ਰਾਮ ਤੀਰਥ/ਅੰਮ੍ਰਿਤਸਰ (ਸੰਜੀਵ, ਸੂਰੀ) : ਅਟਾਰੀ ਹਲਕੇ ਦੇ ਅਧੀਨ ਆਉਂਦੇ ਪਿੰਡ ਗੌਸਾਂਬਾਦ ਦੇ ਇਕ ਜਿੰਮੀਦਾਰ ਪਰਿਵਾਰ ਵਿਚ ਵੱਡੇ ਭਰਾ ਵੱਲੋਂ ਸਕੇ ਛੋਟੇ ਭਰਾ ਉਪਰ ਗੋਲੀਆਂ ਨਾਲ ਹਮਲਾ ਕਰ ਦਿੱਤਾ, ਜਿਸ ਨਾਲ ਛੋਟੇ ਭਰਾ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਥਾਣਾ ਕੰਬੋਅ ਦੇ ਅਧੀਨ ਰਾਮ ਤੀਰਥ ਰੋਡ 'ਤੇ ਪੈਂਦੇ ਪਿੰਡ ਗੌਸਾਂਬਾਦ ਦੇ ਮ੍ਰਿਤਕ ਹਰਜਿੰਦਰ ਸਿੰਘ ਸੋਹਲ ਦਾ ਸੁਰਿੰਦਰਾ ਪਬਲਿਕ ਸਕੂਲ ਹੈ ਅਤੇ ਉਸ ਦਾ ਵੱਡਾ ਭਰਾ ਸੁਖਦੇਵ ਸਿੰਘ ਸੋਹਲ ਕਾਂਗਰਸੀ ਲੀਡਰ ਦੇ ਨਾਲ-ਨਾਲ ਦਾਣਾ ਮੰਡੀ ਭਗਤਾਂ ਵਾਲਾ 'ਚ ਆੜਤੀ ਐਸੋਸੀਏਸ਼ਨ ਦਾ ਪ੍ਰਧਾਨ ਵੀ ਹੈ, ਮ੍ਰਿਤਕ ਹਰਜਿੰਦਰ ਸਿੰਘ ਸੋਹਲ ਆਪਣੀ ਗੱਡੀ ਨੰਬਰ ਪੀ. ਬੀ. 02 ਡੀ. ਐੱਨ 7557 'ਤੇ ਆਪਣੀ ਜ਼ਮੀਨ ਵੱਲ ਨੂੰ ਗਿਆ, ਜਿੱਥੇ ਪੈਲੀ ਵਿਚ ਟਰੈਕਟਰ ਵਾਹ ਰਹੇ ਵੱਡੇ ਭਰਾ ਸੁਖਦੇਵ ਸਿੰਘ ਸੋਹਲ ਨਾਲ ਝਗੜਾ ਹੋ ਗਿਆ।
ਬਾਅਦ 'ਚ ਹਰਜਿੰਦਰ ਸਿੰਘ ਸੋਹਲ ਆਪਣੀ ਗੱਡੀ ਵਿਚ ਬੈਠ ਕੇ ਵਾਪਸ ਜਾਣ ਲੱਗਾ ਤਾਂ ਸੁਖਦੇਵ ਸਿੰਘ ਸੋਹਲ ਨੇ ਸਾਹਮਣੇ ਤੋਂ ਟਰੈਕਟਰ ਲਿਆ ਕੇ ਹਰਜਿੰਦਰ ਦੀ ਗੱਡੀ ਵਿਚ ਮਾਰਿਆ ਅਤੇ ਨਾਲ ਹੀ ਪਿਸਤੌਲ ਨਾਲ ਉਸ ਦੀ ਗੱਡੀ 'ਤੇ ਗੋਲੀਆਂ ਚਲਾ ਦਿੱਤੀਆਂ। ਗੋਲੀਆਂ ਹਰਜਿੰਦਰ ਦੀ ਛਾਤੀ ਵਿਚ ਜਾ ਲੱਗੀਆਂ।
ਮੌਕੇ 'ਤੇ ਗਵਾਹਾਂ ਅਨੁਸਾਰ ਕਾਤਲ ਦੇ ਨਾਲ ਆਏ ਗੱਡੀ ਦੇ ਡਰਾਈਵਰ ਨੇ ਮ੍ਰਿਤਕ ਦੀ ਗੱਡੀ ਦਾ ਸ਼ੀਸ਼ਾ ਦਾਤਰ ਮਾਰ ਕੇ ਤੋੜ ਦਿੱਤਾ ਅਤੇ ਦਾਤਰ ਨਾਲ ਕਈ ਵਾਰ ਕੀਤੇ। ਉਪਰੰਤ ਕਾਤਲ ਨੇ ਨਾਲ ਲਿਆਂਦੀ 315 ਬੋਰ ਦੀ ਬੰਦੂਕ ਦੀਆਂ ਦੋ ਗੋਲੀਆਂ ਮਾਰ ਕੇ ਮੌਕੇ 'ਤੇ ਹੀ ਮਾਰ ਮੁਕਾਇਆ, ਉਪਰੰਤ ਫਰਾਰ ਹੋ ਗਿਆ।
ਇਹ ਪਰਿਵਾਰ ਕੁਝ ਸਮਾਂ ਪਹਿਲੋ ਤਰਨਤਾਰਨ ਜ਼ਿਲੇ ਦੇ ਪੈਂਦੇ ਪਿੰਡ ਸੋਹਲ ਤੋਂ ਇਥੇ ਆਇਆ ਸੀ ਅਤੇ ਇਨ੍ਹਾਂ ਦੇ ਪਿਤਾ ਨੇ ਇਥੇ ਜ਼ਮੀਨ ਖਰੀਦੀ ਸੀ, ਜ਼ਮੀਨ ਦੇ ਵਿਵਾਦ ਕਰਕੇ ਦੋਵਾਂ ਭਰਾਵਾਂ ਵਿਚ ਕਾਫੀ ਕੁੜੱਤਨ ਸੀ ਅਤੇ ਸਬੰਧ ਵੀ ਚੰਗੇ ਨਹੀਂ ਸਨ।
ਕੀ ਕਹਿਣਾ ਹੈ ਪੁਲਸ ਦਾ
ਘਟਨਾ ਸਥਾਨ 'ਤੇ ਐੱਸ. ਪੀ. ਡੀ. ਹਰਪਾਲ ਸਿੰਘ, ਡੀ. ਐੱਸ. ਪੀ. ਮੈਡਮ ਮਨਪ੍ਰੀਤ, ਐੱਸ. ਐਚ. ਓ. ਥਾਣਾ ਕੰਬੋਅ ਸਮੇਤ ਆਲਾ ਅਧਿਕਾਰੀ ਪਹੁੰਚੇ ਅਤੇ ਮੀਡੀਆ ਨੂੰ ਦੱਸਿਆ ਕਿ ਕਾਤਲਾਂ ਵਿਰੁੱਧ ਕੇਸ ਦਰਜ ਕਰ ਲਿਆ ਗਿਆ ਹੈ। ਦੋਸ਼ੀਆਂ ਦੀ ਗ੍ਰਿਫਤਾਰੀ ਲਈ ਵੱਖ-ਵੱਖ ਥਾਵਾਂ 'ਤੇ ਛਾਪੇਮਾਰੀ ਕੀਤੀ ਜਾ ਰਹੀ ਹੈ।
...ਤੇ ਸਿਰੇ ਨਾ ਚੜ੍ਹ ਸਕੀ ਬਿਜਲੀ ਦੀਆਂ ਤਾਰਾਂ ਨੂੰ ਅੰਡਰਗਰਾਊਂਡ ਕਰਨ ਦੀ ਯੋਜਨਾ
NEXT STORY 
