਅੱਧਾ ਰਹਿ ਜਾਵੇ ਤਾਂ ਇਸ ਨੂੰ ਛਾਣ ਕੇ ਚਾਹ ਵਾਂਗ ਸਿਪ-ਸਿਪ ਕਰਕੇ ਪੀਓ। ਇਹ ਵਾਇਰਲ ਬੁਖਾਰ ਅਤੇ ਜ਼ੁਕਾਮ ਵਿਚ ਰਾਹਤ ਦਿੰਦਾ ਹੈ।
ਲਸਣ ਦੀ ਵਰਤੋਂ
- ਲਸਣ ਵਿਚ 'ਐਲੀਸਿਨ' ਨਾਮਕ ਤੱਤ ਹੁੰਦਾ ਹੈ ਜੋ ਵਾਇਰਸ ਨਾਲ ਲੜਦਾ ਹੈ। ਲਸਣ ਦੀਆਂ 2-3 ਕਲੀਆਂ ਨੂੰ ਦੇਸੀ ਘਿਓ ਵਿਚ ਹਲਕਾ ਭੁੰਨ ਕੇ ਖਾਓ ਜਾਂ ਸਬਜ਼ੀ ਵਿਚ ਇਸ ਦੀ ਮਾਤਰਾ ਵਧਾ ਦਿਓ। ਇਹ ਸਰੀਰ ਨੂੰ ਅੰਦਰੋਂ ਗਰਮ ਰੱਖਦਾ ਹੈ ਅਤੇ ਬੈਕਟੀਰੀਅਲ ਇਨਫੈਕਸ਼ਨ ਨੂੰ ਰੋਕਦਾ ਹੈ।
ਰੱਖੋ ਇਨ੍ਹਾਂ ਗੱਲਾਂ ਦਾ ਖਾਸ ਧਿਆਨ :-
- ਬਹੁਤ ਜ਼ਿਆਦਾ ਠੰਢਾ ਪਾਣੀ ਜਾਂ ਕੋਲਡ ਡਰਿੰਕਸ ਤੋਂ ਪਰਹੇਜ਼ ਕਰੋ।
- ਜੇਕਰ ਬੁਖਾਰ 101°F ਤੋਂ ਉੱਪਰ ਹੈ ਜਾਂ ਖਾਂਸੀ 3 ਦਿਨਾਂ ਤੋਂ ਵੱਧ ਰਹਿੰਦੀ ਹੈ, ਤਾਂ ਤੁਰੰਤ ਡਾਕਟਰ ਨਾਲ ਸੰਪਰਕ ਕਰੋ।
ਕੀ ਤੁਸੀਂ ਵੀ ਖੜ੍ਹੇ ਹੋ ਕੇ ਜਾਂ ਮੋਬਾਈਲ ਦੇਖਦੇ ਹੋਏ ਖਾਂਦੇ ਹੋ ਖਾਣਾ? ਸੁਧਾਰ ਲਓ ਇਹ ਆਦਤਾਂ, ਨਹੀਂ ਤਾਂ...
NEXT STORY 
