ਜਲੰਧਰ/ਨਵੀਂ ਦਿੱਲੀ-ਮਹਾਰਾਸ਼ਟਰ ਅਤੇ ਹਰਿਆਣਾ 'ਚ ਪਾਰਟੀ ਦਾ ਬੇੜਾ ਪਾਰ ਲਾਉਣ ਤੋਂ ਬਾਅਦ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਟੀਮ ਹੁਣ ਇਸ ਮਹੀਨੇ ਸ਼ੁਰੂ ਹੋਣ ਵਾਲੀਆਂ ਜੰਮੂ-ਕਸ਼ਮੀਰ ਅਤੇ ਝਾਰਖੰਡ ਦੀਆਂ ਚੋਣਾਂ 'ਚ ਉਨ੍ਹਾਂ ਦੀਆਂ ਰੈਲੀਆਂ ਦੀ ਤਿਆਰੀ ਕਰ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਇਨ੍ਹਾਂ ਦੋਹਾਂ ਸੂਬਿਆਂ 'ਚ 20 ਰੈਲੀਆਂ ਕਰਨਗੇ। ਇਨ੍ਹਾਂ 'ਚੋਂ 14 ਰੈਲੀਆਂ ਝਾਰਖੰਡ ਅਤੇ 6 ਰੈਲੀਆਂ ਜੰਮੂ-ਕਸ਼ਮੀਰ 'ਚ ਹੋ ਸਕਦੀਆਂ ਹਨ।
ਝਾਰਖੰਡ ਦੇ ਨਕਸਲ ਪ੍ਰਭਾਵਿਤ ਇਲਾਕੇ 'ਚ ਮੋਦੀ ਦੀਆਂ ਸੰਭਾਵਿਤ ਰੈਲੀਆਂ ਨੂੰ ਲੈ ਕੇ ਸੁਰੱਖਿਆ ਏਜੰਸੀਆਂ ਨੇ ਤਿਆਰੀ ਵੀ ਸ਼ੁਰੂ ਕਰ ਦਿੱਤੀ ਹੈ। ਨਰਿੰਦਰ ਮੋਦੀ ਝਾਰਖੰਡ ਦੇ ਸਾਰੇ ਲੋਕ ਸਭਾ ਖੇਤਰਾਂ 'ਚ ਇਕ-ਇਕ ਰੈਲੀ ਕਰ ਸਕਦੇ ਹਨ। ਇਨ੍ਹਾਂ ਰੈਲੀਆਂ 'ਚ ਉਸ ਲੋਕ ਸਭਾ ਹਲਕੇ 'ਚ ਆਉਣ ਵਾਲੇ ਸਾਰੇ ਵਿਧਾਨ ਸਭਾ ਉਮੀਦਵਾਰਾਂ ਨੂੰ ਬੁਲਾਇਆ ਜਾਵੇਗਾ। ਇਸੇ ਤਰੀਕੇ ਨਰਿੰਦਰ ਮੋਦੀ ਦੀ ਯੋਜਨਾ ਜੰਮੂ-ਕਸ਼ਮੀਰ 'ਚ 6 ਲੋਕ ਸਭਾ ਸੀਟਾਂ 'ਤੇ ਇਕ-ਇਕ ਰੈਲੀ ਕਰਨ ਦੀ ਹੈ।
ਇਨ੍ਹਾਂ ਰੈਲੀਆਂ 'ਚ ਵੀ ਲੋਕ ਸਭਾ ਸੀਟ ਅਧੀਨ ਆਉਂਦੇ ਸਾਰੇ ਵਿਧਾਨ ਸਭਾ ਉਮੀਦਵਾਰਾਂ ਨੂੰ ਬੁਲਾਇਆ ਜਾਵੇਗਾ। ਦੱਸਿਆ ਜਾ ਰਿਹਾ ਹੈ ਕਿ ਜੰਮੂ ਖੇਤਰ ਅਧੀਨ ਆਉਂਦੀਆਂ 37 ਵਿਧਾਨ ਸੀਟਾਂ 'ਚ ਹੀ ਮੋਦੀ 4 ਤੋਂ 5 ਰੈਲੀਆਂ ਕਰ ਸਕਦੇ ਹਨ। ਹਰਿਆਣਾ ਅਤੇ ਮਹਾਰਾਸ਼ਟਰ ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਮੋਦੀ ਨੇ ਕੁੱਲ 37 ਰੈਲੀਆਂ ਕੀਤੀਆਂ ਸਨ ਅਤੇ ਉਨ੍ਹਾਂ ਦੀਆਂ ਇਨ੍ਹਾਂ ਰੈਲੀਆਂ ਨੇ ਵਿਰੋਧੀਆਂ ਨੂੰ ਧੂੜ ਚਟਾ ਦਿੱਤੀ ਹਾਲਾਂਕਿ ਚੋਣਾਂ ਦੇ ਐਲਾਨ ਤੋਂ ਬਾਅਦ ਮੋਦੀ ਬਤੌਰ ਪ੍ਰਧਾਨ ਮੰਤਰੀ ਆਪਣੇ ਅਧਿਕਾਰਕ ਕੰਮ 'ਚ ਰੁੱਝੇ ਰਹੇ ਪਰ ਅਮਰੀਕਾ ਦੌਰੇ ਤੋਂ ਵਾਪਸ ਆਉਂਦਿਆਂ ਹੀ ਪ੍ਰਧਾਨ ਮੰਤਰੀ ਨੇ ਇਨ੍ਹਾਂ ਦੋਹਾਂ ਸੂਬਿਆਂ 'ਚ ਤਾਬੜ-ਤੋੜ ਰੈਲੀਆਂ ਕੀਤੀਆਂ।
ਇਨ੍ਹਾਂ 'ਚੋਂ 11 ਰੈਲੀਆਂ ਹਰਿਆਣਾ ਅਤੇ 26 ਰੈਲੀਆਂ ਮਹਾਰਾਸ਼ਟਰ 'ਚ ਕੀਤੀਆਂ ਗਈਆਂ। ਇਨ੍ਹਾਂ ਚੋਣਾਂ 'ਚ ਵੀ ਪ੍ਰਧਾਨ ਮੰਤਰੀ ਮੋਦੀ ਦੀਆਂ ਰੈਲੀਆਂ ਦੀ ਜ਼ੋਰਾਂ 'ਤੇ ਤਿਆਰੀ ਕੀਤੀ ਜਾ ਰਹੀ ਹੈ ਅਤੇ ਆਉਣ ਵਾਲੇ ਦਿਨਾਂ 'ਚ ਮੋਦੀ ਦੋਹਾਂ ਸੂਬਿਆਂ 'ਚ ਚੋਣ ਮੈਦਾਨ 'ਚ ਗਰਜਦੇ ਨਜ਼ਰ ਆਉਣਗੇ।
ਚੂਹਾ ਛੱਡਣ ਗਈ ਕੁੜੀ 'ਤੇ ਭਾਰੀ ਪੈ ਗਿਆ ਸ਼ਰਾਬੀ
NEXT STORY 
