ਵਾਸ਼ਿੰਗਟਨ (ਇੰਟ.)– ਅਮਰੀਕੀ ਜਸਟਿਸ ਡਿਪਾਰਟਮੈਂਟ ਨੇ ਜੈਫਰੀ ਐਪਸਟੀਨ ਸੈਕਸ ਸਕੈਂਡਲ ਨਾਲ ਜੁੜੀਆਂ ਨਵੀਆਂ ਫਾਈਲਾਂ ਜਾਰੀ ਕੀਤੀਆਂ ਹਨ। ਇਨ੍ਹਾਂ ਦਸਤਾਵੇਜ਼ਾਂ ਵਿਚ ਦੱਸਿਆ ਗਿਆ ਹੈ ਕਿ ਐਪਸਟੀਨ ਨਾਬਾਲਗ ਲੜਕੀਆਂ ਦਾ ਰੋਜ਼ਾਨਾ ਕਈ ਵਾਰ ਜਿਨਸੀ ਸ਼ੋਸ਼ਣ ਕਰਦਾ ਸੀ।
‘ਡੇਲੀ ਮੇਲ’ ਮੁਤਾਬਕ ਇਹ ਖੁਲਾਸਾ 2010 ’ਚ ਫਲੋਰੀਡਾ ਵਿਚ ਇਕ ਪੀੜਤਾ ਵੱਲੋਂ ਦਾਖਲ ਸਿਵਲ ਸ਼ਿਕਾਇਤ ਵਿਚ ਹੋਇਆ ਹੈ, ਜਿਸ ਦਾ ਜ਼ਿਕਰ ਇਨ੍ਹਾਂ ਫਾਈਲਾਂ ਵਿੱਚ ਹੈ। ਇਸ ਤੋਂ ਇਲਾਵਾ ਕੁਝ ਤਸਵੀਰਾਂ ਵਿਚ ਬ੍ਰਿਟਿਸ਼ ਪ੍ਰਿੰਸ ਐਂਡਰਿਊ ਨੂੰ ਜ਼ਮੀਨ ’ਤੇ ਲੇਟੀ ਇਕ ਲੜਕੀ ਦੇ ਉੱਪਰ ਹੱਥ ਰੱਖੇ ਦਿਖਾਇਆ ਗਿਆ ਹੈ। ਇਨ੍ਹਾਂ ਫਾਈਲਾਂ ਵਿਚ ਪਹਿਲੀ ਵਾਰ ਭਾਰਤੀ ਫਿਲਮ ਡਾਇਰੈਕਟਰ ਮੀਰਾ ਨਾਇਰ ਅਤੇ ਟੈਸਲਾ ਦੇ ਸੀ. ਈ. ਓ. ਐਲਨ ਮਸਕ ਦਾ ਨਾਂ ਵੀ ਆਇਆ ਹੈ। ਮੀਰਾ ਨਾਇਰ ਨਿਊਯਾਰਕ ਸਿਟੀ ਦੇ ਮੇਅਰ ਜੋਹਰਾਨ ਮਮਦਾਨੀ ਦੀ ਮਾਂ ਹੈ।
ਟ੍ਰੰਪ ਪ੍ਰਸ਼ਾਸਨ ਪਿਛਲੇ ਕੁਝ ਸਮੇਂ ਤੋਂ ਅਦਾਲਤ ਦੇ ਹੁਕਮਾਂ ਤੋਂ ਬਾਅਦ ਜਿਨਸੀ ਅਪਰਾਧੀ ਜੈਫਰੀ ਐਪਸਟੀਨ ਨਾਲ ਜੁੜੇ ਦਹਾਕਿਆਂ ਪੁਰਾਣੇ ਸਰਕਾਰੀ ਰਿਕਾਰਡ ਜਨਤਕ ਕਰ ਰਿਹਾ ਹੈ। ਹੁਣ ਜਾਰੀ ਹੋਈਆਂ ਨਵੀਆਂ ਫਾਈਲਾਂ ਵਿਚ 30 ਲੱਖ ਸਫੇ, 1 ਲੱਖ 80 ਹਜ਼ਾਰ ਤਸਵੀਰਾਂ ਅਤੇ 2 ਹਜ਼ਾਰ ਤੋਂ ਵੱਧ ਵੀਡੀਓ ਸ਼ਾਮਲ ਹਨ। ਅਮਰੀਕੀ ਹਾਊਸ ਓਵਰਸਾਈਟ ਕਮੇਟੀ ਵੱਲੋਂ ਜਾਰੀ ਕੀਤੀ ਗਈ ਇਕ ਬਿਨਾਂ ਤਰੀਕ ਵਾਲੀ ਤਸਵੀਰ ਵਿਚ ਜੈਫਰੀ ਐਪਸਟੀਨ ਕੁਝ ਮੁਟਿਆਰਾਂ ਨਾਲ ਨਜ਼ਰ ਆ ਰਿਹਾ ਹੈ। ਇਹ ਤਸਵੀਰ ਦਸੰਬਰ ਵਿਚ ਜਾਰੀ ਹੋਈ ਸੀ।
ਲੜਕੀਆਂ ਨੂੰ ਆਪਸੀ ਸਰੀਰਕ ਸਬੰਧ ਬਣਾਉਣ ਲਈ ਕੀਤਾ ਜਾਂਦਾ ਸੀ ਮਜਬੂਰ
ਦਸਤਾਵੇਜ਼ਾਂ ਮੁਤਾਬਕ ਜਦੋਂ ਕੋਈ ਲੜਕੀ ਐਪਸਟੀਨ ਦੇ ਪਾਮ ਬੀਚ ਸਥਿਤ ਘਰ ਪਹੁੰਚਦੀ ਸੀ ਤਾਂ ਉਸ ਨੂੰ ਐਪਸਟੀਨ ਦੀ ਨਿੱਜੀ ਗੱਡੀ ਵਿਚ ਲਿਆਂਦਾ ਜਾਂਦਾ ਸੀ। ਘਰ ਪਹੁੰਚਣ ’ਤੇ ਇਕ ਸਹਾਇਕ ਲੜਕੀ ਦੀ ਨਿੱਜੀ ਜਾਣਕਾਰੀ ਨੋਟ ਕਰਦਾ ਸੀ। ਇਸ ਤੋਂ ਬਾਅਦ ਉਸ ਨੂੰ ਪੌੜੀਆਂ ਰਾਹੀਂ ਉੱਪਰ ਇਕ ਅਜਿਹੇ ਕਮਰੇ ਵਿਚ ਲਿਜਾਇਆ ਜਾਂਦਾ ਸੀ, ਜਿੱਥੇ ਸ਼ਾਵਰ ਤੇ ਮਸਾਜ ਟੇਬਲ ਹੁੰਦਾ ਸੀ। ਜੇਕਰ ਲੜਕੀ ਪਹਿਲੀ ਵਾਰ ਆਈ ਹੁੰਦੀ ਸੀ ਤਾਂ ਕਮਰੇ ਵਿਚ ਪਹਿਲਾਂ ਤੋਂ ਇਕ ਹੋਰ ਲੜਕੀ ਮੌਜੂਦ ਹੁੰਦੀ ਸੀ, ਜੋ ਉਸ ਨੂੰ ਦੱਸਦੀ ਸੀ ਕਿ ਕੀ ਕਰਨਾ ਹੈ। ਇਸ ਤੋਂ ਬਾਅਦ ਐਪਸਟੀਨ ਉਸ ਦੂਜੀ ਲੜਕੀ ਨੂੰ ਬਾਹਰ ਭੇਜ ਦਿੰਦਾ ਸੀ।
ਐਪਸਟੀਨ ਲੜਕੀਆਂ ਨੂੰ ਸਾਫ਼-ਸਾਫ਼ ਦੱਸਦਾ ਸੀ ਕਿ ਉਸ ਨੂੰ ਕੀ ਚਾਹੀਦਾ ਹੈ ਅਤੇ ਕਿਵੇਂ ਚਾਹੀਦਾ ਹੈ। ਕਈ ਵਾਰ ਉਹ ਲੜਕੀਆਂ ਨੂੰ ਇਕ-ਦੂਜੇ ਨਾਲ ਸਰੀਰਕ ਸਬੰਧ ਬਣਾਉਣ ਲਈ ਮਜਬੂਰ ਕਰਦਾ ਸੀ। ਸ਼ਿਕਾਇਤ ਦਰਜ ਕਰਵਾਉਣ ਵਾਲੀ ਲੜਕੀ ਨੇ ਦੱਸਿਆ ਕਿ ਉਸ ਦੀ ਪਛਾਣ ਐਪਸਟੀਨ ਨਾਲ 15 ਸਾਲ ਦੀ ਉਮਰ ਵਿਚ ਕਰਵਾਈ ਗਈ ਸੀ। ਹਰ ਵਾਰ ਸ਼ੋਸ਼ਣ ਤੋਂ ਬਾਅਦ ਐਪਸਟੀਨ ਉਸ ਨੂੰ 200 ਡਾਲਰ ਦਿੰਦਾ ਸੀ ਅਤੇ ਕਿਸੇ ਸਹਾਇਕ ਰਾਹੀਂ ਘਰੋਂ ਬਾਹਰ ਭੇਜ ਦਿੰਦਾ ਸੀ।
ਐਪਸਟੀਨ ਨਾਲ ਸਬੰਧਾਂ ’ਤੇ ਪਛਤਾਵਾ ਜਤਾ ਚੁੱਕੇ ਹਨ ਬਿਲ ਗੇਟਸ–
ਬਿਲ ਗੇਟਸ ਪਹਿਲਾਂ ਕਹਿ ਚੁੱਕੇ ਹਨ ਕਿ ਉਨ੍ਹਾਂ ਨੂੰ ਐਪਸਟੀਨ ਨਾਲ ਆਪਣੇ ਸਬੰਧਾਂ ’ਤੇ ਪਛਤਾਵਾ ਹੈ। ਹਾਲਾਂਕਿ ਉਨ੍ਹਾਂ ਕਿਸੇ ਵੀ ਤਰ੍ਹਾਂ ਦੀਆਂ ਗਲਤ ਸਰਗਰਮੀਆਂ ਤੋਂ ਇਨਕਾਰ ਕੀਤਾ ਹੈ। 2019 ਵਿਚ ਉਨ੍ਹਾਂ ਕਿਹਾ ਸੀ ਕਿ ਉਨ੍ਹਾਂ ਦਾ ਐਪਸਟੀਨ ਨਾਲ ਕੋਈ ਕਾਰੋਬਾਰੀ ਜਾਂ ਨਿੱਜੀ ਸਬੰਧ ਨਹੀਂ ਸੀ ਪਰ ‘ਨਿਊਯਾਰਕ ਟਾਈਮਜ਼’ ਤੇ ‘ਵਾਲ ਸਟਰੀਟ ਜਰਨਲ’ ਦੀਆਂ ਰਿਪੋਰਟਾਂ ਵਿਚ ਦਾਅਵਾ ਕੀਤਾ ਗਿਆ ਕਿ ਗੇਟਸ ਨੇ 2011 ਤੋਂ 2013 ਵਿਚਾਲੇ ਐਪਸਟੀਨ ਨਾਲ ਕਈ ਵਾਰ ਮੁਲਾਕਾਤ ਕੀਤੀ। ਬਿਲ ਤੇ ਮੇਲਿੰਡਾ ਗੇਟਸ ਦਾ 2021 ਵਿਚ ਤਲਾਕ ਹੋ ਗਿਆ ਸੀ। ਮੇਲਿੰਡਾ ਨੇ ਬਾਅਦ ਵਿਚ ਕਿਹਾ ਸੀ ਕਿ ਗੇਟਸ ਦੇ ਅਫੇਅਰਸ ਅਤੇ ਐਪਸਟੀਨ ਨਾਲ ਸਬੰਧ ਉਨ੍ਹਾਂ ਦੇ ਤਲਾਕ ਦੀ ਵੱਡੀ ਵਜ੍ਹਾ ਬਣੇ।
2005 ’ਚ ਦਰਜ ਹੋਈ ਸੀ ਪਹਿਲੀ ਸ਼ਿਕਾਇਤ–
ਇਸ ਦੀ ਸ਼ੁਰੂਆਤ 2005 ਵਿਚ ਉਸ ਵੇਲੇ ਹੋਈ ਜਦੋਂ ਫਲੋਰੀਡਾ ਵਿਚ ਇਕ 14 ਸਾਲਾ ਲੜਕੀ ਦੀ ਮਾਂ ਨੇ ਪੁਲਸ ਕੋਲ ਸ਼ਿਕਾਇਤ ਦਰਜ ਕਰਵਾਈ। ਇਸ ਵਿਚ ਕਿਹਾ ਗਿਆ ਕਿ ਐਪਸਟੀਨ ਦੇ ਆਲੀਸ਼ਾਨ ਘਰ ਵਿਚ ਉਸ ਦੀ ਬੇਟੀ ਨੂੰ ‘ਮਸਾਜ’ ਦੇ ਬਹਾਨੇ ਬੁਲਾਇਆ ਗਿਆ ਸੀ ਪਰ ਉੱਥੇ ਪਹੁੰਚਣ ਤੋਂ ਬਾਅਦ ਉਸ ’ਤੇ ਸਰੀਰਕ ਸਬੰਧ ਬਣਾਉਣ ਲਈ ਦਬਾਅ ਪਾਇਆ ਗਿਆ। ਜਦੋਂ ਉਸ ਨੇ ਘਰ ਵਾਪਸ ਆ ਕੇ ਇਹ ਗੱਲ ਆਪਣੇ ਮਾਪਿਆਂ ਨੂੰ ਦੱਸੀ ਤਾਂ ਉਨ੍ਹਾਂ ਤੁਰੰਤ ਪੁਲਸ ਕੋਲ ਸ਼ਿਕਾਇਤ ਕੀਤੀ। ਉਸ ਵੇਲੇ ਪਹਿਲੀ ਵਾਰ ਜੈਫਰੀ ਐਪਸਟੀਨ ਖਿਲਾਫ ਅਧਿਕਾਰਤ ਸ਼ਿਕਾਇਤ ਦਰਜ ਹੋਈ। ਪੁਲਸ ਜਾਂਚ ਦੌਰਾਨ ਇਹ ਸਾਹਮਣੇ ਆਇਆ ਕਿ ਇਹ ਕੋਈ ਇਕੱਲਾ ਮਾਮਲਾ ਨਹੀਂ ਸੀ।
ਹੌਲੀ-ਹੌਲੀ ਲੱਗਭਗ 50 ਨਾਬਾਲਗ ਲੜਕੀਆਂ ਦੀ ਪਛਾਣ ਹੋਈ, ਜਿਨ੍ਹਾਂ ਨੇ ਐਪਸਟੀਨ ’ਤੇ ਅਜਿਹੇ ਹੀ ਇਲਜ਼ਾਮ ਲਾਏ। ਪਾਮ ਬੀਚ ਪੁਲਸ ਵਿਭਾਗ ਨੇ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲਿਆ ਅਤੇ ਕਈ ਮਹੀਨਿਆਂ ਤੱਕ ਛਾਣਬੀਣ ਕੀਤੀ। ਇਸ ਤੋਂ ਬਾਅਦ ਐਪਸਟੀਨ ਦੇ ਖਿਲਾਫ ਅਪਰਾਧਕ ਜਾਂਚ ਸ਼ੁਰੂ ਹੋਈ। ਜੈਫਰੀ ਐਪਸਟੀਨ ਨਿਊਯਾਰਕ ਦਾ ਕਰੋੜਪਤੀ ਫਾਇਨਾਂਸਰ ਸੀ। ਉਸ ਦੀ ਵੱਡੇ ਨੇਤਾਵਾਂ ਤੇ ਸੈਲੀਬ੍ਰਿਟੀਜ਼ ਨਾਲ ਦੋਸਤੀ ਸੀ।
ਅਮਰੀਕਾ 'ਚ ਪਰੇਡ ਦੌਰਾਨ ਗੋਲੀਬਾਰੀ: 6 ਲੋਕ ਜ਼ਖਮੀ, ਸ਼ੱਕੀ ਵਿਅਕਤੀ ਨੂੰ ਹਿਰਾਸਤ 'ਚ ਲਿਆ
NEXT STORY 
