ਲੁਧਿਆਣਾ, (ਰਾਜ)— ਹੰਬੜਾਂ ਰੋਡ ਸਥਿਤ ਬਾਈਪਾਸ ਕਨਾਲ ਰੋਡ 'ਤੇ ਖਾਲੀ ਪਲਾਟ 'ਚ ਇਕ ਨੌਜਵਾਨ ਦੀ ਖੂਨ ਨਾਲ ਲਥਪਥ ਲਾਸ਼ ਮਿਲਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਜਿਸ ਦੇ ਸਰੀਰ 'ਤੇ ਤੇਜ਼ਧਾਰ ਹਥਿਆਰ ਦੇ ਨਿਸ਼ਾਨ ਸਨ। ਇਸ ਦੇ ਨਾਲ ਹੀ ਲਾਸ਼ ਨੂੰ ਕਾਫੀ ਹੱਦ ਤੱਕ ਕੁੱਤਿਆਂ ਨੇ ਬੁਰੀ ਤਰ੍ਹਾਂ ਨੋਚ ਦਿੱਤਾ ਸੀ। ਉਸ ਦਾ ਸਰੀਰ ਅਤੇ ਚਿਹਰਾ ਕੁੱਤਿਆਂ ਵਲੋਂ ਇੰਨੀ ਬੁਰੀ ਤਰ੍ਹਾਂ ਨੋਚਿਆ ਗਿਆ ਸੀ ਕਿ ਉਸ ਦੀ ਪਛਾਣ ਕਰਨਾ ਮੁਸ਼ਕਲ ਸੀ। ਜਦੋਂ ਉਸ ਦੇ ਪਰਿਵਾਰ ਨੂੰ ਬੁਲਾਇਆ ਗਿਆ ਤਾਂ ਕੱਪੜੇ ਤੇ ਕੋਲ ਖੜ੍ਹੇ ਬਾਈਕ ਤੋਂ ਪਛਾਣ ਹੋਈ। ਮ੍ਰਿਤਕ ਦੀ ਪਛਾਣ ਰਣਜੀਤ ਸਿੰਘ ਚੌਹਾਨ ਉਮਰ 25 ਸਾਲ ਜ਼ੈੱਡ ਬਲਾਕ ਰਿਸ਼ੀ ਨਗਰ ਵਜੋਂ ਹੋਈ ਹੈ। ਥਾਣਾ ਪੀ.ਏ.ਯੂ. ਦੀ ਪੁਲਸ ਨੇ ਅਣਪਛਾਤੇ ਲੋਕਾਂ ਖਿਲਾਫ ਕਤਲ ਦਾ ਕੇਸ ਦਰਜ ਕਰ ਲਿਆ ਹੈ। ਲਾਸ਼ ਕਬਜ਼ੇ 'ਚ ਲੈ ਕੇ ਸਿਵਲ ਹਸਪਤਾਲ ਦੀ ਮੌਰਚਰੀ 'ਚ ਰਖਵਾ ਦਿੱਤੀ ਹੈ।
ਜਾਣਕਾਰੀ ਮੁਤਾਬਕ ਰਣਜੀਤ ਸਿੰਘ ਮੂਲ ਰੂਪ ਤੋਂ ਉੱਤਰ ਪ੍ਰਦੇਸ਼ ਦੇ ਫੈਜਾਬਾਦ, ਅਯੋਧਿਆ ਦਾ ਰਹਿਣ ਵਾਲਾ ਸੀ। ਉਹ ਲੁਧਿਆਣਾ ਦੇ ਰਿਸ਼ੀ ਨਗਰ 'ਚ ਕਿਰਾਏ 'ਤੇ ਆਪਣੀ ਪਤਨੀ ਤੇ 2 ਬੱਚਿਆਂ ਨਾਲ ਰਹਿੰਦਾ ਸੀ ਤੇ ਪੰਜ ਪੀਰ ਰੋਡ ਸਥਿਤ ਫੈਕਟਰੀ 'ਚ ਸਿਲਾਈ-ਕਢਾਈ ਦਾ ਕੰਮ ਕਰਦਾ ਸੀ। ਵੀਰਵਾਰ ਦੀ ਰਾਤ ਕਰੀਬ 8 ਵਜੇ ਫੈਕਟਰੀ ਤੋਂ ਛੁੱਟੀ ਕਰਦੇ ਨਿਕਲਿਆ ਸੀ ਪਰ ਘਰ ਨਹੀਂ ਪੁੱਜਾ। ਉਸ ਦੀ ਪਤਨੀ ਨੇ ਉਸ ਨੂੰ ਫੋਨ ਵੀ ਕੀਤਾ ਪਰ ਪਹਿਲਾਂ ਤਾਂ ਉਸ ਦੇ ਮੋਬਾਇਲ 'ਤੇ ਰਿੰਗ ਗਈ ਪਰ ਬਾਅਦ 'ਚ ਮੋਬਾਇਲ ਬੰਦ ਆਉਣ ਲੱਗਾ। ਉਸ ਦੀ ਪਤਨੀ ਨੇ ਕਾਫੀ ਭਾਲ ਕੀਤੀ ਪਰ ਰਾਤ ਨੂੰ ਉਸ ਦਾ ਕੁਝ ਪਤਾ ਨਹੀਂ ਲਗ ਸਕਿਆ। ਸ਼ੁੱਕਰਵਾਰ ਦੀ ਸਵੇਰ ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਰਣਜੀਤ ਦੀ ਲਾਸ਼ ਹੰਬੜਾਂ ਰੋਡ ਦੇ ਖਾਲੀ ਪਲਾਟ 'ਚ ਪਈ ਮਿਲੀ ਹੈ। ਰਾਹਗੀਰ ਨੇ ਲਾਸ਼ ਦੇਖ ਕੇ ਪੁਲਸ ਕੰਟਰੋਲ ਰੁਮ ਨੂੰ ਸੂਚਨਾ ਦਿੱਤੀ ਜਿਸ ਤੋਂ ਬਾਅਦ ਡੀ.ਸੀ.ਪੀ. (ਇਨਵੈਸਟੀਗੇਸ਼ਨ) ਸਿਮਰਜੀਤ ਸਿੰਘ ਢੀਂਡਸਾ, ਏ.ਡੀ.ਸੀ.ਪੀ. ਹਰਸ਼ਦ ਦਹਾਯਮਾ, ਏ.ਸੀ.ਪੀ. (ਕ੍ਰਾਇਮ) ਮਨਦੀਪ ਸਿੰਘ, ਏ.ਸੀ.ਪੀ. (ਵੈਸਟ) ਸੰਦੀਪ ਵਰਮਾ, ਸੀ.ਆਈ.ਏ. -1 ਅਤੇ ਥਾਣਾ ਪੀ.ਏ.ਯੂ. ਦੀ ਪੁਲਸ ਮੌਕੇ 'ਤੇ ਪੁੱਜ ਗਈ। ਪੁਲਸ ਹੰਬੜਾਂ ਰੋਡ ਤੋਂ ਵਾਰਦਾਤ ਵਾਲੀ ਜਗ੍ਹਾ ਤੱਕ ਦੀ ਰੋਡ ਤੇ ਸੀ.ਸੀ.ਟੀ.ਵੀ. ਕੈਮਰੇ ਚੈੱਕ ਕਰ ਰਹੀ ਹੈ ਤਾਂ ਕਿ ਕੋਈ ਸੁਰਾਗ ਹੱਥ ਲਗ ਸਕੇ।
ਕੁੱਤਿਆਂ ਨੇ ਬੁਰੀ ਤਰ੍ਹਾਂ ਨੋਚ ਖਾਧੀ ਲਾਸ਼
ਲਾਸ਼ ਦੇਖ ਕੇ ਰਾਹਗੀਰ ਹੈਰਾਨ ਰਹਿ ਗਏ ਕਿ ਉਸ ਦੀ ਲਾਸ਼ ਨੂੰ ਬੁਰੀ ਤਰ੍ਹਾਂ ਕੁੱਤੇ ਨੋਚ ਰਹੇ ਸਨ। ਲੋਕਾ ਨੇ ਪੱਥਰ ਮਾਰ ਕੇ ਕੁੱਤਿਆਂ ਨੂੰ ਭਜਾਇਆ ਪਰ ਇਸ ਤੋਂ ਪਹਿਲਾਂ ਹੀ ਕੁੱਤੇ ਉਸ ਦੇ ਸਰੀਰ ਦਾ ਅੱਧਾ ਹਿੱਸਾ ਨੋਚ ਚੁੱਕੇ ਸਨ ਇੱਥੋਂ ਤੱਕ ਕਿ ਉਸ ਦੇ ਸਿਰ ਨੂੰ ਖਾ ਗਏ। ਉਸ ਦੀ ਪਛਾਣ ਤੱਕ ਨਹੀਂ ਹੋ ਰਹੀ ਸੀ। ਪਰਿਵਾਰ ਵਾਲਿਆਂ ਨੇ ਕੱਪÎੜਿਆਂ ਅਤੇ ਬਾਈਕ ਤੋਂ ਉਸ ਦੀ ਪਛਾਣ ਕੀਤੀ।
ਦੋਸਤ ਨੂੰ ਕਿਹਾ, ਹੰਬਡਾਂ ਰੋਡ 'ਤੇ ਪਲਾਟ ਦੇਖਣ ਜਾ ਰਿਹਾ ਹੈ
ਰਣਜੀਤ ਛੁੱਟੀ ਤੋਂ ਪਹਿਲਾਂ ਫੈਕਟਰੀ 'ਚ ਆਪਣੇ ਸਾਥੀ ਦੋਸਤ ਨੂੰ ਕਹਿ ਕੇ ਗਿਆ ਸੀ ਕਿ ਉਹ ਕਿਸੇ ਦੇ ਨਾਲ ਹੰਬੜਾਂ ਰੋਡ 'ਤੇ ਪਲਾਟ ਦੇਖਣ ਜਾ ਰਿਹਾ ਹੈ ਤੇ ਉਸ ਨੇ ਨਾਲ ਹੀ ਸਬਜ਼ੀ ਲੈ ਕੇ ਘਰ ਜਾਣਾ ਹੈ। ਰਣਜੀਤ ਦੀ ਪੈਂਟ ਖੁੱਲੀ ਹੋਈ ਸੀ। ਨਾਲ ਹੀ ਉਸ ਦਾ ਪਰਸ ਅਤੇ ਮੋਬਾਇਲ ਗਾਇਬ ਸੀ। ਸ਼ੱਕ ਜਤਾਇਆ ਜਾ ਰਿਹਾ ਹੈ ਕਿ ਰਣਜੀਤ ਦੇ ਨਾਲ ਕੋਈ ਹੋਰ ਵੀ ਸੀ। ਹਾਲਾਂਕਿ ਅਜੇ ਇਸ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਮ੍ਰਿਤਕ ਦੀ ਲਾਸ਼ ਨੂੰ ਕੁੱਤਿਆਂ ਨੇ ਨੋਚਿਆ ਹੋਇਆ ਸੀ। ਸ਼ੱਕ ਹੈ ਕਿ ਤੇਜ਼ਧਾਰ ਹਥਿਆਰ ਨਾਲ ਕਤਲ ਕੀਤਾ ਗਿਆ ਹੈ। ਅਜੇ ਕੋਈ ਸੁਰਾਗ ਹੱਥ ਨਹੀਂ ਲੱਗਾ। ਪੁਲਸ ਵਲੋਂ ਮਾਮਲੇ ਦੀ ਵੱਖ-ਵੱਖ ਐਂਗਲਾਂ ਤੋਂ ਜਾਂਚ ਕੀਤੀ ਜਾ ਰਹੀ ਹੈ।
ਜੈਤੋ ਵਿਖੇ ਵਾਪਰਿਆ ਭਿਆਨਕ ਸਡ਼ਕ ਹਾਦਸਾ, 8 ਜ਼ਖਮੀ
NEXT STORY 
