ਮੁੰਬਈ (ਬਿਊਰੋ) — ਲੋਕਾਂ ਦੇ ਮੁਸ਼ਕਿਲ ਸਮੇਂ ’ਚ ਮਸੀਹਾ ਬਣ ਕੇ ਮਦਦ ਕਰ ਰਹੇ ਬਾਲੀਵੁੱਡ ਅਦਾਕਾਰ ਸੋਨੂੰ ਸੂਦ ਨੂੰ ਕੌਣ ਨਹੀਂ ਜਾਣਦਾ। ਕੋਰੋਨਾ ਵਾਇਰਸ ਕਾਰਨ ਦੇਸ਼ ’ਚ ਹੋਈ ਤਾਲਾਬੰਦੀ ਤੋਂ ਬਾਅਦ ਲਗਾਤਾਰ ਉਹ ਲੋਕਾਂ ਦੀ ਮਦਦ ਕਰ ਰਹੇ ਹਨ। ਸੋਨੂੰ ਸੂਦ ਦੀ ਇਸ ਨੇਕੀ ਤੋਂ ਬਾਅਦ ਲੋਕਾਂ ਨੇ ਅੰਦਾਜ਼ੇ ਲਾਉਣੇ ਸ਼ੁਰੂ ਕੀਤੇ ਕਿ ਉਹ ਹੁਣ ਰਾਜਨੀਤੀ ਦੀ ਦੁਨੀਆ ’ਚ ਕਦਮ ਰੱਖਣ ਜਾ ਰਹੇ ਹਨ। ਹਾਲਾਂਕਿ ਸੋਨੂੰ ਸੂਦ ਨੇ ਹਾਲੇ ਤੱਕ ਇਨ੍ਹਾਂ ਸਾਰੀਆਂ ਚੀਜ਼ਾਂ ਨੂੰ ਖਾਰਜ ਕੀਤਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਰਾਜਨੀਤੀ ’ਚ ਮੇਰੀ ਕੋਈ ਦਿਲਚਸਪੀ ਨਹੀਂ ਹੈ। ਮੇਰੇ ਸੁਫ਼ਨਿਆਂ ਦੀ ਲਿਸਟ ਬਹੁਤ ਲੰਬੀ ਹੈ, ਜਿਨ੍ਹਾਂ ਨੂੰ ਇਕ ਐਕਟਰ ਦੇ ਤੌਰ ’ਤੇ ਪੂਰਾ ਕਰਨਾ ਹੈ। ਜਿਹੜੇ ਸੁਫ਼ਨੇ ਮੈਂ ਮੁੰਬਈ ਲੈ ਕੇ ਆਇਆ ਸੀ, ਉਹ ਹਾਲੇ ਪੂਰੇ ਨਹੀਂ ਹੋਏ ਅਤੇ ਮੈਂ ਪਹਿਲਾਂ ਆਪਣੇ ਸੁਫ਼ਨੇ ਪੂਰੇ ਕਰਨਾ ਚਾਹੁੰਦਾ ਹਾਂ।
ਰਾਜਨੀਤੀ ’ਚ ਆਉਣ ਬਾਰੇ ਆਖੀ ਇਹ ਗੱਲ
ਰਾਜਨੀਤੀ ’ਚ ਆਪਣੀ ਐਂਟਰੀ ’ਤੇ ਉਨ੍ਹਾਂ ਨੇ ਕਿਹਾ ਕਿ ਇਥੇ ਆਉਣ ਲਈ ਕੋਈ ਫਿਕਸ ਸਮਾਂ ਨਹੀਂ ਹੁੰਦਾ। ਮੈਂ ਰਾਜਨੀਤੀ ਨੂੰ 5 ਜਾਂ 10 ਸਾਲ ਬਾਅਦ ਜੁਆਇਨ ਕਰ ਸਕਦਾ ਹੈ। ਇਸ ਗੱਲਬਾਤ ਦੌਰਾਨ ਉਨ੍ਹਾਂ ਦੱਸਿਆ ਕਿ ਮੈਨੂੰ 10 ਸਾਲ ਪਹਿਲਾਂ ਆਫ਼ਰ ਮਿਲਿਆ ਸੀ ਅਤੇ ਹੁਣ ਵੀ ਮਿਲ ਆਫ਼ਰ ਮਿਲ ਰਹੇ ਹਨ ਪਰ ਮੇਰੀ ਕੋਈ ਦਿਲਚਸਪੀ ਨਹੀਂ ਹੈ।
ਸੋਨੂੰ ਸੂਦ ਨੇ ਅੱਗੇ ਕਿਹਾ ਕਿ ਮੈਂ ਸੋਚਦਾ ਹਾਂ ਕਿ ਮੈਨੂੰ ਉਹੀ ਚੀਜ਼ਾਂ ਕਰਨੀਆਂ ਚਾਹੀਦੀਆਂ ਨੇ, ਜਿਨ੍ਹਾਂ ’ਚ ਮੈਂ ਐਕਸਪਰਟ ਹਾਂ ਅਤੇ ਜਿਨ੍ਹਾਂ ਨਾਲ ਮੈਂ ਨਿਆਂ ਕਰ ਸਕਦਾ ਹਾਂ। ਜੇਕਰ ਮੈਨੂੰ ਕੋਈ ਜਿੰਮੇਦਾਰੀ ਦਿੱਤੀ ਜਾਂਦੀ ਹੈ ਤਾਂ ਮੈਂ ਪਿੰਡਾਂ ਅਤੇ ਸ਼ਹਿਰਾਂ ’ਚ ਲੋਕਾਂ ਦੀ ਮਦਦ ਨਹੀਂ ਕਰ ਸਕਾਂਗਾ, ਜੋ ਸਭ ਤੋਂ ਜ਼ਰੂਰੀ ਹੈ ਤਾਂ ਜਦੋਂ ਮੈਂ ਉਸ ਦਾ ਇਕ ਬਣ ਸਕਦਾ ਹਾਂ, ਉਨ੍ਹਾਂ ਨਾਲ ਰਹਿ ਕੇ ਉਨ੍ਹਾਂ ਦੀ ਸੇਵਾ ਕਰ ਸਕਦਾ ਹਾਂ ਤਾਂ ਮੈਂ ਉਸੇ ਬਾਰੇ ਹੀ ਸੋਚਾਂਗਾ।
ਸੋਨੂੰ ਸੂਦ ਦੀ ਕਿਤਾਬ ਨੂੰ ਅਮਿਤਾਭ ਨੇ ਕੀਤਾ ਰਿਲੀਜ਼
ਦੱਸਣਯੋਗ ਹੈ ਕਿ ਸੋਨੂੰ ਸੂਦ ਨੇ ਕੋਰੋਨਾ ਦੌਰ 'ਚ ਜਿਵੇਂ ਇਨਸਾਨੀਅਤ ਦੀ ਸੇਵਾ ਕੀਤੀ, ਲੋਕ ਉਸ ਨੂੰ ਮਸੀਹਾ ਆਖਣ ਲੱਗੇ ਸਨ। ਕਈ ਥਾਈਂ ਸੋਨੂੰ ਦੀਆਂ ਮੂਰਤੀਆਂ ਸਥਾਪਤ ਕੀਤੀਆਂ ਗਈਆਂ ਸਨ ਪਰ ਸੋਨੂੰ ਆਪਣੀ ਆਤਮ-ਕਥਾ 'ਮੈਂ ਮਸੀਹਾ ਨਹੀਂ' 'ਚ ਲਿਖਦੇ ਹਨ ਕਿ ਸਾਧਾਰਨ ਆਦਮੀ ਹਾਂ ਮਸੀਹਾ ਨਹੀਂ। ਇਹ ਮਾਂ ਦੀ ਪਰਵਰਿਸ਼ ਦਾ ਨਤੀਜਾ ਹੈ, ਜਿਸ ਨੇ ਪੀੜਤਾਂ ਦੀ ਸੇਵਾ ਲਈ ਪ੍ਰੇਰਿਤ ਕੀਤਾ ਅਤੇ ਬੁਲੰਦੀ 'ਤੇ ਹੋਣ 'ਤੇ ਵੀ ਜ਼ਮੀਨ ਨਾਲ ਜੋੜੀ ਰੱਖਿਆ। ਸੋਨੂੰ ਸੂਦ ਦੀ ਕਿਤਾਬ ਨੂੰ ਟੀ. ਵੀ. ਸ਼ੋਅ 'ਕੌਣ ਬਣੇਗਾ ਕਰੋੜਪਤੀ' ਦੇ ਸੈੱਟ 'ਤੇ ਅਮਿਤਾਭ ਬੱਚਨ ਨੇ ਰਿਲੀਜ਼ ਕੀਤਾ। ਸੋਨੂੰ ਸੂਦ ਨੇ ਆਪਣੀ ਆਤਮ-ਕਥਾ 'ਚ ਲਿਖਿਆ ਹੈ ਕਿ 'ਕੋਰੋਨਾ ਦੇ ਦੌਰ 'ਚ ਜੋ ਕੁਝ ਵੀ ਸਰਦਾ-ਬਣਦਾ ਸੀ, ਮੈਂ ਉਹੀ ਕੁਝ ਕੀਤਾ ਹੈ। ਇਸ ਦੇ ਪਿੱਛੇ ਮਾਂ ਪ੍ਰੋ. ਸਰੋਜ ਸੂਦ ਤੋਂ ਮਿਲੀ ਪਰਵਰਿਸ਼ ਵੱਡੀ ਵਜ੍ਹਾ ਹੈ। ਅੰਗਰੇਜ਼ੀ ਜ਼ੁਬਾਨ 'ਚ ਲਿਖੀ ਕਿਤਾਬ 'ਚ ਸੋਨੂੰ ਨੇ ਆਪਣੇ ਬਚਪਨ ਦੀਆਂ ਕਈ ਗੱਲਾਂ ਦਾ ਜ਼ਿਕਰ ਕੀਤਾ ਹੈ।
ਮੋਗਾ 'ਚ ਸੋਨੂੰ ਸੂਦ ਦੀ ਮਾਂ ਨੂੰ ਮਿਲਿਆ ਵੱਡਾ ਸਨਮਾਨ
ਦੱਸ ਦਈਏ ਕਿ ਦੋ ਦਿਨ ਪਹਿਲਾਂ ਹੀ ਕਾਂਗਰਸੀ ਵਿਧਾਇਕ ਡਾ. ਹਰਜੋਤ ਕਮਲ ਦੀ ਪਹਿਲ 'ਤੇ ਮੋਗਾ ਦੇ ਮੇਨ ਬਾਜ਼ਾਰ ਤੋਂ ਲੈ ਕੇ ਅਕਾਲਸਰ ਰੋਡ ਨੂੰ ਜੋੜਣ ਵਾਲੀ ਸੜਕ ਨੂੰ ਸੋਨੂੰ ਦੀ ਮਾਤਾ ਪ੍ਰੋ. ਸਰੋਜ ਸੂਦ ਦਾ ਨਾਂ ਦਿੱਤਾ ਗਿਆ ਹੈ, ਇਸ ਨੂੰ ਲੈ ਕੇ ਸੋਨੂੰ ਜਜ਼ਬਾਤੀ ਹੋ ਗਏ। ਉਨ੍ਹਾਂ ਇਸ ਨੂੰ ਵੱਡੀ ਪ੍ਰਾਪਤੀ ਕਰਾਰ ਦਿੱਤਾ ਹੈ। ਸੋਨੂੰ ਨੇ ਇਸ ਬਾਰੇ ਤਸਵੀਰ ਟਵੀਟ ਕੀਤੀ ਅਤੇ ਲਿਖਿਆ, ''ਇਹ ਜ਼ਿੰਦਗੀ ਦੀ ਹੁਣ ਤਕ ਦੀ ਵੱਡੀ ਪ੍ਰਾਪਤੀ ਹੈ। ਮੇਰੀ ਮਾਂ ਦੇ ਨਾਂ 'ਤੇ ਸੜਕ ਸਮਰਪਤ ਕੀਤੀ ਗਈ ਹੈ।'' ਸੋਨੂੰ ਸੂਦ ਮੁਤਾਬਕ ਸ਼ੁਰੂਆਤੀ ਦਿਨਾਂ 'ਚ ਜਦੋਂ ਉਹ ਮੋਗਾ 'ਚ ਪੜ੍ਹ ਰਹੇ ਸਨ। ਉਦੋਂ ਮਾਂ ਨੂੰ ਇਹੋ ਜਿਹੇ ਕਈ ਬੱਚੇ ਪੜ੍ਹਾਉਂਦੇ ਵੇਖਿਆ ਸੀ, ਜਿਹੜੇ ਫੀਸ ਜਮ੍ਹਾਂ ਨਾ ਕਰਾਉਣ ਕਰ ਕੇ ਪੜ੍ਹਾਈ ਛੱਡ ਕੇ ਬੈਠੇ ਸਨ। ਮਾਂ ਉਨ੍ਹਾਂ ਦੀ ਫ਼ੀਸ ਤਾਰਦੀ ਸੀ, ਖ਼ੁਦ ਪੜ੍ਹਾਉਂਦੀ ਹੁੰਦੀ ਸੀ।
ਮਾਂ ਕਵਿਤਾਵਾਂ ਲਿਖ ਕੇ ਭੇਜਦੀ ਸੀ
ਸੋਨੂੰ ਸੂਦ ਨੇ ਕਿਤਾਬ 'ਚ ਉਨ੍ਹਾਂ ਪਲਾਂ ਦਾ ਖ਼ਾਸ ਜ਼ਿਕਰ ਕੀਤਾ ਕਿ ਜਦੋਂ ਮੁੰਬਈ 'ਚ ਕੰਮ ਦੀ ਭਾਲ ਕਰ ਰਹੇ ਸਨ। ਇੰਜੀਨੀਅਰਿੰਗ ਕਰਨ ਮਗਰੋਂ ਇਕੱਲਾ ਪੁੱਤ ਹੋਣ ਸਦਕਾ ਰਿਸ਼ਤੇਦਾਰ ਮਾਂ ਨੂੰ ਆਖਦੇ ਸਨ ਕਿ ਇੰਜੀਨੀਰਿੰਗ ਕਰ ਲਈ ਹੈ, ਘਰ ਸੱਦ ਲਓ, ਇਹ ਕਿਹੜਾ ਹੀਰੋ ਬਣ ਜਾਵੇਗਾ। ਜਦਕਿ ਮਾਂ ਪ੍ਰੋ. ਸਰੋਜ ਆਖਦੀ ਸੀ ਕਿ ਸੋਨੂੰ ਤਾਂ ਖ਼ੁਦਾ ਦਾ ਬੰਦਾ ਹੈ, ਜਿਹੜੇ ਮਕਸਦ ਨਾਲ ਗਿਆ ਹੈ, ਜ਼ਰੂਰ ਪੂਰਾ ਹੋਵੇਗਾ। ਸੋਨੂੰ ਸੂਦ ਮੁਤਾਬਕ ਓਨ੍ਹੀਂ ਦਿਨੀਂ ਮਾਂ ਖ਼ਾਸ ਤੌਰ 'ਤੇ ਕਵਿਤਾਵਾਂ ਲਿਖ ਕੇ ਭੇਜਦੀ ਸੀ ਤੇ ਸੰਘਰਸ਼ ਕਰਨ ਲਈ ਉਤਸ਼ਾਹਤ ਕਰਦੀ ਸੀ।
ਨੋਟ - ਇਸ ਖ਼ਬਰ ਬਾਰੇ ਤੁਹਾਡੀ ਕੀ ਹੈ ਰਾਏ, ਕੁਮੈਂਟ ਬਾਕਸ ਵਿਚ ਜ਼ਰੂਰ ਦੱਸੋ।
ਰਣਬੀਰ ਕਪੂਰ ਅਤੇ ਬੌਬੀ ਦਿਓਲ ਦੀ 'Animal' ਦਾ ਪ੍ਰੋਮੋ ਰਿਲੀਜ਼ (ਵੀਡੀਓ)
NEXT STORY 
