ਪੱਟੀ (ਪਾਠਕ, ਰਖ਼ਰਾ, ਜੈਨ)- ਪੱਟੀ ਸ਼ਹਿਰ ਵਿੱਚ ਭੂੰਡ ਆਸ਼ਕਾਂ ਦਾ ਇਸ ਸਮੇਂ ਪੂਰਾ ਬੋਲਬਾਲਾ ਜਿਸ ਕਾਰਨ ਸਕੂਲਾਂ ਅਤੇ ਕਾਲਜਾਂ ਨੂੰ ਜਾਣ ਵਾਲੀਆਂ ਲੜਕੀਆਂ ਨੂੰ ਭਾਰੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਨਿੱਤ ਸਵੇਰੇ ਸਕੂਲ ਅਤੇ ਕਾਲਜ ਲੱਗਣ ਦੇ ਸਮੇਂ ਅਤੇ ਦੁਪਹਿਰ ਨੂੰ ਛੁੱਟੀ ਦੇ ਵੇਲੇ ਭੂੰਡ ਆਸ਼ਕਾਂ ਦੀਆਂ ਟੋਲੀਆਂ ਗਲੀਆਂ, ਬਜ਼ਾਰਾਂ ਅਤੇ ਚੌਂਕਾਂ ਵਿੱਚ ਖੜ੍ਹੇ ਹੋ ਜਾਂਦੇ ਹਨ ਅਤੇ ਰਾਹ ਚੱਲਦੀਆਂ ਕੁੜੀਆਂ 'ਤੇ ਫੱਬਤੀਆਂ ਕੱਸਦੇ ਹਨ। ਕਈ ਭੂੰਡ ਆਸ਼ਕ ਮੋਟਰਸਾਇਕਲਾਂ 'ਤੇ ਸਵਾਰ ਹੋ ਕੇ ਬਜ਼ਾਰਾਂ ਵਿੱਚ ਗਸ਼ਤ ਲਗਾਉਂਦੇ ਰਹਿਦੇ ਹਨ ਅਤੇ ਲੜਕੀਆਂ ਦਾ ਪਿੱਛਾ ਕਰਦੇ ਆਮ ਦੇਖੇ ਜਾਂਦੇ ਹਨ। ਕੁਝ ਭੂੰਡ ਆਸ਼ਕ ਬੁਲਟ ਮੋਟਰਸਾਇਕਲਾਂ 'ਤੇ ਰਾਹ ਜਾਂਦੀਆਂ ਲੜਕੀਆਂ ਕੋਲ ਜਾ ਕੇ ਜਾਣ ਬੁੱਝ ਕੇ ਪਟਾਕੇ ਮਾਰਦੇ ਹਨ ਜਿਸ ਕਾਰਨ ਲੜਕੀਆਂ ਅਤੇ ਹੋਰ ਰਾਹਗੀਰ ਅਸਕਰ ਤ੍ਰਬਕ ਜਾਂਦੇ ਹਨ ਇਸਤੋਂ ਇਲਾਵਾ ਮੋਟਰ ਸਾਇਕਲਾਂ 'ਤੇ ਵੱਖ-ਵੱਖ ਤਰ੍ਹਾਂ ਦੇ ਹਾਰਨ ਲਗਾ ਕੇ ਅਤੇ ਸਾਇਲੰਸਰ ਉਤਾਰ ਕੇ ਮੋਟਰ ਸਾਇਕਲਾਂ ਦਾ ਅਵਾਜ਼ ਪ੍ਰਦੂਸ਼ਨ ਪੈਦਾ ਕਰਕੇ ਜਿੱਥੇ ਇਹ ਲੜਕੀਆਂ ਨੂੰ ਤੰਗ ਕਰਦੇ ਹਨ ਉਥੇ ਦੁਕਾਨਦਾਰ ਵੀ ਇਨ੍ਹਾਂ ਦੀਆਂ ਅਜਿਹੀਆਂ ਹਰਕਤਾਂ ਕਾਰਨ ਪ੍ਰੇਸ਼ਾਨ ਹਨ। ਇਨ੍ਹਾਂ ਨੂੰ ਰੋਕਣ 'ਤੇ ਇਹ ਝੱਟ ਲੜਾਈ ਝਗੜੇ 'ਤੇ ਉਤਾਰੂ ਹੋ ਜਾਂਦੇ ਹਨ ਜਿਸ ਕਾਰਨ ਕੋਈ ਵੀ ਵਿਅਕਤੀ ਇਨ੍ਹਾਂ ਦੇ ਮੂੰਹ ਨਹੀਂ ਲੱਗਦਾ। ਸਥਾਨਕ ਗਾਂਧੀ ਸੱਥ, ਕੰਨਿਆਂ ਸਕੂਲ, ਕਾਲਜ ਰੋਡ, ਸਰਹਾਲੀ ਰੋਡ, ਪੁਰਾਣਾ ਹਸਪਤਾਲ, ਘਾਟੀ ਬਜ਼ਾਰ, ਕੰਡਿਆਲਾ ਰੋਡ ਆਦਿ ਇਲਾਕਿਆਂ ਵਿੱਚ ਇਨ੍ਹਾਂ ਭੂੰਡ ਆਸ਼ਕਾਂ ਨੇ ਦਹਿਸ਼ਤ ਫੈਲਾਈ ਹੋਈ ਹੈ।
ਇਸ ਸਬੰਧੀ ਸਕੂਲ ਪ੍ਰਸਾਸ਼ਨ ਦਾ ਕਹਿਣਾ ਹੈ ਕਿ ਲੜਕੀਆਂ ਦੇ ਆਉਣ ਜਾਣ ਦੀ ਸੁਰੱਖਿਆ ਦੀ ਜਿੰਮੇਵਾਰੀ ਪੁਲਸ ਅਤੇ ਪਰਿਵਾਰ ਦੀ ਬਣਦੀ ਹੈ ਜਦੋਂ ਕਿ ਅਸੀਂ ਉਨ੍ਹਾਂ ਨੂੰ ਸਕੂਲ ਅੰਦਰ ਵਿੱਦਿਆ ਦੇਣੀ ਅਤੇ ਸਕੂਲ ਦੇ ਅੰਦਰ ਸੁਰੱਖਿਆ ਕਰਨੀ ਹੁੰਦੀ ਹੈ। ਸ਼ਹਿਰ ਵਾਸੀਆਂ ਨੇ ਮਨਮੋਹਨ ਕੁਮਾਰ ਸ਼ਰਮਾ ਐਸ.ਐਸ.ਪੀ. ਤਰਨਤਾਰਨ ਤੋਂ ਮੰਗ ਕੀਤੀ ਹੈ ਕਿ ਸ਼ਹਿਰ ਵਿੱਚ ਭੂੰਡ ਆਸ਼ਕਾਂ ਨੂੰ ਕਾਬੂ ਕਰਨ ਲਈ ਪੁਲਸ ਦੇ ਵਿਸ਼ੇਸ਼ ਦਸਤੇ ਤਾਇਨਾਤ ਕੀਤੇ ਜਾਣ ਤਾਂ ਜੋ ਵਿਦਿਆਰਥਣਾਂ ਅੰਦਰ ਅਸੁਰੱਖਿਆ ਦੀ ਭਾਵਨਾ ਖਤਮ ਹੋ ਸਕੇ।
ਲਾਸ ਏਂਜਲਸ ਫੈਡਰਲ ਕੋਰਟ ਦਾ ਫੈਸਲਾ ਨਿਆਂਪੂਰਨ- ਦਲਮੇਘ ਸਿੰਘ
NEXT STORY 
