ਮੁੰਬਈ (ਬਿਊਰੋ) : ਬਾਲੀਵੁੱਡ ਅਦਾਕਾਰਾ ਗੁਲ ਪਨਾਗ ਇਨ੍ਹੀਂ ਦਿਨੀਂ ਆਪਣੀ ਇਕ ਵੈੱਬ ਸੀਰੀਜ਼ ਨੂੰ ਲੈ ਕੇ ਖ਼ੂਬ ਸੁਰਖੀਆਂ ਬਟੋਰ ਰਹੀ ਹੈ। 'ਗੁੱਡ ਬੈਡ ਗਰਲ' 'ਚ ਉਹ ਇਕ ਵਕੀਲ ਦੀ ਜ਼ਬਰਦਸਤ ਭੂਮਿਕਾ 'ਚ ਨਜ਼ਰ ਆਵੇਗੀ। ਹਾਲ ਹੀ 'ਚ ਗੁਲ ਪਨਾਗ ਨੇ ਅਜਿਹਾ ਬਿਆਨ ਦਿੱਤਾ ਹੈ, ਸੋਸ਼ਲ ਮੀਡੀਆ 'ਤੇ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਇਸ ਬਿਆਨ 'ਚ ਗੁਲ ਪਨਾਗ ਨੇ ਭਵਿੱਖਬਾਣੀ ਕੀਤੀ ਹੈ ਕਿ ਫ਼ਿਲਮ ਇੰਡਸਟਰੀ ਦੀ ਕੰਗਨਾ ਰਣੌਤ ਅਤੇ ਤਾਪਸੀ ਪਨੂੰ ਆਉਣ ਵਾਲੇ ਸਮੇਂ 'ਚ ਯਕੀਨੀ ਤੌਰ 'ਤੇ ਰਾਜਨੀਤੀ ਦਾ ਸਰਗਰਮ ਹਿੱਸਾ ਬਣਨਗੀਆਂ।
ਗੁਲ ਪਨਾਗ ਵੀ ਲੜ ਚੁੱਕੀ ਹੈ ਚੋਣ
ਗੁਲ ਪਨਾਗ ਖ਼ੁਦ ਵੀ ਕੁਝ ਸਾਲ ਪਹਿਲਾਂ ਆਮ ਆਦਮੀ ਪਾਰਟੀ ਨਾਲ ਜੁੜੀ ਹੋਈ ਸੀ। ਉਨ੍ਹਾਂ ਨੇ ਸਾਲ 2014 'ਚ ਚੰਡੀਗੜ੍ਹ ਤੋਂ ਵਿਧਾਨ ਸਭਾ ਚੋਣ ਲੜੀ ਸੀ। ਹਾਲਾਂਕਿ ਉਹ ਹਾਰ ਗਈ। ਗੁਲ ਪਨਾਗ ਦੀ ਥਾਂ ਬਾਲੀਵੁੱਡ ਅਦਾਕਾਰਾ ਕਿਰਨ ਖੇਰ ਨੇ ਜਿੱਤ ਹਾਸਲ ਕੀਤੀ ਸੀ।
ਕੰਗਨਾ-ਤਾਪਸੀ ਦਾ ਦੱਸਿਆ ਭਵਿੱਖ
ਇਕ ਨਿੱਜੀ ਚੈਨਲ ਨਾਲ ਗੱਲਬਾਤ ਦੌਰਾਨ ਗੁਲ ਪਨਾਗ ਨੇ ਕਈ ਮੁੱਦਿਆਂ 'ਤੇ ਆਪਣੀ ਰਾਏ ਪ੍ਰਗਟਾਈ ਹੈ। ਇਸ ਦੌਰਾਨ ਉਸ ਤੋਂ ਇਹ ਸਵਾਲ ਪੁੱਛਿਆ ਗਿਆ ਕਿ ਉਹ ਮੌਜੂਦਾ ਬਾਲੀਵੁੱਡ ਸਿਤਾਰਿਆਂ 'ਚ ਇੱਕ ਚੰਗੇ ਰਾਜਨੇਤਾ ਦੇ ਰੂਪ 'ਚ ਕਿਸ ਨੂੰ ਦੇਖ ਰਹੀ ਹੈ। ਇਸ ਦੇ ਜਵਾਬ 'ਚ ਉਨ੍ਹਾਂ ਨੇ ਕਿਹਾ ਕਿ ਉਹ ਯਕੀਨੀ ਤੌਰ 'ਤੇ ਕੰਗਨਾ ਰਣੌਤ ਨੂੰ ਰਾਜਨੀਤੀ 'ਚ ਵੇਖ ਰਹੀ ਹੈ। ਤਾਪਸੀ ਪੰਨੂ ਵੀ ਇਸੇ ਰਾਹ 'ਤੇ ਚਲਦੀ ਨਜ਼ਰ ਆ ਰਹੀ ਹੈ ਪਰ ਉਸ ਨੂੰ ਹੋਰ ਕਿਸੇ ਵੀ ਅਦਾਕਾਰ 'ਚ ਸਿਆਸੀ ਭਵਿੱਖ ਨਜ਼ਰ ਨਹੀਂ ਆਉਂਦਾ।
ਕੰਗਨਾ ਤੇ ਤਾਪਸੀ ਦੀ ਕੀਤੀ ਤਾਰੀਫ਼
ਗੁਲ ਪਨਾਗ ਨੇ ਕੰਗਨਾ ਰਣੌਤ ਬਾਰੇ ਇਹ ਵੀ ਕਿਹਾ ਕਿ ਉਹ ਉਸ ਬਾਰੇ ਹਰ ਗੱਲ ਨਾਲ ਸਹਿਮਤ ਨਹੀਂ ਹੈ। ਉਨ੍ਹਾਂ ਨੇ ਕੰਗਨਾ ਬਾਰੇ ਕਿਹਾ, ''ਉਸ ਦੀਆਂ ਗੱਲਾਂ ਸੁਣ ਕੇ ਮੈਨੂੰ ਵੀ ਗੁੱਸਾ ਆਉਂਦਾ ਹੈ ਪਰ ਤੁਸੀਂ ਜੋ ਵੀ ਸੋਚੋ, ਉਸ 'ਚ ਰੀੜ੍ਹ ਦੀ ਹੱਡੀ ਹੈ। ਉਸ 'ਚ ਬਹੁਤ ਹਿੰਮਤ ਹੈ। ਤਾਪਸੀ ਵੀ ਬਹੁਤ ਦਲੇਰ ਹੈ ਅਤੇ ਜੇਕਰ ਦੋਵੇਂ ਕੁਝ ਦਿਨਾਂ ਬਾਅਦ ਰਾਜਨੀਤੀ 'ਚ ਕਦਮ ਰੱਖਦੀਆਂ ਹਨ ਤਾਂ ਮੈਨੂੰ ਬਿਲਕੁਲ ਵੀ ਹੈਰਾਨੀ ਨਹੀਂ ਹੋਵੇਗੀ।
14 ਅਕਤੂਬਰ ਨੂੰ OTT 'ਤੇ ਰਿਲੀਜ਼ ਹੋਵੇਗੀ ਵੈਬ ਸੀਰੀਜ਼ 'ਗੁਡ ਬੈਡ ਗਰਲ'
ਗੁਲ ਪਨਾਗ ਦੀ ਆਉਣ ਵਾਲੀ ਵੈੱਬ ਸੀਰੀਜ਼ 'ਗੁੱਡ ਬੈਡ ਗਰਲ' ਦੀ ਗੱਲ ਕਰੀਏ ਤਾਂ ਇਹ 14 ਅਕਤੂਬਰ ਤੋਂ OTT ਪਲੇਟਫਾਰਮ 'ਤੇ ਪ੍ਰਸਾਰਿਤ ਕੀਤੀ ਜਾਵੇਗੀ। ਅਭਿਸ਼ੇਕ ਗੁਪਤਾ ਦੁਆਰਾ ਨਿਰਦੇਸ਼ਤ ਇਹ ਵੈੱਬ ਸੀਰੀਜ਼ ਮਾਇਆ ਆਹੂਜਾ ਦੇ ਦੁਆਲੇ ਘੁੰਮਦੀ ਹੈ, ਜੋ ਕਿ ਇੱਕ ਜੀਵੰਤ ਅਤੇ ਵਿਅੰਗਮਈ ਕੁੜੀ ਹੈ, ਜਿਸ ਕੋਲ ਦੱਸਣ ਲਈ ਤਿੰਨ ਵੱਖ-ਵੱਖ ਕਹਾਣੀਆਂ ਹਨ। ਇਸ 'ਚ ਸਮ੍ਰਿਧੀ ਦੀਵਾਨ, ਵੈਭਵ ਰਾਜ ਗੁਪਤਾ, ਸ਼ੀਬਾ ਚੱਢਾ, ਆਰਾਧਿਆ ਅੰਜਨਾ, ਨਮਰਤਾ ਸੇਠ, ਰਾਜਿੰਦਰ ਸੇਠੀ ਅਤੇ ਜ਼ੈਨ ਖ਼ਾਨ ਵੀ ਨਜ਼ਰ ਆਉਣਗੇ।
ਲੱਤ ਦੇ ਫ਼ਰੈਕਚਰ ਦੇ ਦੋ ਮਹੀਨੇ ਪੂਰੇ ਹੋਣ ’ਤੇ ਸ਼ਿਲਪਾ ਨੇ ਦੱਸਿਆ ਦਰਦ, ਧੀ ਸਮੀਸ਼ਾ ਇਸ ਤਰ੍ਹਾਂ ਰੱਖ ਰਹੀ ਮਾਂ ਦਾ ਧਿਆਨ
NEXT STORY 
