ਜਲੰਧਰ- ਪੰਜਾਬ ਸਰਕਾਰ ਵਲੋਂ ਸ਼ਹਿਰਾਂ ਵਿਚ ਲਾਗੂ ਕੀਤੇ ਜਾਣ ਵਾਲੇ ਸਾਲਿਡ ਵੇਸਟ ਸਿਸਟਮ ਦੇ ਮਾਮਲੇ 'ਤੇ ਨਿਗਮ ਯੂਨੀਅਨਾਂ ਸਰਕਾਰ ਖਿਲਾਫ ਸੰਘਰਸ਼ ਦੀ ਤਿਆਰੀ ਵਿਚ ਹਨ। ਪੰਜਾਬ ਸਫਾਈ ਮਜ਼ਦੂਰ ਫੈਡਰੇਸ਼ਨ ਅਤੇ ਪੰਜਾਬ ਸੀਵਰਮੈਨ ਇੰਪਲਾਈਜ਼ ਯੂਨੀਅਨਾਂ ਦੇ ਮੁੱਖ ਅਹੁਦੇਦਾਰਾਂ ਨੇ ਮੰਗਲਵਾਰ ਨੂੰ ਨਗਰ ਨਿਗਮ ਜਲੰਧਰ ਦੇ ਮੁੱਖ ਦਫਤਰ ਵਿਚ ਮੀਟਿੰਗ ਕੀਤੀ, ਜਿਸ ਵਿਚ ਡਰਾਈਵਰ ਅਤੇ ਟੈਕਨੀਕਲ ਯੂਨੀਅਨ, ਸੀਵਰਮੈਨ ਇੰਪਲਾਈਜ਼ ਯੂਨੀਅਨ ਦਰਜਾ 4, ਮਹਾ-ਯੂਨੀਅਨ, ਐੱਸ. ਸੀ./ਬੀ. ਸੀ. ਯੂਨੀਅਨ, ਸਪੋਰਟਸ ਯੂਥ ਐਂਡ ਵੈੱਲਫੇਅਰ ਯੂਨੀਅਨ ਆਦਿ ਸ਼ਾਮਲ ਹਨ।
ਮੀਟਿੰਗ ਵਿਚ ਪਵਨ ਬਾਬਾ ਅਤੇ ਚੰਦਨ ਗਰੇਵਾਲ ਨੇ ਕਿਹਾ ਕਿ ਸਰਕਾਰ ਵਲੋਂ ਨਵੰਬਰ ਮਹੀਨੇ ਤੋਂ ਸਾਲਿਡ ਵੇਸਟ ਸਿਸਟਮ ਨੂੰ ਲਾਗੂ ਕਰਨ ਦਾ ਸਮੂਹ ਯੂਨੀਅਨਾਂ ਵਿਰੋਧ ਕਰਨਗੀਆਂ। ਉਨ੍ਹਾਂ ਕਿਹਾ ਕਿ ਮੌਜੂਦਾ ਸਰਕਾਰ ਇਸ ਪ੍ਰਾਜੈਕਟ ਨੂੰ ਲਾਗੂ ਕਰਨ ਦੇ ਵਾਰ-ਵਾਰ ਬਿਆਨ ਦੇ ਕੇ ਸਫਾਈ ਦੇ ਕੰਮ ਨਾਲ ਸਬੰਧਤ ਕਰਮਚਾਰੀਆਂ ਦੀਆਂ ਭਾਵਨਾਵਾਂ ਨਾਲ ਖਿਲਵਾੜ ਕਰ ਰਹੀ ਹੈ ਅਤੇ ਆਪਣੇ ਕਰੀਬੀ ਜਿੰਦਲ ਗਰੁੱਪ ਨੂੰ ਲਾਭ ਪਹੁੰਚਾਉਣਾ ਚਾਹੁੰਦੀ ਹੈ। ਅਜਿਹਾ ਹੋਣ ਨਾਲ ਗਰੀਬ ਸਫਾਈ ਕਰਮਚਾਰੀਆਂ ਦਾ ਸ਼ੋਸ਼ਣ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਸਾਲਿਡ ਵੇਸਟ ਪ੍ਰਾਜੈਕਟ ਲਾਗੂ ਹੋਣ ਨਾਲ ਸ਼ਹਿਰ ਵਾਸੀਆਂ 'ਤੇ ਇਕ ਨਵਾਂ ਟੈਕਸ ਲਾ ਕੇ ਨਿੱਜੀ ਕੰਪਨੀਆਂ ਨੂੰ ਪੰਜਾਬ ਸਰਕਾਰ ਫਾਇਦਾ ਪਹੁੰਚਾਵੇਗੀ। ਇਸ ਲਈ ਇਸ ਪ੍ਰੋਜੈਕਟ ਨੂੰ ਕਿਸੇ ਵੀ ਕੀਮਤ 'ਤੇ ਲਾਗੂ ਨਹੀਂ ਹੋਣ ਦਿੱਤਾ ਜਾਵੇਗਾ, ਭਾਵੇਂ ਨਿਗਮ ਯੂਨੀਅਨਾਂ ਨੂੰ ਕੋਈ ਵੀ ਕੁਰਬਾਨੀ ਦੇਣੀ ਪਵੇ।
ਬੰਟੂ ਸਭਰਵਾਲ ਅਤੇ ਗਰੇਵਾਲ ਨੇ ਕਿਹਾ ਕਿ ਜੇਕਰ ਸਾਲਿਡ ਵੇਸਟ ਪ੍ਰੋਜੈਕਟ ਲਾਗੂ ਹੋਇਆ ਤਾਂ ਸਾਰੀਆਂ ਯੂਨੀਅਨਾਂ ਮੌਜੂਦਾ ਵਿਧਾਇਕਾਂ ਦੇ ਘਰਾਂ ਦਾ ਘਿਰਾਓ ਕਰਨਗੀਆਂ ਅਤੇ 2017 ਵਿਚ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਵਿਚ ਵਾਲਮੀਕਿ ਭਾਈਚਾਰਾ ਅਕਾਲੀ ਦਲ ਅਤੇ ਭਾਜਪਾ ਦਾ ਬਾਈਕਾਟ ਕਰੇਗਾ। ਇਸ ਮੌਕੇ ਨਰੇਸ਼ ਪ੍ਰਧਾਨ, ਰਿੰਪੀ ਕਲਿਆਣ, ਅਰੁਣ ਕਲਿਆਣ, ਵਿਨੋਦ ਮੋਦੀ, ਸੰਨੀ ਸਹੋਤਾ, ਰਵੀ ਘਈ, ਜਨਕ ਬਾਹਰੀ, ਸੁਭਾਸ਼ ਗਿੱਲ, ਸਿਕੰਦਰ, ਵਿੱਕੀ ਸਹੋਤਾ, ਨੀਰਜ ਸੱਭਰਵਾਲ, ਹਰੀਸ਼ ਰਾਜਨ, ਬੰਟੀ ਥਾਪਰ, ਛੋਟਾ ਰਾਜੂ, ਸੋਨੂੰ ਲੋਹੀਆਂ, ਬੱਬਲ, ਸੰਜੀਵ ਟੀਟੂ, ਸ਼ਾਮ ਲਾਲ ਗਿੱਲ, ਪਵਨ ਪੱਪੂ, ਟਿੰਕੂ ਗਿੱਲ, ਨਿੱਕਾ ਸਿੰਘ ਅਤੇ ਗਰੋਵਰ ਗੋਲੂ ਆਦਿ ਵੀ ਮੌਜੂਦ ਸਨ।
70 ਕਰੋੜ ਦੀ ਹੈਰੋਇਨ ਸਣੇ ਤਸਕਰ ਕਾਬੂ, 9 ਲੱਖ ਦੀ ਕਰੰਸੀ ਵੀ ਬਰਾਮਦ
NEXT STORY 
