ਪਿਆਰ 'ਚ ਅਸਫ਼ਲ ਹੋਣ 'ਤੇ ਦਿੱਤੀ ਸੀ ਮੁੰਡੇ-ਕੁੜੀ ਨੇ ਜਾਨ
ਸਮਰਾਲਾ(ਗਰਗ)-ਕੱਲ ਸਵੇਰੇ ਸਥਾਨਕ ਰੇਲਵੇ ਸਟੇਸ਼ਨ 'ਤੇ ਫਿਰੋਜ਼ਪੁਰ ਤੋਂ ਚੰਡੀਗੜ੍ਹ ਜਾਣ ਵਾਲੀ ਗੱਡੀ ਥੱਲੇ ਆ ਕੇ ਜਾਨ ਦੇਣ ਵਾਲੇ ਪ੍ਰੇਮੀ ਜੋੜੇ ਦੀ ਪਛਾਣ ਹੋਣ ਮਗਰੋਂ ਅੱਜ ਉਨ੍ਹਾਂ ਦੇ ਵਾਰਿਸਾਂ ਦੇ ਇਥੇ ਪੁੱਜਣ 'ਤੇ ਰੇਲਵੇ ਪੁਲਸ ਨੇ ਕਾਰਵਾਈ ਕਰਦਿਆਂ ਦੋਵੇਂ ਲਾਸ਼ਾਂ ਦਾ ਸਿਵਲ ਹਸਪਤਾਲ 'ਚ ਪੋਸਟਮਾਰਟਮ ਕਰਵਾਇਆ। ਇਕ ਹੋ ਕੇ ਜਿਊਣ ਦੀਆਂ ਕਸਮਾਂ ਖਾਣ ਵਾਲੇ ਇਸ ਪ੍ਰੇਮੀ ਜੋੜੇ ਦੇ ਪੋਸਟਮਾਰਟਮ ਮੌਕੇ ਪੁੱਜੇ ਰਿਸ਼ਤੇਦਾਰਾਂ ਨੂੰ ਵਿਸ਼ਵਾਸ ਹੀ ਨਹੀਂ ਸੀ ਹੋ ਰਿਹਾ ਕਿ ਉਨ੍ਹਾਂ ਦੇ ਬੱਚਿਆਂ ਨੇ ਇੰਝ ਦਰਦ ਭਰੇ ਢੰਗ ਨਾਲ ਮੌਤ ਨੂੰ ਗਲੇ ਲਗਾਇਆ।
ਮ੍ਰਿਤਕ ਨੌਜਵਾਨ ਜਿਸ ਦੀ ਕਿ ਅੱਜ ਉਸ ਦੇ ਪਰਿਵਾਰ ਦੇ ਸਮਰਾਲਾ ਪੁੱਜਣ 'ਤੇ 22 ਸਾਲਾ ਸੁਸ਼ੀਲ ਕੁਮਾਰ ਪੁੱਤਰ ਰਾਮ ਨਿਵਾਸ ਵਾਸੀ ਪਿੰਡ ਰੁਪਾਣਾ ਜੀਂਦ ਹਰਿਆਣਾ ਵਜੋਂ ਸ਼ਨਾਖਤ ਹੋਈ ਹੈ ਅਤੇ ਉਸ ਦੇ ਨਾਲ ਮਰਨ ਵਾਲੀ ਪਿੰਡ ਰੁਪਾਣਾ ਦੀ ਹੀ ਲੜਕੀ ਪ੍ਰੀਤੀ (21) ਨੂੰ ਸ਼ਾਇਦ ਇਹ ਪਤਾ ਲੱਗ ਗਿਆ ਸੀ ਕਿ ਉਨ੍ਹਾਂ ਦਾ ਇਹ ਰਿਸ਼ਤਾ ਸਮਾਜ ਨੂੰ ਮਨਜ਼ੂਰ ਨਹੀਂ ਹੋਣ ਵਾਲਾ, ਇਸੇ ਲਈ ਇਹ ਦੋਵੇਂ ਇਕੱਠੇ ਜਿਊਣ ਲਈ ਪਰਿਵਾਰ ਅਤੇ ਸਮਾਜ ਨਾਲ ਬਗਾਵਤ ਕਰਦੇ ਹੋਏ 4 ਦਿਨ ਪਹਿਲਾਂ ਘਰੋਂ ਦੌੜ ਗਏ। ਮ੍ਰਿਤਕ ਪ੍ਰੀਤੀ ਦੇ ਪਰਿਵਾਰ ਨੇ ਸੁਸ਼ੀਲ ਕੁਮਾਰ ਖਿਲਾਫ਼ ਥਾਣਾ ਜੀਂਦ ਸਦਰ 'ਚ ਉਨ੍ਹਾਂ ਦੀ ਲੜਕੀ ਅਗਵਾ ਕਰਕੇ ਲਿਜਾਣ ਦਾ ਕੇਸ ਦਰਜ ਕਰਵਾ ਦਿੱਤਾ। ਘਰੋਂ ਦੌੜੇ ਇਸ ਪ੍ਰੇਮੀ ਜੋੜੇ ਨੂੰ ਜਦੋਂ ਆਪਣਾ ਪਿਆਰ ਪ੍ਰਵਾਨ ਚੜ੍ਹਦਾ ਵਿਖਾਈ ਨਾ ਦਿੱਤਾ ਤਾਂ ਕੱਲ ਇਨ੍ਹਾਂ ਨੇ ਇਕੱਠਿਆਂ ਹੀ ਸਮਰਾਲਾ ਰੇਲਵੇ ਸਟੇਸ਼ਨ 'ਤੇ ਫਿਰੋਜ਼ਪੁਰ ਤੋਂ ਚੰਡੀਗੜ੍ਹ ਜਾਣ ਵਾਲੀ ਗੱਡੀ ਥੱਲੇ ਆ ਕੇ ਮੌਤ ਨੂੰ ਗਲੇ ਲਗਾ ਲਿਆ।
ਮ੍ਰਿਤਕ ਮੁੰਡੇ-ਕੁੜੀ ਦੀਆਂ ਲਾਸ਼ਾਂ ਲੈਣ ਪੁੱਜੇ ਵਾਰਿਸਾਂ ਨੇ ਦੱਸਿਆ ਕਿ ਸੁਸ਼ੀਲ ਕੁਮਾਰ ਆਪਣੀ ਪੜ੍ਹਾਈ ਖਤਮ ਕਰਕੇ ਪਿੰਡ 'ਚ ਹੀ ਮੌਜੂਦ ਆਪਣੀ ਪ੍ਰਚੂਨ ਦੀ ਜੱਦੀ ਦੁਕਾਨ 'ਤੇ ਬੈਠਦਾ ਸੀ, ਜਦਕਿ ਪ੍ਰੀਤੀ ਜੀਂਦ ਦੇ ਸਰਕਾਰੀ ਕਾਲਜ ਵਿਚ ਬੀ. ਐੱਸ. ਸੀ. ਦੀ ਪੜ੍ਹਾਈ ਕਰ ਰਹੀ ਸੀ। ਦੋਵਾਂ ਦੇ ਬਿਲਕੁਲ ਆਹਮਣੇ-ਸਾਹਮਣੇ ਘਰ ਹੋਣ ਕਾਰਨ ਦੋਵੇਂ ਪਰਿਵਾਰਾਂ ਵਿਚ ਚੰਗਾ ਪਿਆਰ ਸੀ ਪਰ ਸੁਸ਼ੀਲ ਅਤੇ ਪ੍ਰੀਤੀ ਦੇ ਪਿਆਰ ਨੇ ਦੋਵਾਂ ਪਰਿਵਾਰਾਂ ਦੇ ਪਿਆਰ ਨੂੰ ਦੁਸ਼ਮਣੀ ਵਿਚ ਬਦਲ ਦਿੱਤਾ।
ਸਥਾਨਕ ਸਿਵਲ ਹਸਪਤਾਲ 'ਚ ਪਈਆਂ ਲਾਸ਼ਾਂ ਦੇ ਪੋਸਟਮਾਰਟਮ ਲਈ ਰੇਲਵੇ ਪੁਲਸ ਦੇ ਅਧਿਕਾਰੀਆਂ ਨੇ ਮ੍ਰਿਤਕ ਲੜਕੇ ਦੇ ਪਿਤਾ ਅਤੇ ਲੜਕੀ ਦੀ ਮਾਤਾ ਦੇ ਬਿਆਨਾਂ 'ਤੇ ਧਾਰਾ 174 ਅਧੀਨ ਕਾਰਵਾਈ ਕਰਦਿਆਂ ਪੋਸਟਮਾਰਟਮ ਮਗਰੋਂ ਲਾਸ਼ਾਂ ਵਾਰਿਸਾਂ ਨੂੰ ਸੌਂਪ ਦਿੱਤੀਆਂ। ਹਸਪਤਾਲ ਦਾ ਮਾਹੌਲ ਉਸ ਵੇਲੇ ਹੋਰ ਵੀ ਗਮਗੀਨ ਹੋ ਗਿਆ ਜਦੋਂ ਦੋਵੇਂ ਪਰਿਵਾਰ ਇਸ ਪ੍ਰੇਮੀ ਜੋੜੇ ਦੀਆਂ ਲਾਸ਼ਾਂ ਨੂੰ ਇਕੋ ਗੱਡੀ 'ਚ ਲੈ ਕੇ ਰਵਾਨਾ ਹੋਏ।
ਗੈਰ ਸਿੱਖ ਨੂੰ ਹਜ਼ੂਰ ਸਾਹਿਬ ਬੋਰਡ ਦਾ ਪ੍ਰਧਾਨ ਬਣਾਉਣਾ ਬਿਲਕੁੱਲ ਪ੍ਰਵਾਨ ਨਹੀਂ : ਬੀਬੀ ਜਗੀਰ ਕੌਰ
NEXT STORY 
