ਵੈੱਬ ਡੈਸਕ - ਗਰਮੀਆਂ ਦਾ ਮੌਸਮ ਸ਼ੁਰੂ ਹੁੰਦਿਆਂ ਹੀ ਘਰਾਂ, ਖਾਸ ਕਰਕੇ ਰਸੋਈ 'ਚ ਕੀੜੀਆਂ ਦੀ ਸਮੱਸਿਆ ਵਧ ਜਾਂਦੀ ਹੈ। ਚਾਹੇ ਖੰਡ ਦਾ ਡੱਬਾ ਹੋਵੇ ਜਾਂ ਸਲੈਬ 'ਤੇ ਡਿੱਗਿਆ ਹੋਇਆ ਥੋੜ੍ਹਾ ਜਿਹਾ ਖਾਣਾ, ਕੀੜੀਆਂ ਦੀ ਫ਼ੌਜ ਤੁਰੰਤ ਉੱਥੇ ਪਹੁੰਚ ਜਾਂਦੀ ਹੈ, ਜਿਸ ਨਾਲ ਕਈ ਵਾਰ ਖਾਣਾ ਵੀ ਬਰਬਾਦ ਹੋ ਜਾਂਦਾ ਹੈ। ਅਕਸਰ ਲੋਕ ਇਨ੍ਹਾਂ ਨੂੰ ਭਜਾਉਣ ਲਈ ਬਾਜ਼ਾਰੂ ਕੀਟਨਾਸ਼ਕ ਸਪਰੇਅ ਦੀ ਵਰਤੋਂ ਕਰਦੇ ਹਨ ਪਰ ਰਸੋਈ 'ਚ ਕੈਮੀਕਲ ਦੀ ਵਰਤੋਂ ਖਾਣੇ ਰਾਹੀਂ ਸਾਡੀ ਸਿਹਤ ਨੂੰ ਨੁਕਸਾਨ ਪਹੁੰਚਾ ਸਕਦੀ ਹੈ। ਅਜਿਹੇ 'ਚ, ਤੁਸੀਂ ਆਪਣੀ ਰਸੋਈ 'ਚ ਹੀ ਮੌਜੂਦ ਕੁਦਰਤੀ ਚੀਜ਼ਾਂ ਦੀ ਵਰਤੋਂ ਕਰਕੇ ਇਨ੍ਹਾਂ 'ਬਿਨ-ਬੁਲਾਏ ਮਹਿਮਾਨਾਂ' ਨੂੰ ਬਾਹਰ ਦਾ ਰਸਤਾ ਦਿਖਾ ਸਕਦੇ ਹੋ।
ਕੀੜੀਆਂ ਨੂੰ ਭਜਾਉਣ ਦੇ ਪ੍ਰਭਾਵਸ਼ਾਲੀ ਤਰੀਕੇ :-
ਸਿਰਕੇ ਦੀ ਵਰਤੋਂ
- ਕੀੜੀਆਂ ਨੂੰ ਸਿਰਕੇ ਦੀ ਤੇਜ਼ ਗੰਧ ਬਿਲਕੁਲ ਪਸੰਦ ਨਹੀਂ ਹੁੰਦੀ। ਇਸ ਦੀ ਵਰਤੋਂ ਕਰਨ ਲਈ ਇਕ ਸਪਰੇਅ ਬੋਤਲ 'ਚ ਬਰਾਬਰ ਮਾਤਰਾ 'ਚ ਪਾਣੀ ਅਤੇ ਸਫੈਦ ਸਿਰਕਾ ਮਿਲਾ ਕੇ ਉਨ੍ਹਾਂ ਥਾਵਾਂ 'ਤੇ ਛਿੜਕਾਅ ਕਰੋ ਜਿੱਥੇ ਕੀੜੀਆਂ ਜ਼ਿਆਦਾ ਨਜ਼ਰ ਆਉਂਦੀਆਂ ਹਨ। ਇਸ ਤੋਂ ਇਲਾਵਾ, ਘਰ ਵਿੱਚ ਪੋਚਾ ਲਗਾਉਣ ਵਾਲੇ ਪਾਣੀ 'ਚ ਵੀ ਥੋੜ੍ਹਾ ਜਿਹਾ ਸਿਰਕਾ ਮਿਲਾਇਆ ਜਾ ਸਕਦਾ ਹੈ।
ਕਾਲੀ ਮਿਰਚ
- ਕੀੜੀਆਂ ਤਿੱਖੀਆਂ ਚੀਜ਼ਾਂ ਤੋਂ ਕੋਸੋ ਦੂਰ ਰਹਿੰਦੀਆਂ ਹਨ। ਜਿੱਥੇ ਕੀੜੀਆਂ ਦਾ ਝੁੰਡ ਹੋਵੇ ਜਾਂ ਉਨ੍ਹਾਂ ਦੀਆਂ ਖੁੱਡਾਂ ਹੋਣ, ਉੱਥੇ ਕਾਲੀ ਮਿਰਚ ਦਾ ਪਾਊਡਰ ਛਿੜਕ ਦਿਓ। ਹਾਲਾਂਕਿ, ਜੇਕਰ ਘਰ 'ਚ ਛੋਟੇ ਬੱਚੇ ਜਾਂ ਪਾਲਤੂ ਜਾਨਵਰ ਹਨ, ਤਾਂ ਇਸ ਨੁਸਖ਼ੇ ਦੀ ਵਰਤੋਂ ਸਾਵਧਾਨੀ ਨਾਲ ਕਰਨੀ ਚਾਹੀਦੀ ਹੈ।
ਦਾਲਚੀਨੀ
- ਖਾਣੇ ਦੀ ਖੁਸ਼ਬੂ ਵਧਾਉਣ ਵਾਲੀ ਦਾਲਚੀਨੀ ਕੀੜੀਆਂ ਨੂੰ ਭਜਾਉਣ 'ਚ ਬਹੁਤ ਮਦਦਗਾਰ ਹੈ। ਜਿਸ ਰਸਤੇ ਤੋਂ ਕੀੜੀਆਂ ਘਰ ਦੇ ਅੰਦਰ ਦਾਖਲ ਹੁੰਦੀਆਂ ਹਨ, ਉੱਥੇ ਦਾਲਚੀਨੀ ਦਾ ਪਾਊਡਰ ਛਿੜਕ ਦਿਓ। ਤੁਸੀਂ ਦਾਲਚੀਨੀ ਦੇ ਤੇਲ (Cinnamon Oil) 'ਚ ਰੂੰ ਦੇ ਫੰਬੇ ਭਿਉਂ ਕੇ ਵੀ ਉਨ੍ਹਾਂ ਥਾਵਾਂ 'ਤੇ ਰੱਖ ਸਕਦੇ ਹੋ।
ਨਿੰਬੂ ਦਾ ਰਸ
- ਨਿੰਬੂ 'ਚ ਮੌਜੂਦ ਐਸਿਡਿਕ ਗੁਣ ਕੀੜੀਆਂ ਦੀ ਰਸਤਾ ਲੱਭਣ ਦੀ ਸਮਰੱਥਾ ਨੂੰ ਘੱਟ ਕਰ ਦਿੰਦੇ ਹਨ। ਕੀੜੀਆਂ ਦੇ ਆਉਣ-ਜਾਣ ਵਾਲੇ ਰਸਤੇ 'ਤੇ ਨਿੰਬੂ ਦਾ ਰਸ ਨਿਚੋੜ ਦਿਓ ਜਾਂ ਨੀਂਬੂ ਦੇ ਛਿਲਕਿਆਂ ਨੂੰ ਅਲਮਾਰੀਆਂ ਅਤੇ ਦਰਵਾਜ਼ਿਆਂ ਦੇ ਕੋਲ ਰੱਖੋ। ਇਸ ਦੀ ਖੱਟੀ ਖੁਸ਼ਬੂ ਕੀੜੀਆਂ ਨੂੰ ਰਸੋਈ ਤੋਂ ਦੂਰ ਰੱਖੇਗੀ।
ਇਹ ਸਾਰੇ ਨੁਸਖ਼ੇ ਕੁਦਰਤੀ ਅਤੇ ਸੁਰੱਖਿਅਤ ਹਨ, ਜੋ ਬਿਨਾਂ ਕਿਸੇ ਜ਼ਹਿਰੀਲੇ ਕੈਮੀਕਲ ਦੇ ਤੁਹਾਡੀ ਰਸੋਈ ਨੂੰ ਕੀੜੀਆਂ ਤੋਂ ਮੁਕਤ ਰੱਖਣ 'ਚ ਮਦਦ ਕਰਨਗੇ।
ਕੀ ਤੁਸੀਂ ਵੀ ਰਾਜਮਾਂਹ ਬਣਾਉਣ ਵੇਲੇ ਕਰਦੇ ਹੋ ਇਹ ਗਲਤੀਆਂ? ਜਾਣੋ ਸੁਆਦ ਰਾਜਮਾ ਬਣਾਉਣ ਦਾ ਸਹੀ ਤਰੀਕਾ
NEXT STORY 
