ਇੰਟਰਨੈਸ਼ਨਲ ਡੈਸਕ : ਆਮ ਤੌਰ 'ਤੇ ਲੋਕ ਦੂਜਿਆਂ ਦੇ ਘਰਾਂ ਦੀਆਂ ਖ਼ਬਰਾਂ ਰੱਖਣ ਜਾਂ ਮੁਹੱਲੇ ਦੀਆਂ ਚੁਗਲੀਆਂ ਕਰਨ ਨੂੰ ਸਮੇਂ ਦੀ ਬਰਬਾਦੀ ਜਾਂ ਫਾਲਤੂ ਟਾਈਮਪਾਸ ਮੰਨਦੇ ਹਨ ਪਰ ਕੋਲੰਬੀਆ ਦੇ ਆਰਮੇਨੀਆ ਸ਼ਹਿਰ ਦੀ ਰਹਿਣ ਵਾਲੀ ਇੱਕ 67 ਸਾਲਾ ਬਜ਼ੁਰਗ ਔਰਤ ਨੇ ਇਸ ਚੁਗਲੀ ਕਰਨ ਦੀ ਆਦਤ ਨੂੰ ਇੱਕ ਅਜਿਹੇ ਮੁਨਾਫ਼ੇ ਵਾਲੇ ਕਾਰੋਬਾਰ (ਸਟਾਰਟਅੱਪ) ਵਿੱਚ ਬਦਲ ਦਿੱਤਾ ਹੈ ਕਿ ਵੱਡੇ-ਵੱਡੇ ਕਾਰੋਬਾਰੀ ਵੀ ਹੈਰਾਨ ਹਨ। ਇਸ ਮਹਿਲਾ ਨੇ ਗੁਆਂਢੀਆਂ ਦੇ ਰਾਜ਼ ਅਤੇ ਚੁਗਲੀਆਂ ਵੇਚ ਕੇ ਹੋਈ ਕਮਾਈ ਨਾਲ ਦੋ ਆਲੀਸ਼ਾਨ ਮਕਾਨ ਖਰੀਦ ਲਏ ਹਨ।
ਗਲਫ਼ ਟੂਡੇ ਦੀ ਇੱਕ ਰਿਪੋਰਟ ਦੇ ਮੁਤਾਬਕ 67 ਸਾਲਾ ਮਿਰਯਮ ਦਾ ਇਹ ਅਨੋਖਾ ਕਾਰੋਬਾਰ ਅੱਜ-ਕੱਲ੍ਹ ਸੋਸ਼ਲ ਮੀਡੀਆ 'ਤੇ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਮਿਰਯਮ ਰੋਜ਼ਾਨਾ ਆਪਣੇ ਘਰ ਦੇ ਬਾਹਰ ਕੁਰਸੀ ਡਾਹ ਕੇ ਬੈਠ ਜਾਂਦੀ ਹੈ ਅਤੇ ਪੂਰੇ ਮੁਹੱਲੇ ਦੀ ਹਰ ਹਲਚਲ 'ਤੇ ਤਿੱਖੀ ਨਜ਼ਰ ਰੱਖਦੀ ਹੈ। ਕਿਸ ਦੇ ਘਰ ਕੀ ਪੱਕ ਰਿਹਾ ਹੈ, ਕਿਸ ਦਾ ਕਿਸ ਨਾਲ ਝਗੜਾ ਹੋਇਆ, ਜਾਂ ਕੌਣ ਕਿਸ ਨੂੰ ਲੁਕ-ਛਿਪ ਕੇ ਮਿਲ ਰਿਹਾ ਹੈ—ਇਨ੍ਹਾਂ ਸਾਰੀਆਂ ਗੱਲਾਂ ਦੀ ਪਲ-ਪਲ ਦੀ ਖ਼ਬਰ ਮਿਰਯਮ ਕੋਲ ਹੁੰਦੀ ਹੈ।
ਮਿਰਯਮ ਖ਼ੁਦ ਨੂੰ ਬੜੇ ਮਾਣ ਨਾਲ ਇੱਕ ਪੇਸ਼ੇਵਰ 'ਚਿਸਮੋਸਾ' (ਗੌਸਿਪ ਕਵੀਨ) ਕਹਿੰਦੀ ਹੈ। ਮੁਹੱਲੇ ਦੇ ਲੋਕ ਜਦੋਂ ਵੀ ਕਿਸੇ ਦੂਜੇ ਗੁਆਂਢੀ ਬਾਰੇ ਕੋਈ ਚਟਪਟੀ ਖ਼ਬਰ ਜਾਣਨਾ ਚਾਹੁੰਦੇ ਹਨ, ਤਾਂ ਉਹ ਸਿੱਧੇ ਮਿਰਯਮ ਕੋਲ ਆਉਂਦੇ ਹਨ। ਮਿਰਯਮ ਵੀ ਕੋਈ ਜਾਣਕਾਰੀ ਮੁਫ਼ਤ ਵਿੱਚ ਸਾਂਝੀ ਨਹੀਂ ਕਰਦੀ। ਛੋਟੀਆਂ-ਮੋਟੀਆਂ ਖ਼ਬਰਾਂ ਲਈ ਉਹ 5,000 ਤੋਂ 10,000 ਕੋਲੰਬੀਅਨ ਪੇਸੋ (ਲਗਭਗ 150 ਤੋਂ 300 ਭਾਰਤੀ ਰੁਪਏ) ਵਸੂਲਦੀ ਹੈ। ਵੱਡੇ ਰਾਜ਼ ਵੇਚਣ ਲਈ ਕੀਮਤ ਵੀ ਕਾਫ਼ੀ ਭਾਰੀ ਹੁੰਦੀ ਹੈ। ਮਿਰਯਮ ਨੇ ਦੱਸਿਆ ਕਿ ਇੱਕ ਵਿਅਕਤੀ ਆਪਣੀ ਪਤਨੀ ਦੇ ਬਾਹਰ ਜਾਣ 'ਤੇ ਉਸ ਨੂੰ ਧੋਖਾ ਦਿੰਦਾ ਸੀ। ਇਸ ਵੱਡੇ ਰਾਜ਼ ਨੂੰ ਗੁਪਤ ਰੱਖਣ ਦੇ ਬਦਲੇ ਮਿਰਯਮ ਨੇ ਉਸ ਵਿਅਕਤੀ ਕੋਲੋਂ 7 ਲੱਖ ਕੋਲੰਬੀਅਨ ਪੇਸੋ (ਲਗਭਗ 21,000 ਭਾਰਤੀ ਰੁਪਏ) ਲਏ ਸਨ।
ਮਿਰਯਮ ਦਾ ਕੰਮ ਕਰਨ ਦਾ ਤਰੀਕਾ ਬਿਲਕੁਲ ਪੇਸ਼ੇਵਰ ਪੱਤਰਕਾਰਾਂ ਵਰਗਾ ਹੈ। ਉਸ ਕੋਲ ਇੱਕ ਖ਼ਾਸ ਨੋਟਬੁੱਕ ਹੈ, ਜਿਸ ਵਿੱਚ ਉਹ ਹਰ ਘਟਨਾ ਦੀ ਤਾਰੀਖ਼ ਅਤੇ ਸਮੇਂ ਦੇ ਨਾਲ ਚੁਗਲੀਆਂ ਨੋਟ ਕਰਦੀ ਹੈ। ਇਸ ਤੋਂ ਇਲਾਵਾ ਉਸ ਦੇ ਘਰ ਦੇ ਅੰਦਰ ਇੱਕ 'ਗੌਸਿਪ ਬੋਰਡ' ਵੀ ਲੱਗਾ ਹੋਇਆ ਹੈ, ਜਿੱਥੇ ਤਸਵੀਰਾਂ, ਕਾਗਜ਼ਾਂ ਅਤੇ ਧਾਗਿਆਂ ਦੀ ਮਦਦ ਨਾਲ ਗੁਆਂਢੀਆਂ ਦੇ ਗੁਪਤ ਸਬੰਧਾਂ ਅਤੇ ਰਾਜ਼ਾਂ ਦੇ ਤਾਣੇ-ਬਾਣੇ ਨੂੰ ਜੋੜਿਆ ਗਿਆ ਹੈ। ਹਾਲਾਂਕਿ, ਇਸ ਅਨੋਖੀ ਹਰਕਤ ਕਾਰਨ ਮੁਹੱਲੇ ਦੇ ਕਈ ਗੁਆਂਢੀ ਉਸ ਨਾਲ ਨਾਰਾਜ਼ ਰਹਿੰਦੇ ਹਨ, ਪਰ ਫਿਰ ਵੀ ਜਦੋਂ ਕਿਸੇ ਨੂੰ ਕੋਈ ਖ਼ਬਰ ਚਾਹੀਦੀ ਹੁੰਦੀ ਹੈ, ਤਾਂ ਉਹ ਮਿਰਯਮ ਦੇ ਦਰਵਾਜ਼ੇ 'ਤੇ ਹੀ ਪਹੁੰਚਦਾ ਹੈ।
ਟਰੰਪ ਨੇ ਇਰਾਨ ਦੇ ਨਕਸ਼ੇ ’ਤੇ ਲਾਈ ਆਪਣੀ ਫੋਟੋ
NEXT STORY 
