ਨੋਇਡਾ-ਈ.ਐਸ.ਆਈ. ਹਸਪਤਾਲ 'ਚ ਪੈਥਾਲੌਜੀ ਵਿਭਾਗ ਦੇ ਮੈਡੀਕਲ ਦਫਤਰ ਦੇ ਡਾ.ਦੀਪਕ ਦੇ ਮੋਬਾਇਲ 'ਤੇ ਪਿਛਲੇ ਦਿਨੀਂ ਇਕ ਵਿਅਕਤੀ ਨੇ ਫੋਨ ਕੀਤਾ। ਫੋਨ ਕਰਨ ਵਾਲੇ ਵਿਅਕਤੀ ਨੇ ਡਾਕਟਰ ਨੂੰ ਕੌਣ ਬਣੇਗਾ ਕਰੋੜਪਤੀ ਨਾਂ ਨਾਲ ਲਾਟਰੀ ਨਿਕਲਣ 'ਤੇ ਇਨਾਮ ਦੇ ਤੌਰ 'ਤੇ ਲੱਖਾਂ ਰੁਪਏ ਜਿੱਤਣ ਬਾਰੇ ਦੱਸਿਆ। ਅਗਲੇ ਦਿਨ ਫਿਰ ਉਸੇ ਨੰਬਰ ਤੋਂ ਦੀਪਕ ਨੂੰ ਫੋਨ ਆਇਆ। ਠੱਗੀ ਤੋਂ ਸਾਵਧਾਨ ਹੋਣ ਕਾਰਨ ਦੀਪਕ ਉਸਦੇ ਜਾਲ 'ਚ ਨਹੀਂ ਫਸੇ ਅਤੇ ਬਚ ਗਏ। ਹਾਲਾਂਕਿ ਆਏ ਦਿਨ ਲੋਕ ਠੱਗਾਂ ਦੀਆਂ ਗੱਲਾਂ 'ਚ ਫਸ ਜਾਂਦੇ ਹਨ ਅਤੇ ਮਿਹਨਤ ਨਾਲ ਕਮਾਈ ਪੂੰਜੀ ਨੂੰ ਗੁਆ ਬੈਠਦੇ ਹਨ। ਅਖਬਾਰਾਂ, ਟੈਲੀਵਿਜ਼ਨ 'ਤੇ ਵਿਗਿਆਪਨ ਦੇ ਕੇ ਜਾਂ ਫਿਰ ਮੋਬਾਇਲ 'ਤੇ ਸੰਦੇਸ਼ ਜਾਂ ਕਾਲ ਦੇ ਜ਼ਰੀਏ ਲੋਕਾਂ ਨੂੰ ਲੱਖਾਂ ਦਾ ਇਨਾਮ ਜਿੱਤਣ ਦੀ ਜਾਣਕਾਰੀ ਦਿੱਤੀ ਜਾਂਦੀ ਹੈ।
ਇਸ ਤੋਂ ਬਾਅਦ ਠੱਗ ਪ੍ਰੋਸੈਸਿੰਗ ਫੀਸ ਦਾ ਬਹਾਨਾ ਬਣਾ ਕੇ ਜਾਲ 'ਚ ਫਸੇ ਲੋਕਾਂ ਤੋਂ ਇਨਾਮ ਦੀ ਰਕਮ ਦੇ ਬਦਲੇ 10 ਤੋਂ 20 ਹਜ਼ਾਰ ਰੁਪਏ ਤੱਕ ਵਸੂਲ ਕਰ ਲੈਂਦੇ ਹਨ। ਪੈਸੇ ਮਿਲਦੇ ਹੀ ਠੱਗ ਆਪਣੇ ਮੋਬਾਇਲ ਬੰਦ ਕਰ ਦਿੰਦੇ ਹਨ। ਦੂਜੇ ਪਾਸੇ ਚੈਕ ਜਾਂ ਫੰਡ ਟ੍ਰਾਂਸਫਰ ਕਰਨ ਲਈ ਇਸਤੇਮਾਲ ਕੀਤਾ ਜਾਣ ਵਾਲਾ ਖਾਤਾ ਕਿਸੇ ਪ੍ਰਦੇਸ਼ 'ਚ ਹੁੰਦਾ ਹੈ ਤਾਂ ਠੱਗੀ ਕਿਸੇ ਹੋਰ ਪ੍ਰਦੇਸ਼ 'ਚ ਬੈਠ ਕੇ ਕੀਤੀ ਜਾਂਦੀ ਹੈ, ਨਾਲ ਹੀ ਠੱਗੀ ਦੀ ਰਕਮ ਕਿਸੇ ਹੋਰ ਪ੍ਰਦੇਸ਼ ਦੇ ਬੈਂਕ ਤੋਂ ਕਢਵਾਈ ਜਾਂਦੀ ਹੈ। ਨੋਇਡਾ ਪੁਲਸ ਨੇ ਹਾਲ ਹੀ 'ਚ ਇਕ ਗਿਰੋਹ ਨੂੰ ਫੜਿਆ ਸੀ, ਜਿਸ ਨੇ ਤਿੰਨ ਮਹੀਨੇ 'ਚ ਕਰੀਬ 560 ਲੋਕਾਂ ਨੂੰ ਠੱਗੀ ਦਾ ਸ਼ਿਕਾਰ ਬਣਾਇਆ ਸੀ। ਦਿੱਲੀ-ਐਨ.ਸੀ.ਆਰ. 'ਚ ਅਜਿਹੇ ਕਈ ਗਿਰੋਹ ਲੋਕਾਂ ਨੂੰ ਸ਼ਿਕਾਰ ਬਣਾ ਰਹੇ ਹਨ।
ਲੋਕਲ ਟੀ.ਵੀ ਅਤੇ ਵੱਡੇ ਨੈਸ਼ਨਲ ਚੈਨਲਾਂ 'ਤੇ ਚਿਹਰਾ ਪਛਾਣੋ ਮੁਕਾਬਲੇ ਸਮੇਤ ਕਈ ਤਰ੍ਹਾਂ ਦੇ ਵਿਗਿਆਪਨ ਆਉਂਦੇ ਹਨ। ਇਨ੍ਹਾਂ 'ਚੋਂ ਕੁਝ ਵਿਗਿਆਪਨ ਫਰਜ਼ੀ ਵੀ ਹੁੰਦੇ ਹਨ। ਇਸ ਤੋਂ ਇਲਾਵਾ ਅਖਬਾਰਾਂ 'ਚ ਉਲਝਣ ਅਤੇ ਚਿਹਰਾ ਪਛਾਣੋ ਮੁਕਾਬਲੇ ਦਾ ਝਾਂਸਾ ਦੇ ਕੇ ਇਨਾਮ ਜਿੱਤਣ ਦੀ ਗੱਲ ਆਖੀ ਜਾਂਦੀ ਹੈ। ਇਸ 'ਚ ਇੰਨੇ ਆਸਾਨ ਸਵਾਲ ਪੁੱਛੇ ਜਾਂਦੇ ਹਨ ਕਿ ਕੋਈ ਵੀ ਆਸਾਨੀ ਨਾਲ ਇਸਦਾ ਜਵਾਬ ਦੇ ਸਕਦਾ ਹੈ। ਅਜਿਹੇ 'ਚ ਇਕ ਵਾਰ ਜ਼ਰੂਰ ਸੋਚੋ ਕਿ ਇੰਨੀ ਆਸਾਨੀ ਨਾਲ ਕੋਈ ਤੁਹਾਨੂੰ ਲੱਖਾਂ ਰੁਪਏ ਕਿਉਂ ਦੇਵੇਗਾ। ਬੈਂਕਾਂ ਨਾਲ ਸਹੀ ਤਾਲਮੇਲ ਕਰਕੇ ਇਸ ਤਰ੍ਹਾਂ ਦੀ ਧੋਖਾਧੜੀ 'ਤੇ ਰੋਕ ਲਗਾਈ ਜਾ ਸਕਦੀ ਹੈ। ਪਿਛਲੇ ਦਿਨੀਂ ਧੋਖਾਧੜੀ ਦੇ ਇਕ ਮਾਮਲੇ ਦਾ ਖੁਲਾਸਾ ਬੈਂਕ ਦੀਆਂ ਦੋ ਬਰਾਂਚਾਂ 'ਚ ਵਧੀਆ ਤਾਲਮੇਲ ਨਾਲ ਹੋਇਆ ਸੀ।
ਆਫਤ ਨਾਲ ਲੜ ਕੇ ‘ਐਵਰੇਸਟ’ ਪੁੱਜੀ ਉਤਰਾਖੰਡ ਦੀ ਮਮਤਾ
NEXT STORY 
