ਚੰਡੀਗੜ੍ਹ (ਸ਼ੀਨਾ) : ਪੰਜਾਬ ਯੂਨੀਵਰਸਿਟੀ ਵਿਦਿਆਰਥੀ ਕੌਂਸਲ ਚੋਣਾਂ ’ਚ ਏ. ਬੀ. ਵੀ. ਪੀ. ਨੇ ਇਤਿਹਾਸ ਰਚਦਿਆਂ ਲਗਾਤਾਰ ਦੂਜੀ ਵਾਰ ਪ੍ਰਧਾਨ ਦਾ ਅਹੁਦਾ ਆਪਣੇ ਨਾਮ ਕਰ ਲਿਆ। ਏ. ਬੀ. ਵੀ. ਪੀ. ਉਮੀਦਵਾਰ ਅੰਕਿਤ ਬਿਧਾਨ ਨੇ 513 ਵੋਟਾਂ ਦੇ ਫ਼ਰਕ ਨਾਲ ਜਿੱਤ ਦਰਜ ਕਰਦਿਆਂ ਪ੍ਰਧਾਨਗੀ ਦੀ ਕੁਰਸੀ ਹਾਸਲ ਕੀਤੀ। ਪੀ. ਯੂ. ਦੇ ਵਿਦਿਆਰਥੀ ਚੋਣਾਂ ਦੇ ਇਤਿਹਾਸ ’ਚ ਇਹ ਪਹਿਲਾ ਮੌਕਾ ਹੈ. ਜਦੋਂ ਏ. ਬੀ. ਵੀ. ਪੀ. ਨੇ ਲਗਾਤਾਰ ਦੋ ਕਾਰਜਕਾਲਾਂ ਲਈ ਪ੍ਰਧਾਨ ਦਾ ਅਹੁਦਾ ਜਿੱਤਿਆ ਹੈ। ਇਸ ਵਾਰ ਚੋਣਾਂ ’ਚ ਕੁੱਲ 16 ਹਜ਼ਾਰ 468 ਵਿਦਿਆਰਥੀ ਵੋਟਰ ਰਜਿਸਟਰਡ ਸਨ, ਜਿਨ੍ਹਾਂ ’ਚੋਂ 9,610 ਵੋਟਾਂ ਪੋਲ ਹੋਈਆਂ। ਇਸ ਤਰ੍ਹਾਂ ਕੁੱਲ 58.35 ਫ਼ੀਸਦੀ ਵੋਟਿੰਗ ਦਰਜ ਕੀਤੀ ਗਈ। ਪ੍ਰਧਾਨ ਅਹੁਦੇ ਲਈ ਚਾਰ ਉਮੀਦਵਾਰਾਂ ਵਿਚਾਲੇ ਸਿੱਧਾ ਮੁਕਾਬਲਾ ਹੋਇਆ ਜਦਕਿ ਉਪ-ਪ੍ਰਧਾਨ, ਸਕੱਤਰ, ਸਾਂਝੇ ਸਕੱਤਰ ਤੇ ਵਿਭਾਗੀ ਪ੍ਰਤੀਨਿਧੀਆਂ ਦੇ ਅਹੁਦਿਆਂ ਲਈ ਵੀ ਚੋਣ ਹੋਈ। ਪ੍ਰਧਾਨ ਅਹੁਦੇ ਲਈ ਐੱਨ. ਐੱਸ. ਯੂ. ਆਈ. ਦੇ ਗੁਰਮਨ ਸਿੰਘ ਸਿੱਧੂ, ਏ. ਐੱਸ. ਏ. ਪੀ. ਦੇ ਆਦਿਲਬੀਰ ਸਿੰਘ ਬਰਾੜ, ਏ. ਬੀ. ਵੀ. ਪੀ. ਦੇ ਅੰਕਿਤ ਬਿਧਾਨ ਤੇ ਸਾਥ ਤੋਂ ਦਰਸ਼ਪ੍ਰੀਤ ਸਿੰਘ ਮੈਦਾਨ ’ਚ ਸਨ। ਪੀ. ਯੂ. ਦੇ 60 ਵਿਭਾਗਾਂ ’ਚ ਵੋਟਿੰਗ ਕਰਵਾਈ ਗਈ। ਸਵੇਰੇ 9.30 ਵਜੇ ਸਖ਼ਤ ਸੁਰੱਖਿਆ ਪ੍ਰਬੰਧਾਂ ਹੇਠ ਵੋਟਿੰਗ ਸ਼ੁਰੂ ਹੋਈ, ਜੋ 11.30 ਵਜੇ ਤੱਕ ਚੱਲੀ। ਇਸ ਤੋਂ ਬਾਅਦ ਦੁਪਹਿਰ 12 ਵਜੇ ਗਿਣਤੀ ਸ਼ੁਰੂ ਕੀਤੀ ਗਈ ਤੇ ਦੇਰ ਸ਼ਾਮ ਅੰਤਮ ਨਤੀਜੇ ਐਲਾਨੇ ਗਏ।
ਜ਼ੈੱਨ-ਜੀ ਦੇ ਸਮਰਥਨ ਤੋਂ ਬਿਨਾਂ ਸੰਭਵ ਨਹੀਂ ਸੀ ਜਿੱਤ : ਅੰਕਿਤ ਬਿਧਾਨ
ਜਿੱਤ ਤੋਂ ਬਾਅਦ ਅੰਕਿਤ ਬਿਧਾਨ ਨੇ ਕਿਹਾ ਕਿ ਚੋਣ ਮੁਹਿੰਮ ਦੌਰਾਨ ਉਨ੍ਹਾਂ ਨੂੰ ਕਈ ਵਿਦਿਆਰਥੀ ਜੱਥੇਬੰਦੀਆਂ ਦਾ ਸਮਰਥਨ ਮਿਲਿਆ, ਜਿਨ੍ਹਾਂ ’ਚ ਐੱਸ. ਓ. ਆਈ., ਹਿਮਸਾ ਤੇ ਆਈ. ਐੱਸ. ਏ. ਸ਼ਾਮਲ ਹਨ। ਚੋਣਾਂ ਤੋਂ ਪਹਿਲਾਂ ਐੱਸ. ਓ. ਆਈ. ਵੱਲੋਂ ਏ. ਬੀ. ਵੀ. ਪੀ. ਉਮੀਦਵਾਰ ਨੂੰ ਸਮਰਥਨ ਦੇਣ ਦਾ ਐਲਾਨ ਵੀ ਅੰਕਿਤ ਦੇ ਹੱਕ ’ਚ ਅਹਿਮ ਮੰਨਿਆ ਗਿਆ। ਅੰਕਿਤ ਨੇ ਕਿਹਾ ਕਿ ਉਨ੍ਹਾਂ ਦੀ ਜਿੱਤ ਜ਼ੈੱਨ-ਜੀ ਦੇ ਸਮਰਥਨ ਤੋਂ ਬਿਨਾਂ ਸੰਭਵ ਨਹੀਂ ਸੀ। ਵਿਦਿਆਰਥੀਆਂ ਨੇ ਉਨ੍ਹਾਂ ਅਤੇ ਏ. ਬੀ. ਵੀ. ਪੀ. ’ਤੇ ਭਰੋਸਾ ਜਤਾਇਆ ਹੈ। ਉਨ੍ਹਾਂ ਕਿਹਾ ਕਿ ਵਿਦਿਆਰਥੀਆਂ ਨਾਲ ਕੀਤੇ ਵਾਅਦਿਆਂ ਨੂੰ ਸਿਰਫ਼ ਕਾਗਜ਼ਾਂ ਤੱਕ ਸੀਮਤ ਨਹੀਂ ਰੱਖਿਆ ਜਾਵੇਗਾ, ਸਗੋਂ ਉਨ੍ਹਾਂ ਨੂੰ ਪਹਿਲ ਦੇ ਆਧਾਰ ’ਤੇ ਪੂਰਾ ਕਰਨ ਲਈ ਕੰਮ ਕੀਤਾ ਜਾਵੇਗਾ। ਉਨ੍ਹਾਂ ਕੈਂਪਸ ’ਚ ਵਿਦਿਆਰਥੀਆਂ ਦੀ ਸੁਰੱਖਿਆ ਨੂੰ ਵੀ ਆਪਣੀਆਂ ਪ੍ਰਮੁੱਖ ਤਰਜੀਹਾਂ ’ਚ ਸ਼ਾਮਲ ਕੀਤਾ।
ਜੀਂਦ ਦੇ ਪਿੰਡ ਤੋਂ ਪ੍ਰਧਾਨਗੀ ਤੱਕ ਦਾ ਸਫ਼ਰ
ਅੰਕਿਤ ਜੀਂਦ ਜ਼ਿਲ੍ਹੇ ਦੇ ਪੇਗਾਹ ਪਿੰਡ ਨਾਲ ਸਬੰਧਿਤ ਹਨ। ਉਹ 2021 ਤੋਂ ਏ. ਬੀ. ਵੀ. ਪੀ. ਨਾਲ ਜੁੜੇ ਹਨ ਅਤੇ ਵਿਦਿਆਰਥੀ ਰਾਜਨੀਤੀ ’ਚ ਸਰਗਰਮ ਰਹੇ ਹਨ। ਉਨ੍ਹਾਂ ਪੰਜਾਬ ਯੂਨੀਵਰਸਿਟੀ ਦੇ ਕਾਨੂੰਨ ਵਿਭਾਗ ਤੋਂ ਪੜ੍ਹਾਈ ਕੀਤੀ ਹੈ ਅਤੇ ਇਸ ਸਮੇਂ ਯੂਨੀਵਰਸਿਟੀ ’ਚ ਖੋਜ ਵਿਦਵਾਨ ਵਜੋਂ ਕੰਮ ਕਰ ਰਹੇ ਹਨ। ਅੰਕਿਤ ਦੀ ਜਿੱਤ ਦੀ ਖ਼ਬਰ ਪਿੰਡ ਪੇਗਾਹ ਪਹੁੰਚਣ ’ਤੇ ਪਿੰਡ ਵਾਸੀਆਂ ਤੇ ਨੌਜਵਾਨਾਂ ਨੇ ਖੁਸ਼ੀ ਮਨਾਈ। ਮਠਿਆਈਆਂ ਵੰਡ ਕੇ ਉਨ੍ਹਾਂ ਨੂੰ ਵਧਾਈ ਦਿੱਤੀ ਗਈ। ਪਿੰਡ ਵਾਸੀਆਂ ਨੇ ਕਿਹਾ ਕਿ ਉਨ੍ਹਾਂ ਦੇ ਪਿੰਡ ਦੇ ਨੌਜਵਾਨ ਦਾ ਪੰਜਾਬ ਯੂਨੀਵਰਸਿਟੀ ਵਰਗੀ ਵੱਕਾਰੀ ਸੰਸਥਾ ਦੀ ਵਿਦਿਆਰਥੀ ਕੌਂਸਲ ਦਾ ਪ੍ਰਧਾਨ ਚੁਣਿਆ ਜਾਣਾ ਪੂਰੇ ਖੇਤਰ ਲਈ ਮਾਣ ਵਾਲੀ ਗੱਲ ਹੈ।
ਸਾਬਕਾ ਪ੍ਰਧਾਨ ਗੌਰਵ ਵੀਰ ਨੇ ਇਹ ਦੱਸੀ ਜਿੱਤ ਦੀ ਵਜ੍ਹਾ
ਸਾਬਕਾ ਪ੍ਰਧਾਨ ਗੌਰਵ ਵੀਰ ਸੋਹਲ ਨੇ ਕਿਹਾ ਕਿ ਏ. ਬੀ. ਵੀ. ਪੀ. ਦੀ ਬੜ੍ਹਤ ਦਾ ਸਭ ਤੋਂ ਵੱਡਾ ਕਾਰਨ ਵਿਦਿਆਰਥੀਆਂ ਨਾਲ ਕੀਤੇ ਵਾਅਦਿਆਂ ਨੂੰ ਪੂਰਾ ਕਰਨ ਲਈ ਕੀਤੇ ਗਏ ਕੰਮ ਹਨ। ਉਨ੍ਹਾਂ ਦੱਸਿਆ ਕਿ ਪਿਛਲੇ ਕਾਰਜਕਾਲ ਦੌਰਾਨ ਬੁਨਿਆਦੀ ਢਾਂਚੇ, ਅਕਾਦਮਿਕ, ਸੱਭਿਆਚਾਰਕ ਤੇ ਖੇਡਾਂ ਨਾਲ ਜੁੜੇ ਮੁੱਦਿਆਂ ’ਤੇ ਧਿਆਨ ਦਿੱਤਾ ਗਿਆ। ਬੁਨਿਆਦੀ ਢਾਂਚੇ ਤਹਿਤ 10 ਸਿੰਥੈਟਿਕ ਟਰੈਕਾਂ ਦੀ ਮਨਜ਼ੂਰੀ ਦਿਵਾਈ ਗਈ ਹੈ, ਜਿਨ੍ਹਾਂ ਦਾ ਕੰਮ ਆਉਣ ਵਾਲੇ ਮਹੀਨਿਆਂ ’ਚ ਸ਼ੁਰੂ ਹੋਵੇਗਾ। ਦੱਖਣੀ ਤੇ ਉੱਤਰੀ ਕੈਂਪਸ ਨੂੰ ਜੋੜਨ ਲਈ ਅੰਡਰਪਾਸ ਪ੍ਰਾਜੈਕਟ ਵੀ ਜਲਦ ਸ਼ੁਰੂ ਹੋਣ ਦੀ ਉਮੀਦ ਹੈ। ਇਸ ਤੋਂ ਇਲਾਵਾ 17 ਸਾਲਾਂ ਤੋਂ ਰੁਕੇ ਕਨਵੈਂਸ਼ਨ ਸੈਂਟਰ ਦੇ ਕੰਮ ਨੂੰ ਅੱਗੇ ਵਧਾਇਆ ਗਿਆ ਤੇ ਇਹ ਵਿਦਿਆਰਥੀਆਂ ਲਈ ਖੋਲ੍ਹਿਆ ਜਾ ਚੁੱਕਾ ਹੈ। ਅਕਾਦਮਿਕ ਖੇਤਰ ’ਚ 300 ਤੋਂ ਵੱਧ ਵਿਦਿਆਰਥੀਆਂ ਨੂੰ ਇੰਟਰਨਸ਼ਿਪ ਦੇ ਮੌਕੇ ਦਿਵਾਉਣ ਤੇ ਪਲੇਸਮੈਂਟ ਡਰਾਈਵ ਕਰਵਾਉਣ ਦਾ ਦਾਅਵਾ ਕਰਦਿਆਂ ਸੋਹਲ ਨੇ ਕਿਹਾ ਕਿ ਇਸ ਦੌਰਾਨ 72 ਫ਼ੀਸਦੀ ਸਫ਼ਲਤਾ ਦਰ ਰਹੀ। ਅਗਲੇ ਕਾਰਜਕਾਲ ’ਚ ਇਸ ਨੂੰ 100 ਫੀਸਦੀ ਤੱਕ ਲਿਜਾਣ ਦਾ ਟੀਚਾ ਹੈ। ਏ. ਬੀ. ਵੀ. ਪੀ. ਦੇ ਚੁੱਪ ਰਹਿਣ ਦੇ ਦੋਸ਼ਾਂ ਨੂੰ ਰੱਦ ਕਰਦਿਆਂ ਉਨ੍ਹਾਂ ਕਿਹਾ ਕਿ ਫ਼ੀਸ ਵਾਧੇ, ਐਂਟੀ-ਐਫਿਡੇਵਿਟ ਤੇ ਹੋਰ ਵਿਦਿਆਰਥੀ ਹਿੱਤਾਂ ਦੇ ਮੁੱਦਿਆਂ ’ਤੇ ਜੱਥੇਬੰਦੀ ਨੇ ਲਗਾਤਾਰ ਆਵਾਜ਼ ਉਠਾਈ। ਪੰਜਾਬ ਯੂਨੀਵਰਸਿਟੀ ਦੇ ਵਿਦਿਆਰਥੀਆਂ ਵੱਲੋਂ ਦਿੱਤਾ ਇਹ ਫਤਵਾ ਦੇਸ਼ ਭਰ ਦੀ ਵਿਦਿਆਰਥੀ ਰਾਜਨੀਤੀ ਲਈ ਵੀ ਮਹੱਤਵਪੂਰਨ ਸੰਦੇਸ਼ ਹੈ।
ਏ. ਐੱਸ. ਈ. ਪੀ ਦਾ ਵੱਡਾ ਐਲਾਨ, ਅਕਿੰਤ ਦੀ ਯੋਗਤਾ ਨੂੰ ਹਾਈਕੋਰਟ ’ਚ ਦੇਵੇਗੀ ਚੁਣੌਤੀ
ਏ.ਐੱਸ.ਈ.ਪੀ ਨੇ ਅੰਕਿਤ ਬਿਧਾਨ ਦੀ ਜਿੱਤ ਤੋਂ ਬਾਅਦ ਉਨ੍ਹਾਂ ਦੀ ਯੋਗਤਾ ਤੇ ਦਸਤਾਵੇਜ਼ਾਂ ਨੂੰ ਲੈ ਕੇ ਗੰਭੀਰ ਸਵਾਲ ਖੜ੍ਹੇ ਕੀਤੇ ਹਨ। ਸੰਗਠਨ ਨੇ ਐਲਾਨ ਕੀਤਾ ਕਿ ਉਹ ਇਸ ਮਾਮਲੇ ਨੂੰ ਹਾਈਕੋਰਟ ’ਚ ਚੁਣੌਤੀ ਦੇਣਗੇ। ਏ.ਐੱਸ.ਈ.ਪੀ ਨੇ ਦਾਅਵਾ ਕੀਤਾ ਕਿ ਵੋਟਿੰਗ ਤੋਂ ਪਹਿਲਾਂ ਹੀ ਕੁਲਪਤੀ, ਡੀਨ ਸਟੂਡੈਂਟ ਵੈੱਲਫੇਅਰ, ਰਿਟਰਨਿੰਗ ਅਫ਼ਸਰ ਤੇ ਹੋਰ ਅਧਿਕਾਰੀਆਂ ਨੂੰ ਸ਼ਿਕਾਇਤ ਦੇ ਕੇ ਅੰਕਿਤ ਦੇ ਅਕਾਦਮਿਕ ਰਿਕਾਰਡ ਅਤੇ ਦਸਤਾਵੇਜ਼ਾਂ ਦੀ ਜਾਂਚ ਦੀ ਮੰਗ ਕੀਤੀ ਪਰ ਚੋਣ ਮੁਕੰਮਲ ਹੋਣ ਤੱਕ ਕੋਈ ਕਾਰਵਾਈ ਨਹੀਂ ਹੋਈ। ਸੰਗਠਨ ਦਾ ਦੋਸ਼ ਹੈ ਕਿ ਉਮੀਦਵਾਰ ਦੇ ਅਕਾਦਮਿਕ ਤੇ ਅਨੁਸ਼ਾਸਨਾਤਮਕ ਰਿਕਾਰਡ ਨਾਲ ਜੁੜੇ ਗੰਭੀਰ ਮਸਲੇ ਹਨ। ਏ.ਐੱਸ.ਈ.ਪੀ. ਮੁਤਾਬਕ ਅਨਫੇਅਰ ਮੀਨਜ਼ ਕੇਸ (ਯੂ.ਐੱਮ.ਸੀ.) ਤੇ ਡੀਬਾਰ ਕੀਤੇ ਜਾਣ ਵਰਗੇ ਮਾਮਲਿਆਂ ਦੀ ਸੁਤੰਤਰ ਜਾਂਚ ਹੋਣੀ ਚਾਹੀਦੀ ਹੈ।
ਲਾਅ ਵਿਭਾਗ ਬਾਹਰ ਹੰਗਾਮਾ, ਸਮੇਂ ਤੋਂ ਪਹਿਲਾਂ ਗੇਟ ਬੰਦ ਕਰਨ ਦੇ ਦੋਸ਼
ਲਾਅ ਵਿਭਾਗ ਬਾਹਰ ਉਸ ਵੇਲੇ ਤਣਾਅਪੂਰਨ ਮਾਹੌਲ ਬਣ ਗਿਆ, ਜਦੋਂ ਵਿਦਿਆਰਥੀਆਂ ਨੇ ਪੋਲਿੰਗ ਸੈਂਟਰ ਦਾ ਗੇਟ ਨਿਰਧਾਰਿਤ ਸਮੇਂ ਤੋਂ ਪਹਿਲਾਂ ਬੰਦ ਕਰਨ ਦਾ ਦੋਸ਼ ਲਾ ਕੇ ਜ਼ੋਰਦਾਰ ਰੋਸ ਪ੍ਰਦਰਸ਼ਨ ਕੀਤਾ। ਵਿਦਿਆਰਥੀਆਂ ਦਾ ਕਹਿਣਾ ਸੀ ਕਿ ਵੋਟਿੰਗ ਦਾ ਸਮਾਂ ਸਵੇਰੇ 11 ਵਜੇ ਤੱਕ ਸੀ ਪਰ ਕਰੀਬ 10 ਵਜੇ ਹੀ ਗੇਟ ਬੰਦ ਕਰ ਦਿੱਤਾ ਗਿਆ। ਇਸ ਕਾਰਨ ਕਈ ਵਿਦਿਆਰਥੀ ਵੋਟ ਪਾਉਣ ਤੋਂ ਵਾਂਝੇ ਰਹਿ ਗਏ। ਉਨ੍ਹਾਂ ਦਾ ਦਾਅਵਾ ਸੀ ਕਿ ਕੁੱਝ ਵਿਦਿਆਰਥੀ ਦੂਰ-ਦਰਾਜ਼ ਇਲਾਕਿਆਂ ਤੋਂ ਪਹੁੰਚੇ ਸਨ ਪਰ ਜਾਮ ਕਾਰਨ ਦੇਰੀ ਹੋ ਗਈ। ਗੇਟ ਬੰਦ ਮਿਲਣ ’ਤੇ ਗੁੱਸੇ ’ਚ ਆਏ ਵਿਦਿਆਰਥੀਆਂ ਨੇ ਨਾਅਰੇਬਾਜ਼ੀ ਕੀਤੀ ਤੇ ਧੱਕਾ-ਮੁੱਕੀ ਦੌਰਾਨ ਲੱਤ ਮਾਰ ਕੇ ਲਾਅ ਵਿਭਾਗ ਦਾ ਦਰਵਾਜ਼ਾ ਖੋਲ੍ਹ ਦਿੱਤਾ। ਇਸ ਦੌਰਾਨ ਪੁਲਸ ਨਾਲ ਵਿਦਿਆਰਥੀਆਂ ਦੀ ਝੜਪ ਵੀ ਹੋਈ। ਹਾਲਾਤ ਵਿਗੜਦੇ ਦੇਖ ਪੁਲਸ ਜਦੋਂ ਮਤਪੇਟੀਆਂ ਨੂੰ ਬਾਹਰ ਲੈ ਜਾਣ ਲੱਗੀ ਤਾਂ ਵਿਦਿਆਰਥੀਆਂ ਨੇ ਉਨ੍ਹਾਂ ਨੂੰ ਰੋਕ ਲਿਆ। ਮੌਕੇ ’ਤੇ ਡੀ.ਐੱਸ.ਡਬਲਿਊ. ਯੋਗੇਸ਼ ਰਾਵਲ ਪਹੁੰਚੇ ਤੇ ਕਾਫ਼ੀ ਦੇਰ ਤੱਕ ਵਿਦਿਆਰਥੀਆਂ ਨਾਲ ਗੱਲਬਾਤ ਕਰਕੇ ਮਾਮਲਾ ਸ਼ਾਂਤ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਕੋਈ ਸਹਿਮਤੀ ਨਹੀਂ ਬਣ ਸਕੀ। ਬਾਅਦ ’ਚ ਸੈਕਟਰ-11 ਥਾਣਾ ਇੰਚਾਰਜ ਜਸਪਾਲ ਸਿੰਘ ਭੁੱਲਰ ਤੇ ਪੀ.ਯੂ. ਸੁਰੱਖਿਆ ਮੁਖੀ ਵਿਕਰਮ ਸਿੰਘ ਆਪਣੀਆਂ ਟੀਮਾਂ ਸਮੇਤ ਮੌਕੇ ’ਤੇ ਪਹੁੰਚੇ। ਸੁਰੱਖਿਆ ਘੇਰੇ ’ਚ ਮਤਪੇਟੀਆਂ ਨੂੰ ਸੈਂਟਰ ਤੋਂ ਬਾਹਰ ਕੱਢਿਆ ਗਿਆ।
ਪਰਿਵਾਰ ਨਾਲ ਮੇਲਾ ਦੇਖਣ ਗਈ ਕੁੜੀ ਦੀ ਮੌਤ, ਬਿਜਲੀ ਦੀਆਂ ਨੰਗੀਆਂ ਤਾਰਾਂ ਤੋਂ ਲੱਗਾ ਕਰੰਟ
NEXT STORY 
