ਪਾਇਲ,(ਵਿਨਾਇਕ)- ਭੱਠੇ ਦੀ ਮਾਲਕਣ ਰਛਪਾਲ ਕੌਰ ਕਤਲਕਾਂਡ ਦੇ ਕੇਸ 'ਚ ਪਾਇਲ ਪੁਲਸ ਨੇ ਮ੍ਰਿਤਕਾਂ ਦੇ ਭਤੀਜੇ ਰਾਜਿੰਦਰ ਸਿੰਘ ਉਰਫ ਬੌਬੀ ਸਮੇਤ ਉਸ ਦੇ ਸਾਥੀ ਸਵਿੰਦਰ ਸਿੰਘ ਉਰਫ ਬਿੰਦਰ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ, ਜਦਕਿ ਇਕ ਹੋਰ ਦੋਸ਼ੀ ਅਜੇ ਵੀ ਫਰਾਰ ਹੈ। ਕਤਲ ਪਿੱਛੇ ਜਾਇਦਾਦ ਦੀ ਵੰਡ ਮੁੱਖ ਕਾਰਨ ਦੱਸਿਆ ਗਿਆ ਹੈ ਅਤੇ ਇਹ ਵੀ ਦੱਸਿਆ ਜਾ ਰਿਹਾ ਹੈ ਕਿ ਭਾੜੇ ਦੇ ਕਾਤਲ ਭੇਜ ਕੇ ਇਸ ਕਤਲ ਨੂੰ ਅੰਜ਼ਾਮ ਦਿੱਤਾ ਗਿਆ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਖੰਨਾ ਦੇ ਐਸ. ਐਸ. ਪੀ. ਹਰਪ੍ਰੀਤ ਸਿੰਘ ਪੀ. ਪੀ. ਐਸ. ਨੇ ਦੱਸਿਆ ਕਿ ਇੰਸਪੈਕਟਰ ਕਰਨੈਲ ਸਿੰਘ ਐਸ. ਐਚ. ਓ. ਪਾਇਲ ਦੀ ਅਗਵਾਈ 'ਚ ਪੁਲਸ ਜਾਂਚ ਟੀਮ ਵੱਲੋਂ ਵਿਗਿਆਨਕ ਢੰਗਾਂ ਨਾਲ ਕੀਤੀ ਜਾਂਚ ਅਤੇ ਸੀ.ਸੀ.ਟੀ.ਵੀ ਕੈਮਰਿਆਂ ਦੀ ਫੁਟੇਜ ਤੋਂ ਇਹ ਤੱਥ ਸਾਹਮਣੇ ਆਇਆ ਕਿ ਦੋਸ਼ੀ ਰਾਜਿੰਦਰ ਸਿੰਘ ਉਰਫ ਬੌਬੀ ਦਾ ਮ੍ਰਿਤਕਾ ਰਛਪਾਲ ਕੌਰ ਨਾਲ ਜਾਇਦਾਦ ਦੀ ਵੰਡ ਸੰਬੰਧੀ ਝਗੜਾ ਚਲਦਾ ਸੀ, ਜਿਸ ਕਾਰਨ ਉਸਨੇ ਭਾੜੇ ਦੇ ਕਾਤਲ ਭੇਜ ਕੇ ਇਸ ਕਤਲ ਨੂੰ ਅੰਜ਼ਾਮ ਦਿੱਤਾ।
ਖੰਨਾ ਦੇ ਐਸ. ਐਸ. ਪੀ. ਹਰਪ੍ਰੀਤ ਸਿੰਘ ਨੇ ਅੱਗੇ ਦੱਸਿਆ ਕਿ ਮ੍ਰਿਤਕਾਂ ਦੀ ਧੀ ਡਾ. ਤਰਨਵੀਰ ਕੌਰ ਪਤਨੀ ਸਿਮਰਜੀਤ ਸਿੰਘ ਵਾਸੀ ਮੋਹਾਲੀ ਨੇ ਪਾਇਲ ਪੁਲਸ ਕੋਲ ਬਿਆਨ ਦਰਜ ਕਰਵਾਏ ਕਿ ਉਸ ਦੀ ਮਾਂ ਰਛਪਾਲ ਕੌਰ ਅਤੇ ਭਰਾ ਬਿਸ਼ੇਸ਼ਰਪਾਲ ਸਿੰਘ ਪਿੰਡ ਸ਼ਾਹਪੁਰ (ਪਾਇਲ-ਕੱਦੋਂ ਰੋਡ) 'ਤੇ ਇੱਟਾ ਦਾ ਭੱਠਾ ਚਲਾਉਂਦੇ ਸਨ। 27 ਜੁਲਾਈ ਨੂੰ ਰਾਤ 8 ਵਜੇ ਕਰੀਬ ਉਸਦੇ ਭਰਾ ਨੇ ਉਸਨੂੰ ਮੋਬਾਇਲ 'ਤੇ ਸੂਚਨਾ ਦਿੱਤੀ ਕਿ ਉਸ ਦੀ ਮਾਤਾ ਰਛਪਾਲ ਕੌਰ ਬੁਰੀ ਤਰਾਂ ਜ਼ਖਮੀ ਹੋ ਗਏ ਹਨ, ਨੂੰ ਇਲਾਜ ਲਈ ਅਪੋਲੋ ਹਸਪਤਾਲ ਲੁਧਿਆਣਾ ਵਿਖੇ ਲੈ ਗਿਆ ਹਾਂ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਕਰ ਦਿੱਤਾ ਹੈ। ਬਾਅਦ ਵਿੱਚ ਉਨ੍ਹਾਂ ਭੱਠੇ 'ਤੇ ਲੱਗੇ ਸੀ.ਸੀ.ਟੀ.ਵੀ ਕੈਮਰਿਆਂ ਦੀ ਫੁਟੇਜ ਵੇਖੀ ਕਿ 2 ਅਣਪਛਾਤੇ ਹੈਲਮੇਟ ਧਾਰੀ ਵਿਅਕਤੀ ਮੋਟਰਸਾਈਕਲ 'ਤੇ ਸਵਾਰ ਹੋ ਕੇ ਭੱਠੇ 'ਤੇ ਆਏ, ਜਿਨ੍ਹਾਂ ਨੇ ਉਸ ਦੀ ਮਾਂ ਰਛਪਾਲ ਕੌਰ ਦੀ ਗਰਦਨ 'ਤੇ ਦਾਤਰ ਨਾਲ ਹਮਲਾ ਕਰਕੇ ਮੌਤ ਦੇ ਘਾਟ ਉਤਾਰ ਦੇਣ ਦੀ ਭਰਪੂਰ ਕੋਸ਼ਿਸ਼ ਕੀਤੀ ਅਤੇ ਘਟਨਾ ਸਥਾਨ ਤੋਂ ਫਰਾਰ ਹੋ ਗਏ।
ਸ਼ਿਕਾਇਤਕਰਤਾ ਡਾ. ਤਰਨਵੀਰ ਕੌਰ ਨੇ ਆਪਣੀ ਮਾਂ ਰਛਪਾਲ ਕੌਰ ਦੀ ਹੱਤਿਆ ਲਈ ਰਾਜਿੰਦਰ ਸਿੰਘ ਉਰਫ ਬੌਬੀ ਤੇ ਜਗਵਿੰਦਰ ਸਿੰਘ ਉਰਫ ਜੱਗੀ ਪੁੱਤਰ ਗੁਰਦੇਵ ਸਿੰਘ, ਗੁਰੀ ਪੁੱਤਰ ਰਾਜਿੰਦਰ ਉਰਫ ਬੌਬੀ, ਬਹਾਦਰ ਸਿੰਘ ਤੇ ਬਿੱਟੂ ਪੁੱਤਰ ਗੁਰਦੇਵ ਸਿੰਘ ਉਰਫ ਦੇਵ ਵਾਸੀ ਪਿੰਡ ਸਾਹਪੁਰ ਥਾਣਾ ਪਾਇਲ 'ਤੇ ਸ਼ੱਕ ਪ੍ਰਗਟਾਇਆ ਸੀ ਕਿ ਇਨ੍ਹਾਂ 'ਚੋਂ ਹੀ ਕਿਸੇ ਨੇ ਉਸ ਦੀ ਮਾਂ ਨੂੰ ਮਾਰ ਮੁਕਾਇਆ ਹੈ ਜਾਂ ਭਾੜੇ ਦੇ ਕਾਤਲ ਭੇਜ ਕੇ ਇਹ ਕਤਲ ਕਰਵਾਇਆ ਹੈ। ਇਸ ਘਟਨਾ ਸੰਬੰਧੀ ਪਾਇਲ ਪੁਲਸ ਨੇ ਮੁਕੱਦਮਾ ਨੰਬਰ. 112 ਮਿਤੀ 28/7/2020 ਧਾਰਾ 302,120ਬੀ,34 ਆਈ. ਪੀ. ਸੀ. ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਸੀ। ਖੰਨਾ ਦੇ ਐਸ. ਐਸ. ਪੀ. ਹਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਦੋਸ਼ੀ ਰਾਜਿੰਦਰ ਸਿੰਘ ਉਰਫ ਬੌਬੀ, ਜਿਸ ਮਕਾਨ ਵਿੱਚ ਰਹਿ ਰਿਹਾ ਹੈ, ਉਸ ਮਕਾਨ ਦੀ ਮਾਲਕੀ ਵੀ ਮ੍ਰਿਤਕਾ ਰਛਪਾਲ ਕੌਰ ਦੇ ਨਾਮ 'ਤੇ ਹੀ ਹੈ, ਜਿਸ ਕਾਰਨ ਦੋਸ਼ੀ ਰਾਜਿੰਦਰ ਸਿੰਘ ਉਰਫ ਬੌਬੀ ਆਪਣੀ ਚਾਚੀ ਰਛਪਾਲ ਕੌਰ ਨੂੰ ਉਸ ਮਕਾਨ ਦੀ ਰਜਿਸਟਰੀ ਆਪਣੇ ਨਾਮ ਕਰਵਾਉਣ ਲਈ ਦਬਾਅ ਬਣਾਉਂਦਾ ਸੀ ਅਤੇ ਮ੍ਰਿਤਕਾ ਵੱਲੋਂ ਮਨ੍ਹਾਂ ਕਰਨ 'ਤੇ ਦੋਸ਼ੀ ਰਾਜਿੰਦਰ ਸਿੰਘ ਉਰਫ ਬੌਬੀ ਨੇ ਭਾੜੇ ਦੇ ਕਾਤਲਾਂ ਤੋਂ ਆਪਣੀ ਚਾਚੀ ਦਾ ਕਤਲ ਕਰਵਾਉਣ ਦੀ ਸਾਜਿਸ਼ ਰਚ ਦਿੱਤੀ।
ਉਨ੍ਹਾਂ ਦੱਸਿਆ ਕਿ ਦੋਸ਼ੀ ਰਾਜਿੰਦਰ ਸਿੰਘ ਉਰਫ ਬੌਬੀ ਨੇ ਵਾਰਦਾਤ 'ਚ ਵਰਤਿਆਂ ਗਿਆ ਡਿਸਕਵਰ ਮੋਟਰਸਾਈਕਲ ਨੰਬਰ ਪੀਬੀ 10 ਸੀ.ਜੇਡ 6571 ਆਪਣੀ ਪਤਨੀ ਸੁਖਦਰਸ਼ਨ ਕੌਰ ਦੇ ਨਾਂ 'ਤੇ ਪਾਇਲ ਬੈਂਕ ਤੋਂ ਲੋਨ ਕਰਵਾ ਕੇ ਭਾੜੇ ਦੇ ਕਾਤਲ ਸਵਿੰਦਰ ਸਿੰਘ ਉਰਫ ਬਿੰਦਰ ਪੁੱਤਰ ਅਰਜਨ ਸਿੰਘ ਵਾਸੀ ਪਿੰਡ ਟਿੱਬਾ ਥਾਣਾ ਸਾਹਨੇਵਾਲ ਨੂੰ ਦਿੱਤਾ ਹੋਇਆ ਸੀ। ਉਨ੍ਹਾਂ ਦੱਸਿਆ ਕਿ ਪਹਿਲਾ ਰਚੀ ਹੋਈ ਸਾਜ਼ਿਸ਼ ਤਹਿਤ ਦੋਸ਼ੀ ਸਵਿੰਦਰ ਸਿੰਘ ਆਪਣੇ ਇੱਕ ਹੋਰ ਭਾੜੇ ਦੇ ਕਾਤਲ ਰਿੰਕੂ ਸਾਹਨੀ ਪੁੱਤਰ ਮਹਾਂਦੇਵ ਸਾਹਨੀ ਵਾਸੀ ਬਿਹਾਰ ਹਾਲ ਵਾਸੀ ਪਿੰਡ ਟਿੱਬਾ ਥਾਣਾ ਸਾਹਨੇਵਾਲ ਨਾਲ ਵਾਰਦਾਤ ਸਮੇਂ ਮੋਟਰਸਾਈਕਲ 'ਤੇ ਸਵਾਰ ਹੋ ਕੇ ਭੱਠੇ 'ਤੇ ਪੁੱਜਾ। ਜਿੱਥੇ ਦੋਸ਼ੀ ਸਵਿੰਦਰ ਸਿੰਘ ਮੋਟਰਸਾਈਕਲ ਸਟਾਰਟ ਕਰਕੇ ਖੜਾਂ ਰਿਹਾ ਅਤੇ ਰਿੰਕੂ ਸਾਹਨੀ ਨੇ ਮ੍ਰਿਤਕਾ ਰਛਪਾਲ ਕੌਰ ਦੀ ਗਰਦਨ 'ਤੇ ਦਾਤਰ ਨਾਲ ਹਮਲਾ ਕੀਤਾ, ਜਿਸ ਕਾਰਨ ਖੂਨ ਨਾਲ ਲੱਥਪਥ ਰਛਪਾਲ ਕੌਰ ਮੌਕੇ 'ਤੇ ਹੀ ਜ਼ਮੀਨ ਉਪਰ ਡਿੱਗ ਗਈ। ਵਾਰਦਾਤ ਨੂੰ ਅੰਜ਼ਾਮ ਦੇਣ ਤੋਂ ਬਾਅਦ ਦੋਵੇਂ ਮੁਜ਼ਰਮ ਫਰਾਰ ਹੋ ਗਏ ਸਨ। ਇਸ ਕੇਸ ਦੀ ਤਫਤੀਸ਼ ਕਰ ਰਹੇ ਪਾਇਲ ਦੇ ਐਸ.ਐਚ.ਓ ਇੰਸਪੈਕਟਰ ਕਰਨੈਲ ਸਿੰਘ ਨੇ ਦੱਸਿਆ ਕਿ ਦੋਵੇ ਦੋਸ਼ੀਆਂ ਨੂੰ ਮਾਨਯੋਗ ਅਦਾਲਤ ਵਿੱਚ ਪੇਸ਼ ਕਰਕੇ ਉਨਾਂ ਦਾ ਰਿਮਾਂਡ ਹਾਸਲ ਕੀਤਾ ਜਾਵੇਗਾ ਅਤੇ ਹੋਰ ਵੀ ਅਹਿਮ ਖੁਲਾਸੇ ਹੋਣ ਦੀ ਪੂਰਨ ਸੰਭਾਵਨਾ ਹੈ। ਉਨਾਂ ਦੱਸਿਆ ਕਿ ਇਸ ਕੇਸ ਦੇ ਲੋੜੀਂਦੇ ਦੋਸ਼ੀ ਨੂੰ ਵੀ ਜਲਦ ਹੀ ਗ੍ਰਿਫਤਾਰ ਕਰ ਲਿਆ ਜਾਵੇਗਾ।
ਲੁਧਿਆਣਾ ਜ਼ਿਲ੍ਹੇ 'ਚ ਕੋਰੋਨਾ ਕਾਰਨ 9 ਦੀ ਮੌਤ, 203 ਨਵੇਂ ਮਾਮਲਿਆਂ ਦੀ ਪੁਸ਼ਟੀ
NEXT STORY 
