ਅੰਮ੍ਰਿਤਸਰ(ਦਲਜੀਤ ਸ਼ਰਮਾ)-ਸਰਕਾਰੀ ਮੈਡੀਕਲ ਕਾਲਜ ਅੰਮ੍ਰਿਤਸਰ 'ਚ ਇਲਾਜ ਸਮੱਗਰੀ ਦੀ ਖਰੀਦ 'ਚ ਕਰਮਚਾਰੀਆਂ ਅਤੇ ਅਧਿਕਾਰੀਆਂ ਦੀ ਮਿਲੀਭੁਗਤ ਨਾਲ ਲੱਗਭਗ 20 ਕਰੋੜ ਦੀ ਗੜਬੜੀ ਹੋਈ ਹੈ। ਘੋਟਾਲੇ ਦੀ ਰਿਪੋਰਟ ਮੈਡੀਕਲ ਸਿੱਖਿਆ ਅਤੇ ਖੋਜ ਵਿਭਾਗ ਦੇ ਕੋਲ ਪੁੱਜਣ ਦੇ ਉਪਰੰਤ ਕਰੀਬ ਤਿੰਨ ਮਹੀਨੇ ਬਾਅਦ ਵੀ ਕੋਈ ਕਾਰਵਾਈ ਨਹੀਂ ਹੋਈ ਹੈ। ਪਾਰਦਰਸ਼ਤਾ ਦੇ ਦਾਅਵੇ ਕਰਨ ਵਾਲੇ ਵਿਭਾਗ ਦੇ ਮੰਤਰੀ ਅਨਿਲ ਜੋਸ਼ੀ ਵੀ ਉਪਰੋਕਤ ਮਾਮਲੇ 'ਚ ਚੁੱਪੀ ਸਾਧੇ ਹੋਏ ਹਨ। ਉਪਰੋਕਤ ਖੁਲਾਸਾ ਆਰ. ਟੀ. ਆਈ. ਐਕਟੀਵਿਸਟ ਰਵਿੰਦਰ ਕੁਮਾਰ ਸੁਲਤਾਨਵਿੰਡ ਵਲੋਂ ਕੀਤਾ ਗਿਆ ਹੈ। ਰਵਿੰਦਰ ਸੁਲਤਾਨਵਿੰਡ ਨੇ ਪੱਤਰਕਾਰ ਸੰਮੇਲਨ 'ਚ ਉਪਰੋਕਤ ਘੋਟਾਲੇ ਦੇ ਦਸਤਾਵੇਜ਼ ਮੀਡੀਆ ਦੇ ਸਾਹਮਣੇ ਪੇਸ਼ ਕੀਤੇ। ਸੁਲਤਾਨਵਿੰਡ ਨੇ ਦੱਸਿਆ ਕਿ ਸਾਲ 2011 'ਚ ਮੈਡੀਕਲ ਕਾਲਜ ਦੀ ਪਰਚੇਜ਼ ਕਮੇਟੀ ਨੇ ਡਾਇਲਾਸਿਸ ਕਿੱਟਾਂ ਅਤੇ ਐਗਜ਼ਾਮੀਨੇਸ਼ਨ ਬੈੱਡ ਦੀ ਖਰੀਦ ਕੀਤੀ ਸੀ। ਇਸ ਸਾਮਾਨ ਦੀ ਖਰੀਦ 'ਚ ਬਹੁਤ ਗੜਬੜੀ ਕੀਤੀ ਗਈ। ਅਧਿਕਾਰੀਆਂ ਨੇ ਲੋੜ ਤੋਂ ਜ਼ਿਆਦਾ ਸਾਮਾਨ ਖਰੀਦਿਆ ਅਤੇ ਸਰਕਾਰ ਨੂੰ ਵੀਹ ਕਰੋੜ ਰੁਪਏ ਦਾ ਚੂਨਾ ਲਗਾਇਆ। ਭ੍ਰਿਸ਼ਟਾਚਾਰ ਦੇ ਸੰਕੇਤ ਮਿਲਣ 'ਤੇ ਉਨ੍ਹਾਂ ਨੇ ਮੁੱਖ ਮੰਤਰੀ, ਮੈਡੀਕਲ ਸਿੱਖਿਆ ਅਤੇ ਖੋਜ ਵਿਭਾਗ ਦੇ ਨਿਰਦੇਸ਼ਕ, ਮੁੱਖ ਸਕੱਤਰ ਨੂੰ ਸ਼ਿਕਾਇਤ ਕੀਤੀ। ਇਸ ਸ਼ਿਕਾਇਤ ਦੇ ਆਧਾਰ 'ਤੇ ਵਿਭਾਗ ਨੇ ਜਾਂਚ ਲਈ ਪਟਿਆਲਾ ਕਮੇਟੀ ਦਾ ਗਠਨ ਕੀਤਾ।
ਇਸ ਕਮੇਟੀ 'ਚ ਸਰਕਾਰੀ ਮੈਡੀਕਲ ਕਾਲਜ ਪਟਿਆਲਾ ਦੀ ਵਾਈਸ ਪ੍ਰਿੰਸੀਪਲ ਡਾ. ਅਨੀਤਾ ਗੁਪਤਾ, ਪ੍ਰੋ. ਬੀ. ਐੱਸ. ਸਿੱਧੂ, ਡਾ. ਅਵਨੀਸ਼ ਕੁਮਾਰ ਅਤੇ ਪ੍ਰੀਤਪਾਲ ਸਿੰਘ ਬਾਵਾ ਨੂੰ ਸ਼ਾਮਲ ਕੀਤਾ ਗਿਆ। ਪਟਿਆਲਾ ਕਮੇਟੀ ਵਲੋਂ ਤਿੰਨ ਸਾਲ ਤੱਕ ਇਸ ਇਸ ਮਾਮਲੇ ਦੀ ਜਾਂਚ ਕੀਤੀ ਜਾਂਦੀ ਰਹੀ। ਕਮੇਟੀ ਦੇ ਅਧਿਕਾਰੀ ਦਰਜਨਾਂ ਵਾਰ ਮੈਡੀਕਲ ਕਾਲਜ ਵੀ ਆਏ ਅਤੇ ਅਧਿਕਾਰੀਆਂ ਤੋਂ ਪੁੱਛਗਿਛ ਕਰਕੇ ਰਿਕਾਰਡ ਦੀ ਜਾਂਚ ਕੀਤੀ।
ਅਗਸਤ 2014 'ਚ ਪਟਿਆਲਾ ਕਮੇਟੀ ਦੀ ਚੇਅਰਮੈਨ ਡਾ. ਅਨੀਤਾ ਗੁਪਤਾ ਨੇ ਰਿਪੋਰਟ ਤਿਆਰ ਕੀਤੀ। ਉਕਤ ਰਿਪੋਰਟ ਦੀ ਪ੍ਰਤੀ ਮੀਡੀਆ ਦੇ ਸਨਮੁਖ ਰੱਖਦੇ ਹੋਏ ਸੁਲਤਾਨਵਿੰਡ ਨੇ ਕਿਹਾ ਕਿ ਇਸ 'ਚ ਸਪੱਸ਼ਟ ਵਿਖਾਇਆ ਗਿਆ ਹੈ ਕਿ ਸਰਕਾਰੀ ਮੈਡੀਕਲ ਕਾਲਜ ਅਤੇ ਸ੍ਰੀ ਗੁਰੂ ਤੇਗ ਬਹਾਦਰ ਹਸਪਤਾਲ ਦੇ ਅਧਿਕਾਰੀਆਂ ਵਲੋਂ ਲੱਗਭਗ ਵੀਹ ਕਰੋੜ ਦੀ ਗੜਬੜੀ ਕੀਤੀ ਗਈ ਹੈ। ਪਰਚੇਜ਼ ਕਮੇਟੀ ਨੇ ਇਹ ਸਾਰੀ ਖਰੀਦ ਬਠਿੰਡਾ ਦੀ ਇਕ ਕੰਪਨੀ ਤੋਂ ਕੀਤੀ। ਉਸ ਸਮੇਂ ਡਾਇਲਾਸਿਸ ਕਿੱਟ ਦਾ ਮੁੱਲ ਸਿਰਫ਼ 460 ਰੁਪਏ ਪ੍ਰਤੀ ਸੀ ਜਦੋਂ ਕਿ ਪਰਚੇਜ਼ ਕਮੇਟੀ ਨੇ 1500 ਰੁਪਏ ਖਰਚ ਦਰਜ ਕੀਤਾ। ਹਸਪਤਾਲਾਂ 'ਚ ਮਰੀਜ਼ਾਂ ਦੀ ਸਹੂਲਤ ਲਈ 1000 ਕਿੱਟ ਖਰੀਦੀ ਗਈ ਸੀ, ਜਦੋਂ ਕਿ ਇੰਨੀਆਂ ਕਿੱਟਾਂ ਦੀ ਲੋੜ ਨਹੀਂ ਸੀ। ਸੁਲਤਾਨਵਿੰਡ ਨੇ ਕਿਹਾ ਕਿ ਇਸ ਤਰ੍ਹਾਂ ਐਗਜ਼ਾਮੀਨੇਸ਼ਨ ਬੈੱਡ ਅਤੇ ਟਰਾਲੀਆਂ ਦੀ ਖਰੀਦ 'ਚ 6 ਕਰੋੜ ਰੁਪਏ ਦੀ ਗੜਬੜੀ ਅਧਿਕਾਰੀਆਂ ਨੇ ਕੀਤੀ। ਸਾਲ 2012 'ਚ ਖਰੀਦੀ ਗਈ ਐਗਜ਼ਾਮੀਨੇਸ਼ਨ ਟੇਬਲ (ਪ੍ਰਤੀ) ਦਾ ਮੁੱਲ 101700 ਰੁਪਏ ਹੈ, ਜਦੋਂ ਕਿ ਪਰਚੇਜ਼ ਕਮੇਟੀ ਨੇ ਇਕ ਐਗਜ਼ਾਮੀਨੇਸ਼ਨ ਟੇਬਲ ਦਾ ਮੁੱਲ 4 ਲੱਖ 50 ਹਜ਼ਾਰ ਰੁਪਏ ਦਰਜ ਕੀਤਾ। ਇਸ ਸਾਰੀ ਖਰੀਦ 'ਚ 2 ਕਰੋੜ 88 ਲੱਖ ਰੁਪਏ ਦੀ ਹੇਰਾਫੇਰੀ ਕੀਤੀ ਗਈ। ਸਾਲ 2009 ਤੋਂ 2013 ਤੱਕ ਗੁਰੂ ਨਾਨਕ ਦੇਵ ਹਸਪਤਾਲ ਦੇ ਵਿਕਾਸ ਦੇ ਨਾਮ 'ਤੇ ਟਰਾਲੀਆਂ, ਇਮਾਰਤਾਂ ਦੀ ਉਸਾਰੀ ਦਾ ਸਾਮਾਨ ਅਤੇ ਬਿਜਲੀ ਨਾਲ ਸਬੰਧਤ ਸਮੱਗਰੀਆਂ ਦੀ ਖਰੀਦ ਕੀਤੀ ਗਈ। ਪਰਚੇਜ਼ ਕਮੇਟੀ ਨੇ ਇਥੇ ਵੀ ਕਰੋੜਾਂ ਰੁਪਿਆ ਹਜ਼ਮ ਕਰ ਲਿਆ।
ਸ੍ਰੀ ਗੁਰੂ ਤੇਗ ਬਹਾਦਰ ਹਸਪਤਾਲ 'ਚ ਦਵਾਈਆਂ ਦੀਆਂ ਦੁਕਾਨਾਂ ਦੀ ਵੰਡ 'ਚ ਵੀ ਭਾਰੀ ਖਾਮੀਆਂ ਦਰਜ ਕੀਤੀਆਂ ਗਈਆਂ। ਸੁਲਤਾਨਵਿੰਡ ਨੇ ਇਲਜ਼ਾਮ ਲਗਾਇਆ ਕਿ ਪਰਚੇਜ਼ ਕਮੇਟੀ ਦੇ ਮੈਂਬਰਾਂ ਨੇ ਆਪਣੀ ਜੇਬ ਭਰਨ ਲਈ ਲੋੜ ਤੋਂ ਜ਼ਿਆਦਾ ਖਰੀਦ ਕੀਤੀ। ਪਟਿਆਲਾ ਕਮੇਟੀ ਨੇ ਰਿਪੋਰਟ 'ਚ ਲਿਖਿਆ ਹੈ ਕਿ ਡਾਇਲਾਸਿਸ ਕਿੱਟਾਂ ਦੀ ਕੋਟੇਸ਼ਨ ਦੂਜੀਆਂ ਕੰਪਨੀਆਂ ਤੋਂ ਲਈ ਗਈ ਤਾਂ ਸਪੱਸ਼ਟ ਹੋਇਆ ਕਿ ਇਨ੍ਹਾਂ ਦਾ ਅਸਲੀ ਮੁੱਲ 678 ਰੁਪਏ ਹੈ। ਸੁਲਤਾਨਵਿੰਡ ਨੇ ਕਿਹਾ ਕਿ ਪਟਿਆਲਾ ਕਮੇਟੀ ਨੇ ਰਿਪੋਰਟ ਵਿਭਾਗ ਦੇ ਉਚ-ਅਧਿਕਾਰੀਆਂ ਨੂੰ ਭੇਜਣ 'ਤੇ ਚਾਰ ਮਹੀਨੇ ਲੰਘਣ ਦੇ ਬਾਅਦ ਵੀ ਵਿਭਾਗ ਨੇ ਸੰਬੰਧ ਅਧਿਕਾਰੀਆਂ ਦੇ ਖਿਲਾਫ ਕਾਰਵਾਈ ਨਹੀਂ ਕੀਤੀ। ਡਾਇਲਾਸਿਸ ਕਿੱਟਾਂ ਦੇ ਇਲਾਵਾ ਐਗਜਾਮੀਨੇਸ਼ਨ ਬੈੱਡ ਦੀ ਖਰੀਦ 'ਚ ਵੀ ਬਹੁਤ ਗੜਬੜੀ ਹੋਈ ਹੈ। ਇਹ ਮਾਮਲਾ ਫਿਲਹਾਲ ਵਿਜੀਲੈਂਸ ਦੀ ਜਾਚ ਦੇ ਘੇਰੇ 'ਚ ਹੈ। ਦੂਜੇ ਪਾਸੇ ਜਾਂਚ ਰਿਪੋਰਟ ਉਨ੍ਹਾਂ ਨੇ ਆਰ. ਟੀ. ਆਈ. ਦੇ ਮਾਰਫ਼ਤ ਇਹ ਜਾਂਚ ਰਿਪੋਰਟ ਪ੍ਰਾਪਤ ਕੀਤੀ ਹੈ। ਵਿਭਾਗ ਸਬੰਧਤ ਅਧਿਕਾਰਿਆਂ ਦੇ ਖਿਲਾਫ ਕਾਰਵਾਈ ਕਰਨ ਨਾਲ ਕੰਨੀ ਕਤਰਾ ਰਿਹਾ ਹੈ। ਮੈਡੀਕਲ ਸਿੱਖਿਆ ਅਤੇ ਖੋਜ ਵਿਭਾਗ ਦੇ ਮੰਤਰੀ ਅਨਿਲ ਜੋਸ਼ੀ ਸਰਕਾਰੀ ਹਸਪਤਾਲਾਂ 'ਚ ਪਾਰਦਰਸ਼ਤਾ ਲਿਆਉਣ ਦੇ ਦਾਅਵੇ ਤਾਂ ਬਹੁਤ ਕਰਦੇ ਹਨ ਪਰ ਅਫਸੋਸ ਉਨ੍ਹਾਂ ਦੇ ਇਹ ਦਾਅਵੇ ਗੱਲਾਂ ਤੱਕ ਹੀ ਸੀਮਿਤ ਹਨ। ਉਨ੍ਹਾਂ ਨੇ ਕਿਹਾ ਕਿ ਜੇਕਰ ਇਕ ਹਫ਼ਤੇ ਦੇ ਅੰਦਰ ਸਬੰਧਤ ਅਧਿਕਾਰੀਆਂ ਨੂੰ ਬਰਖਾਸਤ ਨਹੀਂ ਕੀਤਾ ਗਿਆ ਤਾਂ ਉਹ ਮੈਡੀਕਲ ਕਾਲਜ ਦੇ ਪ੍ਰਿੰਸੀਪਲ ਦਫ਼ਤਰ ਦੇ ਬਾਹਰ ਧਰਨੇ 'ਤੇ ਬੈਠਣਗੇ।
ਵਰਣਨਯੋਗ ਹੈ ਕਿ ਉਪਰੋਕਤ ਸਮੱਗਰੀਆਂ ਦੀ ਖਰੀਦ ਦੇ ਸਮੇਂ ਮੈਡੀਕਲ ਕਾਲਜ ਦੇ ਪ੍ਰਿੰਸੀਪਲ ਐੱਸ. ਐੱਸ. ਸ਼ੇਰਗਿਲ ਸਨ। ਵਿਜੀਲੈਂਸ ਵਿਭਾਗ ਨੇ ਵੀ ਬੈੱਡਾਂ ਦੀ ਖਰੀਦ ਦੇ ਮਾਮਲੇ 'ਚ ਸ਼ੇਰਗਿਲ ਦੇ ਬਿਆਨ ਦਰਜ ਕੀਤੇ ਹਨ। ਉਪਰੋਕਤ ਮਾਮਲੇ ਸਬੰਧੀ ਮੈਡੀਕਲ ਸਿੱਖਿਆ ਅਤੇ ਖੋਜ ਵਿਭਾਗ ਦੇ ਸਕੱਤਰ ਹੁਸਨ ਲਾਲ ਨਾਲ ਗੱਲ ਕਰਨੀ ਚਾਹੀ ਤਾਂ ਬਾਰ-ਬਾਰ ਫੋਨ ਕਰਨ 'ਤੇ ਵੀ ਉਨ੍ਹਾਂ ਨੇ ਫੋਨ ਚੁੱਕਣਾ ਮੁਨਾਸਿਬ ਨਹੀਂ ਸਮਝਿਆ।
ਆਪਣੇ ਬੱਚਿਆਂ ਦੇ ਸਹੀ-ਸਲਾਮਤ ਹੋਣ ਦੀਆਂ ਅਜੇ ਵੀ ਆਸਾਂ ਲਗਾਈ ਬੈਠੇ ਨੇ ਪੀੜਤ ਪਰਿਵਾਰ
NEXT STORY 
