ਲੁਧਿਆਣਾ (ਮੁੱਲਾਂਪੁਰੀ) : ਪੰਜਾਬ 'ਚ ਭਾਵੇਂ 2022 'ਚ ਚੋਣਾਂ ਹਨ ਪਰ ਭਾਰਤੀ ਜਨਤਾ ਪਾਰਟੀ ਨੇ ਜਿਸ ਤਰੀਕੇ ਨਾਲ ਜੰਮੂ-ਕਸ਼ਮੀਰ 'ਚ ਧਾਰਾ 370 ਤੋੜ ਕੇ ਉੱਥੇ ਜੋ ਕਾਰਵਾਈ ਨੂੰ ਅੰਜਾਮ ਦਿੱਤਾ ਹੈ, ਉਸ ਨੂੰ ਲੋਕ ਇਕ ਬਹਾਦਰੀ ਅਤੇ ਦਲੇਰਾਨਾ ਕਦਮ ਆਖਣ ਲਗ ਪਏ ਹਨ ਕਿਉਂਕਿ ਇਸ ਜੋਖਮ ਨੂੰ ਹੱਥ ਪਾਉਣ ਦੀ ਅੱਜ ਤੱਕ ਕਿਸੇ ਨੇ ਹਿੰਮਤ ਨਹੀਂ ਸੀ ਕੀਤੀ। ਹੁਣ ਭਾਵੇਂ ਜੰਮੂ-ਕਸ਼ਮੀਰ ਦਾ ਭਵਿੱਖ ਕੁਝ ਵੀ ਹੋਵੇ, ਇਸ ਸਬੰਧੀ ਅਜੇ ਕੁਝ ਆਖਣਾ ਮੁਸ਼ਕਲ ਹੈ ਪਰ ਪੰਜਾਬ ਦੇ ਲੋਕਾਂ ਦੀ ਜ਼ੁਬਾਨ 'ਤੇ ਇਸ ਚਰਚਾ ਜ਼ਰੂਰ ਹੈ ਕਿ ਹੁਣ ਖੈਰ ਨਹੀਂ। ਹੁਣ ਤਾਂ ਮੋਦੀ ਟੀਮ ਦੀ ਅਗਵਾਈ 'ਚ ਪੰਜਾਬ 'ਚ ਕਮਲ ਖਿੜੇਗਾ ਭਾਵ ਰਾਜ ਆਵੇਗਾ। ਬਾਕੀ ਇਸ ਗੱਲ ਦਾ ਇਸ਼ਾਰਾ ਪੰਜਾਬ ਦੀ ਸਿਆਸੀ ਤਸਵੀਰ ਵੀ ਕਰਨ ਲਗ ਪਈ ਹੈ ਕਿਉਂਕਿ ਸੱਤਾਧਾਰੀ ਕਾਂਗਰਸੀ ਵਿਧਾਇਕਾਂ ਦੀ ਫੌਜ ਆਪਣੇ ਮੁੱਖ ਮੰਤਰੀ ਦਾ ਬਾਦਲ ਨਾਲ ਰਲੇ ਹੋਏ ਹੋਣ ਦਾ ਰੋਣਾ ਰੋ ਰਹੇ ਹਨ ਅਤੇ ਆਖ ਰਹੇ ਹਨ ਕਿ ਜੇਕਰ ਸਮਾਂ ਰਹਿੰਦੇ ਕੁਝ ਨਾ ਕੀਤਾ ਤਾਂ ਕਾਂਗਰਸ ਦਾ ਬੋਰੀਆ ਬਿਸਤਰਾ ਬੰਨ੍ਹਿਆ ਜਾਵੇਗਾ ਕਿਉਂਕਿ ਬਰਗਾੜੀ ਕਾਂਡ, ਨਸ਼ਿਆਂ ਖਿਲਾਫ, ਟ੍ਰਾਂਸਪੋਰਟ ਅਤੇ ਹੋਰ ਮਾਫੀਆ ਨੂੰ ਨੱਥ ਪਾਉਣ ਦੀ ਗੱਲ ਕਰ ਕੇ ਹੀ ਪੰਜਾਬ 'ਚ ਕਾਂਗਰਸ ਨੂੰ ਰਾਜ ਮਿਲਿਆ ਸੀ। ਇਸੇ ਤਰ੍ਹਾਂ 'ਆਪ' ਤਾਂ ਪੰਜਾਬ 'ਚ ਤੀਲਾ-ਤੀਲਾ ਹੋ ਗਈ ਹੈ, ਜਿਸ ਦੇ ਜਿੰਨੇ ਵਿਧਾਇਕ ਹਨ, ਓਨੀਆਂ ਹੀ ਪਾਰਟੀਆਂ ਹਨ।
ਜਦੋਂਕਿ ਸ਼੍ਰੋਮਣੀ ਅਕਾਲੀ ਦਲ ਜਿਸ ਦੇ ਪੰਜਾਬ 'ਚ ਸਿਆਸੀ ਪੈਰ 2017 ਨੂੰ ਅਜਿਹੇ ਉੱਖੜੇ ਕਿ ਅਜੇ ਤੱਕ ਲਗਦੇ ਦਿਖਾਈ ਨਹੀਂ ਦੇ ਰਹੇ ਕਿਉਂਕਿ ਬਰਗਾੜੀ ਕਾਂਡ ਦੇ ਕਾਰਣ ਅਜੇ ਵੀ ਲੋਕਾਂ 'ਚ ਰੋਹ ਅਤੇ ਰੋਸ ਹੈ, ਜਿਸ ਦਾ ਪ੍ਰਤੱਖ ਸਬੂਤ ਪੰਜਾਬ 'ਚ ਢਾਈ ਸਾਲਾਂ ਬਾਅਦ ਲੋਕ ਸਭਾ ਚੋਣਾਂ 'ਚ ਪੰਜਾਬੀਆਂ ਅਤੇ ਖਾਸ ਕਰ ਪੇਂਡੂ ਹਲਕਿਆਂ ਦੇ ਵੋਟਰਾਂ ਵਲੋਂ ਅਕਾਲੀ ਦਲ ਨੂੰ ਫਿਰ ਬਾਹਰ ਦਾ ਰਸਤਾ ਦਿਖਾਉਣਾ ਹੈ। ਬਾਕੀ ਜਿਹੜੀਆਂ ਵੋਟਾਂ ਪਈਆਂ ਹਨ, ਉਹ ਸ਼ਹਿਰੀ ਹਲਕਿਆਂ 'ਚ ਮੋਦੀ ਲਹਿਰ ਦੇ ਕਾਰਣ ਹੀ ਪਈਆਂ। ਪੰਜਾਬ 'ਚ ਇਸ ਤਰ੍ਹਾਂ ਦੀਆਂ ਖਬਰਾਂ ਅਤੇ ਕਿਆਸ ਅਰਾਈਆਂ ਇਸ ਗੱਲ ਵੱਲ ਇਸ਼ਾਰਾ ਕਰਨ ਲਗ ਪਈਆਂ ਹਨ ਕਿ ਕਿਧਰੇ ਰਾਜ ਭਾਗ 'ਚ ਆਟੇ ਵਿਚ 'ਲੂਣ' ਵਾਂਗ ਰਹਿਣ ਵਾਲੀ ਭਾਜਪਾ ਹੁਣ ਰਾਜਸੀ 'ਆਟਾ' ਹੀ ਨਾ ਬਣ ਜਾਵੇ।
ਪੰਜਾਬ 'ਚ ਸਕੂਲੀ ਬੱਚਿਆਂ ਦੇ ਅਗਵਾ ਦੀ ਸੂਚਨਾ ਕਾਰਨ ਮਚਿਆ ਹੜਕੰਪ, ਮਾਪਿਆਂ 'ਚ ਖੌਫ
NEXT STORY 
