ਬਿਜ਼ਨੈੱਸ ਡੈਸਕ - ਗੂਗਲ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ (ਸੀ. ਈ. ਓ.) ਸੁੰਦਰ ਪਿਚਾਈ ਨੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (ਏ. ਆਈ.) ਨੂੰ ‘ਤੀਬਰ ਪ੍ਰਗਤੀ’ ਦੇ ਯੁੱਗ ਦੀ ਸ਼ੁਰੂਆਤ ਕਰਨ ਵਾਲੀ ਤਕਨਾਲੋਜੀ ਕਰਾਰ ਦਿੱਤਾ ਹੈ, ਜਿਸ ’ਚ ਨਵੀਆਂ ਵਿਗਿਆਨਕ ਖੋਜਾਂ ਨੂੰ ਸੰਭਵ ਬਣਾਉਣ ਅਤੇ ਉੱਭਰਦੀਆਂ ਅਰਥਵਿਵਸਥਾਵਾਂ ਨੂੰ ਵਿਕਾਸ ਦੇ ਰਵਾਇਤੀ ਪੜਾਵਾਂ ਨੂੰ ਪਾਰ ਕਰਨ ’ਚ ਮਦਦ ਕਰਨ ਦੀ ਸਮੱਰਥਾ ਹੈ।
ਉਨ੍ਹਾਂ ਨਾਲ ਹੀ ਕਿਹਾ ਕਿ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਜਿੰਨਾ ਕਿਸੇ ਵੀ ਤਕਨਾਲੋਜੀ ਨੇ ਉਨ੍ਹਾਂ ਨੂੰ ‘ਵੱਡੇ ਸੁਪਨੇ ਦੇਖਣ’ ਲਈ ਪ੍ਰੇਰਿਤ ਨਹੀਂ ਕੀਤਾ। ‘ਇੰਡੀਆ ਏ. ਆਈ. ਇੰਪੈਕਟ ਸਮਿਟ’ ਨੂੰ ਸੰਬੋਧਨ ਕਰਦਿਆਂ ਗੂਗਲ ਅਤੇ ਅਲਫਾਬੈੱਟ ਦੇ ਸੀ. ਈ. ਓ. ਨੇ ਏ. ਆਈ. ਲਈ ਇਕ ਉਤਸ਼ਾਹੀ ਦ੍ਰਿਸ਼ਟੀਕੋਣ ਦੀ ਰੂਪ-ਰੇਖਾ ਪੇਸ਼ ਕੀਤੀ ਅਤੇ ਇਸ ਨੂੰ ‘ਸਾਡੇ ਜੀਵਨ ਕਾਲ ਦਾ ਸਭ ਤੋਂ ਵੱਡਾ ਬਦਲਾਅ’ ਦੱਸਿਆ ਅਤੇ ਸਰਕਾਰਾਂ, ਕੰਪਨੀਆਂ ਅਤੇ ਸੰਸਥਾਵਾਂ ਨੂੰ ਇਸ ਤਕਨਾਲੋਜੀ ਨੂੰ ਹੌਸਲੇ ਅਤੇ ਜ਼ਿੰਮੇਵਾਰੀ ਨਾਲ ਅੱਗੇ ਵਧਾਉਣ ਦੀ ਅਪੀਲ ਕੀਤੀ। ਪਿਚਾਈ ਨੇ ਕਿਹਾ ਕਿ ਗੂਗਲ ਭਾਰਤ ’ਚ ਆਪਣੇ ਪਹਿਲਾਂ ਤੋਂ ਐਲਾਨੇ 15 ਅਰਬ ਅਮਰੀਕੀ ਡਾਲਰ ਦੇ ਬੁਨਿਆਦੀ ਢਾਂਚੇ ਦੇ ਨਿਵੇਸ਼ ਤਹਿਤ ਆਂਧਰਾ ਪ੍ਰਦੇਸ਼ ਦੇ ਵਿਸ਼ਾਖਾਪਟਨਮ ’ਚ ਇਕ ਪੂਰਨ ਏ. ਆਈ. ਕੇਂਦਰ ਸਥਾਪਤ ਕਰ ਰਿਹਾ ਹੈ।
ਜੀਓ, ਰਿਲਾਇੰਸ ਨਾਲ ਮਿਲ ਕੇ ਏ. ਆਈ. ’ਚ 7 ਸਾਲਾਂ ’ਚ 10 ਲੱਖ ਕਰੋੜ ਰੁਪਏ ਦਾ ਨਿਵੇਸ਼ ਕਰੇਗੀ : ਅੰਬਾਨੀ
ਮੁਕੇਸ਼ ਅੰਬਾਨੀ ਨੇ ‘ਇੰਡੀਆ ਏ. ਆਈ. ਇੰਪੈਕਟ ਸਮਿਟ’ 2026 ’ਚ ਐਲਾਨ ਕੀਤਾ ਕਿ ਉਨ੍ਹਾਂ ਦਾ ਸਮੂਹ ਏ. ਆਈ. ਖੇਤਰ ’ਚ ਅਗਲੇ 7 ਸਾਲਾਂ ’ਚ 10 ਲੱਖ ਕਰੋੜ ਰੁਪਏ ਦਾ ਨਿਵੇਸ਼ ਕਰੇਗਾ। ਉਨ੍ਹਾਂ ਕਿਹਾ ਕਿ ਇਹ ਨਿਵੇਸ਼ ਸੱਟੇਬਾਜ਼ੀ ਜਾਂ ਥੋੜ੍ਹੇ ਸਮੇਂ ਦੇ ਲਾਭ ਲਈ ਨਹੀਂ, ਸਗੋਂ ਲੰਬੇ ਸਮੇਂ ਦੇ ਰਾਸ਼ਟਰ ਨਿਰਮਾਣ ਦੇ ਉਦੇਸ਼ ਨਾਲ ਕੀਤਾ ਜਾਵੇਗਾ। ਅੰਬਾਨੀ ਨੇ ਕਿਹਾ ਕਿ ਏ. ਆਈ. ਦਾ ਸਰਵਸ੍ਰੇਸ਼ਠ ਦੌਰ ਅਜੇ ਆਉਣਾ ਬਾਕੀ ਹੈ। ਜੀਓ ਅਤੇ ਰਿਲਾਇੰਸ ਇੰਡਸਟਰੀਜ਼ ਮਿਲ ਕੇ ‘ਜੀਓ ਇੰਟੈਲੀਜੈਂਸ’ ਤਹਿਤ ਕੰਪਿਊਟਿੰਗ ਬੁਨਿਆਦੀ ਢਾਂਚਾ ਵਿਕਸਤ ਕਰਨਗੇ, ਜਿਸ ’ਚ ਗੀਗਾਵਾਟ ਸਮਰਥਾ ਵਾਲੇ ਡਾਟਾ ਸੈਂਟਰ ਸ਼ਾਮਲ ਹੋਣਗੇ। ਉਨ੍ਹਾਂ ਕਿਹਾ ਕਿ ਜੀਓ ਹੁਣ ਭਾਰਤ ਨੂੰ ਇੰਟਰਨੈੱਟ ਯੁੱਗ ਤੋਂ ਅੱਗੇ ਇੰਟੈਲੀਜੈਂਸ ਦੇ ਯੁੱਗ ’ਚ ਲੈ ਜਾਵੇਗਾ।
ਏ. ਆਈ. ਦੀ ਤਾਕਤ ਨਾਲ ਸਿਹਤ, ਸਿੱਖਿਆ ਅਤੇ ਖੋਜ ਖੇਤਰ ’ਚ ਹੋਵੇਗਾ ਵਿਸਥਾਰ : ਸੁਨੀਲ ਮਿੱਤਲ
ਭਾਰਤੀ ਸਮੂਹ ਦੇ ਚੇਅਰਮੈਨ ਸੁਨੀਲ ਮਿੱਤਲ ਨੇ ਕਿਹਾ ਕਿ ਸਿਹਤ, ਸਿੱਖਿਆ ਅਤੇ ਮੈਡੀਕਲ ਵਿਗਿਆਨ ਵਰਗੇ ਖੇਤਰਾਂ ’ਚ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (ਏ. ਆਈ.) ਰਾਹੀਂ ਵਿਆਪਕ ਪ੍ਰਗਤੀ ਹੋਵੇਗੀ। ਸਮਿਟ ’ਚ ਮਿੱਤਲ ਨੇ ਕਿਹਾ ਕਿ ਏ. ਆਈ. ਹੁਣ ਕੰਪਨੀ ਦੇ ਸੰਚਾਲਨ ਦਾ ਅਨਿੱਖੜਵਾਂ ਹਿੱਸਾ ਬਣਦੀ ਜਾ ਰਹੀ ਹੈ।
ਉਨ੍ਹਾਂ ਕਿਹਾ,‘‘ਅਸੀਂ ਸਿਹਤ, ਸਿੱਖਿਆ, ਡੂੰਘੀ ਖੋਜ ਅਤੇ ਮੈਡੀਕਲ ਵਿਗਿਆਨ ਦੀ ਗੱਲ ਕਰ ਸਕਦੇ ਹਾਂ। ਇਹ ਸਾਰੇ ਖੇਤਰ ਏ. ਆਈ. ਦੀ ਬਦੌਲਤ ਅੱਗੇ ਵਧਣਗੇ। ਸਾਡੀ ਕੰਪਨੀ ਦੇ ਦ੍ਰਿਸ਼ਟੀਕੋਣ ਤੋਂ ਏ. ਆਈ. ਇਸ ਗੱਲ ਦਾ ਅਹਿਮ ਹਿੱਸਾ ਬਣ ਰਹੀ ਹੈ ਕਿ ਅਸੀਂ ਆਪਣੇ ਗਾਹਕਾਂ ਨੂੰ ਕਿਵੇਂ ਸੇਵਾ ਦੇਈਏ, ਆਪਣੇ ਨੈੱਟਵਰਕ ਕਿਵੇਂ ਤਿਆਰ ਕਰੀਏ ਅਤੇ ਉਨ੍ਹਾਂ ਦਾ ਪ੍ਰਬੰਧਨ ਕਿਵੇਂ ਕਰੀਏ।’’
ਏ. ਆਈ. ਕੰਪਨੀਆਂ, ਭਾਰਤੀ ਇਨੋਵੇਟਰਜ਼ ਦਾ ਸੰਕਲਪ ਸਮਾਵੇਸ਼ੀ ਅਤੇ ਜ਼ਿੰਮੇਵਾਰ ਏ. ਆਈ. ਨੂੰ ਉਤਸ਼ਾਹਿਤ ਕਰਨਾ : ਅਸ਼ਵਿਨੀ ਵੈਸ਼ਨਵ
ਏ. ਆਈ. ਖੇਤਰ ਦੀਆਂ ਮੋਹਰੀ ਕੰਪਨੀਆਂ ਅਤੇ ਭਾਰਤੀ ਇਨੋਵੇਟਰਜ਼ ਨੇ ‘ਨਵੀਂ ਦਿੱਲੀ ਫਰੰਟੀਅਰ ਏ. ਆਈ. ਇੰਪੈਕਟ ਕਮਿਟਮੈਂਟਸ’ ਤਹਿਤ ਸਮਾਵੇਸ਼ੀ ਅਤੇ ਜ਼ਿੰਮੇਵਾਰ ਏ. ਆਈ. ਨੂੰ ਉਤਸ਼ਾਹਿਤ ਕਰਨ ਦਾ ਸੰਕਲਪ ਲਿਆ ਹੈ। ਕੇਂਦਰੀ ਸੂਚਨਾ ਤਕਨਾਲੋਜੀ ਮੰਤਰੀ ਅਸ਼ਵਿਨੀ ਵੈਸ਼ਨਵ ਨੇ ‘ਇੰਡੀਆ ਏ. ਆਈ. ਇੰਪੈਕਟ ਸਮਿਟ’ ਦੇ ਸਮਾਪਤੀ ਮੌਕੇ ਇਹ ਐਲਾਨ ਕੀਤਾ।
ਉਨ੍ਹਾਂ ਦੱਸਿਆ ਕਿ ਸਰਵਮ, ਭਾਰਤਜਨ ਭਾਵ ਅਤੇ ਸੋਕੇਟ ਸਮੇਤ ਵੱਖ-ਵੱਖ ਸੰਗਠਨਾਂ ਨੇ ਆਪਣੀ ਮਰਜ਼ੀ ਨਾਲ ਵਚਨਬੱਧਤਾਵਾਂ ’ਤੇ ਸਹਿਮਤੀ ਜਤਾਈ ਹੈ। ਇਸ ਤਹਿਤ 2 ਪ੍ਰਮੁੱਖ ਕਦਮ ਉਠਾਏ ਜਾਣਗੇ। ਪਹਿਲਾ ਰੋਜ਼ਗਾਰ, ਹੁਨਰ ਅਤੇ ਆਰਥਿਕ ਬਦਲਾਅ ਵਰਗੇ ਮੁੱਦਿਆਂ ’ਤੇ ਗੁਪਤ ਅਤੇ ਸਮੁੱਚੇ ਅੰਕੜਿਆਂ ਦੇ ਆਧਾਰ ’ਤੇ ਸਬੂਤ-ਆਧਾਰਿਤ ਨੀਤੀ ਨਿਰਮਾਣ ਨੂੰ ਸਮਰਥਨ ਦੇਣਾ। ਦੂਜਾ ਏ. ਆਈ. ਪ੍ਰਣਾਲੀਆਂ ਦੇ ਬਹੁ-ਭਾਸ਼ੀ ਅਤੇ ਸੰਦਰਭ-ਆਧਾਰਿਤ ਮੁਲਾਂਕਣ ਨੂੰ ਮਜ਼ਬੂਤ ਕਰਨਾ, ਤਾਂ ਜੋ ਉਹ ਵੱਖ-ਵੱਖ ਭਾਸ਼ਾਵਾਂ ਅਤੇ ਸੱਭਿਆਚਾਰਕ ਦ੍ਰਿਸ਼ਾਂ ’ਚ ਪ੍ਰਭਾਵਸ਼ਾਲੀ ਢੰਗ ਨਾਲ ਕੰਮ ਕਰ ਸਕਣ।
ਟਾਟਾ ਸਮੂਹ ਪੂਰੇ ਸਿਸਟਮ ’ਚ ਏ. ਆਈ. ਅਪਣਾਉਣ ਦੀ ਰਾਹ ’ਤੇ, ਖੇਤਰ-ਵਿਸ਼ੇਸ਼ ਚਿੱਪ ਬਣਾਏਗਾ
ਟਾਟਾ ਸਮੂਹ ਦੇ ਚੇਅਰਮੈਨ ਐੱਨ. ਚੰਦਰਸ਼ੇਖਰਨ ਨੇ ਕਹਿਣਾ ਹੈ ਕਿ ਸਮੂਹ ਸੰਪੂਰਨ ਤਕਨਾਲੋਜੀ ਪ੍ਰਣਾਲੀ ’ਚ ਏ. ਆਈ. ਨੂੰ ਏਕੀਕ੍ਰਿਤ ਕਰ ਰਿਹਾ ਹੈ ਅਤੇ ਵੱਖ-ਵੱਖ ਉਦਯੋਗਾਂ ਲਈ ਏ. ਆਈ.-ਅਨੁਕੂਲ, ਖੇਤਰ-ਵਿਸ਼ੇਸ਼ ਚਿੱਪ ਵਿਕਸਤ ਕਰਨ ਦੀ ਯੋਜਨਾ ’ਤੇ ਕੰਮ ਕਰ ਰਿਹਾ ਹੈ। ਪਹਿਲਾ ਚਿੱਪ ਮੋਟਰ ਵਾਹਨ ਖੇਤਰ ਲਈ ਤਿਆਰ ਕੀਤਾ ਜਾਵੇਗਾ।
ਉਨ੍ਹਾਂ ਦੱਸਿਆ ਕਿ ਸਮੂਹ ਸਿਲੀਕਾਨ ਤੋਂ ਸਿਸਟਮ, ਡਾਟਾ ਸੈਂਟਰ ਤੋਂ ਐਪਲੀਕੇਸ਼ਨ ਅਤੇ ਏ. ਆਈ. ਏਜੰਟ ਤੱਕ ਪੂਰੇ ਸਟੈਕ ’ਚ ਏ. ਆਈ. ਸਮਰਥਾ ਵਿਕਸਤ ਕਰ ਰਿਹਾ ਹੈ। ਟਾਟਾ ਭਾਰਤ ਦਾ ਇਕ ਪਹਿਲਾ ਵੱਡੇ ਪੱਧਰ ਦਾ ਏ. ਆਈ.-ਅਨੁਕੂਲ ਡਾਟਾ ਸੈਂਟਰ ਸਥਾਪਤ ਕਰ ਰਿਹਾ ਹੈ, ਜਿਸ ਦਾ ਪਹਿਲਾ ਪੜਾਅ 100 ਮੈਗਾਵਾਟ ਦਾ ਹੋਵੇਗਾ। ਸਮੂਹ ਨੇ ਓਪਨ ਏ. ਆਈ. ਅਤੇ ਏ. ਐੱਮ. ਡੀ. ਦੇ ਨਾਲ ਸਾਂਝੇਦਾਰੀ ਕੀਤੀ ਹੈ। ਟਾਟਾ ਕੰਸਲਟੈਂਸੀ ਸਰਵਿਸਿਜ਼ ਅਤੇ ਟਾਟਾ ਕਮਿਊਨੀਕੇਸ਼ਨਜ਼ ਉਦਯੋਗਾਂ ਲਈ ਏ. ਆਈ. ਆਪ੍ਰੇਟਿੰਗ ਸਿਸਟਮ ਵਿਕਸਤ ਕਰ ਰਹੇ ਹਨ।
ਉੱਥੇ ਹੀ ਓਪਨ ਏ. ਆਈ. ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ (ਸੀ. ਈ. ਓ.) ਸੈਮ ਆਲਟਮੈਨ ਨੇ ਕਿਹਾ ਕਿ ਏ. ਆਈ. ਸਾਫਟਵੇਅਰ ਉਦਯੋਗ ਦਾ ਕੰਮ ਕਰਨ ਦਾ ਤਰੀਕਾ ਬਦਲ ਦੇਵੇਗਾ। ਉਨ੍ਹਾਂ ਕਿਹਾ ਕਿ ਕੁਝ ਕੰਪਨੀਆਂ ਲਈ ਇਹ ਨੁਕਸਾਨਦੇਹ ਹੋ ਸਕਦਾ ਹੈ, ਜਦੋਂਕਿ ਕਈ ਹੋਰ ਕੰਪਨੀਆਂ ਆਪਣੀ ਵੱਖਰੀ ਵੈਲਿਊ ਪ੍ਰੈਪੋਜ਼ੀਸ਼ਨ ਕਾਰਨ ਇਸ ਤੋਂ ਲਾਭ ਉਠਾ ਸਕਣਗੀਆਂ।
ਸ਼੍ਰੀਲੰਕਾ ’ਚ ਨਵੇਂ ਵਾਹਨਾਂ ਦੀ ਰਜਿਸਟ੍ਰੇਸ਼ਨ ਵਧੀ, ਭਾਰਤ ਤੋਂ ਦਰਾਮਦ ’ਚ 15 ਫੀਸਦੀ ਦਾ ਉਛਾਲ
NEXT STORY 
