ਦਸ ਦਿਨਾਂ ਤੋਂ ਪਾਣੀ ਦੀ ਸਪਲਾਈ ਹੈ ਬੰਦ, ਮਰੀਜ਼ ਪ੍ਰੇਸ਼ਾਨ
ਅੰਮ੍ਰਿਤਸਰ(ਦਲਜੀਤ ਸ਼ਰਮਾ)- ਪੰਜਾਬ ਸਰਕਾਰ ਵਲੋਂ ਸਰਕਾਰੀ ਹਸਪਤਾਲਾਂ 'ਚ ਜ਼ੱਚਾ ਅਤੇ ਬੱਚਾ ਨੂੰ ਵਧੀਆ ਸਿਹਤ ਸੁਵਿਧਾਵਾਂ ਦੇਣ ਦੀ ਹਵਾ ਨਿਕਲਦੀ ਜਾ ਰਹੀ ਹੈ। ਸਰਕਾਰੀ ਭਾਈ ਮੋਹਕਮ ਸਿੰਘ ਸੈਟੇਲਾਈਟ ਹਸਪਤਾਲ 'ਚ ਜ਼ੱਚਾ-ਬੱਚਾ ਪਿਛਲੇ ਦਸ ਦਿਨਾਂ ਤੋਂ ਪਾਣੀ ਦੀ ਬੂੰਦ-ਬੂੰਦ ਨੂੰ ਤਰਸ ਰਹੇ ਹਨ। ਮਾਮਲੇ ਉੱਚ ਅਧਿਕਾਰੀਆਂ ਦੇ ਧਿਆਨ 'ਚ ਹੋਣ ਦੇ ਉਪਰੰਤ ਵੀ ਸਮੱਸਿਆ ਦਾ ਕੋਈ ਵੀ ਹੱਲ ਨਹੀਂ ਨਿਕਲ ਰਿਹਾ ਹੈ। ਜਗ ਬਾਣੀ ਦੀ ਟੀਮ ਨੇ ਜਦੋਂ ਹਸਪਤਾਲ ਦਾ ਦੌਰਾ ਕੀਤਾ ਤਾਂ ਵੇਖਿਆ ਕਿ ਪਾਣੀ ਨਾ ਹੋਣ ਦੇ ਕਾਰਨ ਮਰੀਜ਼ਾਂ ਨੂੰ ਭਾਰੀ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ। ਮਨਦੀਪ ਕੌਰ ਪਤਨੀ ਸੂਰਜ ਵਾਸੀ ਈਸ਼ਵਰ ਨਗਰ ਨੇ ਦੱਸਿਆ ਕਿ ਰਾਤ ਦੋ ਵਜੇ ਉਨ੍ਹਾਂ ਦੇ ਘਰ ਉਪਰੋਕਤ ਹਸਪਤਾਲ 'ਚ ਮੁੰਡਾ ਪੈਦਾ ਹੋਇਆ ਹੈ ਪਰ ਇਥੇ ਪਾਣੀ ਦੀ ਸਮੱਸਿਆ ਬਣੀ ਹੋਈ ਹੈ। ਬਾਥਰੂਮ ਗੰਦਗੀ ਨਾਲ ਭਰੇ ਪਏ ਹੋਏ ਹਨ।
ਉਨ੍ਹਾਂ ਨੇ ਦੱਸਿਆ ਕਿ ਇੱਥੇ ਰੋਜ਼ਾਨਾ ਚਾਰ-ਪੰਜ ਡਲਿਵਰੀਆਂ ਹੁੰਦੀਆਂ ਹਨ। ਟੀਮ ਨੇ ਵੇਖਿਆ ਕਿ ਪਾਣੀ ਨਾ ਹੋਣ ਦੇ ਕਾਰਨ ਆਲੇ-ਦੁਆਲੇ ਗੰਦਗੀ ਦੀ ਭਰਮਾਰ ਸੀ। ਮਰੀਜ਼ ਪਾਣੀ ਨਾ ਹੋਣ ਦੇ ਕਾਰਨ ਬਾਹਰ ਤੋਂ ਬਾਲਟੀਆਂ 'ਚ ਪਾਣੀ ਭਰ ਕੇ ਲਿਆ ਰਹੇ ਸਨ। ਇਸ ਸੰਬੰਧ 'ਚ ਜਦੋਂ ਮੈਡੀਕਲ ਅਧਿਕਾਰੀ ਹਰਦੀਪ ਕੌਰ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਨੇ ਕਿਹਾ ਕਿ ਉਹ ਆਪਣੀ ਜੇਬ 'ਚੋਂ ਤਾਂ ਖਰਚ ਨਹੀਂ ਕਰੇਗੀ। ਵਿਭਾਗ ਜਦੋਂ ਫੰਡ ਜਾਰੀ ਕਰੇਗਾ ਤਾਂ ਸਮੱਸਿਆ ਦਾ ਹੱਲ ਹੋ ਜਾਵੇਗਾ। ਸਮੱਸਿਆ ਦੇ ਸਬੰਧ 'ਚ ਸਾਰੀ ਜਾਣਕਾਰੀ ਅਧਿਕਾਰੀਆਂ ਨੂੰ ਦਿੱਤੀ ਜਾ ਚੁੱਕੀ ਹੈ।
ਸਿਵਲ ਸਰਜਨ ਡਾ. ਰਾਜੀਵ ਭੱਲਾ ਨੇ ਕਿਹਾ ਕਿ ਮਾਮਲਾ ਉਨ੍ਹਾਂ ਦੇ ਧਿਆਨ 'ਚ ਹੈ। ਉਨ੍ਹਾਂ ਨੇ ਆਪਣੇ ਆਪ ਵੀ ਹਸਪਤਾਲ ਦਾ ਦੌਰਾ ਕੀਤਾ ਹੈ। ਸਬੰਧਤ ਅਧਿਕਾਰੀ ਨੂੰ ਸਬਮਰਸੀਬਲ ਬੋਰ ਕਰਵਾ ਕੇ ਪਾਣੀ ਦੀ ਸਹੂਲਤ ਛੇਤੀ ਉਪਲਬਧ ਕਰਵਾਉਣ ਸਬੰਧੀ ਕਹਿ ਦਿੱਤਾ ਗਿਆ ਹੈ।
ਇਲਾਜ ਸਮੱਗਰੀ ਦੀ ਖਰੀਦ 'ਚ ਕਰੋੜਾਂ ਦੀ ਗੜਬੜੀ
NEXT STORY