ਓਹੀਓ : ਅਮਰੀਕਾ ਦੇ ਓਹੀਓ ਸੂਬੇ ਵਿੱਚ ਪੁਲਸ ਤੋਂ ਬਚਣ ਲਈ ਤੇਜ਼ ਰਫਤਾਰ ਨਾਲ ਰੇਂਜ ਰੋਵਰ ਭਜਾਉਣ ਵਾਲੇ ਪੰਜਾਬੀ ਮੂਲ ਦੇ ਤਰਸੇਮ ਸਿੰਘ (33) ਨੂੰ ਅਦਾਲਤ ਨੇ 1 ਮਿਲੀਅਨ ਡਾਲਰ (ਕਰੀਬ 9.4 ਕਰੋੜ ਰੁਪਏ) ਦਾ ਜੁਰਮਾਨਾ ਲਗਾਇਆ ਹੈ। ਇਸ ਭਿਆਨਕ ਸੜਕ ਹਾਦਸੇ ਵਿੱਚ ਇੱਕ 17 ਸਾਲਾ ਗਰਭਵਤੀ ਕੁੜੀ ਐਸ਼ਲੇ ਹੋਮਜ਼ ਅਤੇ ਉਸ ਦੇ ਅਣਜੰਮੇ ਬੱਚੇ ਦੀ ਮੌਤ ਹੋ ਗਈ।
ਡਾਰਕ ਕਾਉਂਟੀ ਸ਼ੈਰਿਫ ਵਿਭਾਗ ਦੇ ਅਨੁਸਾਰ, ਇਹ ਘਟਨਾ 16 ਫਰਵਰੀ 2026 ਦੀ ਰਾਤ ਨੂੰ ਵਾਪਰੀ ਸੀ। ਸਟੇਟ ਰੂਟ 47 'ਤੇ ਤਰਸੇਮ ਸਿੰਘ ਦੀ ਰੇਂਜ ਰੋਵਰ ਨੂੰ ਨਿਰਧਾਰਿਤ 55 ਮੀਲ ਪ੍ਰਤੀ ਘੰਟਾ ਦੀ ਬਜਾਏ 79 ਮੀਲ ਦੀ ਰਫਤਾਰ 'ਤੇ ਦੇਖਿਆ ਗਿਆ ਸੀ। ਜਦੋਂ ਪੁਲਸ ਨੇ ਗੱਡੀ ਰੋਕਣ ਦਾ ਇਸ਼ਾਰਾ ਕੀਤਾ, ਤਾਂ ਤਰਸੇਮ ਨੇ ਰੁਕਣ ਦੀ ਬਜਾਏ ਰਫਤਾਰ 124 ਮੀਲ ਪ੍ਰਤੀ ਘੰਟਾ (ਲਗਭਗ 200 ਕਿਲੋਮੀਟਰ) ਤੱਕ ਵਧਾ ਦਿੱਤੀ। ਲਗਭਗ 8 ਕਿਲੋਮੀਟਰ ਤੱਕ ਚੱਲੇ ਪਿੱਛਾ ਕਰਨ ਤੋਂ ਬਾਅਦ, ਤਰਸੇਮ ਨੇ ਮੋੜ 'ਤੇ ਗੱਡੀ ਤੋਂ ਕੰਟਰੋਲ ਗੁਆ ਦਿੱਤਾ ਅਤੇ ਸਾਹਮਣੇ ਤੋਂ ਆ ਰਹੀ ਇੱਕ ਜੀਪ ਨਾਲ ਸਿੱਧੀ ਟੱਕਰ ਹੋ ਗਈ।
ਟੱਕਰ ਇੰਨੀ ਭਿਆਨਕ ਸੀ ਕਿ ਜੀਪ ਵਿੱਚ ਸਵਾਰ ਐਸ਼ਲੇ ਹੋਮਜ਼ ਉਛਲ ਕੇ ਸੜਕ 'ਤੇ ਜਾ ਡਿੱਗੀ ਅਤੇ ਉਸਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਜੀਪ ਡਰਾਈਵਰ ਰੋਕਸਾਨਾ ਕੈਸਾਰੇਜ ਸੈਂਟੀਆਗੋ ਨੂੰ ਮਾਮੂਲੀ ਸੱਟਾਂ ਲੱਗੀਆਂ, ਜਦਕਿ ਤਰਸੇਮ ਸਿੰਘ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਿਆ, ਜਿਸ ਨੂੰ ਏਅਰਲਿਫਟ ਕਰਕੇ ਹਸਪਤਾਲ ਪਹੁੰਚਾਇਆ ਗਿਆ।
ਅਮਰੀਕਾ ਵਿੱਚ ਗੈਰ-ਕਾਨੂੰਨੀ ਰਹਿ ਰਿਹਾ ਸੀ ਤਰਸੇਮ
ਜਾਂਚ ਦੌਰਾਨ ਪਤਾ ਲੱਗਾ ਹੈ ਕਿ ਤਰਸੇਮ ਸਿੰਘ ਅਮਰੀਕਾ ਵਿੱਚ ਗੈਰ-ਕਾਨੂੰਨੀ (ਅਨਡਾਕੂਮੈਂਟਿਡ) ਤਰੀਕੇ ਨਾਲ ਰਹਿ ਰਿਹਾ ਸੀ। ਡਾਰਕ ਕਾਉਂਟੀ ਗ੍ਰੈਂਡ ਜਿਊਰੀ ਨੇ ਉਸ 'ਤੇ ਗੈਰ-ਇਰਾਦਤਨ ਹੱਤਿਆ, ਲਾਪਰਵਾਹੀ ਨਾਲ ਹੱਤਿਆ ਅਤੇ ਹੋਰ ਗੰਭੀਰ 8 ਦੋਸ਼ ਲਗਾਏ ਹਨ। ਹਾਲਾਂਕਿ, 24 ਮਾਰਚ ਨੂੰ ਵੀਡੀਓ ਕਾਨਫਰੰਸਿੰਗ ਰਾਹੀਂ ਹੋਈ ਪੇਸ਼ੀ ਵਿੱਚ ਤਰਸੇਮ ਨੇ ਖੁਦ ਨੂੰ ਬੇਕਸੂਰ ਦੱਸਿਆ ਹੈ। ਇਸ ਮਾਮਲੇ ਦੀ ਅਗਲੀ ਸੁਣਵਾਈ 3 ਅਪ੍ਰੈਲ ਨੂੰ ਹੋਵੇਗੀ।
ਪੰਜਾਬ ਦੇ ਕਿਸਾਨਾਂ ਲਈ ਸੁਨਹਿਰੀ ਮੌਕਾ, ਜਦਲੀ ਕਰ ਲਓ ਇਹ ਕੰਮ, 24 ਅਪ੍ਰੈਲ ਤੱਕ ਦਾ ਹੈ ਸਮਾਂ
NEXT STORY 
