ਚੰਡੀਗੜ੍ਹ (ਪ੍ਰੀਕਸ਼ਿਤ) : ਜ਼ਿਲ੍ਹਾ ਖ਼ਪਤਕਾਰ ਝਗੜਾ ਨਿਵਾਰਣ ਕਮਿਸ਼ਨ ਨੇ ਖ਼ਰਾਬ ਹਾਲਤ ’ਚ ਏ. ਸੀ. ਡਿਲੀਵਰ ਕਰਨ ’ਤੇ ਗਾਹਕ ਨੂੰ ਯੂਨਿਟ ਵਾਪੀ ਕਰਕੇ ਰਿਫੰਡ ਦੇਣ ਦੇ ਭਰੋਸੇ ਦੇ ਬਾਅਦ ਵੀ ਪੈਸੇ ਵਾਪਸ ਨਾ ਮੋੜਣ ’ਤੇ ਐਮਾਜ਼ਾਨ ਤੇ ਲੁਧਿਆਣਾ ਦੇ ਡੋਨਟੇਕ ਇਲੈਕਟ੍ਰਾਨਿਕਸ ’ਤੇ 10 ਹਜ਼ਾਰ ਦਾ ਹਰਜਾਨਾ ਲਾਇਆ ਹੈ। ਕਮਿਸ਼ਨ ਨੇ ਸ਼ਿਕਾਇਤਕਰਤਾ ਵੱਲੋਂ ਦਿੱਤੀ 40 ਹਜ਼ਾਰ 900 ਰੁਪਏ ਦੀ ਰਕਮ 9 ਫ਼ੀਸਦੀ ਸਲਾਨਾ ਵਿਆਜ ਦਰ ਨਾਲ ਮੋੜਣ ਦੇ ਨਿਰਦੇਸ਼ ਦਿੱਤੇ। ਕਮਿਸ਼ਨ ਨੇ ਕਿਹਾ ਕਿ ਐਮਾਜ਼ਾਨ ਨੇ ਸ਼ੁਰੂ ’ਚ ਸ਼ਿਕਾਇਤਕਰਤਾ ਦੇ ਸਬੰਧਿਤ ਖ਼ਾਤਾ ਵਾਪਸੀ ਬੇਨਤੀ ਨੂੰ ਸਵੀਕਾਰ ਕਰ ਲਿਆ ਸੀ, ਜੋ ਕਿ ਦੋਵਾਂ ਧਿਰਾਂ ਵਿਚਕਾਰ ਆਦਾਨ-ਪ੍ਰਦਾਨ ਕੀਤੇ ਗਏ ਸੁਨੇਹਿਆਂ ਤੋਂ ਸਪੱਸ਼ਟ ਹੈ। ਰਿਕਾਰਡ ’ਤੇ ਰੱਖੀਆਂ ਫੋਟੋਆਂ ਤੋਂ ਇਹ ਸਾਬਤ ਹੁੰਦਾ ਹੈ ਕਿ ਸਬੰਧਤ ਏ. ਸੀ. ਯੂਨਿਟ ਖ਼ਰਾਬ ਹਾਲਤ 'ਚ ਪ੍ਰਾਪਤ ਹੋਇਆ ਸੀ। ਐਮਾਜ਼ਾਨ ਨੇ ਵਾਪਸੀ ਦੀ ਬੇਨਤੀ ਸਵੀਕਾਰ ਕਰ ਲਈ ਸੀ ਪਰ ਬਾਅਦ ’ਚ ਯੂਨਿਟ ਵਾਪਸ ਲੈਣ ਤੇ ਪੈਸੇ ਵਾਪਸ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਐਮਾਜ਼ਾਨ ਨੇ ਆਨਲਾਈਨ ਪਲੇਟਫਾਰਮ ਰਾਹੀਂ ਖ਼ਰਾਬ ਉਤਪਾਦ ਦੀ ਵਿਕਰੀ ਨੂੰ ਸੁਵਿਧਾਜਨਕ ਬਣਾਇਆ, ਵਾਪਸੀ ਦੀ ਬੇਨਤੀ ਨੂੰ ਸਵੀਕਾਰ ਕੀਤਾ ਤੇ ਬਾਅਦ ’ਚ ਗ਼ੈਰ-ਵਾਜ਼ਬ ਢੰਗ ਨਾਲ ਰੱਦ ਕਰ ਦਿੱਤਾ। ਇਸ ਲਈ ਇਹ ਜ਼ਿੰਮੇਵਾਰੀ ਤੋਂ ਬਚ ਨਹੀਂ ਸਕਦਾ।
ਕੰਪਨੀ ਨੇ ਦਿੱਤਾ ਜਵਾਬ
ਐਮਾਜ਼ਾਨ ਨੇ ਕਿਹਾ ਕਿ ਸ਼ਿਕਾਇਤਕਰਤਾ ਨੇ ਏ. ਸੀ. ਡੌਨਟੇਕ ਇਲੈਕਟ੍ਰਾਨਿਕਸ ਤੋਂ ਖਰੀਦਿਆ ਸੀ, ਜਿਸ ਨੇ ਆਪਣੇ ਨਾਂ ਤੋਂ ਟੈਕਸ ਇਨਵਾਇਸ ਜਾਰੀ ਕੀਤਾ ਸੀ। ਇਸ ਤੋਂ ਇਲਾਵਾ ਬਾਜ਼ਾਰ ਦੀ ਵਰਤੋਂ ਦੀਆਂ ਸ਼ਰਤਾਂ ਤਹਿਤ ਖੰਡ 3 ਤਹਿਤ ਸਪੱਸ਼ਟ ਤੌਰ ’ਤੇ ਕਿਹਾ ਕਿ ਸਾਰੇ ਲੈਣ-ਦੇਣ ਖਰੀਦਦਾਰ ਤੇ ਵਿਕਰੇਤਾ ਵਿਚਕਾਰ ਦੁਵੱਲੇ ਸਮਝੌਤੇ ਹਨ, ਅਜਿਹੇ ਵਿਕਰੀ ਸਮਝੌਤਿਆਂ ਦੇ ਨਿਪਟਾਰੇ ਲਈ ਉਹ ਕਿਸੇ ਵੀ ਤਰ੍ਹਾਂ ਨਾਲ ਜਵਾਬਦੇਹ ਨਹੀਂ ਜਦਕਿ ਡੋਨਟੇਕ ਨੇ ਨੋਟਿਸ ਦੇ ਬਾਵਜੂਦ ਜਵਾਬ ਦੇਣ ਲਈ ਪੇਸ਼ ਨਾ ਹੋਣ ਕਾਰਨ ਕਮਿਸ਼ਨ ਨੇ ਮਾਮਲੇ ਨੂੰ ਐਕਸ ਪਾਰਟੀ ਐਲਾਨ ਦਿੱਤਾ।
ਇਹ ਹੈ ਮਾਮਲਾ
ਮੌਲੀਜਾਗਰਾਂ ਦੇ ਗੌਰਵ ਰਿਸ਼ਭ ਨੇ ਐਮਾਜ਼ਾਨ ਰਿਟੇਲ ਤੇ ਲੁਧਿਆਣਾ ਦੇ ਡੋਨਟੇਕ ਇਲੈਕਟ੍ਰਾਨਿਕਸ ਖ਼ਿਲਾਫ਼ ਜ਼ਿਲ੍ਹਾ ਖ਼ਪਤਕਾਰ ਝਗੜਾ ਨਿਵਾਰਣ ਕਮਿਸ਼ਨ ’ਚ ਸ਼ਿਕਾਇਤ ਦਰਜ ਕਰਵਾਈ ਸੀ। ਇਸ ’ਚ ਕਿਹਾ ਕਿ ਪਟੀਸ਼ਨਕਰਤਾ ਨੇ ਐਮਾਜ਼ਾਨ ਰਿਟੇਲ ਰਾਹੀਂ ਡੋਨਟੇਕ ਤੋਂ 16 ਜੁਲਾਈ 2024 ਨੂੰ ਆਨਲਾਈਨ 40 ਹਜ਼ਾਰ 900 ਰੁਪਏ ਦਾ ਭੁਗਤਾਨ ਕਰਕੇ ਸਪਲਿਟ ਏ. ਸੀ. ਖਰੀਦਿਆ ਸੀ। ਸ਼ਿਕਾਇਤਕਰਤਾ ਮੁਤਾਬਕ ਪੈਕ ਕਰਕੇ ਭੇਜੇ ਗਏ ਏ. ਸੀ. ਨੂੰ ਇਸ ਨਿਰਦੇਸ਼ ਨਾਲ ਡਿਲੀਵਰ ਕੀਤਾ ਗਿਆ ਸੀ ਕਿ ਸਿਰਫ਼ ਗੋਦਰੇਜ ਟੈਕਨੀਸ਼ੀਅਨ ਹੀ ਬਾਕਸ ਖੋਲ੍ਹਣਗੇ। ਇੰਸਟਾਲੇਸ਼ਨ ’ਚ ਪਾਇਆ ਗਿਆ ਕਿ ਏ. ਸੀ. ਦੀ ਬਾਹਰੀ ਯੂਨਿਟ ਤੋਂ ਤਾਂਬੇ ਦੀਆਂ ਪਾਈਪਾਂ ਗਾਇਬ ਸਨ ਅਤੇ ਬਾਹਰੀ ਯੂਨਿਟ ਦਾ ਢਾਂਚਾ ਨੁਕਸਾਨਗ੍ਰਸਤ ਸੀ।
ਵਿਸ਼ੇਸ਼ ਇਜਲਾਸ: ਵਿਧਾਨ ਸਭਾ 'ਚ ਬੋਲੇ ਬਾਜਵਾ, ਪਹਿਲਾਂ ਸਲੈਕਟ ਕਮੇਟੀ ਦੀ ਰਿਪੋਰਟ ਪੇਸ਼ ਕਰੇ ਸਰਕਾਰ
NEXT STORY 
