ਚੰਡੀਗੜ੍ਹ, ਪਟਿਆਲਾ (ਬਿਊਰੋ) : ਸ਼ਾਤਿਰ ਢੰਗ ਨਾਲ ਬੈਂਕਾਂ ਅਤੇ ਆਮ ਲੋਕਾਂ ਨੂੰ ਲੁੱਟਣ ਵਾਲਾ ਨਿਰਪਾਲ ਸਿੰਘ ਬੜਿੰਗ ਆਖਿਰ ਚੰਡੀਗੜ੍ਹ ਪੁਲਸ ਦੇ ਹੱਥ ਆ ਗਿਆ ਹੈ। ਚੰਡੀਗੜ੍ਹ ਪੁਲਸ ਦੇ ਈ. ਓ. ਵਿੰਗ ਨੇ ਨਿਰਪਾਲ ਬੜਿੰਗ ਨੂੰ ਢਾਈ ਕਰੋੜ ਰੁਪਏ ਦੇ ਫ਼ਰਾਡ ਕੇਸ ਅੰਦਰ ਫੜ ਕੇ ਸਲਾਖਾਂ ਪਿੱਛੇ ਭੇਜ ਦਿੱਤਾ ਹੈ। ਜ਼ਿਕਰਯੋਗ ਹੈ ਕਿ ਨਿਰਪਾਲ ਸਿੰਘ ਬੜਿੰਗ ਦੇ ਪੰਜਾਬ ਦੇ ਵੱਖ-ਵੱਖ ਥਾਣਿਆਂ ਅੰਦਰ ਇਕ ਦਰਜਨ ਦੇ ਕਰੀਬ ਫ਼ਰਾਡ ਕੇਸ ਦਰਜ ਹਨ। ਇੱਥੇ ਹੀ ਬੱਸ ਨਹੀਂ, ਉਹ ਬਹੁਤ ਸਾਰੇ ਚੈੱਕ ਬਾਊਂਸ ਦੇ ਕੇਸਾਂ ਵਿਚ ਵੀ ਭਗੌੜਾ ਹੈ।
ਚੰਡੀਗੜ੍ਹ ਪੁਲਸ ਦੇ ਈ. ਓ. ਵਿੰਗ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਨਿਰਪਾਲ ਵੜਿੰਗ ਨੂੰ ਇਸ ਸਮੇਂ ਜੇਲ ਭੇਜਿਆ ਜਾ ਚੁੱਕਾ ਹੈ। ਨਿਰਪਾਲ ਸਿੰਘ ਬੜਿੰਗ ਉੱਪਰ ਚੰਡੀਗੜ੍ਹ ਦੇ ਈਸਟ ਸੈਕਟਰ 26 ਥਾਣੇ ਅੰਦਰ ਐੱਫ. ਆਈ. ਆਰ. ਨੰਬਰ 0016 (2022) ਦਰਜ ਹੋਈ ਸੀ। ਹਮੇਸ਼ਾ ਹੀ ਧੋਖਾਦੇਹੀ ਕਰ ਕੇ ਲੋਕਾਂ ਨੂੰ ਲੁੱਟਣ ਵਾਲੇ ਨਿਰਪਾਲ ਬੜਿੰਗ ਨੇ ਇਸ ਕੇਸ ਅੰਦਰ ਵੀ ਆਪਣੀ ਪਟਿਆਲਾ ਸਥਿਤ ਕੋਠੀ ਅਤੇ ਰਾਜਪੁਰਾ ਸਥਿਤ ਇਕ ਬੂਥ ਦੀਆਂ ਰਜਿਸਟਰੀਆਂ ਦੀਆਂ ਕਲਰ ਫੋਟੋ ਸਟੇਟ ਕਰਵਾ ਕੇ ਇੰਡੀਅਨ ਓਵਰਸੀਜ਼ ਬੈਂਕ ਚੰਡੀਗੜ੍ਹ ਸੈਕਟਰ 26 ਤੋਂ ਢਾਈ ਕਰੋੜ ਰੁਪਏ ਦਾ ਲੋਨ ਕਮ ਲਿਮਟ ਲੈ ਲਿਆ ਸੀ।
ਮੁੜ ਕੇ ਇਸ ਨੇ ਲੋਨ ਨਹੀਂ ਭਰਿਆ, ਜਿਸ ਤੋਂ ਬਾਅਦ ਬੈਂਕ ਨੇ ਚੰਡੀਗੜ੍ਹ ਪੁਲਸ ਨੂੰ ਸ਼ਿਕਾਇਤ ਦਿੱਤੀ। ਬਕਾਇਦਾ ਜਾਂਚ ਤੋਂ ਬਾਅਦ ਨਿਰਪਾਲ ਬੜਿੰਗ, ਉਸ ਦੇ ਭਰਾ ਨਰਿੰਦਰ ਸਿੰਘ ਅਤੇ ਬੈਂਕ ਦੀ ਬ੍ਰਾਂਚ ਦੇ ਮੈਨੇਜਰ ਅਦਰੇਸ਼ ਕੁਮਾਰ ਖ਼ਿਲਾਫ਼ ਜਾਅਲੀ ਰਜਿਸਟਰੀਆਂ ਜਮ੍ਹਾ ਕਰਵਾਉਣ ਅਤੇ ਹੋਰ ਦੋਸ਼ਾਂ ਤਹਿਤ ਧਾਰਾ 420, 467, 468, 471 ਅਤੇ 120-ਬੀ ਆਈ. ਪੀ. ਸੀ. ਤਹਿਤ ਕੇਸ ਦਰਜ ਕੀਤਾ ਗਿਆ ਸੀ।
ਨਿਰਪਾਲ ਬੜਿੰਗ ਇਸ ਤੋਂ ਬਾਅਦ ਚੰਡੀਗੜ੍ਹ ਪੁਲਸ ਨਾਲ ਲੁਕਣ-ਮੀਟੀ ਦੀ ਖੇਡ ਖੇਡਦਾ ਰਿਹਾ। ਆਖਰ ਬੈਂਕ ਵੱਲੋਂ ਲਗਾਤਾਰ ਸ਼ਿਕੰਜਾ ਕੱਸਣ ਤੋਂ ਬਾਅਦ ਚੰਡੀਗੜ੍ਹ ਪੁਲਸ ਨੇ ਛਾਪਾਮਾਰੀ ਕਰਕੇ ਇਸ ਨੂੰ ਇਸ ਦੇ ਘਰ ਤੋਂ ਗ੍ਰਿਫ਼ਤਾਰ ਕਰ ਲਿਆ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਨ੍ਹਾਂ ਹੀ ਰਜਿਸਟਰੀਆਂ ’ਤੇ ਇਹ ਕੁਝ ਸਾਲ ਪਹਿਲਾਂ ਐੱਚ. ਡੀ. ਬੀ. ਐੱਫ. ਐੱਸ. ਐੱਲ. (ਐੱਚ. ਡੀ. ਬੀ. ਫਾਈਨਾਂਸ਼ੀਅਲ ਸਰਵਿਸਿਜ਼ ਲਿਮਟਿਡ) ਤੋਂ ਵੀ ਕਈ ਕਰੋੜ ਦਾ ਲੋਨ ਲੈ ਚੁੱਕਾ ਹੈ ਅਤੇ ਉਨ੍ਹਾਂ ਹੀ ਰਜਿਸਟਰੀਆਂ ਨੂੰ ਫੋਟੋ ਸਟੇਟ ਕਰਵਾ ਕੇ, ਜਾਅਲੀ ਬਣਾ ਕੇ ਬ੍ਰਾਂਚ ਮੈਨੇਜਰ ਨਾਲ ਮਿਲ ਕੇ ਇਸ ਨੇ ਦੁਬਾਰਾ ਲੋਨ ਕਰਵਾਇਆ ਸੀ।
ਅਸੀਂ ਕਾਨੂੰਨ ਅਨੁਸਾਰ ਸਖ਼ਤ ਕਾਰਵਾਈ ਕਰਾਂਗੇ : ਏ. ਵੈਂਕਟੇਸ਼
ਇਸ ਸਬੰਧੀ ਜਦੋਂ ਚੰਡੀਗੜ੍ਹ ਪੁਲਸ ਦੇ ਐੱਸ. ਪੀ., ਸੀਨੀਅਰ ਅਧਿਕਾਰੀ ਅਤੇ ਈ. ਓ. ਵਿੰਗ ਦੇ ਇੰਚਾਰਜ ਏ. ਵੈਂਕਟੇਸ਼ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਆਖਿਆ ਕਿ ਚੰਡੀਗੜ੍ਹ ਪੁਲਸ ਅਪਰਾਧੀਆਂ ਖ਼ਿਲਾਫ਼ ਪੂਰੀ ਤਰ੍ਹਾਂ ਸਖ਼ਤੀ ਨਾਲ ਕੰਮ ਕਰ ਰਹੀ ਹੈ ਅਤੇ ਧੋਖਾਧੜੀ ਦੇ ਕੇਸ ਅੰਦਰ ਨਿਰਪਾਲ ਨੂੰ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਾ ਹੈ।
ਇਸ ਖ਼ਿਲਾਫ਼ ਅਸੀਂ ਕਾਨੂੰਨ ਅਨੁਸਾਰ ਸਖ਼ਤ ਕਾਰਵਾਈ ਕਰਾਂਗੇ। ਇਸ ਸਬੰਧੀ ਥਾਣਾ ਈਸਟ ਸੈਕਟਰ 26 ਦੇ ਇਸ ਕੇਸ ਨੂੰ ਦੇਖ ਰਹੇ ਆਈ. ਓ. ਜਗਪਾਲ ਸਿੰਘ ਦਾ ਕਹਿਣਾ ਹੈ ਕਿ ਨਿਰਪਾਲ ਇਸ ਸਮੇਂ ਸੈਂਟਰਲ ਜੇਲ ’ਚ ਹੈ। ਇਸ ਨੂੰ ਕੋਰਟ ’ਚ ਪੇਸ਼ ਕੀਤਾ ਜਾਵੇਗਾ ਅਤੇ ਕਾਨੂੰਨ ਆਪਣਾ ਕੰਮ ਕਰੇਗਾ।
ਨਿਰਪਾਲ ਬੜਿੰਗ ’ਤੇ ਪੰਜਾਬ ਦੇ ਵੱਖ-ਵੱਖ ਥਾਣਿਆਂ ਅੰਦਰ ਵੀ ਹਨ ਇਕ ਦਰਜਨ ਮੁਕੱਦਮੇ
ਨਿਰਪਾਲ ਬੜਿੰਗ ਉੱਪਰ ਪੰਜਾਬ ਅੰਦਰ ਵੀ ਲਗਭਗ ਇਕ ਦਰਜਨ ਦੇ ਕਰੀਬ ਪਰਚੇ ਦਰਜ ਹਨ ਅਤੇ ਕਈ ਕੇਸਾਂ ’ਚ ਇਹ ਪੰਜਾਬ ਪੁਲਸ ਨੂੰ ਵੀ ਲੋੜੀਂਦਾ ਹੈ। ਮੁਕੱਦਮਾ ਨੰਬਰ 60 (05.08.2022) ਧਾਰਾ 473, 420 ਆਈ. ਪੀ. ਸੀ. ਥਾਣਾ ਖੇੜੀ। ਮੁਕੱਦਮਾ ਨੰਬਰ 06 (23.08.2018) ਧਾਰਾ 406, 420 ਆਈ. ਪੀ. ਸੀ. ਥਾਣਾ ਬਨੂੜ। ਮੁਕੱਦਮਾ ਨੰਬਰ 277 (27.10.2017) ਧਾਰਾ 406, 420 ਆਈ. ਪੀ. ਸੀ. ਥਾਣਾ ਸਿਟੀ ਰਾਜਪੁਰਾ। ਮੁਕੱਦਮਾ ਨੰਬਰ 179 (03.09.2013) ਧਾਰਾ ਐੱਸ. ਸੀ./ਐੱਸ. ਟੀ. ਐਕਟ 1989, ਆਈ. ਪੀ. ਸੀ. ਥਾਣਾ ਸਦਰ ਪਟਿਆਲਾ।
ਮੁਕੱਦਮਾ ਨੰਬਰ 08 (12.11.2010) ਧਾਰਾ 420, 465, 467, 468, 471, 120-ਬੀ ਆਈ. ਪੀ. ਸੀ. ਥਾਣਾ ਫ਼ਰੀਦਕੋਟ ਮੋਹਾਲੀ (ਇਸ ਕੇਸ ਵਿੱਚ ਸਜ਼ਾ ਹੋ ਚੁੱਕੀ ਹੈ)। ਮੁਕੱਦਮਾ ਨੰਬਰ 113 (12.06.2018) ਧਾਰਾ 406, 420, 120-ਬੀ ਆਈ. ਪੀ. ਸੀ. ਥਾਣਾ ਫੇਜ਼ 1 ਮੋਹਾਲੀ। ਮੁਕੱਦਮਾ ਨੰਬਰ 09 (26.01.2024) ਧਾਰਾ 406, 420, 467, 468, 471, 120-ਬੀ ਆਈ. ਪੀ. ਸੀ. ਥਾਣਾ ਅਰਬਨ ਐਸਟੇਟ ਪਟਿਆਲਾ। ਮੁਕੱਦਮਾ ਨੰਬਰ 44 (28.03.2021) ਧਾਰਾ 174-ਏ ਆਈ. ਪੀ. ਸੀ. ਥਾਣਾ ਫੇਜ਼ 8 ਮੋਹਾਲੀ।
ਮੁਕੱਦਮਾ ਨੰਬਰ 128 (10.07.2024) ਧਾਰਾ 420, 406 ਆਈ. ਪੀ. ਸੀ. ਥਾਣਾ ਸਿਟੀ ਰਾਜਪੁਰਾ। ਮੁਕੱਦਮਾ ਨੰਬਰ 107 (22.06.2024) ਧਾਰਾ 420, 406, 120-ਬੀ ਆਈ. ਪੀ. ਸੀ. ਥਾਣਾ ਫੇਜ਼ 1 ਮੋਹਾਲੀ। ਐੱਫ. ਆਈ. ਆਰ. ਨੰਬਰ 41 ਥਾਣਾ ਛਾਜਲੀ (4 ਕਰੋੜ ਦਾ ਗਬਨ)।
ਵੱਖ-ਵੱਖ ਕੋਰਟਾਂ ਨੇ ਵੀ ਕਈ ਕੇਸਾਂ ਵਿਚ ਕੀਤਾ ਪੀ. ਓ. ਕਰਾਰ
ਨਿਰਪਾਲ ਬੜਿੰਗ ਨੂੰ ਵੱਖ-ਵੱਖ ਮਾਣਯੋਗ ਅਦਾਲਤਾਂ ਨੇ ਵੀ ਪੀ. ਓ. (ਭਗੌੜਾ) ਕਰਾਰ ਦਿੱਤਾ ਹੋਇਆ ਹੈ, ਜਿਸ ਤਹਿਤ ਮਿਤੀ 11.11.2020 ਨੂੰ ਮਾਨਯੋਗ ਅਦਾਲਤ ਭੁਪਿੰਦਰ ਸਿੰਘ ਗਰੇਵਾਲ ਜੁਡੀਸ਼ੀਅਲ ਮੈਜਿਸਟ੍ਰੇਟ ਫਸਟ ਕਲਾਸ ਜਲੰਧਰ ਵੱਲੋਂ ਚੋਪੜਾ ਪਬਲੀਕੇਸ਼ਨ ਹੋਮਸ ਪ੍ਰਾਈਵੇਟ ਲਿਮਟਿਡ ਦੀ ਪਟੀਸ਼ਨ ਦੀ ਸੁਣਵਾਈ ਦੌਰਾਨ ਨਿਰਪਾਲ ਸਿੰਘ ਨੂੰ ਭਗੌੜਾ ਐਲਾਨਿਆ ਗਿਆ।
ਮਿਤੀ 07.07.2023 ਨੂੰ ਮੁਕੇਸ਼ ਕੁਮਾਰ ਸਿੰਗਲਾ (ਜੁਡੀਸ਼ੀਅਲ ਮੈਜਿਸਟ੍ਰੇਟ ਫਸਟ ਕਲਾਸ) ਐੱਸ. ਏ. ਐੱਸ. ਨਗਰ ਵੱਲੋਂ ਨਿਰਪਾਲ ਸਿੰਘ ਨੂੰ ਭਗੌੜਾ ਐਲਾਨ ਕੇ ਇਸ ਦੇ ਖ਼ਿਲਾਫ਼ 174-ਏ ਆਈ. ਪੀ. ਸੀ. ਦਾ ਮੁਕੱਦਮਾ ਦਰਜ ਕਰਨ ਦੇ ਹੁਕਮ ਜਾਰੀ ਕੀਤੇ ਗਏ।
ਮਾਨਯੋਗ ਅਦਾਲਤ ਡਾ. ਕੁਸ਼ਲ ਸਿੰਗਲਾ (ਜੁਡੀਸ਼ੀਅਲ ਮੈਜਿਸਟ੍ਰੇਟ ਫਸਟ ਕਲਾਸ) ਰਾਜਪੁਰਾ ਵੱਲੋਂ ਮਿਤੀ 12.06.2023 ਨੂੰ ਨਿਰਪਾਲ ਸਿੰਘ ਦੀ ਪਤਨੀ ਰਮਨਦੀਪ ਕੌਰ ਨੂੰ ਭਗੌੜਾ ਐਲਾਨ ਕੀਤਾ ਗਿਆ।
ਮਾਨਯੋਗ ਅਦਾਲਤ ਦੇਵਨੂਰ ਸਿੰਘ (ਜੇ. ਐੱਮ. ਆਈ. ਸੀ.) ਮੋਹਾਲੀ ਵੱਲੋਂ ਮੁਕੱਦਮਾ ਨੰਬਰ 6 ਬਾਬਤ ਬਨੂੜ ਮਿਤੀ 18.10.2021 ਨੂੰ ਨਿਰਪਾਲ ਸਿੰਘ ਅਤੇ ਉਸ ਦੀ ਪਤਨੀ ਰਮਨਦੀਪ ਕੌਰ ਨੂੰ ਭਗੌੜਾ ਐਲਾਨਿਆ ਗਿਆ।
ਮਿਤੀ 17.11.2018 ਨੂੰ ਮਾਨਯੋਗ ਅਦਾਲਤ ਦਿਲਜੀਤ ਕੌਰ ਜੁਡੀਸ਼ੀਅਲ ਮੈਜਿਸਟ੍ਰੇਟ ਫਸਟ ਕਲਾਸ ਖਰੜ ਵੱਲੋਂ ਨਿਰਪਾਲ ਸਿੰਘ ਨੂੰ ਭਗੌੜਾ ਘੋਸ਼ਿਤ ਕਰਕੇ ਕਾਰਵਾਈ ਦੇ ਹੁਕਮ ਦਿੱਤੇ ਗਏ।
ਮਿਤੀ 11.06.2019 ਨੂੰ ਮਾਨਯੋਗ ਅਦਾਲਤ ਰੁਚੀ ਕੰਬੋਜ ਜੇ. ਐੱਮ. ਆਈ. ਸੀ. ਐੱਸ. ਏ. ਐੱਸ. ਨਗਰ ਵੱਲੋਂ ਭਗੌੜਾ ਐਲਾਨ ਕੀਤਾ ਗਿਆ।
ਹੇਮਕੁੰਟ ਸਾਹਿਬ ਤੋਂ ਪਰਤ ਰਹੇ ਨੌਜਵਾਨਾਂ ਨਾਲ ਵਾਪਰਿਆ ਹਾਦਸਾ! ਇਕ ਦੀ ਮੌਤ, ਦੂਜਾ ਜ਼ਖਮੀ
NEXT STORY 
