ਫਿਲੌਰ (ਭਾਖੜੀ) : ਪਾਖੰਡੀ ਬਾਬੇ ਦੇ ਦਰਬਾਰ ’ਚ ਬੱਚਿਆਂ ਦੇ ਚੰਗੇ ਭਵਿੱਖ ਅਤੇ ਕੰਮ ਬਾਰੇ ਪੁੱਛਣ ਗਈ ਜਨਾਨੀ ਨਾਲ ਬਾਬੇ ਤੇ ਉਸ ਦੇ ਦੋ ਸਾਥੀਆਂ ਨੇ ਜਬਰ-ਜ਼ਿਨਾਹ ਕੀਤਾ। ਸਿਰਫ ਇੰਨਾ ਹੀ ਨਹੀਂ, ਇਸ ਗੰਦੀ ਕਰਤੂਤ ਤੋਂ ਬਾਅਦ ਉਕਤ ਲੋਕਾਂ ਨੇ ਜਨਾਨੀ ਨੂੰ ਮੌਤ ਦੇ ਘਾਟ ਉਤਾਰ ਕੇ ਲਾਸ਼ ਨਹਿਰ ’ਚ ਸੁੱਟ ਦਿੱਤੀ। 6 ਦਿਨ ਬਾਅਦ ਜਦੋਂ ਬੱਚੇ ਆਪਣੀ ਲਾਪਤਾ ਮਾਂ ਬਾਰੇ ਬਾਬੇ ਤੋਂ ਪੁੱਛਣ ਗਏ ਤਾਂ ਬਾਬੇ ਨੇ ਅੰਤਰ ਧਿਆਨ ਦਾ ਡਰਾਮਾ ਕਰ ਕੇ ਖ਼ੁਦ ਹੀ ਦੱਸ ਦਿੱਤਾ ਕਿ ਉਨ੍ਹਾਂ ਦੀ ਮਾਂ ਦੀ ਲਾਸ਼ ਨਹਿਰ ’ਚ ਹੈ। ਪੁਲਸ ਨੇ ਲਾਸ਼ ਬਾਹਰ ਕੱਢ ਕੇ ਬਾਬੇ ਤੇ ਉਸ ਦੇ ਦੋ ਸਾਥੀਆਂ ਖ਼ਿਲਾਫ਼ ਮੁਕੱਦਮਾ ਦਰਜ ਕਰ ਕੇ ਉਨ੍ਹਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਇਹ ਵੀ ਪੜ੍ਹੋ : SGPC ਪ੍ਰਧਾਨਗੀ ਦੀ ਚੋਣ ਲਈ ਜਨਰਲ ਇਜਲਾਸ 29 ਨਵੰਬਰ ਨੂੰ, ਨਵਾਂ ਪ੍ਰਧਾਨ SC ਭਾਈਚਾਰੇ ਤੋਂ ਹੋਣ ਦੀ ਚਰਚਾ
ਮਿਲੀ ਸੂਚਨਾ ਮੁਤਾਬਕ ਸ਼ਹਿਰ ’ਚ ਪੈਂਦੇ ਇਕ ਪਿੰਡ ਦੀ ਰਹਿਣ ਵਾਲੀ 38 ਸਾਲਾ ਜਨਾਨੀ (3 ਬੱਚਿਆਂ ਦੀ ਮਾਂ) ਦੀ ਮੱਖਣ ਦੇ ਖੇਤਾਂ ਨੇੜੇ ਬਣੇ ਪਾਖੰਡੀ ਬਾਬਾ ਗਿਆਨੀ ਰਾਮ ਦੇ ਡੇਰੇ ’ਚ ਪੂਰੀ ਸ਼ਰਧਾ ਸੀ। ਉਹ ਆਮ ਤੌਰ 'ਤੇ ਉਥੇ ਮੱਥਾ ਟੇਕਣ ਆਉਂਦੀ-ਜਾਂਦੀ ਸੀ। ਬੀਤੀ 5 ਨਵੰਬਰ ਨੂੰ ਮ੍ਰਿਤਕ ਜਨਾਨੀ ਘਰੋਂ ਬਾਬੇ ਦੇ ਦਰਬਾਰ ’ਚ ਮੱਥਾ ਟੇਕਣ ਗਈ। ਬਾਬੇ ਨੇ ਜਨਾਨੀ ਨੂੰ ਕਿਹਾ ਕਿ ਜੇਕਰ ਉਹ ਆਪਣੇ ਬੱਚਿਆਂ ਦਾ ਚੰਗਾ ਕਾਰੋਬਾਰ ਦੇਖਣਾ ਚਾਹੁੰਦੀ ਹੈ ਤਾਂ ਉਹ ਦਰਬਾਰ ’ਚ ਚੌਂਕੀ ਭਰ ਕੇ ਹੀ ਜਾਵੇ। ਉੱਥੇ ਬਾਬਾ ਗਿਆਨੀ ਰਾਮ ਤੇ ਉਸ ਕੋਲ ਬੈਠੇ ਦੋ ਹੋਰਨਾਂ ਸਾਥੀਆਂ ਦੀ ਜਨਾਨੀ ਨੂੰ ਦੇਖ ਕੇ ਨੀਅਤ ਖ਼ਰਾਬ ਹੋ ਗਈ ਤੇ ਤਿੰਨਾਂ ਨੇ ਸ਼ਰਾਬ ਨਾਲ ਟੁੰਨ ਹੋ ਕੇ ਉਸ ਨਾਲ ਜਬਰ-ਜ਼ਿਨਾਹ ਕੀਤਾ। ਇਸ ਤੋਂ ਬਾਅਦ ਉਸ ਨੂੰ ਮੌਤ ਦੇ ਘਾਟ ਉਤਾਰ ਕੇ ਲਾਸ਼ ਪੱਥਰ ਨਾਲ ਬੰਨ੍ਹ ਕੇ ਰਾਤ ਦੇ ਹਨ੍ਹੇਰੇ ’ਚ ਨਹਿਰ ’ਚ ਸੁੱਟ ਦਿੱਤੀ।
ਇਹ ਵੀ ਪੜ੍ਹੋ : ਵੱਡੀ ਖ਼ਬਰ : ਪੰਜਾਬ ਵਿਧਾਨ ਸਭਾ ਅੰਦਰ ਬਿਜਲੀ ਸਮਝੌਤਿਆਂ 'ਤੇ ਵ੍ਹਾਈਟ ਪੇਪਰ ਪੇਸ਼ ਕਰੇਗੀ ਚੰਨੀ ਸਰਕਾਰ
ਬਾਬੇ ਨੇ ਅੰਤਰ ਧਿਆਨ ਹੋ ਬੱਚਿਆਂ ਨੂੰ ਦੱਸ ਦਿੱਤਾ, ਉਨ੍ਹਾਂ ਦੀ ਮਾਂ ਪਾਣੀ ’ਚ ਹੈ
ਜਦੋਂ ਦੇਰ ਰਾਤ ਤੱਕ ਜਨਾਨੀ ਘਰ ਵਾਪਸ ਨਾ ਆਈ ਤਾਂ ਉਸ ਦੇ ਬੱਚੇ ਉਸ ਨੂੰ ਲੱਭਣ ਨਿਕਲ ਪਏ। 5 ਦਿਨ ਤੱਕ ਬੱਚੇ ਦਿਨ-ਰਾਤ ਆਪਣੀ ਮਾਂ ਦੀ ਭਾਲ ’ਚ ਰਿਸ਼ਤੇਦਾਰਾਂ ਤੋਂ ਇਲਾਵਾ ਹਰ ਥਾਂ ’ਤੇ ਗਏ। ਫਿਰ ਉਨ੍ਹਾਂ ਨੂੰ ਬਾਬੇ ਦੀ ਯਾਦ ਆਈ ਕਿ ਉਨ੍ਹਾਂ ਦੀ ਮਾਂ ਘਰੋਂ ਬਾਬੇ ਕੋਲ ਗਈ ਸੀ। ਬੱਚੇ ਜਦੋਂ ਬਾਬੇ ਕੋਲ ਗਏ ਤਾਂ ਬਾਬਾ ਗਿਆਨੀ ਰਾਮ ਨੇ ਬੱਚਿਆਂ ਤੇ ਉੱਥੇ ਬੈਠੇ ਲੋਕਾਂ ’ਤੇ ਆਪਣਾ ਪ੍ਰਭਾਵ ਪਾਉਣ ਲਈ ਅੰਤਰ ਧਿਆਨ ਹੋ ਕੇ ਉਨ੍ਹਾਂ ਦੀ ਮਾਂ ਨੂੰ ਲੱਭਣ ਦਾ ਡਰਾਮਾ ਸ਼ੁਰੂ ਕਰ ਦਿੱਤਾ ਅਤੇ ਅੱਖਾਂ ਬੰਦ ਕਰ ਕੇ ਜ਼ੋਰ ਨਾਲ ਬੋਲਣ ਲੱਗ ਪਿਆ ਕਿ ਉਨ੍ਹਾਂ ਦੀ ਮਾਂ ਜਿੱਥੇ ਹੈ, ਉੱਥੇ ਆਸ-ਪਾਸ ਪਾਣੀ ਹੀ ਪਾਣੀ ਹੈ ਅਤੇ ਉਸ ਥਾਂ ’ਤੇ ਸਾਰਿਆਂ ਨੂੰ ਲੈ ਗਿਆ, ਜਿੱਥੇ ਉਸ ਨੇ ਆਪਣੇ ਦੋ ਸਾਥੀਆਂ ਨਾਲ ਮਿਲ ਕੇ ਜਨਾਨੀ ਨੂੰ ਮਾਰ ਕੇ ਨਹਿਰ ’ਚ ਸੁੱਟਿਆ ਸੀ।
ਇਹ ਵੀ ਪੜ੍ਹੋ : ਵਿਸ਼ੇਸ਼ ਇਜਲਾਸ : ਪੰਜਾਬ ਵਿਧਾਨ ਸਭਾ ਅੰਦਰ ਕੁੱਲ 15 ਬਿੱਲਾਂ ਨੂੰ ਕੀਤਾ ਗਿਆ ਪਾਸ
ਚਮਤਕਾਰ ਦਿਖਾਉਣ ਦੇ ਚੱਕਰ ’ਚ ਬਾਬਾ ਤੇ ਉਸ ਦੇ ਸਾਥੀ ਪੁੱਜ ਗਏ ਸਲਾਖ਼ਾਂ ਪਿੱਛੇ
ਬਾਬੇ ਦਾ ਚਮਤਕਾਰ ਦੇਖਣ ਲਈ ਅਨੇਕਾਂ ਲੋਕ ਪੁੱਜ ਗਏ। ਘਟਨਾ ਦਾ ਪਤਾ ਲੱਗਦੇ ਹੀ ਡੀ. ਐੱਸ. ਪੀ. ਹਰਨੀਲ ਸਿੰਘ, ਥਾਣਾ ਮੁਖੀ ਸੰਜੀਵ ਕਪੂਰ ਵੀ ਪੁਲਸ ਫੋਰਸ ਦੇ ਨਾਲ ਉਥੇ ਪੁੱਜ ਗਏ। ਗੋਤਾਖ਼ੋਰਾਂ ਨੂੰ ਜਦੋਂ ਲਹਿਰ ’ਚ ਉਤਾਰਿਆ ਤਾਂ ਲਾਪਤਾ ਜਨਾਨੀ ਦੀ ਬਿਨਾਂ ਕੱਪੜਿਆਂ ਦੇ ਲਾਸ਼ ਉਨ੍ਹਾਂ ਨੂੰ ਮਿਲ ਗਈ। ਲਾਸ਼ ਨੂੰ ਦੇਖਦੇ ਹੀ ਪੁਲਸ ਨੇ ਜਦੋਂ ਪਾਖੰਡੀ ਬਾਬਾ ਤੋਂ ਥੋੜ੍ਹੀ ਸਖ਼ਤੀ ਨਾਲ ਪੁੱਛਿਆ ਤਾਂ ਬਾਬਾ ਗਿਆਨੀ ਰਾਮ ਨੇ ਆਪਣਾ ਜ਼ੁਰਮ ਕਬੂਲ ਕਰਦਿਆਂ ਦੱਸਿਆ ਕਿ 5 ਨਵੰਬਰ ਨੂੰ ਉਸ ਨੇ ਆਪਣੇ ਦੋ ਸਾਥੀਆਂ ਦੇਵ ਅਤੇ ਸੁੱਗਾ ਪੁਨੀਆ ਨਾਲ ਮਿਲ ਕੇ ਸ਼ਰਾਬ ਦੇ ਨਸ਼ੇ ’ਚ ਜਨਾਨੀ ਨਾਲ ਜਬਰ-ਜ਼ਿਨਾਹ ਕਰ ਕੇ ਉਸ ਨੂੰ ਮਾਰ ਦਿੱਤਾ ਅਤੇ ਲਾਸ਼ ਨਹਿਰ ’ਚ ਸੁੱਟ ਦਿੱਤੀ ਸੀ। ਦੇਰ ਸ਼ਾਮ ਪਤਾ ਲੱਗਾ ਕਿ ਪੁਲਸ ਦੇ ਹੱਥ ਤਿੰਨੋਂ ਮੁਲਜ਼ਮ ਲੱਗ ਚੁੱਕੇ ਹਨ।
ਨੋਟ : ਇਸ ਖ਼ਬਰ ਸਬੰਧੀ ਕੁਮੈਂਟ ਕਰਕੇ ਦਿਓ ਆਪਣੀ ਰਾਏ
SGPC ਪ੍ਰਧਾਨਗੀ ਦੀ ਚੋਣ ਲਈ ਜਨਰਲ ਇਜਲਾਸ 29 ਨਵੰਬਰ ਨੂੰ, ਨਵਾਂ ਪ੍ਰਧਾਨ SC ਭਾਈਚਾਰੇ ਤੋਂ ਹੋਣ ਦੀ ਚਰਚਾ
NEXT STORY 
